Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Julai 2015

Yu Ting Em i Bikpela Samting Long Ol Man i Lukim Wok Yu Mekim?

Yu Ting Em i Bikpela Samting Long Ol Man i Lukim Wok Yu Mekim?

BESALEL na Oholiap i save gut long wok bilong sanapim ol haus. Ol i bin i stap sleiv long Isip na ol i wokim planti brik. Tasol ol i lusim Isip inap planti yia i go pinis. Nau ol i go pas long wokim haus lotu sel na ol bai kamap saveman tru bilong wokim olkain gutpela gutpela samting. (Kis. 31:1-11) Tasol i no olgeta man bai lukim ol gutpela samting ol i wokim. Yu ting bai ol i bel hevi? Yu ting em i bikpela long ol man i lukim wok ol i mekim? Olsem wanem long yu? Yu ting em i bikpela samting long ol man i lukim wok yu mekim?

WAN WAN MAN TASOL I LUKIM

Sampela samting long haus lotu sel em ol samting ol saveman tasol inap wokim. Tingim 2-pela ensel ol i wokim long gol na ol i sanap antap long bokis kontrak. Aposel Pol i tok ol i “naispela tru.” (Hib. 9:5) Tru tumas! Ol i bin wokim gut ol piksa bilong dispela 2-pela ensel!—Kis. 37:7-9.

Long nau, sapos ol i painim ol samting em Besalel na Oholiap i wokim, ol inap putim insait long ol nambawan musium na planti man inap lukim ol dispela samting. Tasol taim tupela i wokim ol dispela naispela samting, hamas man i lukim ol dispela samting? Ol ensel gol i stap insait long Rum Tambu Tru, olsem na hetpris tasol bai lukim taim em i go insait 1-pela taim tasol long olgeta yia—long Bikpela De Bilong God i Tekewe Sin Bilong Ol Manmeri. (Hib. 9:6, 7) Olsem na i no gat planti man i lukim ol dispela samting.

BELGUT MASKI OL MAN I NO LITIMAPIM NEM BILONG YU

Sapos yu Besalel o Oholiap na yu wok hat tru long wokim ol naispela samting na yu save olsem wan wan man tasol bai lukim ol dispela samting, bai yu pilim olsem wanem? Long nau, taim ol wanlain i litimapim nem bilong wanpela man, em bai pilim olsem em i mekim gutpela wok tru. Tasol ol wokman bilong Jehova i narapela kain. Olsem Besalel na Oholiap, yumi save belgut taim yumi mekim laik bilong Jehova na em i orait long yumi.

Long taim bilong Jisas, ol bikman bilong lotu i mekim olkain beten ol man bai kirap nogut long en. Tasol Jisas i tok yumi mas holim stretpela tingting taim yumi beten, na no ken bihainim pasin we bai kirapim ol man long litimapim nem bilong yumi. Taim yumi mekim olsem, “Papa bilong [yumi] husat  i stap long ples hait na lukim [yumi], em bai givim pe long [yumi].” (Mat. 6:5, 6) Yumi no ken tingting tumas long ol man bai pilim olsem wanem long beten bilong yumi. Mobeta yumi tingting long Jehova bai pilim olsem wanem long beten bilong yumi. Sapos God i orait long beten bilong yumi, dispela bai makim olsem beten bilong yumi i gutpela tru. Yumi mas holim wankain tingting long ol narapela samting yumi mekim long wok bilong God. Yumi no ken tingting long kisim biknem long ai bilong ol man, nogat. Mobeta yumi kisim biknem long ai bilong Jehova, long wanem, em “i stap long ples hait na lukim” ol wok yumi mekim.

Taim ol i wokim pinis haus lotu sel, klaut “i karamapim haus sel . . . na bikpela lait bilong [God] i pulapim haus.” (Kis. 40:34) Dispela i soim klia olsem Jehova i orait long dispela haus sel! Yu ting Besalel na Oholiap i pilim olsem wanem? Ol i no raitim nem bilong ol long ol samting ol i wokim, tasol ating ol i belgut olsem God i blesim olgeta wok bilong ol. (Snd. 10:22) Inap planti yia bihain, ating tupela i amamas tru long lukim olsem lain Israel i yusim haus lotu sel long lotuim Jehova. Taim Besalel na Oholiap i kirap bek long nupela taim, ol bai amamas tru long save olsem lain Israel i mekim lotu i tru long haus lotu sel inap olsem 500 yia!

Maski yu daunim yu yet na yu amamas long mekim wok na i no gat man i lukim, Jehova i lukim yu!

Long oganaisesen bilong Jehova long nau, ol lain i mekim wok olsem droim ol katun piksa, pilaim musik, kisim ol poto, tanim tok, na raitim buk samting, nem bilong ol i no stap long ol dispela samting. I olsem i no gat man i “lukim” wok ol i mekim. Dispela i wankain tu long wok ol i mekim long 110,000 kongrigesen long olgeta hap bilong graun. Husat i save lukim akaun sevan taim em i stretim ol pepa long pinis bilong mun? Husat i save lukluk i stap taim seketeri bilong kongrigesen i stretim ripot bilong autim tok? Husat i save lukim brata o sista i stretim samting i bagarap long Haus Kingdom?

Taim Besalel na Oholiap i dai, ol i no gat bilas gol o medal o hap plang i gat nem bilong ol bilong soim olsem ol i saveman tru bilong wokim ol naispela samting. Tasol ol i kisim wanpela samting i dia tumas—ol i kisim gutnem long ai bilong Jehova, na em i orait long ol. Yumi bilip olsem Jehova i lukim wok bilong ol. Yumi tu i ken bihainim pasin bilong tupela na daunim yumi yet na amamas long mekim wok bilong God.