Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Epril 2015

Trastim Jehova Long Olgeta Taim!

Trastim Jehova Long Olgeta Taim!

“Yupela ol lain bilong mi, oltaim yupela i mas bilip long God.”—SNG. 62:8.

1-3. Wanem samting i kamap na i strongim pasin bilong Pol long trastim Jehova? (Lukim piksa long kirap bilong stadi.)

SAPOS yu bin i stap long Rom long bipo na yu wanpela Kristen, yu bai bungim bikpela hevi. Taim taun Rom i paia long 64 C.E., ol manmeri i sutim tok long ol Kristen, na tu, ol i sutim tok olsem ol Kristen i save heitim ol narapela, olsem na ol i mekim nogut tru long ol Kristen. Sapos yu stap Kristen long dispela taim, long olgeta de yu bai pret, long wanem, ol birua inap arestim yu na mekim nogut long yu. Ating ol birua i larim ol animal i brukbrukim bodi bilong sampela bratasista na kilim ol i dai, na ating ol i nilim sampela long diwai pos na kukim long paia na bodi bilong ol i mekim paia i lait inap long nait olgeta.

2 Ating ol dispela hevi i wok long kamap taim ol i kalabusim aposel Pol long Rom long namba 2 taim. Yu ting ol narapela Kristen bai i kam helpim em? Ating Pol i bin tingting planti long dispela samting, olsem na em i raitim pas i go long Timoti na i tok: “Long namba 1 taim mi sanap long kot, i no gat wanpela i kam long sait bilong mi, nogat, olgeta i lusim mi. God i no ken kotim ol long dispela samting.” Maski i olsem, Pol i bin kisim sampela helpim. Em i tok moa: “Bikpela i bin sambai long mi na givim strong long mi.” Yes, Jehova i yusim Jisas  long givim strong long Pol. Olsem na Pol i tok: “Bikpela i bin kisim bek mi long maus bilong laion.”—2 Tim. 4:16, 17. *

3 Taim Pol i tingim bek dispela samting, ating dispela i helpim em long bilip olsem Jehova bai strongim em long karim ol hevi i painim em long dispela taim, na ol hevi bai kamap bihain. Pol i tok: “Bikpela bai kisim bek mi long olgeta wok nogut.” (2 Tim. 4:18) Pol i save olsem taim ol narapela i no inap helpim yumi, Jehova na Jisas bai helpim yumi!

SOIM OLSEM YU TRASTIM JEHOVA

4, 5. (a) Husat i stap redi oltaim long helpim yu? (b) Olsem wanem yu inap strongim pasin bilong yu long pas gut wantaim Jehova?

4 Olsem wanem? Sampela taim yu pilim olsem yu stap wanpis na yu no inap stretim wanpela bikpela hevi? Ating yu no gat wok mani, na yu kisim presa long skul, bikpela sik i painim yu, o narapela bikpela hevi i painim yu. Ating yu askim ol narapela long helpim yu, tasol ol i no gat rot long helpim yu long samting yu nidim, na dispela i mekim yu bel hevi. Yumi save olsem ol man nating i no inap tru long stretim sampela hevi. Long kain taim olsem, yu ting i stret long bihainim skultok bilong Baibel long “bilip strong long Bikpela,” olsem trastim em? (Snd. 3:5, 6) Yu ting dispela skultok inap helpim yumi? Yes, em inap tru long helpim yumi! Olsem planti stori bilong Baibel i kamapim, God i stap tru na em inap helpim yumi.

5 Taim ol narapela i no gat rot long helpim yumi, orait yumi no ken bel hevi. Mobeta yumi holim wankain tingting olsem aposel Pol i bin mekim—ol hevi i opim rot long yumi inap soim olsem yumi bilip tru long Jehova, na yumi inap lukim stret ol samting em i mekim bilong helpim yumi. Dispela bai strongim pasin bilong yumi long trastim Jehova, na yumi bai tingim em olsem Man i stap tru.

TRASTIM GOD—PAS GUT WANTAIM EM

6. Bilong wanem i hatwok long yumi bilip long Jehova taim yumi tingting planti long hevi i painim yumi?

6 Sapos yu karim bikpela hevi, yu ting i gat rot long yu inap beten na tokim Jehova long dispela hevi, na yu ting bel bilong yu inap i stap isi taim yu save olsem yu mekim olgeta samting yu inap mekim na yu lusim olgeta narapela samting long han bilong God? Yes, i gat rot long yu inap mekim olsem! (Ritim Song 62:8; 1 Pita 5:7.) Taim yu lain long mekim olsem, dispela bai helpim yu long kisim pasin bilong pas gut wantaim Jehova. Tasol sampela taim i hatwok long bilip olsem Jehova bai givim ol samting yu nidim. Bilong wanem? Wanpela risen em olsem, sampela taim Jehova i no save kirap kwik long bekim beten bilong yumi.—Sng. 13:1, 2; 74:10; 89:46; 90:13; Hab. 1:2.

7. Sampela taim, bilong wanem Jehova i no save bekim kwik ol beten bilong yumi?

7 Bilong wanem Jehova i no save bekim kwik olgeta beten bilong yumi? God i tok, pasin bilong yumi long pas gut wantaim em i kain olsem pasin bilong pikinini long pas gut wantaim papa bilong em. (Sng. 103:13) Pikinini i no inap kisim tingting olsem papa bai givim kwik olgeta samting em i askim long en. Sampela taim, pikinini i no pilim tru samting em i askim long en. Sampela haptaim i mas lus pastaim na bai papa i givim samting em pikinini i askim long en. Sampela samting i no inap helpim pikinini o ol narapela long famili. Na tu, sapos papa i givim kwik olgeta samting em pikinini i laikim, dispela bai mekim na ol i no inap stap olsem papa na pikinini, nogat, pikinini bai i stap olsem bosman na papa bai i stap olsem wokboi. Long wankain pasin, Jehova i laik helpim yumi, olsem na sampela haptaim i mas lus paslain long em i givim samting yumi askim long en. God i gat rait long mekim olsem, long wanem, em i Krieta bilong yumi, em i gutpela Bosman, na em i Papa bilong yumi long heven. Sapos God i givim kwik olgeta samting yumi askim long en, dispela bai bagarapim  pasin pren i stap namel long yumi na God.—Skelim Aisaia 29:16; 45:9.

8. Jehova i save long ol samting yumi no inap mekim, olsem na em i tok promis long mekim wanem?

8 Narapela risen em olsem, Jehova i save long ol samting yumi no inap long mekim. (Sng. 103:14) Olsem na em i no holim tingting olsem yumi inap karim hevi long strong bilong yumi yet, nogat, em i redi long helpim yumi olsem papa i save redi long helpim pikinini. Em tru olsem sampela taim yumi pilim olsem yumi no gat strong moa long karim ol hevi. Jehova i laik bai yumi save olsem em i no inap tru long larim ol wokman bilong em i karim hevi we i winim strong bilong ol. “Em bai wokim rot bilong helpim [yumi].” (Ritim 1 Korin 10:13.) Olsem na i stret long yumi bilip tru olsem Jehova i save bihainim stretpela pasin taim em i larim ol hevi i painim yumi.

9. Yumi mas mekim wanem sapos yumi no kisim kwik bekim bilong ol beten bilong yumi?

9 Taim yumi beten long kisim helpim na yumi no kisim kwik bekim long beten bilong yumi, orait yumi mas bilip na wet long Man husat i save long taim stret bilong helpim yumi. Dispela Man i laik tru long helpim yumi, tasol em tu i bihainim pasin bilong wet. Baibel i tok long Jehova olsem: “Em i God bilong mekim stretpela pasin tasol. Olsem na em i sori long yupela na em i wet long soim marimari bilong em long yupela. Ol manmeri i bilip long Bikpela na i wetim em i helpim ol, ol i ken amamas.”—Ais. 30:18.

“MAUS BILONG LAION”

10-12. (a) Sapos wanpela Kristen i lukautim wanfamili husat i gat bikpela sik, wanem ol samting inap putim bikpela hevi moa long dispela Kristen? (b) Sapos yumi trastim Jehova long taim bilong hevi, olsem wanem dispela inap strongim pasin bilong yumi long pas gut wantaim em? Stori long dispela.

10 Sapos yu bungim bikpela hevi tru, ating yu inap pilim wankain olsem aposel Pol i bin pilim—yu stap insait o klostu tru long “maus bilong laion.” Long dispela kain taim, yu inap pilim olsem i hatwok long trastim Jehova—tasol em i bikpela samting tru long yu mas trastim em. Tingim olsem yu lukautim wanfamili husat i kisim bikpela sik. Ating yu bin beten askim God long strongim yu na givim savetingting bambai yu inap karim dispela hevi. * Taim yu mekim olgeta samting yu inap mekim, yu bai i stap bel isi, long wanem, yu save olsem Jehova i tingim yu na em bai helpim yu long sanap strong yet long bilip.—Sng. 32:8.

11 Ol narapela samting tu inap putim hevi long yu. Ol dokta inap kamapim narapela narapela tingting. Na tu, ol wanfamili i no mekim gut bel bilong yu, nogat, ol i putim bikpela hevi moa long yu. Sapos kain samting olsem i kamap, orait yu mas wok yet long askim Jehova long strongim yu, na wok yet long i go klostu long em. (Ritim 1 Samuel 30:3, 6.) Taim yu kisim helpim, dispela bai kirapim yu long pas gut moa wantaim God.

12 Kain samting olsem i bin kamap long Linda. * Papamama bilong em i lapun na ol i sik, na em i lukautim ol inap sampela yia. Em i tok: “Taim dispela hevi i kamap, mi na man bilong mi, na liklik brata bilong mi, mipela i no save long ol samting mipela bai mekim. Sampela taim, mipela i pilim olsem mipela i no gat rot long kisim helpim. Taim mipela i tingim bek dispela hevi, mipela inap luksave long ol samting Jehova i mekim bilong helpim mipela. Mipela i pilim olsem mipela i no gat rot moa bilong kisim helpim, tasol God i strongim mipela na givim stret ol samting mipela i nidim.”

13. Wanpela sista i trastim Jehova, na olsem wanem dispela i strongim em long karim ol hevi?

13 Sapos yumi trastim tru Jehova, dispela bai helpim yumi taim hevi i painim yumi. Man bilong Rhonda em i no wanpela Witnes, na em i stretim pepa bilong divosim Rhonda. Long wankain  taim, liklik brata bilong Rhonda i kisim sik lupus, em wanpela sik we inap kilim man i dai. Sampela mun bihain, meri bilong brata bilong Rhonda i dai. Taim Rhonda i pilim olsem em i kisim bek strong, em i kirap mekim wok painia oltaim. Bihain liklik, mama bilong em i dai. Olsem wanem Rhonda inap karim dispela hevi? Em i tok: “Long olgeta de, mi save toktok long Jehova na askim em long stiaim mi long olgeta disisen mi mas mekim. Taim mi mekim olsem, mi pilim olsem Jehova em Man i stap tru. Dispela i skulim mi long bilip strong long Jehova, na mi no bilip long strong bilong mi yet na ol narapela manmeri. Mi luksave long ol samting God i mekim bilong helpim mi—em i givim olgeta samting mi nidim. Dispela i mekim na mi pilim olsem mi inap wok gut wantaim Jehova.”

Ol hevi inap kamap insait long famili bilong traim pasin bilong yumi long pas gut wantaim Jehova (Lukim paragraf 14-16)

14. Kristen i mas holim wanem tingting sapos wanblut i raus long kongrigesen?

14 Tingim narapela eksampel. Tingim olsem wanpela wanblut i raus long kongrigesen. Yu bin stadi long Baibel, olsem na yu save pinis long pasin yu mas mekim long ol raus lain. (1 Kor. 5:11; 2 Jon 10) Sampela taim yumi no inap wanbel long disisen em kongrigesen i mekim long rausim wanblut, tasol yumi inap sapotim dispela disisen. * Yu ting yu ken bilip olsem Papa bilong yu long heven bai strongim yu bambai yu inap bihainim stiatok bilong Baibel long sait bilong rausim man long kongrigesen? Yu holim tingting olsem dispela hevi inap opim rot bilong yu long strongim pasin bilong yu long pas gut moa wantaim Jehova?

15. Bilong wanem Adam i sakim tok bilong Jehova long gaden Iden?

15 Tingim namba 1 man Adam. Yu ting tru tru em i bilip olsem em bai stap laip yet maski em i  sakim tok bilong Jehova? Nogat. Baibel i tokim yumi olsem Adam “i no bilipim tok giaman.” (1 Tim. 2:14) Sapos olsem, orait bilong wanem em i sakim tok? Ating Adam i kaikai prut bilong diwai, long wanem, em i laikim tumas meri bilong em. Em i harim tok bilong meri bilong em, na em i no harim tok bilong God bilong em, Jehova.—Stt. 3:6, 17.

16. Husat i mas i stap olsem namba 1 man yumi laikim tru? Bilong wanem?

16 Yu ting dispela i makim olsem yumi no ken laikim ol wanfamili bilong yumi? Nogat! Yumi ken laikim ol, tasol yumi mas laikim Jehova moa yet. (Ritim Matyu 22:37, 38.) Dispela inap helpim tru ol wanfamili, maski ol i mekim wok bilong Jehova long nau, o nogat. Olsem na yu mas strongim tru pasin bilong yu long laikim Jehova na trastim em. Sapos wanblut i raus na yu no amamas long disisen bilong kongrigesen long rausim em, orait beten long Jehova na tokim em long hevi bilong yu. * (Rom 12:12; Fili. 4:6, 7) Larim dispela hevi i opim rot long yu inap pas gut moa wantaim Jehova na tingim em olsem Man i stap tru. Taim yu mekim olsem, dispela bai strongim bilip bilong yu olsem Jehova inap tru long helpim yu.

TAIM YUMI WET I STAP

Soim olsem yu trastim Jehova taim yu givim bikpela haptaim na strong bilong yu long mekim wok bilong em (Lukim paragraf 17)

17 Bilong wanem “Bikpela i bin kisim bek [Pol] long maus bilong laion”? Pol i tok: “Bai mi ken mekim gut tru wok bilong autim tok na olgeta lain pipol i ken harim.” (2 Tim. 4:17) Sapos yumi givim bikpela haptaim na strong bilong yumi long mekim wok autim tok olsem Pol i bin mekim, yumi bilip olsem Jehova bai ‘givim olgeta samting’ yumi nidim. (Mat. 6:33) Yumi “kisim wok bilong autim gutnius” bilong Kingdom, olsem na Jehova i tingim yumi olsem “ol wanwok bilong [em].” (1 Tes. 2:4; 1 Kor. 3:9) Taim yumi givim bel tru long mekim wok bilong God, yumi bai amamas long wetim em long helpim yumi.

18. (a) Olsem wanem yumi inap kisim pasin bilong trastim Jehova? (b) Olsem wanem yumi inap strongim pasin bilong yumi long pas gut wantaim em?

18 Long nau, yumi mas mekim ol samting bilong strongim pasin bilong yumi long pas gut wantaim God. Sapos yumi tingting planti long wanpela samting, larim dispela i opim rot long yumi inap i go klostu moa long Jehova. Taim yumi stadi gut long tok bilong God long Baibel, beten long olgeta taim, na givim bel tru long mekim wok bilong God, yumi ken bilip tru olsem Jehova bai strongim yumi long karim ol hevi i painim yumi long nau na ol hevi bai kamap bihain.

^ par. 2 Pol i stori long “maus bilong laion” na dispela inap makim maus bilong laion tru o em i olsem tok piksa bilong makim narapela samting.

^ par. 10 I gat ol atikol bilong helpim ol Kristen long karim hevi bilong ol bikpela sik, na tu, i gat ol atikol bilong helpim ol lain i lukautim ol sikman. Lukim Kirap! bilong Janueri 8, 1992, na Wastaua bilong Me 1, 2008; Novemba 1, 2009; na Me 15, 2010.

^ par. 12 Mipela i senisim ol nem.

^ par. 14 Lukim atikol, “Rausim Man—Mak Bilong Pasin Laikim,” long dispela Wastaua.

^ par. 16 I gat ol atikol bilong helpim ol famili em wanpela bilong ol i lusim Jehova. Lukim Wastaua bilong Septemba 1, 2006, pes 17-21, na Janueri 15, 2007, pes 17-20.