Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Februeri 2015

Bihainim Jisas na Mekim Pasin Daun na Pasin Isi

Bihainim Jisas na Mekim Pasin Daun na Pasin Isi

“Krais yet i bin karim pen bilong helpim yupela. Em i stap olsem gutpela piksa bai yupela i ken bihainim gut lek mak bilong en.”1 PITA 2:21.

1. Taim yumi bihainim ol pasin bilong Jisas, olsem wanem dispela inap kirapim yumi long i go klostu moa long Jehova?

YUMI save bihainim pasin bilong ol manmeri yumi laikim. Jisas Krais em nambawan man i winim tru olgeta narapela man husat i bin i stap long graun, olsem na i stret tru long yumi mas bihainim pasin bilong em. Bilong wanem? Jisas i tok: “Man i lukim mi, em i lukim Papa tu.” (Jon 14:9) Jisas i bihainim gut tru olgeta pasin bilong Papa, olsem na taim man i lukim ol pasin Jisas i mekim, i olsem em i lukim Papa. Taim yumi bihainim ol pasin bilong Jisas, yumi bai i go klostu moa long Jehova, em nambawan Man tru i winim olgeta lain long heven na graun. Dispela em gutpela blesing tru!

2, 3. (a) Bilong wanem Jehova i stiaim ol man long raitim ol tok i stori long ol pasin bilong Pikinini bilong em? (b) Jehova i save olsem yumi inap mekim wanem? (c) Long dispela stadi na long neks stadi, yumi bai stori long wanem samting?

2 Tasol olsem wanem yumi inap save long ol pasin bilong Jisas? Yumi ken tenkyu tru olsem God i kirapim ol man long raitim ol tok i stori long ol pasin Jisas i mekim. Ol dispela stori i stap long Ol Skripsa Grik. Jehova i laik bai yumi save gut long ol pasin bilong  Pikinini bilong em na bai yumi inap bihainim. (Ritim 1 Pita 2:21.) Stori bilong Jisas long Baibel i stap olsem gutpela piksa yumi ken bihainim. I olsem Jisas i lusim ol “lek mak” bilong em, na Jehova i tokim yumi long bihainim ol dispela lek mak. Pasin bilong Jisas i stap olsem gutpela piksa tru yumi ken bihainim, tasol yumi no gutpela olgeta wankain olsem em. Olsem na Jehova i save olsem yumi no inap bihainim stret olgeta pasin bilong Jisas. Tasol em i save olsem yumi inap bihainim ol pasin bilong Jisas inap tru long skel bilong yumi.

3 Orait nau yumi ken stori long sampela gutpela pasin bilong Jisas. Long dispela stadi, yumi bai stori long pasin daun na pasin isi, na long neks stadi yumi bai stori long pasin bilong em long strongim bel na pasin bilong skelim gut ol samting. Taim yumi stori long ol dispela pasin, yumi bai skelim 3-pela askim: Wanem mining bilong dispela pasin? Olsem wanem Jisas i soim dispela pasin? Olsem wanem yumi inap bihainim pasin bilong em?

JISAS I GAT PASIN DAUN

4. Wanem mining bilong dispela tok, pasin daun?

4 Wanem mining bilong dispela tok, pasin daun? Planti manmeri i gat pasin antap, olsem na sampela inap pilim olsem pasin daun em pasin bilong ol man i no gat strong. Tasol dispela tingting i no stret. Taim ol manmeri i mekim pasin daun, dispela i makim olsem ol i gat strongpela bel na ol i no pret long ol man. Wanpela dikseneri i tok, sapos man i gat pasin daun, “em i no inap holim tingting bilong man i gat pasin antap.” Tingting yumi holim long pasin bilong yumi yet bai stiaim yumi long mekim pasin daun. Wanpela dikseneri bilong Baibel i tok: “Sapos yumi gat pasin daun, yumi bai holim tingting olsem yumi samting nating long ai bilong God.” Sapos tru tru yumi daunim yumi yet long ai bilong God, yumi no inap holim tingting olsem yumi winim ol narapela manmeri. (Rom 12:3; Fili. 2:3) I hatwok long ol sinman i kisim pasin daun. Tasol yumi inap lain long kisim pasin daun sapos yumi tingim tingim i stap bilong yumi long ai bilong God, na bihainim ol lek mak bilong Jisas.

5, 6. (a) Maikel, dispela nambawan ensel, em i husat? (b) Olsem wanem Maikel i soim olsem em i gat pasin daun?

5 Olsem wanem Jisas i soim pasin daun? I gat planti stori i kamapim klia olsem oltaim Pikinini Bilong God i bihainim pasin daun—taim em i stap long heven olsem strongpela ensel, na taim em i stap long graun olsem man i gutpela olgeta. Skelim sampela eksampel.

6 Tingting bilong em. Jut, em man bilong raitim Baibel, em i stori long wanpela samting Jisas i mekim paslain long em i kam long graun. (Ritim Jut 9.) Jisas i gat nem olsem Maikel, em nambawan ensel, na em i “toktok wantaim Satan na tok pait long bodi bilong Moses.” Tingim: Taim Moses i dai, Jehova i planim em long wanpela hap ol man i no save long en. (Lo 34:5, 6) Ating Satan i laik yusim bodi bilong Moses long sapotim bilip bilong lotu giaman. Maski Satan i laik mekim wanem samting long bodi bilong Moses, ensel Maikel i strongim bel na pasim Satan long mekim samting em i tingting long mekim. Wanpela buk i tok, ol tok Grik ol i tanim olsem “tok pait,” ol inap yusim tu taim “ol i tok pait long sait bilong lo” na dispela inap makim olsem “Maikel i ‘kwestenim Satan’ long wai na em i laik kisim bodi bilong Moses.” Tasol Maikel i stap olsem Nambawan Ensel na em i luksave olsem em i no gat namba long givim strafe long man. Em i larim dispela wok long han bilong Jehova, em Nambawan Jas. Olsem na maski Satan i sikirapim bel bilong Maikel, Maikel i no larim dispela i kirapim em long mekim wok we em i no gat rait long mekim. Dispela i soim klia olsem Jisas i gat pasin daun!

7. Olsem wanem toktok na ol wok Jisas i mekim i soim olsem em i gat pasin daun?

 7 Taim Jisas i mekim wok autim tok long graun, toktok na pasin bilong em i soim olsem em i gat pasin daun. Toktok bilong em. I no gat wanpela taim we em i litimapim nem bilong em yet. Oltaim em i stiaim ol man long givim glori long Papa bilong em. (Mak 10:17, 18; Jon 7:16) Em i no save mekim wanpela tok bilong daunim ol disaipel bilong em o mekim ol i pilim olsem ol i samting nating, nogat. Em i givim biknem long ol, tok amamas long ol, na em i trastim ol. (Luk 22:31, 32; Jon 1:47) Ol wok em i mekim. Long i stap bilong Jisas long graun, em i no bungim planti mani kago. (Mat. 8:20) Em i amamas long mekim ol wok i no gat nem. (Jon 13:3-15) Em i redi long bihainim tok, na em i mekim bikpela samting tru we i soim klia olsem em i gat pasin daun. (Ritim Filipai 2:5-8.) Ol man i gat pasin antap, ol i no save bihainim tok. Tasol Jisas i daunim em yet na mekim laik bilong God, na em i “bihainim tok i go inap long em i dai.” Jisas i stap olsem Pikinini bilong man, na ol samting em i mekim i soim klia tru olsem em i gat “pasin daun.”Mat. 11:29.

BIHAINIM PASIN DAUN BILONG JISAS

8, 9. Olsem wanem yumi inap mekim pasin daun?

8 Olsem wanem yumi inap bihainim pasin bilong Jisas na mekim pasin daun? Tingting bilong yumi. Sapos yumi gat pasin daun, yumi no inap mekim wok we yumi no gat rait long mekim. Sapos yumi luksave olsem yumi no gat rait long skelim pasin bilong ol narapela, orait yumi no inap kirap kwik long sutim tok long ol pasin kranki bilong ol narapela o holim 2-pela tingting long ol. (Luk 6:37; Jems 4:12) Pasin daun bai helpim yumi na yumi no inap holim tingting olsem yumi “stretpela man tumas,” na tu, yumi no inap luk daun long ol narapela husat i no gat wankain save olsem yumi o ol i no mekim wankain wok olsem yumi. (Sav. 7:16, NW) Ol elda husat i gat pasin daun, ol i no save holim tingting olsem ol i gutpela moa winim ol wanbilip, nogat. Ol i save “tingim olsem ol arapela i winim” ol, na ol i bihainim pasin daun.Fili. 2:3; Luk 9:48.

9 Tingim Brata W. J. Thorn. Em i mekim wok wasman raun kirap long 1894. Em i mekim dispela wok inap planti yia, na bihain ol i singautim em i go wok long Kingdom Fam long New York, na em i wok insait long haus kakaruk. Em i tok: “Taim mi luksave olsem mi kisim tingting bilong man i gat pasin antap, mi save tokim mi yet olsem: ‘Yu olsem das tasol. Wai na yu laik kisim pasin antap?’” (Ritim Aisaia 40:12-15.) Dispela i soim olsem em i gat pasin daun!

10. Olsem wanem yumi inap soim pasin daun long toktok na ol wok yumi mekim?

10 Toktok bilong yumi. Sapos yumi gat pasin daun tru, dispela bai kamap ples klia long toktok bilong yumi. (Luk 6:45) Taim yumi toktok wantaim ol narapela, yumi no inap toktok tasol long ol wok yumi mekim. (Snd. 27:2) Yumi bai tok amamas long ol bratasista bilong yumi long ol gutpela pasin bilong ol, save bilong ol long mekim sampela wok, na ol gutpela wok ol i mekim. (Snd. 15:23) Ol wok yumi mekim. Ol Kristen husat i gat pasin daun, ol i no tingting long kisim biknem long dispela haptaim bilong nau, nogat. Ol i amamas long mekim ol wok i no gat nem, na long dispela rot i no gat samting inap pasim ol long mekim laik bilong Jehova inap tru long skel. (1 Tim. 6:6, 8) Tasol bikpela samting moa em olsem, sapos yumi gat pasin bilong bihainim tok, dispela bai soim olsem yumi gat pasin daun. Pasin daun bai kirapim yumi long “bihainim tok bilong ol man i go pas long [yumi]” insait long kongrigesen, na yumi bai amamas long bihainim tok i kam long oganaisesen bilong Jehova.Hib. 13:17.

JISAS I GAT PASIN ISI

11. Wanem mining bilong dispela tok, pasin isi?

11 Pasin laikim i save kirapim man long sori  long narapela. Baibel i soim olsem Jehova na Jisas i save mekim bikpela pasin sori na pasin laikim. (Luk 1:78; 2 Kor. 1:3; Fili. 1:8) Wanpela dikseneri i stori long tok bilong Baibel long pasin sori, na i tok: “Dispela tok i no makim olsem yumi sori tasol long ol tarangu man, nogat. Em i makim olsem yumi yet i mas mekim sampela samting bilong stretim hevi bilong ol na bai sindaun bilong ol i ken senis na kamap gutpela.” Sapos man i gat pasin isi, dispela bai kirapim em long mekim ol wok bilong helpim sindaun bilong ol narapela.

12. (a) Jisas i mekim wanem na dispela i soim olsem em i sori tru long ol narapela? (b) Pasin sori i kirapim em long mekim wanem?

12 Jisas i soim pasin isi long wanem ol rot? Tingting na ol wok em i mekim. Jisas i sori tru long ol narapela. Taim Jisas i lukim Maria na ol narapela i krai sori long Lasarus i dai, dispela i mekim na “aiwara bilong Jisas i pundaun.” (Ritim Jon 11:32-35.) Em i pilim sori tru, olsem na em i kirapim bek Lasarus, wankain olsem em i bin kirapim bek pikinini man bilong wanpela wido. (Luk 7:11-15; Jon 11:38-44) Taim Jisas i kirapim bek Lasarus, ating dispela i opim rot long Lasarus inap bilip na wet long kisim laip long heven. Wanpela taim Jisas i lukim bikpela lain manmeri i kam long em, na em i “sori tru” long ol. Olsem na “em i kirap skulim ol long planti samting.” (Mak 6:34) Long dispela taim, ol skultok bilong em i bin senisim i stap bilong ol man husat i bihainim ol dispela tok! Tingim: Jisas i pilim sori long ol narapela, na em i no lukluk tasol, nogat. Em yet i mekim sampela samting bilong helpim ol.Mat. 15:32-38; 20:29-34; Mak 1:40-42.

13. Olsem wanem Jisas i bihainim pasin isi taim em i toktok long ol narapela? (Lukim piksa long kirap bilong stadi.)

13 Ol tok em i mekim. Bel bilong Jisas i pilim sori tru, na em i sori moa yet long ol man em ol narapela i luk daun long ol. Aposel Matyu i kamapim olsem Jisas i truim tok bilong Aisaia, olsem: “Bai em i no krungutim pitpit i bruk liklik, na bai em i no kilim i dai lam em paia long wik bilong en i laik pinis.” (Ais. 42:3; Mat. 12:20) Ol manmeri i bel hevi tru na ol i stap olsem ol pitpit i bruk liklik na lam em paia long wik bilong en i laik pinis, olsem na taim Jisas i toktok long ol, em i toktok long pasin we i strongim gen bel bilong ol. Em i autim ol tok we i “pinisim bel hevi bilong ol man i stap wantaim bikpela wari.” (Ais. 61:1) Em i toktok long “ol man i save hatwok nating na karim ol bikpela hevi” na em i kirapim ol long i kam long em, na em i tok ol bai “kisim nupela strong.” (Mat. 11:28-30) Em i strongim ol disaipel olsem God i tingim tru olgeta wan wan man husat i lotuim Em, na God i tingim tu ‘ol man i no gat nem’ long ai bilong ol man bilong graun.Mat. 18:12-14; Luk 12:6, 7.

BIHAINIM PASIN ISI BILONG JISAS

14. Olsem wanem yumi inap kisim pasin bilong isi long ol narapela?

14 Olsem wanem yumi inap bihainim Jisas na mekim pasin isi? Ol tingting bilong yumi. Ating i hatwok long yumi inap kisim kwik ol dispela pasin, tasol Baibel i kirapim yumi long wok strong long kisim ol dispela pasin. God i laik bai olgeta Kristen i mas kisim nupela pasin, na “bikpela pasin sori” i insait long ol dispela nupela pasin. (Ritim Kolosi 3:9, 10, 12.) Olsem wanem yu inap kisim pasin bilong isi long ol narapela? Yupela i mas mekim pasin laikim bilong yupela i kamap bikpela moa. (2 Kor. 6:11-13) Yupela i mas putim gut yau taim man i stori long ol samting i stap long tingting bilong em. (Jems 1:19) Askim yu yet olsem: ‘Sapos kain hevi olsem i painim mi, bai mi pilim olsem wanem? Mi laik bai ol narapela i helpim mi olsem wanem?’1 Pita 3:8.

15. Yumi inap mekim wanem bilong helpim ol man husat i stap olsem pitpit i bruk liklik o lam em paia long wik bilong en i laik pinis?

15 Ol wok yumi mekim. Pasin isi bai kirapim yumi long helpim ol narapela, na moa yet em ol  man em hevi i daunim ol na ol i stap olsem pitpit i bruk liklik na olsem lam em paia long wik bilong en i laik pinis. Olsem wanem yumi inap helpim ol? Rom 12:15 i tok: “Krai wantaim ol man i krai.” Taim ol man i bel hevi, ol i laik bai yumi pilim hevi bilong ol pastaim, na bihain yumi ken tokim ol long rot bilong stretim hevi. Pikinini meri bilong wanpela sista i dai na ol narapela i mekim gut bel bilong dispela sista, na em i tok: “Bel bilong mi i stap isi taim ol pren bilong mi i kam krai wantaim mi.” Yumi inap soim pasin isi taim yumi mekim ol gutpela wok bilong helpim ol narapela. Olsem wanem? Yu save long wanpela wido husat i nidim helpim long stretim sampela samting long haus? Yu save long wanpela lapun brata o sista husat i nidim helpim long sait bilong kar bilong i go long miting, autim tok, o i go long haus sik? Maski yumi mekim liklik wok tasol, dispela inap helpim tru wanbilip husat i nidim helpim. (1 Jon 3:17, 18) Bikpela samting moa em olsem, yumi inap soim pasin bilong tingim tru ol narapela taim yumi givim bel tru long autim tok. Dispela em nambawan gutpela rot bilong helpim ol manmeri i gat gutpela bel!

Yu tingim tru ol wanbilip? (Lukim paragraf 15)

16. Yumi inap mekim wanem tok bilong strongim bel bilong ol manmeri i bel hevi?

16 Toktok bilong yumi. Pasin isi bai kirapim yumi long kamapim ol tok i “mekim gut bel bilong ol man i bel hevi.” (1 Tes. 5:14) Yumi inap mekim wanem kain tok bilong strongim bel bilong ol man i bel hevi? Yumi inap tokim ol olsem yumi tingim ol na yumi wari tru long ol. Yumi inap tok amamas long ol bambai ol inap luksave olsem ol i gat ol gutpela pasin na gutpela save bilong mekim sampela wok. Yumi ken kirapim ol long tingim gen olsem Jehova i bringim ol i go klostu long Pikinini bilong em, olsem na dispela i makim olsem ol i gutpela samting tru long ai bilong God. (Jon 6:44) Yumi ken strongim bel bilong ol na tokim ol olsem Jehova i wari tru long ol wokman bilong em husat “i gat hevi” na “bilip bilong ol i bagarap.” (Sng. 34:18) Taim yumi mekim ol gutpela tok, dispela inap mekim gut bel bilong ol man i stap bel hevi.Snd. 16:24.

17, 18. (a) Jehova i laik bai ol elda i bihainim wanem pasin taim ol i lukautim ol sipsip bilong em? (b) Long neks stadi, yumi bai stori long wanem samting?

17 Yupela ol elda, Jehova i laik bai yupela i bihainim pasin isi taim yupela i lukautim ol sipsip bilong em. (Apo. 20:28, 29) Tingim, em wok bilong yupela long givim kaikai long ol sipsip bilong em, strongim bel bilong ol, na givim nupela strong long ol. (Ais. 32:1, 2; 1 Pita 5:2-4) Olsem na sapos elda i gat pasin sori, em i no inap kontrolim ol sipsip, na putim ol lo na bai ol sipsip i pilim olsem ol i gat asua na ol i mas mekim bikpela wok moa i winim skel bilong ol, nogat. Em bai mekim ol i amamas, na em bai bilip olsem pasin bilong ol long laikim tru Jehova bai kirapim ol long mekim wok bilong Em inap tru long skel bilong ol.Mat. 22:37.

18 Taim yumi tingim pasin daun na pasin isi bilong Jisas, dispela bai kirapim yumi long bihainim yet lek mak bilong Jisas. Long neks stadi, yumi bai skelim 2-pela moa pasin bilong Jisas—pasin bilong em long strongim bel na pasin bilong skelim gut ol samting.