Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Janueri 2015

Larim Jehova i Strongim na Lukautim Marit Bilong Yu

Larim Jehova i Strongim na Lukautim Marit Bilong Yu

“Sapos Bikpela i no lukautim wanpela taun, orait ol wasman i was nating.” SNG. 127:1b.

1, 2. (a) Bilong wanem 24 tausen manmeri bilong Israel i lus long kisim ol gutpela blesing? (b) Stori bilong lain Israel long bipo inap givim wanem skul long yumi?

PASLAIN liklik long lain Israel i go insait long Graun Bilong Promis, planti tausen man i kirap long “pamuk nabaut wantaim ol meri Moap i stap long dispela hap.” Olsem na Jehova i kilim i dai 24 tausen manmeri. Lain Israel i stap klostu tru long Graun Bilong Promis, tasol ol i lus long kisim dispela blesing, long wanem, ol i pundaun long traim.—Nam. 25:1-5, 8, 9.

2 Dispela stori i stap olsem “tok lukaut long yumi husat i stap nau long pinis bilong dispela taim.” (1 Kor. 10:6-11) Nau em pinis bilong dispela “taim bilong las de,” na ol wokman bilong God i stap klostu tru long nupela taim we stretpela pasin bai i stap long en. (2 Tim. 3:1; 2 Pita 3:13) Tasol sori tru olsem sampela manmeri long lain bilong Jehova i no was gut na ol i pundaun long traim. Ol i mekim pasin pamuk na karim hevi bilong en. Ol kain lain olsem inap lus long kisim ol blesing bilong oltaim oltaim.

3. Bilong wanem ol marit i mas larim Jehova i stiaim na lukautim ol? (Lukim piksa long kirap bilong stadi.)

3 Long nau, pasin pamuk i kamap bikpela tru, olsem na ol marit i mas askim Jehova long stiaim na lukautim ol bambai hatwok  ol i mekim long lukautim marit bilong ol i no inap lus nating. (Ritim Song 127:1.) Yumi bai stori long olsem wanem tupela marit inap strongim marit sapos ol i lukautim gut tingting i stap long bel, go klostu long God, kisim nupela pasin, toktok gut wantaim narapela narapela, na tingim tru tok promis ol i bin mekim long narapela narapela.

LUKAUTIM GUT TINGTING I STAP LONG BEL

4. Wanem samting i pulim sampela Kristen long mekim rong?

4 Wanem samting inap mekim na Kristen inap insait long pasin pamuk? Samting man i lukim long ai inap pulim em long insait long pasin pamuk. Jisas i tok: “Man husat i wok long lukluk long wanpela meri na aigris long em, long bel em i mekim pinis pasin adaltri.” (Mat. 5:27, 28; 2 Pita 2:14) Namel long ol Kristen husat i pundaun long pasin pamuk, planti bilong ol i bin lukim ponografi, ritim ol buk i stori long pasin sem, na lukim ol piksa bilong pasin doti long Intenet, olsem na ol i no gat strong long sakim ol laik nogut. Sampela i save kisim amamas long lukim ol program i stori long pasin sem, olsem ol muvi, ol pilai na danis samting, na ol program long televisen. Sampela i save go long ol naitklab, na ol pilai we ol manmeri i save rausim klos bilong ol, na ol ples we narapela i save holim na bengim skin bilong narapela.

5. Bilong wanem yumi mas lukautim gut tingting i stap long bel bilong yumi?

5 Sampela manmeri i pundaun long traim, long wanem, ol i save go long rong man long kisim tingting bilong em. Ol manmeri i kamap wail olgeta na ol i save amamas long insait long olgeta kain pasin doti, olsem na em isi tru long bel bilong man inap kirapim em long laikim narapela husat i no poroman marit bilong em. (Ritim Jeremaia 17:9, 10.) Jisas i tok: “Ol samting i kam long tingting bilong bel em ol tingting nogut, pasin bilong kilim man i dai, pasin adaltri, [na] pasin pamuk.”—Mat. 15:19.

6, 7. (a) Laik nogut inap pulim man long mekim wanem? (b) Olsem wanem man inap abrusim pasin pamuk?

6 Taim man na meri i stat long kisim ol laik nogut, dispela inap kirapim ol long toktok wantaim long ol samting we ol poroman marit tasol inap stori long en. Ol yet i painim rot long ol inap bung planti taim, na ol i mekim long rot we i luk olsem ol i no plenim dispela samting. Taim filings bilong ol i kamap strong moa, ol inap mekim ol pasin i no stret. Sapos ol i lusim bikpela haptaim moa long i stap wantaim, dispela bai i mekim na i hatwok long stopim dispela pasin maski ol i save olsem pasin ol i mekim i no stret.—Snd. 7:21, 22.

7 Ol i save givim baksait long ol lo bilong God taim ol laik nogut i kamap strong na toktok bilong ol i kamap doti, dispela i save kirapim ol long mekim ol samting we ol i mas mekim tasol wantaim poroman marit. Olsem: Ol i save holim han bilong narapela narapela, kis, na holim skin bilong narapela narapela long pasin we i kirapim ol laik nogut. Baibel i tok: “Laik bilong bel bilong olgeta man wan wan i save traim ol, dispela laik i save giamanim ol na pulim ol.” Taim ol dispela laik nogut i kamap bikpela, “em i save kamapim sin,” em pasin pamuk. (Jems 1:14, 15) Sori tru! Dispela hevi i no inap kamap sapos man na meri wantaim i larim Jehova i strongim tingting bilong ol long rispektim marit na tingim marit olsem samting i holi. Tasol hau bai ol inap mekim olsem?

WOK YET LONG I GO KLOSTU LONG GOD

8. Taim man i kamap pren bilong Jehova, hau bai dispela i lukautim em?

8 Ritim Song 97:10. Sapos man i stap pren bilong Jehova, dispela bai lukautim em. Taim yumi kisim save long ol gutpela pasin bilong God na yumi wok strong long  “bihainim pasin bilong [Em] . . . olsem ol pikinini bilong em” na yumi “wokabaut yet long pasin laikim,” dispela bai strongim yumi na yumi bai sakim “pasin pamuk na olgeta kain pasin i no klin.” (Efe. 5:1-4) Ol marit i save olsem “God bai kotim ol man i mekim pasin pamuk na pasin adaltri,” olsem na ol i wok strong long mekim marit bilong ol i stap klin.—Hib. 13:4.

9. (a) Wanem samting i helpim Josep long sakim pasin pamuk? (b) Yumi inap kisim wanem skul long pasin bilong Josep?

9 Sampela wokman bilong God i no strong moa long bihainim stretpela pasin, long wanem, bihain long wok ol i save bung wantaim ol wanwok em ol i no Witnes. Taim ol i stap long ples wok, long dispela taim tu traim inap painim ol. Tingim Josep: Em i yangpela man na em i luk smat tru. Em i stap long ples wok taim meri bilong bosman bilong em i lukim em na i laikim em. Long olgeta de, meri i wok long grisim Josep. Bihain, dispela meri i “holimpas saket bilong Josep na em i tok olsem, ‘Yu kam slip wantaim mi.’” Tasol Josep i lusim meri na i ranawe. Wanem samting i helpim Josep long sanap strong na sakim dispela traim? Em i holimpas klinpela pasin na stap gut yet long God, long wanem, em i bin tingting strong olsem em i no inap larim wanpela samting i bagarapim pasin bilong em long pas gut wantaim God. Josep i stap gut long God, olsem na ol i pinisim em long wok na ol i putim em long kalabus, tasol Jehova i blesim em. (Stt. 39:1-12; 41:38-43) Taim ol Kristen i stap long ples wok o ol i stap ol yet, ol i no ken i stap wantaim wanpela husat i no poroman marit bilong ol.

KISIM NUPELA PASIN

10. Sapos man i kisim nupela pasin, hau bai dispela i lukautim em?

10 Nupela pasin em samting we “laik bilong God yet i as bilong en na i poroman wantaim stretpela pasin na pasin bilong stap gut long narapela,” olsem na ol marit i mas kisim nupela pasin na dispela bai strongim bilip bilong ol. (Efe. 4:24) Ol manmeri husat i kisim nupela pasin, ol i “kilim i dai” ol laik nogut bilong ol long mekim ol kain pasin olsem “pasin pamuk, pasin i no klin, bel i kirap, ol laik nogut, na pasin gridi.” (Ritim Kolosi 3:5, 6.) Dispela tok, “kilim i dai,” i makim olsem yumi mas taitim bun tru long daunim ol laik nogut na bai yumi no ken mekim ol pasin i no stret. Yumi bai abrusim olgeta kain samting we inap kirapim yumi long kisim laik nogut long narapela husat i no poroman marit bilong yumi. (Jop 31:1) Taim yumi senisim pasin na yumi bihainim laik bilong God, yumi bai lain long “heitim tru pasin nogut, na pas tru long gutpela pasin.”—Rom 12:2, 9.

11. Olsem wanem nupela pasin inap strongim marit?

11 Nupela pasin i kamapim klia ol pasin bilong Jehova, em “Man husat i bin kamapim” ol dispela pasin. (Kol. 3:10) Planti gutpela blesing i save kamap taim ol marit i mekim ol samting bilong strongim ol yet, olsem ol i “kisim bikpela pasin sori, pasin helpim, pasin daun, pasin isi, na pasin bilong i no les kwik”! (Kol. 3:12) Na tu, pasin wanbel insait long marit i save kamap strong moa taim ol marit i “larim bel isi bilong Krais i bosim bel bilong [ol].” (Kol. 3:15) Em gutpela pasin tru long ol marit i “sori na laikim tumas” narapela narapela! Ol i save amamas long i “go pas long givim ona” long narapela narapela.—Rom 12:10.

12. Wanem ol pasin bai helpim ol marit long i stap amamas?

12 Sid na Sonja em tupela marit, na ol i stori long ol pasin i helpim ol long i stap amamas. Sid i tok: “Pasin laikim em nambawan bikpela pasin mitupela i wok strong long bihainim. Mitupela i pilim  olsem mitupela i mas bihainim pasin isi.” Meri bilong em, Sonja, i wanbel na em i tok: “Mitupela i mas i gat pasin helpim. Na tu, mitupela i traim long bihainim pasin daun maski sampela taim i hatwok.”

TOKTOK GUT WANTAIM

13. Wanem pasin inap strongim tru marit? Bilong wanem?

13 Wanpela bikpela pasin we inap strongim tru ol marit em pasin bilong toktok gut wantaim. Long sampela marit, sori tru olsem poroman marit i no save rispektim narapela narapela taim ol i toktok wantaim, tasol ol i rispektim ol man ol i no save long ol na ol animal ol i lukautim long haus, kain olsem dok o pusi! Taim ol poroman marit i “bel nogut na kros na belhat na bikmaus na tok nogut” long narapela narapela, dispela bai bagarapim tupela wantaim long sait bilong bilip. (Efe. 4:31) Ol marit i no ken sutim tok o tok bilas long narapela narapela, nogat, mobeta ol i mekim ol gutpela tok, na toktok long pasin isi, na soim pasin sori, na dispela bai strongim marit.—Efe. 4:32.

14. Yumi mas abrusim wanem ol pasin?

14 Baibel i tok i gat “taim bilong pasim maus.” (Sav. 3:7) Dispela i no makim olsem yumi mas pasim maus long olgeta taim, nogat. Wanpela maritmeri long Jemani i tok: “Sapos yu pasim maus long olgeta taim, dispela inap mekim poroman marit i bel hevi.” Tasol em i tok moa olsem: “Taim yu kisim bikpela presa, sampela taim i hatwok long i stap isi, tasol no ken mekim wanpela samting bilong soim olsem yu kros. Sapos yu no was gut na yu kirap kwik long mekim wanpela tok o pasin we i bagarapim bel bilong poroman marit, dispela inap mekim hevi i kamap bikpela moa.” Ol marit i no inap stretim hevi sapos ol i bikmaus o ol i les long toktok long narapela narapela. Marit bai i stap strong sapos ol i abrusim pasin bilong tok pait long olgeta taim o pulim kros i go inap longpela taim.

15. Olsem wanem pasin bilong toktok gut wantaim inap strongim marit?

15 Marit bai i stap strong sapos man na meri i autim tingting na filings bilong ol long narapela narapela. Wei bilong man  long toktok i gat wankain strong olsem toktok em i mekim. Olsem na long taim bilong bikpela hevi, bihainim pasin isi taim yu toktok, na skelim gut ol tok yu mekim. Dispela bai mekim na poroman marit bai amamas long putim yau long yu. (Ritim Kolosi 4:6.) Man na meri inap strongim marit long rot bilong toktok gut wantaim, na ol i ken “mekim ol gutpela tok bilong strongim [poroman marit] taim [em] i no gat strong.”—Efe. 4:29.

Ol marit i mas toktok gut wantaim na dispela inap strongim marit (Lukim paragraf 15)

TINGIM TOK PROMIS BILONG MARIT

16, 17. Wai na em i bikpela samting long pilim tingting bilong poroman marit na tingim laik bilong em long sait bilong maritpasin?

16 Ol poroman marit inap strongim marit taim ol i putim laik bilong poroman i stap namba 1 na laik bilong ol yet i stap namba 2. (Fili. 2:3, 4) Ol i mas pilim tingting bilong narapela narapela, na tingim laik bilong ol long mekim maritpasin.—Ritim 1 Korin 7:3, 4.

17 Sori tru olsem, sampela manmeri i save surik long soim poroman marit olsem ol i laikim em, na sampela man i pilim olsem sapos ol i soim pasin isi long meri, dispela i makim olsem ol i no gat strong. Baibel i tok: “Yupela maritman, long sindaun bilong yupela wantaim ol meri bilong yupela, yupela i mas kliagut long tingting i stap long bel bilong ol.” (1 Pita 3:7) Maritman i mas kliagut olsem taim ol i marit, dispela i no makim olsem ol i ken mekim maritpasin tasol, nogat. Dispela i makim olsem long ol narapela taim tu, em i mas mekim ol pasin i soim olsem em i laikim tru meri bilong em. Taim tupela wantaim i soim olsem ol i laikim tru narapela narapela, ol bai inapim tru olgeta laik bilong poroman marit.

18. Olsem wanem man na meri inap strongim marit bilong ol?

18 Ol poroman marit i mas i stap gut long narapela narapela, tasol sapos ol i no mekim pasin isi, dispela inap kirapim poroman marit long painim narapela husat inap mekim pasin isi long em. (Snd. 5:18; Sav. 9:9) Olsem na Baibel i givim strongpela tok long ol marit, olsem: “Yupela ol marit i no ken tok nogat long poroman marit na pasim bodi bilong yupela yet. . . . Tasol yupela i mas wanbel long mekim olsem na mekim inap sotpela taim. . . . Nogut yupela i no inap bosim laik bilong bodi na Satan i traim yupela.” (1 Kor. 7:5) Sapos ol marit “i no inap bosim laik bilong bodi,” Satan inap pulim ol na ol inap pundaun long traim na mekim pasin adaltri. Tasol sapos tupela poroman marit i “tingim ol samting bilong helpim narapela,” na ol i no “tingting long ol samting bilong helpim ol yet,” na ol i soim olsem ol i laikim tru poroman, dispela inap strongim tru marit.—1 Kor. 10:24.

LUKAUTIM GUT MARIT

19. Yumi mas tingting strong long mekim wanem? Bilong wanem?

19 Klostu nau nupela taim bai kamap long graun na stretpela pasin bai i stap long en. Olsem na sapos yumi bihainim ol laik nogut bilong yumi, dispela inap givim bikpela hevi long yumi olsem hevi i bin painim 24 tausen manmeri bilong lain Israel long Ples Stret Bilong Moap. Baibel i stori long dispela samting, na bihain em i tok lukaut olsem: “Man i ting em i sanap strong i stap, em i mas lukaut, nogut em i pundaun.” (1 Kor. 10:12) Olsem na em i bikpela samting long yumi mas strongim marit bilong yumi—yumi mas i stap gut long Papa bilong yumi long heven, na poroman marit bilong yumi. (Mat. 19:5, 6) Long nau, winim olgeta taim bipo, yumi “mas wok strong tru long stap klin olgeta, na i stap olsem man i no gat rong, na stap bel isi.”—2 Pita 3:13, 14.