Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  No. 6 2016

Narakain Klaun Pis

Narakain Klaun Pis

Orange klaun pis

SAMPELA pis i save pulim ai bilong yumi, tasol klaun pis i narakain tru. Ating yumi amamas long lukim kain kain kala bilong ol, long wanem, kala bilong ol i olsem klos ol man i werim long sekes. Na ating yumi kirap nogut long save olsem ol klaun pis i stap namel long ol gras bilong solwara (sea anemone). Narapela nem bilong klaun pis em anemonefish.

Olsem planti ekta long Hollywood, ol klaun pis i no pret long ol man i kisim poto bilong ol. Ol daiva na ol man i go snokel long solwara i save olsem ol inap kisim poto bilong ol dispela pis, bikos ol i stap long ples bilong ol na ol i no save hait.

Na tu, ol klaun pis i no save pret long ol birua bilong ol. Ol i stap namel long ol gras i gat marasin nogut long en. I kain olsem ol i stap namel long planti liklik snek. Maski i olsem, ol klaun pis i amamas long stap long dispela ples. Wai na ol klaun pis i laik stap long kain hap? Na olsem wanem klaun pis na ol dispela gras i helpim narapela narapela?

‘MI NO INAP LUSIM YU’

Two-banded klaun pis

Wankain long pasin bilong ol man long wok gut wantaim, ol klaun pis na ol dispela  gras bilong solwara i save helpim narapela narapela. Ol i stap na ol klaun pis i stap laip. Ol wok painimaut bilong ol saientis bilong solwara i tokaut olsem ol dispela gras i helpim klaun pis long kisim kaikai na ples slip. Ol klaun pis i no save swim tumas, olsem na taim ol i stap namel long gras bilong solwara, ol inap hait long ol birua. Long dispela rot, ol inap long stap laip longpela taim olsem 10-pela krismas samting.

Ol dispela gras i gat marasin nogut long en, tasol em i stap olsem haus na ples hait bilong ol klaun pis. Ol klaun pis i save putim ol kiau long as bilong en, na man na meri klaun pis i save lukautim. Bihain, yu inap lukim man na meri klaun pis na ol pikinini bilong ol i swim namel long dispela wankain hap.

Taim ol klaun pis i swim namel long ol dispela gras, olsem wanem dispela i helpim ol? Ol klaun pis i stap olsem wasman bilong ol, ol i ronim ol bataflai pis na bai ol i no ken kaikai ol dispela gras. Sapos ol klaun pis i no stap, ol bai i dai. Taim ol saveman i rausim ol klaun pis long ol dispela gras bilong solwara, insait long 24 aua tasol, ol i no stap moa. Ol bataflai pis i kam na kaikaim ol dispela gras.

Na tu, ol klaun pis i save helpim ol long kisim strong. Ol pekpek bilong klaun pis i gat marasin ammonium long en we i save helpim ol gras long gro. Na taim ol klaun pis i swim namel long ol dispela gras bilong solwara, ol i helpim wara i gat win oksijen long ron namel long ol.

GO LONG PLES WE OL NARAPELA I PRET LONG SWIM

Pink skunk klaun pis

I gat marasin i stap long skin bilong ol klaun pis na dispela i save lukautim ol. Dispela marasin i stopim ol gras samting bilong solwara na ol i no sutim skin bilong ol. Na tu, ol dispela gras bilong solwara i tingim ol klaun pis olsem hap famili bilong ol. Wanpela saientis bilong solwara i tok, i olsem “ol klaun pis i pasim klos bilong ol long gras bilong solwara.”

Sampela wok painimaut i soim olsem taim ol klaun pis i laik makim ples bilong i stap long en, pastaim ol i save painimaut sapos ol inap stap long dispela ples o nogat. Ol saveman i luksave olsem, long namba wan taim dispela pis i swim namel long gras i gat marasin nogut long en, em i save tatsim na lusim dispela hap insait long sampela aua. Taim em i mekim olsem, em inap senisim marasin long bodi bilong en long helpim em sakim marasin nogut bilong ol dispela gras. Sampela taim ol dispela gras inap sutim skin bilong klaun pis, tasol bihain ol i stap gut wantaim.

Pasin bilong klaun pis na ol gras bilong solwara long wok bung wantaim inap skulim yumi long pasin bilong wok wantaim ol narapela. Planti taim ol man bilong ol narapela ples na sindaun i save wok bung wantaim. Olsem ol klaun pis, ating pastaim i hatwok long ol i wok gut wantaim narapela narapela, tasol bihain gutpela samting inap kamap.