Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  No. 6 2016

 BAIBEL I TOK WANEM?

Bihainim Stret Taim

Bihainim Stret Taim

Planti i gat pasin bilong kam leit long ol bung, tasol ol i tok i gutpela sapos ol i bihainim stret taim. Baibel i kamapim gutpela savetingting long dispela samting.

Wai na em i bikpela samting long bihainim stret taim?

AS NA EM I BIKPELA SAMTING

Sampela i luksave olsem sapos yu go paslain long apoinmen, dispela bai daunim presa bilong yu. Na tu, pasin bilong bihainim stret taim inap givim gutnem long yu. Bilong wanem yumi tok olsem?

Pasin bilong bihainim stret taim i soim olsem yu redi gut. Sapos yu kamap long taim stret, dispela i soim olsem yu redi gut na yu no larim ol narapela samting i pasim yu long mekim ol wok yu laik mekim.

Pasin bilong bihainim stret taim i soim olsem ol narapela inap trastim yu. Long nau, ol man i save pasim tok wantaim narapela o mekim ol tok promis, tasol ol i no truim tok bilong ol. Ol man i amamas long ol lain i inapim ol promis bilong ol. Sapos ol pren na famili bilong yu i trastim yu, ol bai rispektim yu. Ol bos i save amamas long ol lain husat i kamap long taim stret bilong wok na pinis long taim stret. Ol i trastim ol kain wokman olsem, na ol i save givim ol gutpela pe.

BAIBEL I TOK

I gat sampela tok bilong Baibel i stori long pasin bilong bihainim stret taim. Kain olsem: “Olgeta samting yupela i mekim, yupela i mas mekim long gutpela pasin na ol samting i mas ron gut.” (1 Korin 14:40) Taim tupela man i pasim tok na makim taim na ples bilong bung, i gutpela long ol i bihainim dispela tok na kamap long taim stret. Na tu, Baibel i tok: “Olgeta samting i kamap long dispela graun, i save kamap long taim bilong em yet.” (Saveman 3:1) Ol tok i stap klostu long dispela ves i tok i gat “taim bilong planim kaikai na taim bilong kamautim kaikai.” (Saveman 3:2) Ol fama i planim kaikai long taim stret bambai ol i ken kisim gutpela kaikai long gaden. Yumi ken tok, ol fama i bihainim stret taim na gutpela samting i kamap.

Baibel i kolim wanpela bikpela as na yumi mas bihainim stret taim: Yumi rispektim ol narapela na tingim olsem ol i makim tu taim bilong mekim ol narapela wok. (Filipai 2:3, 4) Sapos oltaim ol narapela i mas wetim yumi, i olsem yumi stilim taim bilong ol.

“No ken tingim ol samting bilong yupela yet tasol, nogat. Yupela i mas tingim tu ol samting bilong ol arapela.”Filipai 2:4.

 Yu ken mekim wanem bilong bihainim stret taim?

BAIBEL I TOK

Baibel i kirapim yumi long tingting gut long ol samting yumi laik mekim. (Sindaun 21:5) Sapos oltaim yu go leit long ol apoinmen, ating yu mas stretim gut sediul bilong yu. I gutpela yu lusim pasin bilong mekim ol samting i no bikpela samting. Skelim gut taim yu bai kamap long ol apoinmen, na putim mak long kamap long taim stret. Dispela bai helpim yu long abrusim ol samting em yu no ting bai kamap, olsem hevi bilong trafik o bikpela ren samting.

Na tu, Baibel i kirapim yumi long kisim pasin daun. (Sindaun 11:2) Dispela i makim olsem yu save long skel bilong yu yet. Paslain long yu mekim apoinmen, skelim gut sapos i gat sampela samting em yu mas mekim na bai yu gat taim o nogat. Sapos yu no mekim olsem, dispela inap putim hevi long yu na ol narapela!

Baibel i kirapim yumi long yusim gut taim bilong yumi. (Efesus 5:15, 16) Skelim gut wanem ol samting i bikpela samting moa. (Filipai 1:10) Olsem, taim yu kalap long bas o wetim ol narapela, yusim gut dispela taim long ritim buk o tingim ol samting yu bai mekim long dispela de.

“Ol man bilong wok ol i save tingting gut na mekim wok, olsem na wok bilong ol i kamap gutpela na ol i gat planti samting.”Sindaun 21:5.