Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  No. 5 2017

Sampela Save Long Yusim Gut Pawa na Fiul

Sampela Save Long Yusim Gut Pawa na Fiul

YUMI nidim pawa long yusim eakon na fen, fiul bilong ronim kar, na bilong mekim ol wok bilong wan wan de. Tasol ol manmeri long olgeta hap bilong graun i bungim bikpela hevi long sait bilong pawa na fiul.

Gary long Saut Afrika i tok: “Pe bilong fiul i go antap tru.” Dispela em wanpela bikpela hevi tru. Jennifer long Filipins i tingting planti long olsem wanem ol manmeri i yusim pawa bikos “planti taim ol i no gat pawa.” Fernando long El Salvado i tok, em i “tingting planti long envairomen.” Long planti hap, ol man i yusim pawa na fiul long mekim ol bikpela wok, na dispela i bagarapim win na wara samting.

Ating yu bai tok, ‘Olsem wanem mi inap yusim gut pawa na fiul?’

Yumi olgeta i mas yusim gut pawa na fiul bambai yumi no inap tromoi bikpela mani. Na tu, yumi lukautim win na wara samting.

Yumi ken stori long olsem wanem yumi inap yusim gut pawa na fiul taim yumi stap long haus, taim yumi ronim kar, na taim yumi mekim ol wok bilong wan wan de.

HAUS

Yusim gut pawa taim yu yusim eakon. Temostet em wanpela liklik divais ol i putim long eakon na frisa samting bilong kontrolim tempresa. Wanpela wok painimaut long Briten i soim olsem taim ol man i daunim temostet i go daun inap 2 digri long taim bilong winta, dispela i seivim bikpela pawa. Derek i stap long Kanada, na em tu i wanbel long dispela samting. Em i tok: “Long taim bilong winta, famili bilong mi i werim ol kolsiot na i no gat wok long apim tempresa bilong masin bilong wokim paia. Long dispela rot, mipela i seivim pawa.”

Wankain samting i kamap long ol ples i hot. Rodolfo long Filipins i save larim temostet i stap long wanpela mak tasol. Bilong wanem? Em i tok: “Long dispela rot, mipela i seivim mani na pawa.”

Pasim ol windo na dua bilong haus taim yu onim eakon. * Yumi inap yusim gut pawa taim yumi pasim gut ol dua bambai win bilong eakon i no go ausait. Olsem, taim ples i kol na yu larim dua i op, bai yu mas yusim bikpela pawa bilong hatim gen haus.

Sampela man i putim ol strongpela windo long haus bilong ol. Ol dispela windo i no larim win i go ausait, na tu, ol inap long larim san lait i kam insait long haus.

Baim ol masin i no yusim planti pawa. Jennifer em yumi stori long en long pastaim i tok: “Mipela i no moa yusim ol lait balb we i lait strong, nogat, mipela i yusim ol nupela lait balb we i seivim pawa.” Pe bilong  ol i antap tru, tasol ol i no save yusim bikpela pawa na long dispela rot, yu no inap tromoi bikpela mani long baim pawa.

RONIM KAR

Kalap long PMV o teksi. Andrew long Briten i tok: “Mi save kalap long tren o baisikol na go long wok.” Wanpela buk (Energy: What Everyone Needs to Know) i helpim yumi long tingim olsem, “ol kar i save yusim planti fiul inap 3-pela taim moa winim taim yu kalap long bas o tren.”

Wokim plen long hap yu bai go long en. Taim yu wokim gut plen long i go long wanpela hap, yu no inap yusim planti fiul na yu bai seivim mani na taim bilong yu.

Jethro long Filipins i save putim sampela mani long sait long olgeta mun bilong baim fiul. Em i tok: “Dispela i mekim na mi inap plenim gut raun bilong mi.”

WOK BILONG WAN WAN DE

No ken yusim planti hot wara. Wanpela wok painimaut long Australia i soim olsem, “ol haus i save yusim hot wara i kisim inap 1.3 pesen bilong pawa em ol narapela siti i yusim,” em inap olsem “27 pesen bilong pawa em olgeta haus i yusim.”

Taim ol haus i gat hot wara sistem, dispela i save yusim bikpela pawa. Tasol sapos ol i yusim gut wara, dispela bai seivim pawa. Olsem na Victor long Saut Afrika i tok: “Mipela i traim long yusim liklik hot wara tasol taim mipela i waswas.” Steven Kenway em wanpela saientis, na em i tok: “Taim yu yusim gut hot wara, dispela bai helpim yu long 3-pela rot. Yu bai seivim wara na pawa, yu bai helpim wok bilong kampani i givim wara na pawa, na yu bai seivim mani bilong yu.”

Ofim ol samting i yusim pawa. Dispela i makim ol lait, ol teblet na fon samting, na TV na kompiuta. Maski sampela taim yu ofim ol masin olsem kompiuta, ol bai wok yet long yusim pawa. Sampela saveman i tok olsem i gutpela long rausim kod long pawa poin. Fernando em yumi stori pinis long em i tok, “Planti taim mi save ofim ol lait na kamautim ol pawa kod bilong ol masin em mi no yusim.”

Yumi no inap kontrolim pe bilong baim pawa na fiul o stopim wok bilong pawa na fiul long bagarapim win na wara samting, tasol yumi inap kontrolim hamas pawa na fiul yumi yusim. Ol man long olgeta hap bilong graun i laik mekim olsem. Em tru olsem yumi mas lusim bikpela strong na haptaim long mekim olsem, tasol tingim ol gutpela samting inap kamap. Valeria long Meksiko i tok, “Mi save seivim mani na helpim wok bilong lukautim ol samting long envairomen.”

^ par. 10 Yumi mas bihainim gut ol instraksen i stap long ol masin yumi baim olsem eakon samting. Olsem, taim yu yusim sampela masin, yu mas larim dua o windo i op bambai win nogut i go ausait.