Pasin bilong tok tenkyu inap lukautim helt bilong yu, na bel na tingting bai stap isi. Olsem na i gutpela yumi kisim pasin bilong tok tenkyu long olgeta de.

Hau na pasin bilong tok tenkyu inap lukautim helt bilong yu?

OL WOK PAINIMAUT

Wanpela atikol long nius Harvard Mental Health Letter i tok: “Ol man i gat pasin bilong tok tenkyu, oltaim ol i stap amamas tru. Pasin bilong tok tenkyu i helpim bel na tingting bilong man long stap isi, karim ol hevi, gat gutpela helt, amamas long ol samting i painim em, na pas gut wantaim ol narapela.”

BAIBEL I TOK

Baibel i kirapim yumi long kisim pasin bilong tok tenkyu. Aposel Pol i bihainim dispela pasin na em i stap gutpela piksa long yumi, em i tok: “Yupela i mas kamapim tenkyu bilong yupela.” Olsem, Pol i “tenkyu long God” taim ol manmeri i amamas long harim gutnius em i autim long ol. (Kolosi 3:15; 1 Tesalonaika 2:13) Bilong stap amamas tru, yumi no ken tok tenkyu wan wan taim tasol, nogat, yumi mas tok tenkyu long olgeta taim. Dispela i lukautim yumi long pasin bilong ting yumi gat rait long kisim ol samting, laikim samting ol narapela i gat, na bel nogut, ol dispela pasin inap bagarapim pasin bilong yumi long pas gut wantaim ol narapela na yumi no stap amamas.

Krieta bilong yumi i save tok tenkyu long ol man bilong graun, em i stap gutpela piksa em yumi ken bihainim! Hibru 6:10 i tok: “God i no man bilong mekim pasin i no stret na bai em i lusim tingting long ol wok yupela i bin mekim na pasin bilong yupela long laikim tru nem bilong em.” Tru tumas, Krieta bilong yumi i ting pasin bilong tok tenkyu em gutpela pasin yumi mas bihainim.

“Oltaim yupela i mas amamas i stap. Yupela i mas tok tenkyu long God long olgeta samting.”1 Tesalonaika 5:16, 18.

 Hau na pasin bilong tok tenkyu i strongim pasin bilong pas gut wantaim ol narapela?

SAMTING I PAINIM OL MAN

Taim yumi tok tenkyu long wanpela i givim presen, mekim gutpela tok, na helpim yumi, dispela man bai pilim olsem yumi tingim em na em bai amamas. Olsem, ating wanpela man i opim dua taim yu laik go insait long haus, na yu tok tenkyu long em maski yu no save long em, dispela bai mekim em i amamas.

BAIBEL I TOK

Jisas Krais i tok: “Bihainim pasin bilong givim ol samting long ol man, na ol bai givim ol samting long yupela. Ol bai kapsaitim planti samting tru i go long laplap bilong yupela na ol bai i sakim i go daun na seksekim na pulapim inap long em i kapsait.” (Luk 6:38) Tingim ekspiriens bilong Rose, em yaupas gel long Vanuatu, wanpela ailan long Saut Pasifik.

Rose i save go long ol miting Kristen bilong ol Witnes Bilong Jehova, tasol em i no kisim helpim, long wanem, em na ol narapela long kongrigesen i no save long tokples Sain. Tasol tupela marit i save gut long tokples Sain i visitim kongrigesen na ol i luksave long dispela hevi, olsem na ol i kamapim skul bilong lainim dispela tokples. Rose i amamas tru, em i tok: “Mi amamas olsem mi gat planti pren i laikim mi.” Pasin bilong Rose long tok tenkyu na insait long ol hap bilong miting i givim bikpela amamas long dispela tupela marit. Na tu, Rose i tenkyu long pasin bilong ol narapela long kongrigesen long givim bel long lainim tokples Sain na bai ol i ken toktok wantaim em.—Aposel 20:35.

“Man i givim tenkyu long mi [God] olsem ofa bilong en, em i save litimapim nem bilong mi.”Song 50:23.

Hau na bai yu kisim pasin bilong tok tenkyu?

BAIBEL I TOK

Ol samting yumi tingting long en i save stiaim samting yumi mekim. Devit em wanpela man i bin raitim Baibel, em i beten long God olsem: “Mi tingting long ol samting yu bin mekim na long ol gutpela wok bilong yu.” (Song 143:5) Devit i no larim kain kain samting i pulim tingting bilong em, nogat. Long laip olgeta bilong em, em i save tok tenkyu long God, long wanem, oltaim em i tingim tingim ol gutpela wok God i mekim bilong helpim em.—Song 71:5, 17.

Baibel i kamapim gutpela edvais: ‘Yupela i mas wok yet long tingim ol samting i tru, ol samting i kirapim pasin laikim, ol samting i gat gutnem, ol samting i gutpela, na ol samting i stret long ol man i litimapim.’ (Filipai 4:8) Dispela tok “wok yet long tingim” i kamapim olsem, oltaim yumi mas tingim tingim ol gutpela samting, dispela bai helpim yumi long kisim pasin bilong tok tenkyu.

“Bel bilong mi i gat gutpela tingting tasol. Olsem na bai mi autim gutpela tok bilong givim save long yupela.”Song 49:3.