Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  No. 4 2017

 INTAVIU | RAJESH KALARIA

Dokta Bilong Kru i Stori Long Bilip Bilong Em

Dokta Bilong Kru i Stori Long Bilip Bilong Em

PROFESA Rajesh Kalaria i stap long Newcastle Yunivesiti long Inglan. Em i stadi long kru bilong ol man winim 40 yia olgeta. Bipo em i bilip long evolusen. Tasol bihain em i senisim bilip bilong em. Nius Kirap! i askim em long stori long wok na bilip bilong em.

Plis stori long lotu yu kamap bikpela long en.

Papa i bon long India, na Mama i bilong India, tasol em i bon long Yuganda. Ol i kamap bikpela long lotu Hindu. Ol i gat 3-pela pikinini, na mi namba 2 pikinini. Mipela i stap long Nairobi, Kenya. Planti manmeri bilong lotu Hindu i stap klostu long mipela.

Wanem samting i kirapim yu long laikim saiens?

Mi save laikim ol animal, na mi save go raun na slip long bus wantaim ol pren bambai mi inap lukim kain kain animal. Bikpela laik bilong mi em long kamap dokta bilong ol animal. Tasol bihain long mi grediuet long wanpela teknikel kolis long Nairobi, mi go long Yunivesiti Bilong London, Inglan, bilong stadi long wok bilong painimaut long ol sik. Bihain, mi kamap saveman bilong mekim wok painimaut long kru bilong ol man.

Save bilong yu i kirapim yu long skelim gen bilip bilong yu?

Yes. Taim save bilong mi long saiens i kamap bikpela, mi no laik moa long bilipim na bihainim ol pasin bilong lotu Hindu, kain olsem pasin bilong lotuim ol animal na ol piksa bilong ol samting.

Wai na yu bilip long evolusen?

Taim mi liklik yet, planti manmeri i tok olsem laip bilong ol manmeri i kirap long Afrika long rot bilong evolusen, na mipela i stori long dispela samting long skul. Na tu, ol tisa na ol profesa bilong yunivesiti i kirapim mipela ol sumatin long tingim olsem olgeta saientis i bilip long evolusen.

 Wanem samting i stiaim yu long painimaut gen long laip i kirap olsem wanem?

Inap sampela yia, mi stadi long laip bilong ol plaua na ol diwai na bun bilong ol samting, na wanpela wanskul i tokim mi long ol samting em i lainim long Baibel wantaim ol Witnes Bilong Jehova. Dispela i kirapim tingting bilong mi. Olsem na mi go long kibung bilong ol Witnes taim ol i mekim kibung long kolis bilong mipela. Bihain, 2-pela misineri bilong ol Witnes i stori gut long mi long sampela tok bilong Baibel. Ol i bilip olsem i gat Man i bin disainim olgeta samting na em i kamapim bekim bilong ol bikpela askim. Mi pilim olsem bilip bilong ol i stret.

Save bilong wok dokta i pasim yu long bilip olsem i gat Krieta?

Nogat tru! Taim mi stadi long bun bilong ol samting i gat laip, mi luksave olsem ol i gat narapela kain disain. Mi skelim olsem i no stret long tok olsem ol dispela disain i kamap nating.

Stori long wanpela eksampel.

Bihain long 1970, mi stadi long kru bilong ol man, na mi kirap nogut tru long ol samting mi lainim. Kru i stiaim tingting na memori, na em i stiaim wok bilong ol narapela hap bilong bodi. Na tu, kru i stiaim yumi long lukim, smelim, teistim, pilim, na tatsim ol samting, na yumi inap save long ol samting i kamap insait na ausait long bodi.

Kru i gat narapela kain disain na wok bilong en i narakain tru. Em i gat planti bilion sel ol i kolim neuron. Wanpela neuron inap salim tok i go long narapela neuron long rot bilong ol longpela rop ol i kolim axon. Olgeta wan wan neuron i gat ol rop long arere bilong en, em ol dendrite, na ol dispela rop inap konektim wanpela neuron long planti tausen narapela neuron. Olsem na ol man i no inap tru long kaunim namba bilong olgeta koneksen insait long kru! Maski i gat planti bilion neuron na dendrite, olgeta wan wan i stap long ples stret na mekim stret wok bilong ol. Dispela em wanpela samting i narapela kain tru.

Plis stori moa.

Ol koneksen insait long kru i save kamap taim laip bilong bebi i stat insait long bel bilong mama na bihain long bebi i bon. Ol neuron i save salim ol rop i go bilong painim ol narapela neuron i stap sampela sentimita longwe long ol—spes bilong sampela sentimita i longwe tumas taim yumi tingim sais bilong ol liklik neuron. Taim rop bilong wanpela neuron i painim narapela neuron, em bai konekt long hap we i stret long em i konekt long en.

Taim nupela rop i kamaut long neuron, ol kemikal bai kamap olsem ol sainbot bilong stiaim em long luksave olsem em i mas “stop,” “go,” o “tanim,” i go inap long em i konekt long narapela neuron. Sapos i no gat ol dispela sain, ol rop bilong neuron i no inap mekim wok bilong ol. Man i gat bikpela save tru i bin raitim ol instraksen na putim insait long DNA bilong yumi, na dispela i stiaim olgeta samting i kamap insait long kru.

Yumi no inap tru long kliagut long kru i kamap olsem wanem na wok olsem wanem na kamapim ol memori, filings, na tingting. Kru i mekim ol narapela kain wok na em i kamap long narapela kain wei. Wok bilong kru i kirapim mi long pilim tru olsem i gat wanpela Man em kru bilong em i winim tru kru bilong yumi ol man.

Wai na yu kamap Witnes Bilong Jehova?

Ol Witnes i helpim mi long luksave long ol samting i kamapim klia olsem Baibel em Tok Bilong God. Maski Baibel i no buk bilong saiens, ol tok bilong en i stret wantaim save bilong saiens. Na tu, ol tok profet bilong en i kamap tru. Em i helpim tu sindaun bilong ol manmeri husat i bihainim ol tok bilong en. Dispela samting i kamap long laip bilong mi. Mi kamap wanpela Witnes Bilong Jehova long 1973, na kirap long dispela taim na i kam, mi save larim ol tok bilong Baibel i stiaim mi. Olsem na mi inap i stap amamas na laip bilong mi i gat as bilong en.