LONG nau i gat planti narapela narapela tokples, klostu olsem 7,000 tokples long graun olgeta. Na dispela inap mekim na i hatwok long ol man i raun i go long narapela ples, mekim wok bisnis, kisim ediukesen na mekim wok gavman. Kirap long bipo yet dispela hevi i stap. Olsem, long 475 B.C.E. samting taim King Ahasuerus (ating em Serksis Namba 1) i bosim Persia, em i salim ol pas long “olgeta ofisa bilong ol 127 provins, stat long India na i go inap long Itiopia. Dispela pas ol i raitim long ol tok ples bilong olgeta provins na long tok ples bilong ol Juda.” *

Long nau planti oganaisesen na ol gavman i no inap long mekim kain bikpela wok bilong trensletim ol buk na nius samting. Tasol i gat wanpela oganaisesen i mekim gut dispela wok, em ol Witnes Bilong Jehova. Ol i save wokim ol buk na nius, ol odio na vidio rekoding, na tu, ol i trensletim Baibel na planti narapela buk i go long winim 750 tokples. Na tu, ol i trensletim klostu 80 narapela narapela tokples Sain bilong ol yaupas. Ol Witnes i wokim tu kain kain buk long rait Brel bilong helpim ol man i aipas.

Ol Witnes Bilong Jehova i no save mekim wok bisnis long ol wok ol i mekim. Na tu, ol trensleta na ol arapela lain i wok long ol ofis bilong ol i mekim wok olsem ol volantia. Bilong wanem ol i givim bel long trensletim ol buk na nius samting i go long planti tokples? Na hau ol i mekim dispela bikpela wok?

^ par. 3 Ritim Esta 8:9 long Baibel.