MAKIM WANEM SAMTING

Maritman na maritmeri i gat pasin rispek i save tingim narapela, maski long taim ol i no wanbel long wanpela samting. Buk Ten Lessons to Transform Your Marriage i tok: “Ol dispela maritman na maritmeri i no save mekim ol samting bilong pasim rot long kamap wanbel. Ol i save toktok wantaim narapela narapela long ol samting ol i tok pait long en. Long pasin rispek, ol i putim yau long tingting bilong poroman marit na ol i wanbel long samting tupela wantaim i amamas long en.”

STIATOK BILONG BAIBEL: “Man i gat pasin laikim . . . i no save tingim em yet.”—1 Korin 13:4, 5.

“Bilong rispektim meri bilong mi, dispela i makim olsem mi tingim em na mi no laik mekim wanpela samting bilong bagarapim em o marit bilong mitupela.”—Micah.

WAI NA EM I BIKPELA SAMTING

Sapos i no gat pasin rispek, toktok namel long tupela marit bai i gat pasin bilong sutim tok, tok bilas, na i no tingim narapela—ol man bilong mekim wok painimaut i tok ol dispela pasin em ol mak i kamap paslain long divos.

“Taim maritman i mekim ol tok i daunim meri, dispela bai mekim na meri i no trastim man bilong em, na marit inap bagarap.”—Brian.

SAMTING YU KEN MEKIM

ASKIM YU YET

Skelim toktok na pasin bilong yu insait long wanpela wik. Bihain, askim yu yet:

  • ‘Hamas taim mi bin sutim tok long poroman marit bilong mi, na hamas taim mi bin tok amamas long em?’

  • ‘Mi bin mekim wanem ol samting bilong soim olsem mi rispektim poroman marit?’

TOKTOK WANTAIM POROMAN MARIT

  • Wanem sampela pasin na tok inap helpim yutupela long pilim olsem narapela i rispektim narapela?

  • Wanem sampela pasin na tok inap mekim na yutupela i pilim olsem narapela i no rispektim narapela?

SAMPELA ROT

  • Raitim 3-pela samting yu laik bai poroman marit i mekim bilong soim rispek long yu. Tokim poroman marit long mekim wankain. Bihain, senisim lista na wok strong long soim rispek long narapela narapela long ol samting yutupela i raitim.

  • Raitim lista bilong ol pasin yu laikim long poroman marit. Bihain, tokim poroman marit olsem yu amamas tru long ol dispela gutpela pasin bilong em.

“Bilong rispektim man bilong mi, pasin bilong mi i soim olsem mi tingim em na mi laik bai em i stap amamas. I no olsem mi mas mekim wanpela bikpela samting; sampela taim ol pasin mi mekim inap soim olsem mi rispektim em.”—Megan.

Bikpela samting em poroman marit i pilim olsem yu rispektim em na i no yu holim tingting olsem yu gat pasin bilong rispektim em.

STIATOK BILONG BAIBEL: “Yupela i mas kisim bikpela pasin sori, pasin helpim, pasin daun, pasin isi, na pasin bilong i no les kwik.”—Kolosi 3:12.