Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  No. 2 2017

Maski ol muvi na buk samting i kamapim ol stori bilong ol spirit nogut na bai ol man i amamas long en, yumi mas was gut long ol hevi ol i kamapim

 FRAN PES STORI | HUSAT I STRONGIM WOK BILONG OL SPIRIT NOGUT?

Baibel i Tok Wanem Long Wok Bilong Ol Spirit Nogut?

Baibel i Tok Wanem Long Wok Bilong Ol Spirit Nogut?

OL MAN i gat kain kain tingting long wok bilong ol spirit nogut, sampela i ting em ol stori nating ol man i kamapim long ol muvi, tasol Baibel i givim tok lukaut long wok bilong ol spirit nogut. Long Lo 18:10-13, Baibel i tok: “Yupela i no ken . . . larim ol manmeri bilong yupela i mekim olkain pasin bilong glasman, na pasin tambaran na pasin sanguma na wokim posin na mekim marila. Na yupela i no ken toktok wantaim tewel bilong ol man i dai pinis.” Bilong wanem? Baibel i tok: “God, Bikpela bilong yumi, i no laikim tru ol manmeri i save mekim ol dispela kain pasin nogut. . . . Long olgeta pasin yupela i mas bihainim tru Bikpela.”

Wai na Baibel i givim tok lukaut long wok bilong ol spirit nogut?

OL ENSEL NOGUT

Baibel i tok paslain long God i wokim heven na graun, em i wokim planti milion spirit, em ol ensel. (Jop 38:4, 7; Revelesen 5:11) Olgeta wan wan ensel i stap fri long mekim ol disisen, ol inap makim wanem samting i gutpela na wanem samting i nogut. Tasol sampela bilong ol i bikhet long God na ol i lusim wok ol i holim long heven, na ol i kam daun long graun na kamapim ol bikpela hevi. Olsem na pasin bilong “pait na bikhet” i pulap long olgeta hap bilong graun.—Stat 6:2-5, 11; Jut 6.

Baibel i tok ol dispela ensel nogut i giamanim na pulim planti milion man. (Revelesen 12:9) Ol i kirapim ol man long kisim save long ol samting bai painim ol long bihain.—1 Samuel 28:5, 7; 1 Timoti 4:1.

 Sampela taim ol ensel nogut inap mekim ol samting i soim olsem ol i laik helpim ol man. (2 Korin 11:14) Tasol ol i pasim tingting bilong ol manmeri na bai ol i no kisim save long tok i tru bilong God.—2 Korin 4:4.

Tok bilong Baibel i kamapim klia olsem pasin bilong toktok wantaim ol spirit nogut inap bagarapim man. Olsem na long taim bilong ol aposel, taim ol man i kisim stretpela save na ol i kamap disaipel bilong Jisas, “planti bilong ol husat i save wokim ol kain kain marila posin samting, ol i karim ol buk bilong ol i kam na kukim,” maski ol dispela buk i gat bikpela pe.—Aposel 19:19.

“Planti tineja i lukim ol piksa na ritim ol buk bilong ol man i wok mejik na ol i laik bilas na bihainim pasin bilong ol.” —Gallup Youth Survey, 2014

Long nau, planti i no laik insait long wok bilong ol spirit nogut na lukim ol muvi samting we i stori long dispela. Olsem, taim Maria * i gat 12-pela krismas, em i save tokaut long ol hevi na ol samting bai kamap bihain. Em i save ritim long ol wanskul bilong em ol kas em ol i kolim tarot na bai ol i save long samting bai painim ol long bihain. Ol dispela samting i kamap tru, olsem na Maria i amamas long insait long wok bilong ol spirit nogut.

Maria i ting em i kisim presen i kam long God bilong helpim ol manmeri. Em i tok: “Mi inap ritim ol kas na save long ol samting bai painim ol narapela. Tasol mi tingting planti, long wanem, mi no inap long save long ol samting bai painim mi long bihain.”

Maria i gat planti askim, olsem na em i beten long God. Bihain ol Witnes Bilong  Jehova i bungim em, na em i kirap stadi long Baibel wantaim ol. Nau em i kisim stretpela save long Baibel olsem God i no as bilong ol wok em i mekim. Na tu, em i kisim save olsem man husat i laik kamap pren bilong God, em i mas rausim olgeta samting i insait long wok bilong ol spirit nogut. (1 Korin 10:21) Olsem na em i mekim wanem? Maria i tromoi olgeta samting em i save yusim bilong toktok wantaim ol spirit nogut, olsem ol paspas, ol kat, ol nekles, na ol buk samting. Nau em i helpim ol narapela long kisim stretpela save long tok i tru bilong Baibel.

Taim Michael i tineja, em i amamas long ritim ol buk i stori long ol vempaia, ol god i gat bikpela strong, na ol wulf man. Em i tok: “Mi laik tru long save long ol dispela lain i gat wankain krismas olsem mi na long ol ples ol i go long en.” Isi isi Michael i kisim pasin bilong ritim ol buk i stori long wok mejik, na tu, em i mekim ol samting bilong lotuim Satan. Em i tok: “Mi laik kisim sampela save moa long wok bilong ol spirit nogut, olsem na mi ritim ol buk na lukim ol muvi i stori long dispela samting.”

Tasol long rot bilong stadi long Baibel, Michael i luksave olsem em i mas skelim gen ol buk em i ritim. Em i tok: “Mi wokim wanpela lista bilong ol samting i insait long wok bilong ol spirit nogut na mi rausim ol. Mi kisim wanpela bikpela skul. Long 1 Korin 10:31, Baibel i tok: ‘Yupela i mas mekim olgeta samting bilong givim glori long God.’ Mi askim mi yet olsem, ‘Buk mi ritim i givim glori long God?’ Sapos nogat, mi no ken ritim dispela buk.”

Tok bilong Baibel i olsem lam, em i kamapim nambawan gutpela save. Na em i tokaut long yumi mas sakim wok bilong ol spirit nogut. (Song 119:105) Na tu, Baibel i tok promis olsem klostu nau ol spirit nogut bai i no stap moa long bosim ol man. Gutpela samting tru bai painim ol man long dispela taim. Song 37: 10, 11 i tok: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol. Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”

^ par. 10 Mipela i senisim ol nem long dispela atikol.