Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  No. 2 2016

 NIUS I KAM LONG OLGETA HAP

Nius Bilong Pasin Pren

Nius Bilong Pasin Pren

Olsem wanem? Taim yu gat hevi wantaim pren bilong yu, yu save ritim Baibel bilong kisim ol gutpela edvais? Kisim save long olsem wanem ol gutpela savetok bilong Baibel i winim ol wok painimaut bilong ol man.

INDIA

Wanpela sevei long 2014 i tok, inap olsem 61 pesen bilong ol yangpela em krismas bilong ol i namel long 18 na 25 i ting man na meri i no marit i ken mekim maritpasin. Planti man “long India i ting i nogat rong long mekim olsem.” Wanpela dokta long Mumbai i tokim nius Hindustan Times olsem, “planti yangpela i gat boipren na gelpren, tasol ol i no tingting long marit. Ol i ting i nogat rong long pren tasol, slip nabaut wantaim narapela, o man na meri i no marit i stap wantaim na ol i no pasim tok long marit.”

TINGIM: Olsem wanem? Sapos man na meri i no marit i slip wantaim, ol inap kisim sik bilong pamuk, o bel na tingting i kotim ol? Na olsem wanem sapos ol i wet inap long ol i marit?—1 Korin 6:18.

DENMAK

Sapos oltaim yu kros pait wantaim ol narapela long famili, dispela inap mekim na taim yu gat 35 i go 50 krismas yu inap long i dai. Ol saveman long University of Copenhagen i mekim wok painimaut long klostu 10,000 man husat i gat dispela kain krismas insait long 11-pela yia. Na ol i luksave olsem ol man em planti taim ol i save tok pait long ol narapela em ol i pas gut wantaim, ol i save dai hariap winim ol man husat i no save kros. Wanpela meri husat i insait long dispela wok painimaut i tok taim man inap long karim hevi bilong en, em i gat planti wok, na em i traim long stretim ol hevi wantaim ol narapela “em ol gutpela rot bilong helpim em long i stap laip inap longpela taim.”

BAIBEL I TOK: “Man i gat planti save, em i no save toktok planti. Na man i gat gutpela tingting, em i no save belhat kwik.”Sindaun 17:27.

AMERIKA

Wanpela wok painimaut long 564 nupela marit long Louisiana, i soim olsem long taim ol man na meri i pren tasol na ol i gat pasin bilong lusim pasin pren bilong ol na bihain ol i pren gen, long taim ol i marit ol i save brukim marit na stap seperet insait long fes 5-pela yia ol i marit. Na tu, planti taim ol i save kros pait na ol i no amamas long marit bilong ol.

BAIBEL I TOK: “Samting God i pasim pinis [marit], man i no ken katim.”—Matyu 19:6.