Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  No. 2 2016

 FRAN PES STORI

Yu Ting Baibel Em Gutpela Buk Tasol?

Yu Ting Baibel Em Gutpela Buk Tasol?

Ol man i raitim Baibel klostu 2 tausen yia i go pinis. Kirap long dispela taim na i kam inap long nau, ol man i raitim planti arapela buk, sampela bilong ol dispela buk i no stap long nau. Tasol long nau ol man i ritim yet Baibel. Yumi laik kisim sampela save moa long olsem wanem Baibel i no wankain long ol arapela buk.

  • Ol man i gat namba i traim long pasim wok bilong transletim Baibel, tasol ol i no inap tru. Buk An Introduction to the Medieval Bible i tok, namel long yia 500 na 1500 samting long ol kantri ol man i tok ol i Kristen, “planti i ting ol i brukim lo sapos ol i gat Baibel na ol i ritim long tokples bilong ol yet.” Ol saveman i trensletim Baibel long tokples bilong ol yet o ol i kirapim ol man long stadi long Baibel i redi long lusim laip bilong ol, long wanem, ol man i birua long ol. Na ol i kilim i dai sampela bilong ol.

  • Maski planti man i birua long Baibel, ol man i tilim dispela buk long planti hap bilong graun winim olgeta narapela buk. Ol i prinim klostu 5 bilion kopi bilong Baibel olgeta o hap bilong en long winim 2,800 tokples. Tasol taim yumi skelim Baibel wantaim ol buk i stori long tingting bilong ol man, saiens, na ol narapela topik, planti man i no baim ol dispela buk. Na dispela i kamapim klia olsem ol dispela buk i no inap helpim ol man.

  • Long sampela tokples we ol man i bin trensletim Baibel, dispela i helpim ol long raitim gut ol tok long tokples bilong ol, na tu, kamapim ol tok i klia long ol man i ken ritim. Olsem, Martin Luther i trensletim Baibel long tok Jeman na dispela i helpim ol man long kliagut long dispela tokples. Na tu, ol man i tok fes edisen bilong Baibel King James Version long tok Inglis, “em wanpela buk we i bin helpim tru planti man.”

  • Tok bilong Baibel “i stiaim pasin na tingting bilong ol man long ol kantri olsem Amerika na Yurop. Na tu, Baibel i senisim ol lo, wok politik, ol buk na nius, ol bilip na pasin bilong lotu, piksa na musik, na planti arapela samting.”The Oxford Encyclopedia of the Books of the Bible.

Tru tumas, Baibel i narapela kain long ol arapela buk. Bilong wanem planti man i amamas long ritim Baibel? Wai na planti man i redi long lusim laip bilong ol long trensletim Baibel? Sampela risen em olsem: Baibel i gat planti gutpela savetok bilong helpim i stap bilong yumi na olsem wanem yumi inap pas gut wantaim God. Na Baibel i helpim yumi long kliagut long risen na ol man i karim pen na hevi na i gat ol woa. Na tu, Baibel i tok promis olsem ol hevi bilong yumi bai pinis na hau dispela samting bai kamap.

 Baibel i Kamapim Ol Stretpela Lo

Em tru olsem em i bikpela samting long go long skul. Tasol wanpela atikol long niuspepa Ottawa Citizen bilong Kanada i tok: “Maski man i go long bikpela skul na kisim ol setifiket na diploma samting, dispela i no inap helpim em long bihainim stretpela pasin.” Lain Edelman i mekim wok painimaut long graun olgeta long ol man i kisim bikpela skul na ol man i go pas long ol wok bisnis na gavman. Ol i tok ol dispela man i save stil, mekim pasin giaman, na paulim mani, olsem na “ol man i no trastim ol moa.”

Planti taim Baibel i stori long ol stretpela pasin em yumi mas bihainim na ol samting God i laik yumi mas mekim. Em i helpim yumi long “save long olgeta gutpela rot bilong wokabaut. Bai yu save long bihainim ol gutpela na stretpela pasin na long mekim wankain pasin long olgeta man.” (Sindaun 2:9) Tingim, wanpela man i gat 23 krismas, em yumi ken kolim Stephen i stap kalabus long Polan. Taim em i stap yet long kalabus, em i kirap stadi long Baibel na em i laikim tru tok em i kisim save long en. Em i tok: “Nau mi save long insait bilong dispela tok ‘onarim papa bilong yu na mama bilong yu.’ Na tu, mi lain long bosim bel na tingting bilong mi, moa yet pasin bilong belhat.”Efesus 4:31; 6:2.

Stephen i laikim tru stiatok bilong Baibel long Sindaun 19:11, em i tok: “Man i gat gutpela tingting, em i no inap kros kwik. Nambawan pasin bilong en i olsem. Em i no save tingim rong narapela man i mekim long em.” Taim wanpela hevi i kamap long Stephen, em i save stap isi na tingim ol samting em inap mekim, na hau em inap bihainim ol stiatok bilong Baibel. Em i tok: “Mi luksave olsem Baibel em wanpela gutpela buk tru long helpim yumi.”

Maria em wanpela Witnes Bilong Jehova. Wanpela taim, wanpela meri i birua na bikmaus long en long pablik ples, olsem na planti man i kam bung. Tasol Maria i no bekim tok long en, em i tanim na wokabaut i go. Dispela meri i pilim hevi long pasin em i mekim na em i go painim ol Witnes. Klostu wanpela mun bihain em i lukim Maria, olsem na em i go  hagim em na tok sori long em. Em i luksave olsem Maria i gat pasin isi na pasin bilong bosim bel, na dispela i kamapim klia ol bilip bilong lotu bilong em. Wanem gutpela samting i kamap long dispela? Dispela meri na 5-pela narapela wanfamili bilong em i kirap stadi long Baibel wantaim ol Witnes Bilong Jehova.

Jisas Krais i tok pasin man i mekim i kamapim klia savetingting bilong em. (Luk 7:35) I gat planti samting i soim olsem ol stiatok bilong Baibel i save helpim yumi! Ol dispela tok i helpim yumi long mekim ol gutpela disisen. Ol tok bilong Baibel “i save givim gutpela tingting long ol man i no gat planti save,” “mekim bel bilong yumi i amamas,” na “givim gutpela save long yumi” long bihainim stretpela pasin na kliagut long tok i tru.Song 19:7, 8.

Baibel i Stori Long As na i Gat Ol Woa, Pen na Hevi

Taim ol man i mekim wok painimaut long wanpela bikpela sik, ol i laik save long risen dispela sik i kamap. Olsem tasol, yumi laik kliagut long risen na i gat ol woa na ol pen na hevi. Baibel inap helpim tru yumi, long wanem, em i stori long yumi kamap olsem wanem na hau ol hevi bilong yumi i kirap.

Buk Stat i kamapim klia olsem ol hevi bilong ol man i kirap taim fes man na meri i sakim tok bilong God. Tupela i no laik daun long Krieta bilong yumi husat i gat rait long bosim yumi ol man, ol yet i laik makim wanem samting i gutpela na wanem samting i nogut. (Stat 3:1-7) Olsem na kirap long dispela taim olgeta man i holim dispela tingting olsem ol i gat rait long bosim wokabaut bilong ol yet. Wanem samting i kamap long dispela? Kirap long bipo yet na i kam inap long nau, ol man i no stap amamas na fri long mekim ol samting, nogat. I gat ol woa, pasin bilong daunim ol narapela, na ol man i no bihainim ol stretpela lo bilong God. (Saveman 8:9) Dispela em risen na Baibel i tok: “Mipela man i no inap bosim wokabaut bilong mipela.” (Jeremaia 10:23) Tasol yumi amamas olsem klostu nau wok bos bilong ol man na ol pen na hevi bai pinis.

 Baibel i Helpim Yumi Long Bilip na Wet

Baibel i tok God i laikim ol man husat i daun long wok bos bilong em na i laik bihainim ol lo bilong Em, olsem na klostu nau em bai pinisim olgeta man nogut, na tu, em bai pinisim ol pen na hevi. Ol man nogut bai “kisim pe nogut bilong ol pasin nogut [ol] i save mekim.” (Sindaun 1:30, 31) Tasol “ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”Song 37:11.

“Laik bilong [God] i olsem, em i laik kisim bek olgeta kain man na em i laik bai ol i kisim stretpela save long tok i tru.”1 Timoti 2:3,4

Long rot bilong “Kingdom bilong God,” Em bai mekim samting em i tingting pinis long mekim, em long kamapim bel isi long graun olgeta. (Luk 4:43) Dispela Kingdom em gavman we bai bosim graun olgeta, na long rot bilong dispela gavman God bai bosim olgeta man. Long Beten Bilong Bikpela, Jisas i kamapim klia olsem wanem dispela Kingdom bai kamapim bel isi long graun. Em i tok: “Kingdom bilong yu i mas i kam. Laik bilong yu i mas kamap long graun.”Matyu 6:10.

Tru tumas, ol man i stap aninit long Kingdom Bilong God bai mekim laik bilong God, na ol bai sapotim wok Bos bilong Krieta. Ol woa, hevi bilong mani, pasin korapsen, pasin mangal, na pasin bilong birua long ol man bilong wanpela ples bai pinis olgeta. Bai i gat wanpela gavman na olgeta man bai sindaun gut wantaim. Na ol bai bihainim ol stretpela pasin na mekim laik bilong God.Revelesen 11:15.

Sapos yumi laik stap long dispela nupela taim, yumi mas kisim stretpela  save. Long 1 Timoti 2:3, 4, Baibel i tok: “Laik bilong [God] i olsem, em i laik kisim bek olgeta kain man na em i laik bai ol i kisim stretpela save long tok i tru.” Tok i tru i makim olgeta tok bilong Baibel, yumi ken tok em ol lo na stiatok bilong dispela Kingdom. Jisas i stori long planti bilong ol dispela tok taim em i mekim Bikpela Tok Long Maunten. (Matyu, sapta 5-7) Taim yu ritim dispela tripela sapta, piksaim long tingting laip bai olsem wanem taim olgeta man i bihainim ol savetok bilong Jisas.

Yumi no kirap nogut olsem Baibel em wanpela buk we ol man i bin tilim long olgeta hap bilong graun winim ol narapela buk. Long wanem, God yet i as bilong ol tok bilong Baibel. Ol i tilim Baibel long planti hap bilong graun, dispela i soim olsem God i laik bai ol man bilong kain kain tok ples na kantri i kisim save long em na ol gutpela samting em Kingdom bilong em bai kamapim long bihain.Aposel 10:34, 35.