Long olgeta yia, planti milion bebi i save dai long rot bilong rausim bel, dispela namba i winim populesen bilong planti kantri.

Yu ting i stret long meri i rausim bel?

OL MAN I TOK

 

I gat planti risen na ol meri i rausim bel, olsem hevi bilong mani na marit, tingting long kisim bikpela skul o wok mani, o ol i no laik stap olsem singel mama. Tasol sampela i ting i no stret long rausim bel, i olsem meri i brukim tok promis long lukautim bebi i stap long bel.

BAIBEL I TOK

 

Long ai bilong God, laip bilong man em samting i dia tumas. (Stat 9:6; Song 36:9) Dispela stiatok i makim tu bebi i stap long bel bilong mama, em ples God i wokim bilong bebi i ken stap gut long en na i go bikpela. Wanpela man bilong raitim Baibel i tok: “Yu wokim mi olgeta insait long bel bilong mama. Yu lukim mi taim mama i no karim mi yet. Mi no kamap yet long graun, tasol yu raitim pinis long buk bilong yu.”—Song 139:13, 16.

Lo God i givim long lain Israel i kamapim tingting bilong em long laip bilong bebi i no bon yet, na tu, em i givim maus bilong bel long yumi. Lo i tok sapos wanpela man i paitim meri i gat bel na bebi i dai, orait i stret dispela man i mas dai. Laip bilong em i mas bekim laip bilong dispela bebi. (Kisim Bek 21:22, 23) Tasol ol jas i mas skelim gut wanem samting i kamap na risen na dispela man i mekim olsem.—Namba 35:22-24, 31.

Olgeta man i gat maus bilong bel. Taim meri i bihainim maus bilong bel na rispektim laip bilong bebi long bel, maus bilong bel bilong em bai i no kotim em. * Sapos em i sakim maus bilong bel, em bai tingting planti na bel bai kotim em. (Rom 2:14, 15) Tru tumas, ol wok painimaut i kamapim klia olsem ol meri husat i rausim bel inap tingting planti na kisim sik dipresen.

Olsem wanem sapos yu no laik kisim bel o yu tingting planti long mekim bikpela long pikinini? Lukim tok promis God i mekim bilong strongim bel bilong ol man i stap gut na bihainim ol lo bilong em: “Bikpela, sapos man i no lusim yu, orait yu no save lusim em. Sapos man i mekim stretpela pasin na i no gat asua, orait yu save bekim stretpela pasin tasol long em.” (Song 18:25) Baibel i tok: “God i save laikim tumas stretpela pasin. Em i no inap larim ol manmeri bilong en i lus.”—Song 37:28.

Maus bilong bel bilong ol tu i tokaut na i skelim ol. Na taim ol i tingting long dispela, orait tingting bilong ol yet bai tok ol i gat asua o ol i no gat asua.Rom 2:15.

 Olsem wanem sapos yu bin rausim bel?

OL MAN I TOK

 

Ruth em wanpela singel mama i tok: “Mi gat tripela pikinini na mi ting mi no inap long lukautim namba foa pikinini. Bihain long mi rausim bel, mi pilim olsem mi mekim bikpela rong.” * Tasol yu ting God i no inap tru long fogivim em?

BAIBEL I TOK

 

Jisas Krais i kamapim klia tingting bilong God taim em i tok: “Mi no kam bilong singautim ol stretpela man, nogat, mi kam bilong singautim ol sinman long tanim bel.” (Luk 5:32) Yes, maski yumi mekim ol bikpela rong, sapos yumi hevi tru long rong yumi mekim na tanim bel na askim God long fogivim yumi, em bai mekim olsem. (Aisaia 1:18) Long Buk Song 51:17, Baibel i tok: “Yu [God] no givim baksait long man i pilim hevi long sin na i daunim em yet.”

Taim maus bilong bel bilong man i klin na em i daunim em yet na i beten, orait God bai givim bel isi long em. Long Filipai 4: 6, 7, * Baibel i tok: “Kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God. Na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela.” Bihain long Ruth i stadi long Baibel na kamapim tingting bilong em long God long rot bilong beten, em i kisim bel isi. Em i kisim save olsem God i “save rausim ol sin” na em i no tingim gen.—Song 130:4.

Yumi bin mekim planti pasin nogut, na em [God] inap bekim bikpela hevi long yumi, tasol em i no save mekim olsem.Song 103:10.

^ par. 10 Long taim bilong karim bebi sapos man na meri i luksave olsem meri o bebi inap i dai, orait tupela yet bai skelim olsem dokta i mas helpim meri o pikinini long stap laip. Dispela samting i no save kamap planti taim long ol kantri i gat planti mani, long wanem, ol dokta i kisim ol nupela save long rot bilong stretim kain hevi.

^ par. 15 Mipela i senisim nem.

^ par. 18 Tok promis bilong kirap bek inap helpim ol man long kisim bel isi. Lukim het tok “Askim” long Wastaua bilong Epril 15, 2009, em i kamapim ol stiatok bilong Baibel bilong helpim yumi long ting olsem ol bebi i dai long bel bilong mama inap kirap bek.