Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  No. 1 2016

 BAIBEL I TOK WANEM?

Heven

Heven

Long nau, ol man i gat kain kain tingting na planti i tok pait long heven i makim wanem samting. Tasol tok bilong Baibel long heven i narapela kain long samting ol lotu i skulim ol man long en.

Dispela tok heven i makim wanem samting?

SAMPELA MAN I TOK

Ol man i gat narapela narapela bilip long heven. Olsem:

  • Planti man husat i tok ol i Kristen bai wanbel long tok bilong buk New Catholic Encyclopedia olsem, heven “em ples we ol gutpela man husat i bilip long Bikpela i go stap long en taim ol i dai.”

  • Rabai Bentzion Kravitz i tok, lotu Juda i stori planti long samting i painim yumi long nau, na i no long ol samting i painim yumi taim yumi dai. Tasol em i tok, “tewel bilong man i stap amamas long heven, na em i stap klostu long God winim long taim em i stap long graun.” Kravitz i tok “ol Juda i bilip long heven, tasol buk Tora i no stori tumas long dispela.”

  • Ol Hindu na Budis i bilip olsem i gat planti ples olsem heven em ol spirit i go stap long en. Ol i bilip olsem taim man i dai, em i bon gen olsem bebi long graun, o em i kamap tewel na i go stap long Nevana, em ples i gutpela moa winim heven.

  • Sampela man i sakim bilip bilong ol lotu olsem ol bai go long heven, long wanem, ol i ting i nogat as bilong dispela bilip.

Ol man i gat kain kain tingting long heven i makim wanem samting

BAIBEL I TOK

Long Baibel dispela tok “heven” inap makim planti samting. Olsem:

  • Long Buk Stat 1:20, Baibel i stori olsem God i wokim ol pisin na ol i “flai nabaut long skai.” Long tok Hibru, dispela tok skai inap makim “heven.”

  • Long Baibel, Aisaia 13:10, (NW ) i stori long “lait bilong olgeta sta long heven.” Long dispela skripsa, “heven” i makim ples antap.

  • Baibel i tok long God olsem, “yu stap long ples bilong yu long heven,” na i gat ‘ol ensel long heven.’ (1 King 8:30; Matyu 18:10) Dispela tok “heven” i makim wanpela ples tru na i no tok piksa, nogat. *

“Bikpela, yu stap long ples bilong yu long heven, em dispela ples bikpela lait na strong bilong yu i pulap long en. Tasol yu mas lukluk i kam daun na lukim mipela.”Aisaia 63:15.

 Yu ting ol gutpela man i go long heven taim ol i dai?

Baibel i no tok, yumi bai stap sotpela haptaim long graun na taim yumi dai yumi go long heven. Baibel i kamapim klia olsem taim God i wokim ol man, Em i laik bai ol i stap oltaim long graun. Tingim:

  • God i bin tokim fes man na meri olsem: “Yupela i mas kamap planti na i go sindaun long olgeta hap bilong graun.” (Stat 1:28) Dispela i makim olsem God i wokim graun na bai ol man i stap oltaim long en. Tasol sapos fes man na meri i sakim tok bilong God, ol bai dai. Sori tru, tupela i mekim disisen long sakim tok bilong God.—Stat 2:17; 3:6.

  • Taim fes man i sakim tok bilong God, dai i painim em na meri bilong en na ol tumbuna pikinini bilong ol. (Rom 5:12) Olsem na yu ting i no gat gutpela samting bai painim ol man bilong graun?

  • Baibel i tok: “God i promis pinis long wokim nupela skai na nupela graun, . . . Em dispela samting tasol yumi wetim.” * (2 Pita 3:13) Long rot bilong Kingdom Bilong God, Em bai stretim graun bilong yumi olsem em i bin tingting long mekim long pastaim, “na bai i no gat dai moa.” (Revelesen 21:3, 4) Yu ting tok bilong dispela skripsa i makim olsem ol man bai stap laip long heven o long graun? Dispela tok ‘bai i no gat moa’ i makim olsem dispela samting i bin kamap, tasol bihain em bai pinis. Tingim, i no gat wanpela man i bin dai long heven. Olsem na dispela tok i makim samting bai kamap long graun, em ples God i wokim bilong yumi i stap long en. Na yumi laik tru long stap wantaim ol man yumi laikim. Na tu, Baibel i tok ol man i dai pinis bai kirap bek na stap wantaim ol man ol i laikim tru.—Jon 5:28, 29.

Planti manmeri i amamas long kisim save long tok Baibel i mekim long heven. Olsem, George em bipo em i wanpela Katolik i tok: “Taim mi kisim save long tok bilong Baibel olsem ol man bai stap oltaim long graun, dispela i mekim isi bel bilong mi. Ol tok mi lainim i gat as tru bilong en.” *

“Heven em i ples bilong God tasol, na em i givim graun long yumi manmeri.”Song 115:16.

^ par. 13 God em i spirit, em i no gat bodi olsem bilong yumi. (Jon 4:24) Olsem na i stret long em i stap long ples spirit, na i no long dispela graun.

^ par. 19 Dispela tok “nupela graun” i makim lain em God i orait long ol na ol bai i stap long graun, na i no makim wanpela nupela graun tru.—Song 66:4.

^ par. 20 Baibel i tok aninit long Kingdom Bilong God, Em bai makim 144,000 manmeri long mekim wok king wantaim Jisas long heven.—1 Pita 1:3, 4; Revelesen 14:1.