Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  Disemba 2015

Ol Weil i Kam Pinis!

Ol Weil i Kam Pinis!

Long olgeta yia, long kirap bilong mun Julai, ol weil meri (Eubalaena australis) i save raun i kam long hap saut bilong Santa Catarina, Brasil. Sampela bilong ol i stap long hap bilong Antaktika na ol i swim i kam inap planti tausen kilomita long dispela hap we solwara i daun. Long dispela hap, ol i karim ol pikinini na mekim bikpela long ol. Inap sampela mun ol man bilong dispela ples na ol turis i save raun i kam long ol nambis na ol klif, na ol i amamas tru long lukim ol weil na ol pikinini bilong ol i pilai na slip long wara! *

Ol Bikpela Pis i Save Kalap

Wanpela meri weil i longpela inap 16 mita, na bikpela bilong en em inap olsem wanpela bikpela bas em hevi bilong en inap 80 ton! Kala bilong ol em blak, na sampela i gat waitpela kala long bel bilong ol. Ol i gat bikpela het tru na maus bilong ol i longpela na i krungut liklik. Em i nogat pul long baksait olsem sampela weil i gat. Bilong em i ken swim, em i save meknaisim tel bilong en i go antap na i kam daun, na i no go long sait sait olsem ol pis i save mekim. Na taim em i laik senisim ron bilong en na swim i go long narapela hap, em i save yusim pul long sait bilong en. Dispela i wankain long hau ol balus i save senisim ron bilong ol.

Maski ol dispela weil i bikpela, ol inap long kalap i go antap tru na mekim kain kain stail. Taim ol i swim yu inap lukim tel bilong ol i stap antap long solwara inap longpela taim tru, na ol inap apim tel bilong ol na paitim strong wara. Na tu, ol i save kalap i go antap tru na taim ol i pundaun long wara, dispela i mekim bikpela nois na wara i kalap i go  nabaut. Olsem na maski yu stap longwe tru, yu inap long lukim ol dispela weil.

Ol i Gat Narakain Lukluk

Long het na ol hap klostu long het bilong weil, i gat ol liklik waitpela na yelopela bukbuk we planti liklik kuka i pas long en. Ol man i tok ol kuka i olsem ol laus bilong ol weil. Karina Groch, em kodineta bilong lain Brazilian Right Whale Project i tok: “Olgeta man i gat narapela narapela pingaprin, olsem tasol olgeta bukbuk long skin bilong ol weil i no wankain, na dispela i helpim ol man long luksave long wan wan weil. Taim ol weil i kam long nambis, mipela i save kisim poto bilong ol na putim long wanpela buk.”

Ol saientis bilong skelim ol samting i gat laip i tok ol dispela weil i nogat tit, olsem na i hatwok long save long krismas bilong ol long taim ol i dai. Tasol ol i ting olsem ol dispela weil i save stap inap 65 krismas samting. *

Narapela Kain Pasin Bilong Kaikai

Ol dispela weil i save kaikaim ol liklik kuka na kindam samting. Na long maus bilong ol i gat planti samting olsem gras. Taim ol i swim ol i save opim maus, olsem na ol liklik kuka samting i save pas long gras long maus bilong ol. Na long dispela rot, ol weil inap kaikai inap olsem 2-pela ton kuka long olgeta de.

Long taim bilong san long Janueri na Februeri, ol weil long hap saut i save kam painim kaikai long solwara Antaktika. Dispela i helpim bodi bilong ol long kamapim planti gris. Olsem na taim ol i swim long wara i kol, ol dispela gris i helpim ol long i stap hat, na tu, ol inap swim i go long ples i longwe tru na ol i no hangre.

Wai Ol Man i Painim na Kilim Ol Dispela Weil?

Kirap long yia 1750 samting, ol man i wok long painim na kilim ol weil long Hap Saut. Na ol i save amamas long kilim ol dispela weil, long wanem, ol i no save swim hariap. Maski ol man i raun long ol bot ol i wokim long diwai, ol inap long yusim ol spia long kilim ol dispela weil. Na tu, taim ol i kilim ol dispela weil, ol i save trip antap long solwara bikos ol i gat bikpela gris long bodi bilong ol. Olsem na ol man inap long pulim ol weil i go long nambis.

Na tu, ol gris na gras long maus bilong ol weil i gat bikpela pe tru long bipo. Ol man i bin yusim ol gris olsem oil long ol lam long ol strit. Na ol i yusim gras long maus bilong weil long wokim ol klos bilong ol meri, ol wip bilong paitim ol hos, na ol bun bilong ambrela. Pe bilong ol samting olsem gras ol i kisim long weil i wankain long hamas mani ol i tromoi bilong painim na kilim ol weil!

Long kirap bilong yia 1900 samting, ol man i kilim klostu olgeta weil, olsem na ol man i no mekim moa wok bisnis long baim ol weil. Long 1973, ol i pasim laspela ples we ol i save lukautim ol weil long Brasil. Maski i gat planti weil long nau, sampela famili bilong ol weil i laik pinis olgeta.

Dispela weil em wanpela bilong ol narakain samting i gat laip i stap long graun. Na dispela i kamapim klia bikpela strong na savetingting bilong God Jehova, em Man Bilong Wokim Olgeta Samting.—Song 148:7.

^ par. 2 Ol narapela ples ol weil i go stap long en bilong karim pikinini, em long ol nambis bilong Ajentina, Auckland Islands, Australia, Saut Afrika, na Yurugwai.

^ par. 8 Ol saientis i tok i gat 3-pela kain famili bilong dispela weil. Ol dispela weil em Eubalaena australis long Hap Saut, Eubalaena glacialis na Eubalaena japonica long Hap Not.