Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  Novemba 2015

Laip Bilong Ol Man i Stap Aipas

Laip Bilong Ol Man i Stap Aipas

“Long taim mi bon, ol i putim strongpela marasin long ai bilong mi, olsem na mi no lukim klia ol samting. Na taim mi tineja mi kamap aipas, dispela i mekim mi bel hevi tru.”—Paqui em meri i gat 50 krismas samting na man bilong em tu i aipas.

I GAT planti risen na man inap kamap aipas o em i no inap lukluk gut. Ating sampela i kisim bagarap long bodi, o ol i kisim bikpela sik. Taim kain samting olsem i kamap, dispela inap givim hevi long kru, ai, na ol wailis bilong ai. Planti taim ol man i aipas o ol i no inap lukluk gut i bel hevi na pret, na tu, ol inap pilim olsem ol arapela i no tingim ol. Tasol planti bilong ol i wok strong long karim dispela hevi na mekim ol samting bilong i stap amamas.

Ai bilong yumi i save helpim yumi long kisim save long planti samting. Olsem na taim wanpela i kamap aipas, em bai mekim wok long ol arapela hap bilong bodi bilong en. Olsem, em inap harim krai bilong ol samting, smelim ol samting, pilim ol samting long han, na teistim ol samting long maus.

Nius Scientific American i tok, ol saveman i mekim wok painimaut long hau kru bilong yumi i save wok, na ol i kisim save olsem kru bilong yumi inap long “senisim sampela wok bilong en. Wok painimaut i soim olsem taim wanpela hap bilong bodi i bagarap, kru bilong yumi i no inap mekim wok long en. Tasol em inap mekim bikpela wok long ol narapela hap bilong bodi.” Tingim:

Harim krai bilong ol samting: Taim yu harim wanpela man i toktok o krai bilong man i wokabaut, yu inap piksaim em long tingting maski yu no lukim em. Fernando em wanpela aipas i tok: “Mi save gut long krai bilong nek na pasin bilong wanpela long wokabaut.” Juan tu em wanpela aipas i tok: “Long rot bilong putim yau long krai bilong nek bilong man, ol aipas inap save husat i toktok wantaim em.” Wankain olsem man husat inap lukluk, krai bilong nek i helpim ol aipas long save olsem man i toktok long em i amamas o em i kros.

Wanpela aipas man inap save gut long krai bilong ol samting. Na dispela inap  helpim em long save long ples em i stap long en, kar i ron long wanem hap, bikpela bilong haus em i stap long en, na long ples em inap bungim ol hevi.

Smelim ol samting: Smel bilong ol samting inap helpim yumi long kisim sampela save moa. Olsem, taim wanpela aipas i wokabaut long rot em inap smelim ol samting, na dispela i helpim em long save long ol samting i stap long dispela ples. Olsem, ol restron, ol maket, na ol stua ol i salim kofi samting. Na taim ol i save gut long krai bilong ol samting na ol inap pilim long han, dispela i helpim ol long save long hap ol i stap long en.

Pilim ol samting long han: Francisco i tok: “Ol han bilong mi i stap olsem ai bilong mi.” Na tu, sampela i yusim stik bilong wokabaut bilong helpim ol long pilim ol samting. Manasés i bon olsem wanpela aipas, na long taim em i liklik yet em i skul long yusim stik bilong wokabaut. Em i tok: “Mi amamas olsem mi inap yusim ol arapela hap bilong bodi bilong mi, mi inap tingim gut ol samting, na mekim wok long stik bilong wokabaut long helpim mi long save long rot bilong wokabaut.”

Wanpela aipas i ritim nius Wastaua ol i raitim long Brel

Pasin bilong pilim ol samting i helpim ol aipas long ritim ol buk em ol i raitim long Brel. Long nau, planti aipas i kisim helpim bilong mekim ol i stap bel isi na ol inap kisim save long God. Na tu, long rot bilong teknoloji ol man i wokim ol odio rekoding long kompiuta bilong helpim ol aipas long  kisim save long Baibel na ol buk na nius bilong Baibel. *

Ol buk na nius bilong Baibel i givim bel isi na helpim Paqui na man bilong em long wet long ol gutpela samting bai painim ol long bihain. Na tu, ol i amamas olsem ol i gat bikpela famili bilong tok i tru, em ol Witnes Bilong Jehova long Kongrigesen Kristen husat i save helpim ol. Paqui i tok: “Nau mipela i stap amamas na mipela inap lukautim mipela yet.”

Ol aipas i save bungim planti hevi. Tasol ol inap yusim ol arapela hap bilong bodi long helpim ol long karim ol hevi bilong i stap olsem aipas na ol inap long stap amamas long nau!

^ par. 10 Ol Witnes Bilong Jehova i wokim planti buk na nius bilong Baibel long Brel long winim 25 tokples.