Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  Septemba 2015

 NIUS I KAM LONG OLGETA HAP

Nius Bilong Midel Is

Nius Bilong Midel Is

Midel Is em wanpela bilong ol ples we ol man i bin sindaun long en long pastaim tru. Olsem na ol saveman long nau i painim planti gutpela samting bilong bipo long dispela hap.

Lain Kenan Bilong Bipo i Wokim Wain

Long 2013, ol saveman i painim wanpela bikpela haus bilong lain Kenan we ol i putim ol botol wain long en. Dispela haus i stap klostu 3,700 yia samting. Na insait long en i gat inap 40 bikpela botol, na dispela i wankain long 3,000 botol wain bilong nau. Wanpela saveman i skelim gut ol pipia bilong wain i pas long ol dispela botol, na em i luksave olsem lain Kenan bilong bipo i save gut long pasin bilong wokim wain. Em i tok: “Ol i bihainim gut pasin bilong wokim wain long olgeta wan wan botol.”

YU SAVE LONG DISPELA? Baibel i tok lain Israel bilong bipo i wokim ‘wain i swit moa,’ na ol i pulimapim long ol sospen graun.—Solomon 7:9; Jeremaia 13:12.

Populesen i Go Bikpela Tru

Wanpela ripot long niuspepa Guardian i tok, long 2012 inap olsem 560,000 bebi i bon long Isip winim long yia 2010. Magued Osman i wok wantaim Baseera, em wanpela kampani long Isip i save mekim ol wok painimaut, na em i tok: “Em fes taim long populesen bilong Isip long i go antap tru.” Sampela saveman i tok, sapos populesen i wok long i go bikpela yet ol man bai sot long wara, kaikai, na fiul samting.

YU SAVE LONG DISPELA? Baibel i tok, God i laik bai ol man i mas “i go sindaun long olgeta hap bilong graun,” na ol bai gat olgeta samting ol i nidim bilong i stap amamas.—Stat 1:28; Song 72:16.

Ol i Painim Ol Bras Koin

Ol man i painim winim 100 bras koin klostu long wanpela bikrot long Israel. Ol dispela koin i gat rait olsem “Yia 4,” na dispela i makim namba 4 yia we lain Juda i pait long ol Rom (69-70 C.E.) na biktaun Jerusalem i bagarap. Pablo Betzer em man i go pas long mekim dispela wok painimaut i tok: “Ating wanpela man i lukim olsem lain ami bilong Rom i kam long bagarapim taun bilong ol. Olsem na em i haitim mani bilong en na ting bihain em bai i kam bek na kisim.”

YU SAVE LONG DISPELA? Long yia 33 C.E., Jisas i tok profet olsem ami bilong Rom bai bagarapim biktaun Jerusalem. Na em i tokim ol Kristen long ranawe i go long ol ples maunten na hait.—Luk 21:20-24.