Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  Ogas 2015

 BAIBEL I TOK WANEM?

No Ken Les Kwik

No Ken Les Kwik

Taim ol man i fogivim narapela na i no les kwik, ol inap long pas gut wantaim. Tasol i gat mak long bihainim pasin bilong i no les kwik?

Hau bai yu kisim pasin bilong i no les kwik?

LONG NAU

Long graun olgeta, ol man i gat pasin bilong les kwik. Dispela pasin i go bikpela bikos ol man i litimapim kantri, birua long ol man bilong narapela ples, na wanpela lotu i birua long narapela lotu.

BAIBEL I TOK

Taim Jisas Krais i stap long graun na autim tok, ol man i birua long narapela na ol i no stap wanbel. Ol Juda na ol Samaria i bin birua long narapela narapela. (Jon 4:9) Na ol man i luk daun long ol meri, na tu, ol hetman bilong lotu Juda i mekim nogut long ol man nating. (Jon 7:49) Tasol pasin bilong Jisas i narapela kain, olsem na ol birua bilong en i tok: “Dispela man i save amamas long ol sinman i kam long em na em i save kaikai wantaim ol.” (Luk 15:2) Jisas i mekim gutpela pasin, i no les kwik, na em i no skelim pasin bilong ol man, nogat. Em i helpim ol long i go klostu long God, long wanem, em i laikim ol tru.—Jon 3:17; 13:34.

Jisas i no les kwik na skelim ol man, nogat, em i helpim ol long i go klostu long God

Sapos yumi gat pasin laikim, yumi no inap les kwik long narapela, maski em i rongim yumi. Long Kolosi 3:13, Baibel i tok: “Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela.”

“Na moa yet, yupela i mas laikim tru ol arapela, long wanem, pasin laikim i karamapim planti sin.”1 Pita 4:8.

 Bilong wanem pasin bilong i no les kwik i gat mak bilong en?

LONG NAU

Planti kantri i putim ol lo, na dispela i helpim ol man long bihainim stretpela pasin.

BAIBEL I TOK

Man i gat pasin laikim “i no save bikhet nabaut.” (1 Korin 13:5) Maski Jisas i gat pasin bilong i no les kwik, em i no orait long olkain pasin bikhet, ol man bilong tupela maus, na ol man i mekim pasin nogut, nogat. Em i strongim bel na tokaut olsem God i no orait long ol dispela pasin. (Matyu 23:13) Jisas i tok: “Man i save mekim ol stingpela samting, em i heitim lait” bilong tok i tru.—Jon 3:20.

Aposel Pol i tok: “Yupela i mas heitim tru pasin nogut, na pas tru long gutpela pasin.” (Rom 12:9) I stap bilong Pol i soim olsem em i bihainim dispela tok. Olsem, taim sampela Juda Kristen i no laik bung wantaim ol man bilong ol arapela lain, Pol em i wanpela Juda i strongim bel na long gutpela pasin em i tokim ol olsem pasin ol i bihainim i no stret. (Galesia 2:11-14) Pol i save olsem God “i save mekim wankain pasin long olgeta manmeri,” olsem na God bai no larim pasin bilong mekim nogut long ol narapela i stap namel long lain bilong em.—Aposel 10:34.

Ol Witnes Bilong Jehova i larim Baibel i stiaim ol long bihainim stretpela pasin. (Aisaia 33:22) Olsem na ol i no larim pasin bilong bel nogut i stap namel long ol. Kongrigesen Kristen i mas stap klin, na ol man i sakim lo bilong God i no ken bung wantaim kongrigesen. Ol Witnes i bihainim tok bilong Baibel olsem: “Yupela i mas rausim dispela man nogut i stap namel long yupela.”—1 Korin 5:11-13.

“Bikpela i laikim tru ol manmeri i no save laikim pasin nogut.”Song 97:10.

Yu ting God bai larim ol man nogut i stap oltaim?

PLANTI MAN I TING

Planti i ting pasin nogut bai stap oltaim, long wanem, em pasin bilong ol man.

BAIBEL I TOK

Profet Habakuk i beten long God Jehova olsem: “Olsem wanem na yu lukim ol dispela samting nogut i kamap long ol manmeri na yu no mekim wanpela samting? Long olgeta hap mi lukim ol i bagarapim ol manmeri na ol samting bilong ol. Na ol man i save kros na pait nabaut.” (Habakuk 1:3) God i mekim gut bel bilong Habakuk olsem em bai kotim ol man nogut. Em i tok: “Yu ting bai em i no inap kamap kwik, tasol yu mas wet liklik na em bai i kamap.”—Habakuk 2:3.

Long nau, rot i op long ol man nogut i ken senisim pasin bilong ol. Baibel i tok: “Mi God, Bikpela, mi laik askim yupela, yupela i ting mi save amamas taim wanpela man nogut i dai, a? Nogat tru. Mi save amamas long taim man i lusim sin bilong en na i stap gut.” (Esekiel 18:23) Ol man i tanim bel na i go klostu long Jehova inap bilip na wet long ol gutpela samting bai kamap bihain. Baibel i tok: “Ol manmeri i putim yau gut long tok bilong mi, bai ol i stap gut. Na bai ol i no gat hevi na bai ol i no pret, long wanem, ol i save, samting nogut i no inap kamap long ol.”—Sindaun 1:33.

“I no longtaim na bai ol man nogut i lus olgeta. . . . Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”Song 37:10, 11.