Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  Me 2015

“God i Helpim Mipela Long Stap Bel Isi”

“God i Helpim Mipela Long Stap Bel Isi”

NATALYA na pikinini man bilong em, Aslan i gat 9-pela krismas i sindaun klostu long Zarina na pikinini meri bilong en Anzhelika husat i gat 12-pela krismas. Ol paitman i holim ol gan na bom samting i kidnepim winim 1,000 man na ol pikinini na ol i stap namel long ol dispela lain.

Long Trinde, Septemba 1, 2004, ol pikinini na ol papamama i redi long selebretim fes de bilong skul long Beslan, em wanpela liklik taun long Alania, Rasia. Wantu tasol, winim 30 paitman i holim ol gan na bom i ran i kam na sut long gan. Ol i bikmaus na fosim olgeta man long go insait long haus bilong pilai spot long skul, na ol i putim ol bom long olgeta hap bilong dispela haus.

Hevi i Go Bikpela Tru

Ol paitman i pait wantaim ol ami na polis samting inap 3-pela de. Long dispela taim, Natalya i stadi long Baibel wantaim ol Witnes Bilong Jehova i tok: “Mi beten planti taim winim olgeta narapela taim.”

Em taim bilong san na dispela haus bilong pilai spot i hot tru. Long moning bilong de namba 2, ol paitman i no givim kaikai na wara long ol man ol i kidnepim. Olsem na long de namba 3, em Fraide, ol manmeri i dring pispis na kaikai plaua em ol pikinini i bringim bilong givim long ol tisa. Natalya i tok: “Wanpela mangi i sindaun klostu long mipela i givim wanpela lip long mi, na mi brukim na givim hap long Anzhelika na narapela hap long Aslan.”

Bihain long de namba 3, hevi i go bikpela tru. Natalya i tok: “Mi kirap nogut taim mi harim bom i pairap. Mi lukim smok i stap long olgeta hap na ol man i wok long sut long gan.” Taim dispela samting i kamap, Natalya na Aslan i krol i go  bilong painim ples hait. Alan em wanpela asples bilong Ossetia i helpim tupela long ranawe. Tasol planti man i stap yet long dispela hap.

Bihain Long Dispela Bikpela Hevi

Anzhelika i dai long taim ol paitman i kilim ol man i dai

Planti handret man na ol pikinini i dai, na Anzhelika tu i dai. Inap planti wik, ol man long Beslan i krai sori long ol man i dai long dispela hevi. Natalya i stap klostu long skul, na maski gavman i wokim nupela skul, Aslan i no laik go long skul, na tu, em i no save pilai ausait. Natalya i tok: “Mipela i beten long Jehova i ken helpim em long daunim pasin bilong pret.” Bihain liklik, Aslan i no pret moa long go long skul.

Natalya tu i bungim wanpela hevi, i hatwok long em i go long ol miting Kristen long Haus Kingdom. Em i tok: “Taim mi stap insait long wanpela haus o rum na i gat planti manmeri, mi save pret olsem ol man nogut bai kam na kilim mipela i dai. Taim mi kisim dispela tingting, mi save beten long kain hevi olsem i no ken kamap. Tasol bihain liklik mi lusim pasin bilong go long ol miting. Na tu, mi save bel hevi olsem planti man i bin dai long dispela hevi, na mipela i no kisim bagarap.”

Mi Stap Bel Isi

Natalya i tok: “Mi tenkyu olsem ol bratasista long kongrigesen i helpim mi.” Wanpela Witnes, nem bilong em Tatyana i save visitim mi 3-pela de long olgeta wik. Bihain, em i kam wantaim narapela Witnes nem bilong em Ulyana. Ulyana i save gut long tok bilong Baibel na em i gat gutpela pasin, pasin bilong skelim gut ol samting, na em i save toktok isi. Em i mekim gutpela tok long pasin bilong mi long givim bel long stadi, na em i putim gut yau long ol tok bilong mi.

“Mi no pret na bel hevi, olsem na mi inap stori long dispela hevi”

Natalya i tok: “Ulyana i ritim tok aposel Pol i mekim bihain long wanpela hevi i bin kamap long Esia. Dispela tok i stap long 2 Korin 1:9, em i tok: ‘Mipela i pilim wankain olsem man em jas i tok long em i mas i dai.’ Na tu, em i ritim tok bilong Aisaia 40:31, olsem: ‘Ol manmeri i bilip long Bikpela na i wetim em i helpim ol, ol bai i stap strong oltaim. Na bai ol i flai olsem ol tarangau.’ Ol kain skripsa olsem i strongim mi. Na tu, oltaim Ulyana na ol narapela i mekim ol gutpela tok bilong mekim isi bel bilong mi. Dispela i kirapim mi na ol pikinini bilong mi long go gen long ol miting Kristen. Maski i olsem, sampela taim mi pilim olsem i hatwok long stap long ol ples bung samting.”

Bihain Zarina i kamap wanpela Witnes Bilong Jehova. Em i bilip na wet long taim Kingdom Bilong God bai bosim graun olgeta, na ol manmeri bai kirap bek na stap amamas na bel isi. Long dispela taim em bai amamas long lukim pikinini meri bilong em Anzhelika i kirap bek. (Matyu 6:9, 10; Aposel 24:15) Long 2009, Natalya na ol pikinini bilong em i kisim baptais. Ol i stap klostu long dispela hap we ol paitman i bin kidnepim ol na kilim sampela man i dai, tasol ol i no larim hevi i daunim ol. Natalya i tok: “Mi no pret na bel hevi, olsem na mi inap stori long dispela hevi. God i helpim mipela long stap bel isi.”