Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  Mas 2015

 BILONG HELPIM FAMILI | MARIT

Pas Gut Wantaim Ol Tambu

Pas Gut Wantaim Ol Tambu

HATWOK BILONG EN

“Taim mi na meri bilong mi i gat sampela hevi long marit bilong mipela, em i save tokim papamama bilong em long ol dispela samting. Orait nau papa bilong em i ringim mi bilong givim edvais long mi. Mi no amamas long dispela pasin!”—James. *

“Planti taim tambu mama i save tok, ‘Mi wari long pikinini bilong mi!’ Em i stori olsem bipo em na pikinini man bilong em i pas gut wantaim. Dispela i mekim na bel i kotim mi. Ating mi maritim pikinini bilong em na em i bel hevi long dispela!”—Natasha.

Yu ting ol marit inap daunim pasin bilong tingim ol hevi bilong ol tambu olsem hevi bilong marit bilong ol?

SAMTING YU MAS SAVE LONG EN

Taim man na meri i marit, nau ol i gat famili bilong ol yet. Baibel i tok, taim man i marit em “bai lusim papa na mama bilong en na pas wantaim meri bilong en.” Na tu, meri marit i mas lusim papamama na pas wantaim man bilong en. Baibel i tok taim man na meri i marit, tupela i kamap “wanpela bodi” na dispela i soim olsem ol i gat famili bilong ol yet.—Matyu 19:5.

Tingim marit bilong yu olsem bikpela samting. Saveman John M. Gottman i save givim skultok long ol marit i tok: “Em i bikpela samting long ol marit i mas pilim tingting bilong narapela narapela long olgeta samting ol i mekim. Ol marit i mas lusim pasin bilong pas tumas wantaim papamama na ol bratasusa bilong ol na bai ol inap strongim marit bilong ol.” *

I hatwok long sampela papamama i mekim ol senis. Wanpela yangpela man marit i tok: “Taim meri bilong mi i singel, oltaim em i putim laik bilong papamama i stap nambawan. Tasol taim mipela i marit, mama bilong em i luksave olsem pikinini i tingim laik bilong mi olsem bikpela samting. Olsem na em i no amamas long dispela.”

Sampela nupela marit i hatwok long mekim ol senis. James em yumi stori pinis long en i tok: “Yu inap makim ol pren bilong yu, tasol yu no inap mekim olsem long tambu papamama. I olsem wanpela i tok, ‘Yu gat tupela nupela pren. Na yu mas stap pren bilong ol,’ maski sampela taim ol i skrapim bel bilong yu!”

 SAMTING YU KEN MEKIM

Sapos yu na poroman marit i no wanbel long samting ol tambu papamama i mekim, i gutpela long toktok gut wantaim long stretim dispela hevi. Bihainim tok bilong Baibel long ‘kamap wanbel wantaim ol arapela na strong long bihainim dispela pasin.’—Song 34:14.

Bilong helpim yu long mekim olsem, yumi ken skelim ol samting we inap kamap. Ol dispela tok inap makim ol hevi i save painim man marit na meri marit. Na ol stiatok inap helpim ol marit long stretim ol hevi ol i gat wantaim ol tambu papamama.

Meri i laik bai yu pas gut wantaim mama bilong em. Tasol i hatwok long mekim olsem.

Traim dispela: Toktok wantaim meri bilong yu long dispela samting, na redi long pilim tingting bilong em. Bikpela samting i olsem, tingim meri bilong yu na tok promis yu bin mekim long laikim em tru. No ken tingim hevi yu gat wantaim tambu mama bilong yu. Taim yu na meri i stretim tok, makim wanpela o 2-pela rot yu inap bihainim bilong stap bel isi wantaim mama bilong em. Orait bihain pasim tok long bel long mekim ol dispela samting. Taim meri i luksave olsem yu wok strong long pas gut wantaim mama bilong em, dispela bai kirapim em long rispektim yu moa.—Stiatok bilong Baibel: 1 Korin 10:24.

Man bilong yu i tok yu laik amamasim papamama bilong yu na yu no tingim em.

Traim dispela: Toktok wantaim man bilong yu long dispela samting, na kliagut long tingting bilong em. I tru olsem yu bihainim tok bilong Baibel long lukautim papamama, olsem na man bilong yu i no ken bel hevi long dispela. (Sindaun 23:22) Tasol em i bikpela samting tu long soim man bilong yu olsem yu tingim tru em. Yu ken mekim olsem long toktok na pasin bilong yu na bai man i stap bel isi, long wanem, em i save olsem yu laikim em tru.—Stiatok bilong Baibel: Efesus 5:33.

Taim hevi i kamap meri i kisim edvais long papamama na em i no toktok wantaim yu.

Traim dispela: Toktok wantaim meri long wanem kain hevi em yutupela yet bai stretim. Na i gutpela yupela i holim stretpela tingting long dispela. Olsem wanem? Yu ting i no stret long toktok wantaim papamama long olgeta hevi bilong yupela? Wanem taim i stret long mekim olsem? Sapos yutupela i holim stretpela tingting na wanbel long wanem hevi em yutupela yet bai stretim, orait dispela i no inap kamap olsem wanpela bikpela hevi.—Stiatok bilong Baibel: Filipai 4:5.

^ par. 4 Mipela i senisim ol nem long dispela atikol.

^ par. 9 I kam long buk The Seven Principles for Making Marriage Work.