ANTONIO DELLA GATTA i skul long Rom inap 9-pela yia na long 1969 ol i makim em long kamap pris. Em i mekim wok olsem pris long wanpela haus lotu o semineri klostu long Naples, Itali. Bihain long em i kisim save na tingim tingim ol samting em i lainim, em i luksave olsem Baibel i no as bilong ol bilip bilong lotu Katolik. Nius Kirap! i stori wantaim em long olsem wanem em i kisim save long God tru.

Stori long bekgraun bilong yu.

Mi bon long 1943 long Itali. Mi wantaim ol brata na ol susa bilong mi i go bikpela long wanpela liklik ples we papa i mekim wok olsem fama na kapenta. Papamama i strong long mipela i mas bihainim bilip bilong Katolik.

Bilong wanem yu kamap pris?

Taim mi liklik yet, mi save amamas tru long harim ol pris i mekim semon long haus lotu. Mi laikim pasin bilong ol long toktok na ol wok lotu ol i save mekim, olsem na mi laik kamap wanpela pris. Taim mi gat 13 krismas, mama i salim mi i go long boding skul. Dispela skul i save helpim ol mangi long kamap pris.

Ol i yusim Baibel taim ol i skulim yu?

Nogat, planti taim ol i no yusim Baibel. Taim mi gat 15 krismas, wanpela tisa i givim mi kopi bilong Ol Gutnius, em wanpela buk i stori long i stap na wok autim tok bilong Jisas long graun. Mi bin ritim dispela buk planti taim. Taim mi gat 18 krismas, mi go long Rom na skul long ol yunivesiti bilong kamap pris. Ol dispela yunivesiti i stap aninit long lukaut bilong pop. Mi kisim save long histori na bilip bilong ol lotu, pasin bilong ol man na olsem wanem tingting bilong ol i save wok, na tu, mi lainim tokples Latin na Grik. Maski mipela i save kolim ol Baibel ves na harim ol pris i ritim Baibel long ol semon long Sande, mipela i no kliagut long ol tok bilong Baibel.

Yu kamap pris, olsem na yu bin skulim ol arapela?

Planti taim mi save mekim wok long ofis. Tasol mi bin skulim ol arapela man i laik kamap pris long ol lo bilong Namba 2 Bung Bilong Vatiken.

Wanem samting i mekim na yu gat tupela tingting long lotu?

Mi tingting planti long 3-pela samting. Lotu Katolik i insait long wok politik na ol i orait long ol pasin nogut bilong ol bikman na ol man bilong dispela lotu. Na tu, sampela bilip bilong ol i no stret wantaim tok bilong Baibel. Dispela i mekim na mi gat ol askim. Olsem wanem God bilong pasin laikim i givim strafe long ol man i dai pinis? Na tu, em laik bilong God long yumi mas yusim rosari na kolim ol beten inap planti handret taim? *

Dispela i kirapim yu long mekim wanem?

Mi krai na beten long God i ken helpim mi. Long dispela taim ol i raitim Jerusalem Bible bilong ol Katolik long tokples Itali,  olsem na mi baim wanpela kopi na mi ritim. Long wanpela Sande moning, taim mipela i pinis long Misa, 2-pela man i kam long haus lotu. Ol i tok ol i Witnes Bilong Jehova. Winim wanpela aua samting mipela i stori long tok Baibel i mekim long trupela lotu.

Yu gat wanem tingting long ol Witnes?

Mi kirap nogut olsem ol i kamapim gut ol tok bilong Baibel na ol i no pret, maski ol i yusim Baibel bilong mi em ol Katolik yet i raitim. Bihain, Mario em wanpela Witnes i kam lukim mi. Em i gat pasin bilong i no les kwik na em i save truim tok bilong em. Long olgeta Sarere moning em i save kam long semineri long 9 klok, maski san i hat o ren i pundaun.

Ol narapela pris i gat wanem tingting?

Mi invaitim ol long insait long ol stadi bilong mi, tasol ol i no gat bikpela laik long stadi long Baibel. Tasol mi amamas tru long ol samting mi kisim save long en. Mi kisim save long as na God i larim pasin nogut na ol pen na hevi i stap, em samting mi bin tingting planti long en inap longtaim.

Ol bikman bilong lotu i laik pasim yu long stadi long Baibel?

Long 1975, mi go long Rom na bai mi ken stori long bilip bilong mi. Mi mekim olsem inap planti taim liklik. Ol bikman bilong lotu i laik bai mi senisim tingting bilong mi, tasol ol i no kamapim ol tok bilong Baibel. Olsem na long Janueri 9, 1976, mi raitim pas bilong toksave olsem mi no stap moa olsem wanpela Katolik. Tupela de bihain, mi lusim semineri na mi kalap long tren bilong i go long miting bilong ol Witnes Bilong Jehova. Taim mi kamap, mi luksave olsem planti kongrigesen i kam long dispela bung bilong lotu. Pasin bilong ol long mekim lotu i narapela kain olgeta! Ol man i mekim tok i yusim Baibel na ol man i stap long dispela bung i bihainim long Baibel bilong ol yet.

Famili bilong yu i gat wanem tingting long dispela disisen?

Planti bilong ol i no amamas long disisen bilong mi, olsem na ol i birua long mi. Tasol bihain mi kisim save olsem liklik brata bilong mi i stadi wantaim ol Witnes long Lombardy, em wanpela ples i stap long not Itali. Mi go lukim em, na ol Witnes long dispela hap i helpim mi long painim wok mani na ples slip. Bihain long dispela yia, mi kisim baptais olsem wanpela Witnes Bilong Jehova.

Mi amamas olsem nau mi stap klostu long God

Yu bel hevi long disisen bilong yu?

Nogat tru! Mi amamas olsem nau mi stap klostu long God, long wanem, ol save mi kisim em Baibel i as bilong en, na i no pasin na tingting bilong ol man. Na tu, mi bilip tru long ol samting mi kisim save long en na mi amamas long skulim ol narapela long tok i tru bilong Baibel.

^ par. 13 Baibel i kamapim klia ol bekim bilong ol dispela askim na planti arapela askim. Lukim het tok BIBLE TEACHINGS > BIBLE QUESTIONS ANSWERED.