Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Kirap!  |  Februeri 2015

 BILONG HELPIM FAMILI | WOK PAPAMAMA

Pikinini i Gat Askim Long Man i Dai Pinis

Pikinini i Gat Askim Long Man i Dai Pinis

HATWOK BILONG EN

Pikinini bilong yu i gat 6-pela krismas i askim yu, “Wanpela taim bai yu dai?” Ating yu kirap nogut long dispela askim na yu ting: ‘Pikinini bilong mi i bikpela inap long save long bekim bilong dispela askim? Bai mi stori olsem wanem long samting i painim man i dai pinis?’

SAMTING YU MAS SAVE LONG EN

Ol pikinini i save tingting planti long samting i painim man i dai pinis. Na sampela taim ol pikinini i pilai na mekim olsem ol i dai. Olsem na em i bikpela samting long stori wantaim pikinini bilong yu long ol askim em i gat long dai. Taim yu mekim olsem, dispela bai helpim pikinini long karim hevi bilong wanpela em i laikim i dai.

Taim yu toktok wantaim pikinini long samting i painim man i dai pinis, dispela inap helpim em long kisim stretpela save na em i no pret. Tasol yu mas helpim pikinini long kliagut long dispela samting. Olsem, sampela saveman i tok planti pikinini em krismas bilong ol i aninit long 6-pela krismas i ting taim man i dai em inap kirap gen bihain long sotpela haptaim. Olsem na ol pikinini i save kamapim kain stori olsem taim ol i mekim pilai bilong man i dai.

Tasol taim pikinini i go bikpela, ol i kliagut olsem taim man i dai em i no kirap bek bihain long sotpela haptaim, nogat. Dispela i mekim na ol i pret na tingting planti, na tu, ol i gat planti askim taim wanpela ol i laikim i dai. Olsem na em i bikpela samting long toktok wantaim pikinini long dispela. Savemeri bilong sik bilong tingting em Marion Haza i tok: “Sapos papamama i no laik toktok wantaim pikinini long samting i painim man i dai pinis, dispela bai mekim na pikinini i no kamapim ol tingting na askim bilong em long dai.”

No ken tingting planti long wanem tok bai yu mekim. Wanpela wok painimaut i kamapim olsem, ol pikinini i laik “harim tok tru, tasol yu mas kamapim long gutpela pasin.” Tingim olsem pikinini i givim askim, long wanem, em i laik save long bekim bilong en.

 SAMTING YU KEN MEKIM

Painim rot long stori wantaim pikinini long samting i painim man i dai pinis. Sapos pikinini i lukim wanpela pisin i dai long sait bilong rot o sapos dok bilong yupela i dai, yu ken givim ol askim bilong kisim tingting bilong em. Yu ken askim em olsem: “Taim animal i dai, yu ting em i pilim pen yet? Yu ting em i kol o em i hangre? Wanem samting i save kamap na yu inap tok wanpela man o animal i dai?”—Stiatok bilong Baibel: Saveman 3:1, 7.

Kamapim olgeta tok tru. Taim wanpela pren o wanblut i dai, no ken mekim kain tok olsem “Em i go pinis,” long wanem, dispela bai mekim pikinini i tingting planti. Pikinini bai ting dispela pren o wanblut i dai i go long wanpela hap na em bai kam bek gen. I gutpela moa long kamapim tok tru long pasin we pikinini inap kliagut long en. Olsem, yu ken tok: “Taim bubu meri i dai, em i no inap mekim wanpela samting moa. Yumi no inap toktok long em, tasol yumi gat ol gutpela memori bilong em.”—Stiatok bilong Baibel: Efesus 4:25.

Mekim gut bel bilong pikinini. Sampela pikinini bai ting olsem samting em i mekim i as na wanpela i dai. Long kain taim olsem, tokim pikinini olsem em i nogat asua long dai bilong dispela man. Na tu, yu ken askim em olsem, “Bilong wanem yu ting em asua bilong yu na em i dai?” No ken hariap long stretim pikinini, putim gut yau taim em i toktok long yu. Na tu, helpim pikinini long luksave olsem dai i no wankain long ol sik we inap kalap long narapela man, nogat. Na dispela bai mekim gut bel bilong em.

Helpim pikinini long kamapim tingting bilong em. No ken pret long stori long pikinini long ol wanblut i dai pinis, maski em i no bin bungim ol. Yu ken stori long ol gutpela samting em anti, ankol, na ol tumbuna papamama bilong yu i bin mekim taim yu pikinini yet. Taim yu mekim olsem, pikinini bai luksave olsem i nogat rong long stori o tingim ol man i dai pinis. Tasol tingim, no ken fosim pikinini long kamapim tingting bilong em. Bihain yu inap stori long dispela taim rot i op long mekim olsem.—Stiatok bilong Baibel: Sindaun 20:5.

Buk Kisim Skul Long Bikpela Tisa long sapta 34 na 35 inap helpim pikinini bilong yu long kisim save long tok Baibel i mekim long samting i painim man i dai pinis. . Lukim het tok PABLIKESEN > BUK & BUKLET

Helpim pikinini long luksave olsem dai i no wankain long ol sik we inap kalap long narapela man, nogat. Na dispela bai mekim gut bel bilong em