FAIV handret yia i go pinis, ol man bilong Spen i kam sindaun long Kosta Rika. Ol i kolim dispela ples olsem Kosta Rika o Rich Coast, mining bilong en nambis i gat planti samting. Ol i ting ol inap painim planti gol, tasol dispela tingting bilong ol i no stret. Long nau ol man i tingim dispela kantri olsem ples we i gat kain kain diwai na animal samting, na i no ples bilong painim silva na gol samting.

Ol i save kolim ol man bilong Kosta Rika olsem Ticos. Long tokples bilong ol, ol i save kolim dispela tok “-ico” long pinis bilong ol tok bilong makim samting i liklik. Olsem, long tokples bilong ol “un momento” i makim wet pastaim, tasol ol i save tok “un momentico” na dispela i makim wet liklik. Long olgeta tok bilong ol, ol i save tok “¡pura vida!” na dispela i makim stap gut. Ol i mekim kain tok olsem bilong kamapim olsem ol i amamas na wanbel long wanpela samting o ol i laik tok gude o gutbai.

Kosta Rika i gat planti bikbus na kain kain animal na diwai samting. Wanpela bilong ol dispela animal em rokrok bilong diwai (Agalychnis callidryas)

Ol man bilong Kosta Rika i laik tru long kaikai gallo pinto. Bilong redim dispela kaikai ol i save kukim rais na bin, na bihain ol i putim ol spais bilong mekim kaikai i swit. Ol i save kaikai gallo pinto long moning, belo na  long apinun. Wanpela dring bilong ol em bipo yet ol i save wokim em café chorreado. Bilong wokim dispela dring ol i save strenim kofi long wanpela hap laplap em ol i putim namel long wanpela liklik hap diwai ol i wokim olsem freim.

I gat klostu 450 kongrigesen bilong ol Witnes Bilong Jehova long Kosta Rika. Ol i mekim ol miting long 10-pela tokples. Wanpela bilong ol dispela tokples em tokples sain bilong Kosta Rika, na tupela em tokples bilong ol asples lain bilong Kosta Rika, em Bribri na Cabecar.

YU SAVE LONG DISPELA? I gat planti handret bikpela ston long Kosta Rika na ol dispela ston i raunpela. Ol i bin painim wanpela bilong ol bikpela ston olsem em braitpela bilong en 2.4 mita. Ol man i ting sampela bilong ol dispela ston i stap winim 1,400 yia. I no gat wanpela man i save long as na ol dispela ston i stap!

Ol raunpela ston