MATYU 13:55, 56 MAK 6:3

  • FAMILI BILONG JOSEP NA MARIA I GO BIKPELA

  • JISAS I SKUL LONG MEKIM WOK KAPENTA

Jisas i go bikpela long taun Nasaret, em wanpela liklik taun i no gat nem. Dispela taun i stap long hap not long ol ples maunten bilong Galili, na long hap wes em raunwara Galili.

Taim Jisas i gat 2-pela krismas samting, Josep na Maria i lusim Isip na bringim em i go long Nasaret. Ating long dispela taim, ol i gat dispela wanpela pikinini tasol. Bihain, Josep na Maria i kamapim sampela pikinini moa, em ol hap brata bilong Jisas. Nem bilong ol Jems, Josep, Saimon, na Judas. Na tu, tupela i kamapim sampela pikinini meri, em ol hap susa bilong Jisas. Olsem na Jisas i gat ol brata na susa i kamap bihain long em, olsem 6-pela samting.

Na tu, Jisas i gat ol arapela wanblut. Yumi save pinis long Elisabet na pikinini man bilong em Jon. Jon i stap inap planti kilomita long hap saut bilong Judia. Tasol Salome, em susa bilong Maria, em i stap klostu long hap bilong Galili. Man bilong Salome em Sebedi. Na ol i gat tupela pikinini man, em Jems na Jon, ol i kasen bilong Jisas. Yumi no save sapos tupela i bin poroman wantaim Jisas long taim ol i wok long go bikpela. Tasol bihain, ol i kamap gutpela pren bilong em, na tupela i mekim wok olsem aposel bilong Jisas.

Famili bilong Josep i go bikpela, olsem na em i mas wok hat bilong sapotim ol. Em i wanpela kapenta. Josep i mekim bikpela long Jisas olsem  pikinini bilong em yet, olsem na ol man i kolim Jisas olsem “pikinini bilong kapenta.” (Matyu 13:55) Josep i skulim Jisas long kamap wanpela kapenta, olsem na em i skul gut long mekim dispela wok. Bihain, ol manmeri i tok long Jisas olsem: “Em dispela kapenta.”—Mak 6:3.

Famili bilong Josep i tingim tru pasin bilong lotuim Jehova. Josep na Maria i bihainim Lo Bilong God, na ol i skulim ol pikinini bilong ol long tok bilong God ‘taim ol i stap long haus, long taim ol i wokabaut long rot, na long taim ol i malolo na long taim ol i wok.’ (Lo 6:6-9) I gat wanpela sinagog i stap long Nasaret. Na oltaim Josep i save bringim famili bilong em i go long dispela hap bilong lotu. Olsem na bihain ol manmeri i tok long Jisas olsem, em i go long sinagog “olsem em i save mekim long de Sabat.” (Luk 4:16) Na tu, long olgeta yia famili bilong ol i save amamas long go long tempel bilong Jehova long Jerusalem.