MATYU 9:14-17 MAK 2:18-22 LUK 5:33-39

  • OL DISAIPEL BILONG JON I ASKIM JISAS LONG PASIN BILONG TAMBU LONG KAIKAI

Jon Bilong Baptais i bin stap long kalabus inap sampela haptaim bihain long Jisas i mekim bung bilong Pasova long yia 30 C.E. Jon i laik bai ol disaipel bilong em i bihainim Jisas, tasol i no olgeta bilong ol i mekim olsem long ol mun em Jon i bin stap long kalabus.

Nau taim bilong mekim Pasova bilong yia 31 C.E. i kam klostu, na sampela disaipel bilong Jon i kam long Jisas na i askim em: “Bilong wanem mipela wantaim ol Farisi i save bihainim pasin bilong tambu long kaikai, tasol ol disaipel bilong yu i no save tambu long kaikai?” (Matyu 9:14) Ol Farisi i save bihainim pasin bilong lotu long tambu long kaikai. Bihain Jisas i mekim tok piksa long wanpela Farisi i beten olsem: “God, mi tenkyu olsem mi no olsem ol arapela man, . . . tupela taim long wik mi save tambu long kaikai.” (Luk 18:11, 12) Ating ol disaipel bilong Jon i bihainim dispela pasin bilong tambu long kaikai. O ating ol i tambu long kaikai, long wanem, ol i bel hevi long Jon i stap long kalabus. Ol manmeri tu i tingting planti long wai na ol disaipel bilong Jisas i no tambu long kaikai, ating ol i mekim olsem bilong soim olsem ol i bel sori long Jon.

Bilong bekim askim bilong ol, Jisas i mekim wanpela tok piksa olsem: “I no gat as na ol pren bilong man i laik marit i krai sori taim dispela man i stap yet wantaim ol, a? Tasol bihain ol man bai kam kisim dispela man i laik marit, na long dispela taim ol pren bai tambu long kaikai.”—Matyu 9:15.

Jon i tok Jisas i olsem dispela man i laik marit. (Jon 3:28, 29) Olsem na taim Jisas i stap yet, ol disaipel bilong em i no tambu long kaikai. Bihain, long taim Jisas i dai, ol disaipel bilong em bai i bel hevi na tambu long kaikai. Tasol bikpela senis bai kamap taim Jisas i kirap bek! Long dispela taim, ol i no inap bel hevi moa na tambu long kaikai.

Jisas i mekim dispela tok pinis long ol disaipel bilong Jon, na bihain em i mekim tupela tok piksa, olsem: “I no gat man i save yusim nupela hap laplap bilong stretim hul long olpela saket, long wanem, strong bilong nupela laplap bai pulim olpela laplap na hul bai kamap bikpela moa. Ol manmeri i no save putim nupela wain insait long ol olpela beg wain. Sapos ol i mekim olsem, orait ol beg wain bai bruk na wain bai kapsait, na ol beg wain tu bai bagarap. Tasol ol manmeri i save putim nupela wain long ol nupela beg wain.” (Matyu 9:16, 17) Wanem mining bilong tok bilong Jisas?

Jisas i helpim ol disaipel bilong Jon Bilong Baptais long save olsem i no gat wanpela man i mas ting olsem ol disaipel bilong em i mas bihainim ol olpela pasin bilong ol Juda, olsem ol lo bilong tambu long kaikai. Jisas i no kam bilong stretim ol olpela pasin bilong lotu em klostu nau ol bai pinis. Lotu em Jisas i kirapim ol disaipel bilong en long bihainim i no wankain long ol Juda long dispela taim, em ol man yet i kamapim ol pasin bilong lotu. Jisas i no laik yusim nupela laplap bilong stretim hul long olpela laplap o putim nupela wain insait long ol olpela beg wain.