Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Gutpela Nius i Kam Long God!

 Lesen 7

Kingdom Bilong God Em Wanem Samting?

Kingdom Bilong God Em Wanem Samting?

Wanem samting i mekim na Jisas i gutpela King tru?—MAK 1:40-42.

1. Kingdom Bilong God em wanem samting?

Kingdom Bilong God em wanpela gavman long heven. Em bai senisim olgeta arapela gavman na kamapim laik bilong God long heven na long graun. Olsem na ol samting Kingdom Bilong God bai kamapim em gutpela nius. Klostu nau Kingdom Bilong God bai inapim laik bilong ol man long stap aninit long gutpela gavman. Em bai mekim olgeta manmeri long graun i stap wanbel.Ritim Daniel 2:44; Matyu 6:9, 10; 24:14.

Wanpela kingdom i mas i gat king bilong en. Jehova i makim Pikinini bilong em, Jisas, long kamap King long Kingdom bilong Em.Ritim Revelesen 11:15.

2. Bilong wanem Jisas i gutpela King?

Pikinini Bilong God em i gutpela King, long wanem, em i save mekim gutpela pasin na em i strong long mekim stretpela pasin. (Jon 1:14) Na tu, em i gat bikpela strong inap long helpim ol manmeri, long wanem, em bai stap long heven na bosim graun. Bihain long Jisas i kirap bek, em i go antap long heven na em i wet long han sut bilong God. (Hibru 10:12, 13) Orait nau God i givim strong long em bilong kirap mekim wok king.Ritim Daniel 7:13, 14.

3. Husat bai mekim wok king wantaim Jisas?

Wanpela lain manmeri em Baibel i kolim ol olsem “ol manmeri bilong God,” ol bai mekim wok king wantaim Jisas long heven. (Daniel 7:27) Namba 1 lain i insait long en, em  ol gutpela aposel bilong Jisas. I kam inap nau, Jehova i makim yet ol man na meri i stap gut long em long insait long dispela lain. Olsem Jisas, ol i kirap bek wantaim bodi bilong heven.Ritim Jon 14:1-3; 1 Korin 15:42-44.

Hamas manmeri bai go long heven? Jisas i kolim ol olsem “liklik lain sipsip.” (Luk 12:32) Namba bilong ol em 144,000. Ol bai wok king wantaim Jisas na bosim ol manmeri bilong graun.Ritim Revelesen 14:1.

4. Wanem samting i kamap taim Jisas i kirap mekim wok king?

Kingdom Bilong God i kirap mekim wok long 1914. * Namba 1 samting Jisas i mekim taim em i kamap King, em i tromoi Satan wantaim ol ensel nogut i kam daun long graun. Satan i belhat na em i kirap kamapim ol hevi long olgeta hap bilong graun. (Revelesen 12:7-10, 12) Kirap long dispela taim na i kam, ol hevi i go bikpela tru. Ol woa, bikpela hangre, ol bikpela sik, na ol bikpela guria, em ol hap bilong “sain” we i makim olsem klostu nau Kingdom bai kirap bosim ol samting long graun.Ritim Luk 21:7, 10, 11, 31.

5. Kingdom Bilong God bai kamapim wanem ol samting?

Long rot bilong wok autim tok long olgeta hap, Kingdom Bilong God i wok long bungim planti manmeri bilong olgeta kantri na ol i stap wanbel wantaim. Planti milion manmeri i gat pasin daun i kam aninit long Kingdom Bilong God, em Jisas i King bilong en. Kingdom Bilong God bai lukautim ol, taim em i pinisim pasin nogut bilong dispela graun. Olsem na olgeta man husat i laik kisim ol gutpela blesing aninit long Kingdom Bilong God, ol i mas lain long bihainim tok na stap aninit long Jisas.Ritim Revelesen 7:9, 14, 16, 17.

Insait long 1,000 yia, Kingdom Bilong God bai kamapim laik bilong God long pastaim tru. Graun olgeta bai kamap Paradais. Bihain, Jisas bai givim Kingdom i go bek long Papa bilong em. (1 Korin 15:24-26) Yu tingim wanpela man em yu laik tokim em long Kingdom Bilong God?Ritim Song 37:10, 11, 29.

 

^ par. 12 Bilong kisim sampela save moa long olsem wanem Baibel i tok profet long yia 1914, lukim pes 216-218, bilong buk Tru Tru Baibel i Tok Wanem?