Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Gutpela Nius i Kam Long God!

 Lesen 8

Bilong Wanem God i Larim Pasin Nogut na Pen na Hevi i Stap?

Bilong Wanem God i Larim Pasin Nogut na Pen na Hevi i Stap?

Inap longpela taim God i larim ol man i bosim ol yet, na dispela i kamapim klia olsem ol i no inap stretim ol hevi

1. Pasin nogut i kirap olsem wanem?

Pasin nogut i kirap long graun taim Satan i mekim namba 1 tok giaman. Pastaim, Satan i wanpela gutpela ensel, tasol “em i no holimpas tok i tru.” (Jon 8:44) Em i no laik bai ol man i lotu long God—em i laik ol i mas lotu long em. Satan i giamanim namba 1 meri, Iv, na grisim em long bihainim tok bilong em na sakim tok bilong God. Adam tu i bihainim Iv na sakim tok. Disisen bilong Adam i kamapim pen na hevi na indai.Ritim Stat 3:1-6, 18, 19.

Taim Satan i pulim Iv long sakim tok bilong God, em i kirapim pasin bilong bikhet long wok bos bilong God, o namba bilong em olsem God Antap Tru. Klostu olgeta man i bihainim Satan na sakim God, olsem King bilong ol. Olsem na Satan i kamap “hetman bilong dispela graun.”Ritim Jon 14:30; 1 Jon 5:19.

2. Yu ting ol samting God i wokim i no gutpela tumas?

Olgeta samting God i wokim, i gutpela olgeta. Ol manmeri na ol ensel em God i bin wokim, ol inap tru long bihainim tok bilong God. (Lo 32:4, 5) God i wokim yumi long stap fri long makim pasin yumi laik bihainim—gutpela pasin o pasin nogut. Dispela pasin bilong stap fri i givim rot long yumi long kamapim klia olsem yumi laikim tru God.Ritim Jems 1:13-15; 1 Jon 5:3.

3. Bilong wanem God i larim pen na hevi i stap inap nau?

Inap sampela haptaim, Jehova i larim ol man i bikhet long wok bos bilong em. Bilong wanem? Bilong soim olsem taim ol man i bosim wokabaut bilong ol yet, dispela i no inap helpim ol. (Saveman 7:29; 8:9) Insait long 6,000 yia i go pinis, i stap bilong ol man i kamapim klia dispela samting. Ol bikman bilong gavman i no inap pinisim woa, pasin raskol, pasin i no stret, na sik.Ritim Jeremaia 10:23; Rom 9:17.

 Wok bos bilong God i helpim ol man husat i daun long en, tasol wok bos bilong ol man i no olsem. (Aisaia 48:17, 18) Klostu nau Jehova bai pinisim olgeta gavman bilong graun. Ol manmeri i stap aninit long wok bos bilong God, ol bai kisim graun na stap long en.—Aisaia 11:9.Ritim Daniel 2:44.

Ol disisen bilong yumi i soim olsem yumi laik bai God i stap olsem Bos bilong yumi o nogat

4. Pasin bilong God long wet i opim rot long yumi ken mekim wanem?

Satan i tok i no gat wanpela man inap laikim tru Jehova na mekim wok bilong Em. Olsem wanem? Yu laik soim olsem dispela tok i no tru? Yu inap mekim olsem! Pasin bilong God long wet, i givim rot long yumi olgeta long soim olsem yumi laik daun long wok bos bilong God o bilong ol man. Ol samting yumi mekim long i stap bilong yumi, i kamapim klia yumi laik daun long wok bos bilong husat.Ritim Jop 1:8-12; Sindaun 27:11.

5. Olsem wanem yumi makim God olsem Bos bilong yumi?

Yumi makim God olsem Bos bilong yumi taim yumi wok long kisim save na insait long lotu i tru, em Baibel i as bilong en. (Jon 4:23) Taim yumi no insait long wok politik na woa, yumi sakim Satan olsem hetman bilong yumi, olsem Jisas i bin mekim.Ritim Jon 17:14.

Satan i mekim wok long strong bilong em bilong kirapim ol man long mekim pasin nogut na ol pasin i save bagarapim ol man. Taim yumi sakim ol dispela pasin, sampela pren na wanblut bai tok bilas o birua long yumi. (1 Pita 4:3, 4) Olsem na yumi mas makim samting yumi laik mekim. Bai yumi bung wantaim ol man i laikim tru God? Bai yumi bihainim ol gutpela lo bilong em? Sapos yumi mekim olsem, yumi kamapim klia olsem Satan i giaman, taim em i tok i no gat wanpela man bai bihainim tok bilong God taim hevi i painim em.Ritim 1 Korin 6:9, 10; 15:33.

Pasin laikim bilong God i kamapim klia olsem, tru tru em bai pinisim pasin nogut na ol pen na hevi. Ol manmeri husat i bilip olsem wok bos bilong God i stret na ol i makim em olsem Bos bilong ol, ol bai amamas na stap oltaim long graun.Ritim Jon 3:16.