Olsem wanem ol stiatok i kirapim yumi long mekim ol samting we i no ken bagarapim laip bilong yumi yet na ol narapela?—SONG 36:9.

1. Bilong wanem yumi mas kisim tok bilong stiaim yumi?

Krieta bilong yumi i gat bikpela savetingting, winim yumi. Olsem wanpela Papa i gat pasin laikim, em i save tingim tru yumi. Na tu, em i no wokim yumi bilong bosim wokabaut bilong yumi yet. (Jeremaia 10:23) Papamama i mas stiaim liklik pikinini, na olsem tasol God i mas stiaim yumi olgeta. (Aisaia 48:17, 18) Ol stiatok bilong Baibel i stiaim yumi, na dispela em i wanpela presen i kam long God.Ritim 2 Timoti 3:16.

Ol lo na stiatok bilong Jehova i skulim yumi long nambawan gutpela rot bilong bihainim long nau, na i soim yumi rot bilong kisim ol gutpela blesing bilong i stap oltaim long bihain. God i wokim yumi, olsem na i stret yumi amamas long bihainim ol lo na stiatok bilong em.Ritim Song 19:7, 11; Revelesen 4:11.

2. Ol stiatok bilong Baibel i wanem samting?

Ol stiatok bilong Baibel em ol bikpela tok i tru we i stret long olgeta taim. Tasol ol lo bilong Baibel i stret long sampela samting tasol. (Lo 22:8) Yumi mas wokim gut tingting bambai yumi inap kliagut long olsem wanem stiatok i stret long wanpela samting i kamap. (Sindaun 2:10-12) Olsem, Baibel i tok laip em i presen God i givim. Dispela stiatok inap stiaim yumi long ples wok, long haus, na taim yumi raun. Em bai kirapim yumi long mekim ol samting long pasin we i no ken bagarapim laip bilong yumi yet na bilong ol narapela.Ritim Aposel 17:28.

 3. I gat wanem 2-pela bikpela stiatok?

Jisas i toktok long 2-pela bikpela stiatok. Namba 1 stiatok i kamapim klia as na yumi stap laip—yumi mas kisim save long God, laikim em tru, na stap gut long wok bilong em. Long olgeta disisen yumi mekim, yumi mas tingim dispela namba 1 bikpela stiatok. (Sindaun 3:6) Ol lain husat i bihainim dispela stiatok, ol bai kamap pren bilong God, stap amamas tru, na kisim laip oltaim.Ritim Matyu 22:36-38.

Namba 2 bikpela stiatok inap helpim yumi long stap wanbel wantaim ol narapela. (1 Korin 13:4-7) Bilong bihainim dispela namba 2 bikpela stiatok, yumi mas bihainim pasin God i mekim long ol manmeri.Ritim Matyu 7:12; 22:39, 40.

4. Olsem wanem ol stiatok bilong Baibel i helpim yumi?

Ol stiatok bilong Baibel i skulim ol famili long pasin bilong laikim narapela na stap wanbel. (Kolosi 3:12-14) Na tu, Tok Bilong God i lukautim ol famili long rot bilong narapela stiatok, olsem marit i mas stap strong oltaim.Ritim Stat 2:24.

Taim yumi bihainim ol stiatok bilong Baibel, dispela inap lukautim yumi long sait bilong wok mani na long ol samting yumi pilim long bel na tingting. Olsem, ol bos i save laikim ol wokman i bihainim ol stiatok bilong Baibel long pasin bilong wok strong na i no giaman. (Sindaun 10:4, 26; Hibru 13:18) Na tu, Baibel i skulim yumi long amamas long ol samting yumi holim pinis, na long tingim pasin pren yumi gat wantaim God i bikpela samting moa, winim mani kago.Ritim Matyu 6:24, 25, 33; 1 Timoti 6:8-10.

Taim yumi bihainim ol stiatok bilong Baibel, dispela inap lukautim helt bilong yumi. (Sindaun 14:30; 22:24, 25) Olsem, lo bilong God i tambuim pasin bilong dring spak, dispela i helpim yumi long abrusim ol eksiden na ol sik nogut we inap kilim yumi. (Sindaun 23:20) Jehova i orait long yumi ken dring liklik alkohol tasol. (Song 104:15; 1 Korin 6:10) Ol stiatok bilong God i helpim yumi long rot bilong skulim yumi long was gut long pasin na tingting bilong yumi. (Song 119:97-100) Tru, ol Kristen i rispektim ol lo bilong God long wanem dispela i helpim ol, tasol moa yet, ol i mekim olsem bilong onarim Jehova.Ritim Matyu 5:14-16.