Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Go Klostu long Jehova

 SAPTA 7

Strong Bilong Lukautim Ol Man—“God Em i Ples Hait Bilong Yumi”

Strong Bilong Lukautim Ol Man—“God Em i Ples Hait Bilong Yumi”

1, 2. Wanem kain bagarap inap painim lain Israel taim ol i kam long hap bilong Sainai long 1513 B.C.E.? Jehova i tok wanem bilong strongim ol?

BAGARAP inap painim lain Israel taim ol i kam long hap bilong Sainai long kirap bilong 1513 B.C.E. Ol i mas raun long wanpela hap ol i pret long en, ol i mas wokabaut long “dispela bikpela ples wesan nating, we i gat olkain snek na binatang i gat marasin nogut.” (Lo 8:15) Na ol lain man i birua long ol inap kam pait long ol. Jehova i bin mekim na lain bilong em i bungim dispela hevi. Em i God bilong ol, olsem na yu ting em inap lukautim ol na bagarap i no ken painim ol?

2 Jehova i mekim gutpela tok bilong strongim ol: “Yupela i lukim pinis ol samting mi bin mekim long ol Isip. Na yupela i lukim mi bin karim yupela, olsem tarangau i karim nupela pikinini long wing bilong en. Na mi bringim yupela i kam long dispela ples, na nau yupela i stap wantaim mi.” (Kisim Bek 19:4) Jehova i kirapim lain bilong em long tingim olsem em i bin kisim bek ol long Isip, i olsem em i mekim wok long ol tarangau bilong karim ol i go long ples ol i ken stap gut long en. Tasol i gat ol narapela as na ‘wing bilong tarangau’ i gutpela tok piksa bilong makim pasin bilong God long lukautim ol man.

3. Bilong wanem ‘wing bilong tarangau’ i gutpela tok piksa bilong makim pasin bilong God long lukautim ol man?

3 Tarangau i no save mekim wok long bikpela na strongpela wing bilong em bilong flai tasol. Nogat. Long taim san i hat tru, mama tarangau i save taitim tupela wing bilong em na wokim olsem ambrela—tupela wing i op wantaim i olsem 2 mita—bilong kamapim ples hait ol liklik pikinini bilong em i ken hait aninit long en long bikpela san. Long ol narapela taim em i save karamapim ol pikinini long tupela wing bilong em bilong lukautim ol na ol i no pilim kolwin. Olsem tarangau i  save lukautim ol pikinini bilong em, Jehova tu i bin banisim na lukautim lain Israel i no strong yet. Long ples drai nating, lain bilong Jehova inap i go yet long em na hait aninit long strongpela wing bilong em, sapos ol i stap gut long em. (Lo 32:9-11; Song 36:7) Tasol olsem wanem? I stret long yumi ken ting God bai lukautim yumi long nau?

God i Tok Promis Long Lukautim Man

4, 5. Bilong wanem yumi ken bilip tru long tok promis bilong God long lukautim man?

4 Jehova inap tru long lukautim ol wokman bilong em. Em i “God I Gat Olgeta Strong”—dispela biknem i makim olsem em i gat bikpela strong. (Stat 17:1) I no gat wanpela samting inap sakim strong bilong Jehova, olsem man i no inap sakim haiwara long kam. Em inap mekim olgeta samting em i gat laik long mekim, olsem na yumi ken mekim dispela askim: ‘Em laik bilong Jehova long yusim strong bilong em long lukautim lain bilong em?’

5 Bekim bilong dispela askim, em yes! Jehova i tok promis olsem em bai lukautim lain bilong em. Song 46:1 i tok: “God em i ples hait bilong yumi, na em i save strongim yumi oltaim. Em i stap klostu na i redi long helpim yumi long taim bilong bikpela hevi.” God “i no save giaman,” olsem na yumi ken bilip tru long tok promis bilong em long lukautim man. (Taitus 1:2) Nau yumi ken skelim sampela tok piksa Jehova i save mekim wok long en bilong stori long pasin bilong em long lukautim man.

6, 7. (a) Long taim bilong ol man i bin raitim Baibel wasman i mekim wanem bilong lukautim ol sipsip bilong em? (b) Baibel i mekim wanem tok piksa bilong soim bikpela laik bilong Jehova long lukautim gut ol sipsip bilong em?

6 Jehova em i Wasman, na “yumi manmeri bilong en, yumi olsem ol sipsip bilong en.” (Song 23:1; 100:3) Planti animal inap lukautim ol yet, tasol ol sipsip i no inap mekim. Wasman bilong sipsip long taim bilong ol man i bin raitim Baibel em i mas i gat strongpela bel bilong lukautim ol sipsip long ol laion, weldok, bea, na ol stilman tu. (1 Samuel 17:34, 35; Jon 10:12, 13) Tasol  sampela taim wasman i mas mekim gutpela pasin isi bilong lukautim ol sipsip. Taim sipsip i stap longwe long lain sipsip na karim pikinini, wasman i was long mama long dispela taim em i no inap lukautim em yet, na bihain wasman i apim dispela pikinini sipsip i no gat strong na karim i go long lain sipsip.

“Wasman i save putim ol pikinini sipsip long bros”

7 Taim Jehova i tok em i olsem wasman bilong sipsip, em i strongim yumi long bilip olsem em i gat laik tru long lukautim yumi. (Esekiel 34:11-16) Tingim tok Aisaia 40:11 i mekim long Jehova, em Sapta 2 bilong dispela buk i bin skelim. Em i tok: “Em i save was gut long ol lain manmeri bilong en, olsem wasman bilong sipsip i save lukautim ol sipsip bilong en. Wasman i save putim ol pikinini sipsip long bros na karim wokabaut.” Olsem wanem liklik sipsip inap i stap long “bros” bilong wasman—olsem insait long klos bilong em klostu long bros? Ating sipsip i kam klostu long wasman na subim lek bilong em liklik. Tasol wasman yet i mas lindaun na apim pikinini sipsip long pasin isi na putim em gut long bros bilong em. Dispela i makim gut laik bilong Bikpela Wasman bilong yumi long banisim na lukautim yumi!

8. (a) God i tok promis long lukautim husat? Olsem wanem Sindaun 18:10 i kamapim dispela samting? (b) Yumi mas mekim wanem na bai nem bilong God i ken lukautim yumi?

8 Bilong God i ken truim tok promis bilong em long lukautim ol man, ol i mas mekim sampela samting—ol i mas i go klostu long em. Sindaun 18:10 i tok: “Bikpela i olsem wanpela strongpela haus. Ol stretpela man i ken ran i go long en na i stap gut.” Long taim bilong ol man i bin raitim Baibel, sampela taim ol man i wokim ol taua long ples drai nating bilong ol man i ken stap long en na ol i no kisim bagarap. Tasol man i laik kisim bagarap em wok bilong em yet long ran i go long kain taua olsem bilong em i ken stap gut. I wankain liklik long man i laik painim ples hait long nem bilong God. Tasol yumi no ken kolim tasol planti taim nem bilong God; dispela nem yet i no wanpela samting i wokim nating ol mirakel. Nogat. Yumi mas save na bilip long Man i gat dispela nem na bihainim pasin i stret wantaim ol stretpela lo bilong em. Jehova i mekim gutpela pasin tru na tokim yumi olsem sapos yumi bilip long em na askim em long helpim yumi, em bai stap olsem taua bilong lukautim yumi!

 “God Bilong Mipela Em Inap Long Helpim Mipela”

9. Jehova i tok promis long lukautim man, tasol em i bin mekim wanem samting moa?

9 Jehova i no tok promis tasol long lukautim yumi, em i mekim sampela samting moa. Long taim bilong ol man i bin raitim Baibel, em i wokim ol mirakel i soim olsem em inap long lukautim lain bilong em. Taim lain Israel i stap, planti taim Jehova i bin helpim ol na ol birua i no inap bagarapim ol. (Kisim Bek 7:4) Tasol Jehova i yusim tu strong bilong em long lukautim wan wan man.

10, 11. Wanem ol stori bilong Baibel i soim olsem wanem Jehova i yusim strong bilong em long lukautim man?

10 Taim tripela yangpela Hibru—Satrak, Mesak na Abetnego—i no laik brukim skru long imis gol bilong King Nebukatnesar, king i kros nogut tru na i tok em bai tromoi ol i go insait long hatpela paia. Nebukatnesar i strongpela king tru i winim olgeta narapela king long graun, na em i tok bilas olsem: “Wanem god inap helpim yupela na kisim bek yupela?” (Daniel 3:15) Dispela tripela yangpela man i bilip tru long strong bilong God long lukautim ol, tasol ol i no gat tingting olsem em i mas mekim dispela samting. Olsem na ol i tok: “God bilong mipela em inap long helpim mipela.” (Daniel 3:17) Tru tumas, dispela paia, maski ol i mekim em i kamap hat nogut tru, em i no putim hevi long God i gat olgeta strong. Em i lukautim ol dispela Hibru, na king i mas tokaut olsem: “I no gat wanpela god inap long helpim ol manmeri bilong en olsem dispela God.”—Daniel 3:29.

11 Jehova i kamapim klia strong bilong em long lukautim man taim em i putim laip bilong dispela wanpela Pikinini bilong em i go long bel bilong Maria em wanpela meri Juda, i no bin slip wantaim man. Wanpela ensel i tokim Maria olsem em bai “kisim bel na karim wanpela pikinini man.” Ensel i tok: “Holi Spirit bai i kam long yu, na strong bilong God Antap Tru bai i karamapim yu.” (Luk 1:31, 35) Long dispela taim i luk olsem ol samting inap bagarapim Pikinini Bilong God. Olsem wanem? Mama i gat sin na i no gutpela olgeta, dispela inap mekim na pikinini i no klin? Satan inap bagarapim o kilim i dai dispela Pikinini paslain long mama i karim Em? Nogat tru! I olsem Jehova i  kamapim wanpela banis i raunim Maria na bai i no gat wanpela samting—olsem sin, ol samting nogut, man i laik kilim i dai pikinini, o spirit nogut—inap nogutim pikinini kirap long taim em i wok long kamap long bel. Jehova i wok yet long lukautim Jisas taim em i yangpela. (Matyu 2:1-15) I go inap long taim God i makim, i no gat wanpela man inap bagarapim gutpela Pikinini bilong em.

12. Long taim bilong ol man i bin raitim Baibel, bilong wanem Jehova i lukautim sampela man long rot bilong mirakel?

12 Bilong wanem Jehova i lukautim sampela man long rot bilong mirakel? Planti taim Jehova i lukautim ol man, long wanem, em i tingim wanpela samting i bikpela samting tru: em wok bilong inapim ol samting em i tingting pinis long mekim. Olsem: Em i bikpela samting long pikinini Jisas i mas i stap laip na bai em inap kamapim ol samting God i tingting pinis long mekim, em dispela samting bai helpim olgeta lain manmeri long bihain. Baibel i gat planti stori long God i mekim wok long strong bilong em long lukautim ol man, em ‘ol i bin raitim bilong skulim yumi na bilong strongim bel bilong yumi na mekim yumi sanap strong na wetim God i kisim yumi.’ (Rom 15:4) Yes, ol dispela stori i strongim yumi long bilip long God bilong yumi i gat olgeta strong. Tasol yumi ken ting God bai lukautim yumi olsem wanem long nau?

Ol Samting Pasin Bilong God Long Lukautim Man i No Makim

13. Yu ting Jehova i mas wokim mirakel bilong helpim yumi? Stori long dispela.

13 Tok promis bilong God long lukautim man i no makim olsem Jehova i mas wokim ol mirakel bilong helpim yumi. God bilong yumi i no tok promis olsem laip bilong yumi long dispela taim bai no gat ol hevi bilong en. Planti wokman bilong Jehova i stap gut long em ol i karim ol bikpela hevi, olsem ol i stap rabis, ol i stap long hap i gat woa, kisim sik, o i dai. Jisas i tokim ol disaipel bilong em olsem bilip bilong ol inap mekim na ol man i kilim ol i dai. Olsem na Jisas i tok em i bikpela samting long ol i mas sanap strong i go inap long pinis. (Matyu 24:9, 13) Sapos olgeta taim Jehova i wokim mirakel bilong lukautim  ol wokman bilong em na bagarap i no inap painim ol, ating i gat as na Satan i ken sutim tok long Jehova olsem yumi tingim yumi yet tasol na givim bel long God.—Jop 1:9, 10.

14. Wanem ol stori i soim olsem Jehova i no save lukautim olgeta wokman bilong em long wankain pasin?

14 Long taim bilong ol man i bin raitim Baibel, Jehova i no yusim strong bilong em long lukautim olgeta wan wan wokman bilong em na ol i no ken i dai. Olsem: Herot i kilim i dai aposel Jems long 44 C.E. samting; tasol bihain liklik, ensel i kisim bek Pita “long han bilong Herot.” (Aposel 12:1-11) Na Jon, brata bilong Jems, i stap longpela taim, winim Pita na Jems. Em nau, yumi no ken ting God i mas lukautim olgeta wokman bilong em long wankain pasin. Na tu, “taim nogut i save painim yumi olgeta.” (Saveman 9:11) Orait, olsem wanem Jehova i save lukautim yumi long nau?

Jehova i Lukautim Lain Bilong Em

15, 16. (a) Wanem samting i soim olsem Jehova i bin lukautim lain i lotuim em na dispela lain i no bagarap? (b) Bilong wanem yumi ken bilip tru olsem Jehova bai lukautim ol wokman bilong em long nau na long taim bilong ‘bikpela hevi tru’?

15 Pastaim tingim pasin bilong Jehova long lukautim yumi. Yumi save lotuim Jehova, olsem na yumi save Jehova bai lukautim yumi olsem wanpela lain na dispela lain i no ken bagarap. Sapos em i no mekim olsem, Satan bai no hatwok long bagarapim lain bilong yumi. Tingim dispela: Satan, em i “hetman i save bosim dispela graun,” na em bai amamas tru long pinisim lotu i tru. (Jon 12:31; KTH 12:17) Sampela strongpela gavman bilong dispela graun i bin tambuim wok bilong yumi long autim tok na ol i bin traim long pinisim lain bilong yumi olgeta. Tasol lain bilong Jehova i bin sanap strong na ol i no bin lusim wok autim tok! Bilong wanem ol strongpela kantri i no inap pasim wok bilong dispela liklik lain Kristen i luk olsem ol i no gat helpim bilong lukautim ol? Long wanem, Jehova i bin lukautim yumi long strongpela wing bilong em!—Song 17:7, 8.

16 Olsem wanem? God bai lukautim yumi na bagarap i no inap painim yumi long taim bilong ‘bikpela hevi tru’ bai kamap bihain? Yumi no gat wok long pret long strafe God bai givim, long  wanem, “sapos traim i kamap long ol man i bihainim God, orait Bikpela i save long rot bilong kisim bek ol long dispela traim. Na Bikpela i save pinis long pasin bilong ol man nogut, na em i save long rot bilong bekim pe nogut long ol.” (KTH 7:14; 2 Pita 2:9) Yumi inap bilip long tupela samting. Namba wan, Jehova bai i no larim ol man i pinisim olgeta ol wokman bilong em i stap gut long em. Namba tu, ol man i stap gut long em ol bai kisim laip oltaim long nupela taim God bai kamapim—maski God i mas kirapim bek ol bilong ol i ken kisim dispela laip. Ol man i dai pinis ol i stap long tingting bilong God, em i nambawan gutpela hap bilong i stap long en.—Jon 5:28, 29.

17. Olsem wanem Jehova i lukautim yumi long rot bilong Tok bilong em?

17 Long nau tu Jehova i save lukautim yumi long rot bilong “tok” bilong em, dispela tok i gat strong long mekim gut bel bilong ol man na kirapim ol long senisim pasin bilong ol. (Hibru 4:12) Pasin bilong bihainim ol stiatok bilong Baibel bai helpim yumi long abrusim sampela bagarap. Aisaia 48:17 i tok: “Mi God, . . . oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” Tru tumas, pasin bilong bihainim Tok Bilong God inap mekim na yumi no sik planti na yumi ken stap longpela taim. Olsem: Yumi bihainim tok bilong Baibel long abrusim pasin pamuk na rausim olgeta pasin doti na kamap klin, olsem na yumi no insait long ol pasin doti na pasin nogut i save bagarapim laip bilong planti man husat i givim baksait long God. (Aposel 15:29; 2 Korin 7:1) Yumi tenkyu tru long Tok Bilong God i lukautim yumi!

Jehova i Lukautim Yumi Long Ol Samting Bilong Spirit

18. Olsem wanem Jehova i lukautim yumi long ol samting bilong spirit?

18 Tasol bikpela samting tru, Jehova i save lukautim yumi long ol samting bilong spirit. Gutpela God bilong yumi i no larim yumi bagarap long ol samting bilong spirit, olsem na em i givim yumi ol samting yumi mas kisim bilong sanap strong long karim ol hevi na stap gut wantaim em. Long dispela rot Jehova i mekim ol samting na bai yumi ken i stap laip inap oltaim oltaim na i no sampela yia tasol. Tingim sampela samting God i givim  yumi em ol inap lukautim yumi long ol samting bilong spirit.

19. Olsem wanem spirit bilong Jehova inap helpim yumi long karim wanem wanem kain traim i painim yumi?

19 Jehova em i Man bilong “harim beten.” (Song 65:2) Taim ol hevi bilong laip i laik daunim yumi, pasin bilong kamapim bel bilong yumi long em inap helpim yumi long stap bel isi. (Filipai 4:6, 7) Ating em i no wokim mirakel na rausim hevi bilong yumi, tasol bilong helpim yumi em inap givim gutpela tingting na save long yumi na bai yumi inap karim hevi. (Jems 1:5, 6) Na tu, Jehova i givim holi spirit long ol man i askim em long en. (Luk 11:13) Dispela strongpela spirit inap helpim yumi long karim wanem wanem kain traim o hevi inap painim yumi. Em inap givim yumi “bikpela strong” bilong yumi ken sanap strong i go inap long taim Jehova i rausim olgeta hevi long nupela taim klostu nau i laik kamap.—2 Korin 4:7.

20. Olsem wanem Jehova i kamapim strong bilong em long lukautim yumi long rot bilong ol wanbilip?

20 Sampela taim Jehova i kamapim strong bilong em long lukautim yumi long rot bilong ol wanbilip. Jehova i bin mekim lain bilong em i kamap wanpela ‘lain brata’ i stap long olgeta hap. (Rom 12:10; Jon 6:44) Insait long dispela lain i gat pasin bilong laikim narapela, na ol i kamapim ples klia strong bilong holi spirit bilong God long stiaim ol man long mekim gutpela  pasin. Dispela spirit i kirapim yumi long mekim ol gutpela pasin, olsem laikim tru ol arapela, helpim ol, na mekim gutpela pasin long ol. (Galesia 5:22, 23) Olsem na taim yumi gat hevi na wanpela wanbilip i laik givim gutpela tok bilong helpim yumi o tok bilong strongim yumi, yumi tenkyu long Jehova long ol dispela gutpela samting i soim olsem em i lukautim yumi.

21. (a) Long rot bilong “wokboi i gat gutpela tingting” Jehova i givim wanem ol kaikai bilong spirit long taim stret? (b) Olsem wanem ol samting Jehova i givim bilong lukautim yumi long ol samting bilong spirit i bin helpim yu yet?

21 Jehova i givim sampela narapela samting bilong lukautim yumi: kaikai bilong spirit long taim stret. Bilong helpim yumi long kisim strong long Tok bilong em, Jehova i bin givim wok long “wokboi i gat gutpela tingting” long givim ol kaikai bilong spirit long ol man. Dispela gutpela wokboi i mekim wok long ol buk samting wantaim Wastaua na Kirap!, na ol miting na kibung bilong “skelim kaikai” long yumi long taim stret—em i givim ol samting yumi mas kisim na long taim yumi mas kisim. (Matyu 24:45) Olsem wanem? Sampela taim long miting Kristen yu bin harim wanpela bekim, o tok, o beten i strongim tru bel bilong yu long taim stret? Wanpela stori long nius bilong yumi i bin mekim bikpela samting long laip bilong yu? Tingim, Jehova i givim olgeta dispela samting bilong lukautim yumi long ol samting bilong spirit.

22. Oltaim Jehova i save yusim strong bilong em long mekim wanem? Olsem wanem dispela i helpim tru yumi?

22 Jehova i save lukautim gut “olgeta manmeri i go long em na ol i hait long ol birua.” (Song 18:30) Yumi save em i no yusim strong bilong em long lukautim yumi long olgeta hevi i save kamap long nau. Tasol oltaim em i save yusim dispela strong bilong kamapim ol samting em i tingting pinis long mekim. Dispela pasin bilong em bai kamapim ol gutpela samting bilong helpim tru lain bilong em. Sapos yumi go klostu long em na stap insait long laikim bilong em, Jehova bai givim yumi gutpela laip i stap inap oltaim oltaim. Taim yumi tingim dispela, yumi inap tru long ting ol hevi bilong nau “i no bikpela tumas, na ol bai i stap sotpela taim tasol.”—2 Korin 4:17.