Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Go Klostu long Jehova

 SAPTA 24

I No Gat Wanpela Samting Inap ‘Pasim God Long Laikim Yumi’

I No Gat Wanpela Samting Inap ‘Pasim God Long Laikim Yumi’

1. Planti man na sampela Kristen tru i gat wanem tingting?

OLSEM WANEM? God Jehova i save laikim yu? Sampela i tok God i save laikim olgeta man, olsem Jon 3:16 i tok. Tasol ol i ting, ‘God i no inap laikim mi yet.’ Ol trupela Kristen tu inap kisim tupela tingting long dispela. Wanpela man i bel hevi, em i tok: “Mi hatwok long bilip olsem God i save tingim mi.” Olsem wanem? Sampela taim yu save tingting olsem?

2, 3. Husat i laik bai yumi ting Jehova i no save laikim yumi o ting yumi samting nating? Olsem wanem yumi ken daunim dispela tingting?

2 Satan i laik bai yumi ting God Jehova i no save laikim yumi o ting yumi samting nating. Tru, planti taim Satan i grisim ol man long rot bilong pasin bilong ol long hambak na ting ol i samting tru. (2 Korin 11:3) Tasol em i save amamas tu long daunim ol man i no gat strong na bai ol i ting ol i samting nating tasol. (Jon 7:47-49; 8:13, 44) Em i save mekim moa yet nau long dispela “taim bilong las de” i gat planti hevi long en. Planti man long nau i go bikpela insait long ol famili i no gat pasin bilong laikim narapela. Sampela ol i karim hevi long stap namel long ol man i save pait na bagarapim ol man, tingim ol yet, na bikhet. (2 Timoti 3:1-5) Sapos planti yia narapela i bin mekim nogut long ol, o birua long ol, long wanem, ol i bilong narapela lain o skin, dispela inap mekim na ol i ting ol i samting nogut tasol o ol i no gutpela inap long narapela i laikim ol.

3 Sapos yu gat kain tingting olsem, yu no ken bel hevi. Planti bilong yumi i save kotim na skelim tumas yumi yet long sampela taim. Tasol tingim, Baibel i bilong “stretim ol manmeri,” na bilong “brukim ol strongpela banis.” (2 Timoti 3:16; 2 Korin 10:4) Baibel i tok: “Maski sapos bel bilong yumi i kotim yumi long wanpela samting, yumi ken i stap bel isi long ai bilong God. Long wanem, God em i save long olgeta samting, na save bilong en i winim tru save i stap long bel bilong yumi.” (1 Jon  3:19, 20) Nau yumi ken skelim 4-pela rot em Baibel i helpim yumi long “stap bel isi” na save olsem Jehova i laikim yumi tru.

Jehova i Ting Yu Gutpela Samting Tru

4, 5. Olsem wanem tok piksa bilong Jisas long ol liklik pisin i soim olsem Jehova i save tingim yumi?

4 Namba wan, Baibel i tokaut stret olsem God i lukim sampela gutpela samting long olgeta wan wan wokman bilong em. Jisas i tok: “Yupela i save, ol man i save baim tupela liklik pisin long 10 toea tasol. Na Papa bilong yupela i save lukautim gut ol dispela pisin. . . . Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.” (Matyu 10:29-31) Long taim bilong Jisas, ol dispela tok i gat wanem mining long ol man i bin harim?

“Yupela i winim planti lain liklik pisin”

5 Ating yumi laik save long as na wanpela man i laik baim liklik pisin. Long taim bilong Jisas, pe bilong dispela kain pisin bilong kaikai i liklik tru. Long wanpela liklik koin, man inap baim tupela pisin. Tasol bihain Jisas i tok, sapos man i tromoi tupela liklik koin em bai kisim faipela pisin, i no fopela. Ol i givim wanpela pisin moa olsem dispela pisin em i samting nating. Ating ol man i ting kain pisin olsem em i samting nating, tasol Man Bilong Wokim olgeta samting i gat wanem tingting long ol? Jisas i tok: “God i no save lusim tingting long wanpela bilong ol dispela liklik pisin [em i tingim dispela pisin tu ol i givim nating].” (Luk 12:6, 7) Ating nau yumi kirap kisim gut bikpela tok Jisas i laik kamapim. Sapos Jehova i save tingim wanpela liklik pisin, yumi ken save em i tingim moa yet ol man! Olsem Jisas i tok, Jehova i save long olgeta liklik samting bilong yumi. Tingim, em i kaunim pinis olgeta gras long het bilong yumi!

6. Bilong wanem yumi ken bilip olsem Jisas i no tok nating taim em i tok God i kaunim gras bilong het bilong yumi?

6 Tru tru em i kaunim gras bilong het bilong yumi? Sampela inap ting Jisas i kolim nating dispela tok. Tasol tingim bilip bilong kirap bek. Jehova i mas save gut tru long yumi bilong em i ken wokim yumi gen! Em i tingim tru yumi na em i tingim olgeta samting bilong yumi, olgeta save i stap insait long ol jin na  olgeta samting yumi holim long tingting na olgeta samting i bin painim yumi. * Wok bilong kaunim namba bilong ol gras long het bilong man—em inap olsem 100,000—em i liklik samting tru taim yumi skelim wantaim wok bilong kirapim bek man.

Jehova i Lukim Wanem Gutpela Samting Long Yumi?

7, 8. (a) Jehova i amamas taim em i lukim wanem ol pasin i stap long bel bilong man? (b) Wanem sampela wok yumi save mekim em Jehova i save laikim tru?

7 Namba tu samting, Baibel i skulim yumi long ol samting Jehova i save laikim long ol wokman bilong em. Em i save amamas long ol gutpela pasin bilong yumi na ol wok yumi save mekim. King Devit i bin tokim pikinini bilong em, Solomon: “Bikpela i save long olgeta tingting na laik bilong yumi.” (1 Stori 28:9) God i wok long skelim bel bilong planti bilion manmeri nau long dispela taim nogut bilong pait na birua, olsem na em i amamas tru taim em i lukim bel bilong wanpela man i laikim tumas bel isi, na tok i tru, na stretpela pasin! Orait, God i save mekim wanem taim em i lukim bel bilong wanpela man i save laikim em tru, na dispela man i laik kisim save long em na autim dispela save long ol narapela man? Jehova i tok, em i save tingim ol man husat i save tokim ol narapela man long em. Em i gat “wanpela buk i gat nem bilong ol manmeri i save stap aninit long Bikpela na i tingting long em oltaim.” (Malakai 3:16) Ol dispela pasin i gutpela samting tru long ai bilong em.

8 Wanem sampela gutpela wok Jehova i save laikim tru? Em i amamas tru long hatwok yumi mekim bilong bihainim pasin bilong Pikinini bilong em, Jisas Krais. (1 Pita 2:21) Wanpela bikpela wok God i tingim tru em wok bilong autim gutnius bilong Kingdom bilong em. Long Rom 10:15 Baibel New World Translation i tok: “Ol manmeri i autim gutnius bilong ol gutpela samting, lek bilong ol i naispela tru!” Ating yumi no save ting lek bilong  yumi i “naispela tru.” Tasol long dispela ves lek i makim hatwok ol wokman bilong Jehova i save mekim bilong autim gutnius. Olgeta dispela wok i gutpela samting tru long ai bilong em.Matyu 24:14; 28:19, 20.

9, 10. (a) Bilong wanem yumi ken bilip olsem Jehova i save laikim tru pasin bilong yumi long sanap strong taim yumi karim kain kain hevi? (b) Jehova i no save kisim wanem tingting long ol wokman i stap gut long em?

9 Jehova i save tingim tu pasin bilong yumi long sanap strong na karim hevi. (Matyu 24:13) Tingim, Satan i laik bai yu givim baksait long Jehova. Olgeta wan wan de yu stap gut long Jehova, yu bin helpim Jehova long bekim tok giaman Satan i bin sutim long em. (Sindaun 27:11) Sampela taim i hatwok tru long sanap strong na karim hevi. Sik, hevi bilong mani, bel hevi, na ol narapela samting inap mekim na olgeta wan wan de i olsem wanpela traim. Taim ol samting yumi bin wet long en i no kamap, dispela tu inap mekim na yumi bel hevi. (Sindaun 13:12) Jehova i save tingim tru pasin bilong yumi long sanap strong, maski yumi karim ol kain hevi olsem. Long dispela as, King Devit i askim Jehova long tingim krai bilong em, na em i tok: “Yu raitim pinis long buk bilong yu.” (Song 56:8) Yes, Jehova i save tingim tru krai bilong yumi na ol hevi yumi karim taim yumi  wok long stap gut long em. Ol dispela samting tu i no liklik samting long ai bilong em.

Jehova i save tingim tru pasin bilong yumi long sanap strong taim ol hevi i painim yumi

10 Tasol taim bel bilong yumi i kotim na daunim yumi, bel inap sakim dispela tok olsem yumi gutpela samting tru long ai bilong God. I olsem bel i tok oltaim: ‘I gat planti manmeri i save mekim moa yet ol gutpela pasin, winim mi. Taim Jehova i skelim mi wantaim ol, ating em i no amamas liklik long mi!’ Tasol Jehova i no save skelim yumi wantaim ol narapela; na em i no mekim hatpela pasin long yumi. (Galesia 6:4) Em i save lukim gut bel bilong yumi, na em i save laikim tru olgeta gutpela pasin, maski ol i planti o liklik tasol.

Jehova i Painim Ol Gutpela Pasin

11. Ol samting Jehova i mekim long Abiya i lainim yumi long wanem samting bilong Jehova?

11 Namba tri, taim Jehova i skelim bel bilong yumi, em i wok long painim ol gutpela pasin bilong yumi. Olsem: Taim Jehova i tok ol i mas kilim i dai lain olgeta bilong King Jeroboam em ol i bin tromoi lotu i tru, Em i tok ol i mas planim gut wanpela pikinini man bilong king, em Abiya. I gat wanem as na em i tok olsem? “Bikpela bilong yumi Israel, i lukim em wanpela tasol i mekim gutpela pasin namel long olgeta lain famili bilong Jeroboam.” (1 King 14:1, 10-13) I olsem Jehova i skelim bel bilong dispela yangpela man na painim “gutpela pasin” long en. Maski dispela gutpela pasin i liklik tasol, Jehova i ting em i gutpela samting inap long ol i ken raitim dispela long Baibel. Em i givim gutpela pe long dispela pasin, em i marimari long dispela man i bilong dispela lain i bin tromoi lotu i tru.

12, 13. (a) Olsem wanem stori bilong King Jehosafat i soim olsem Jehova i save lukim ol gutpela pasin bilong yumi, maski yumi mekim sin? (b) Taim yumi mekim ol gutpela wok na pasin, Jehova i mekim wanem olsem wanpela Papa i save laikim tru ol pikinini?

12 Stori bilong gutpela King Jehosafat i kamapim klia moa dispela samting. Taim king i mekim wanpela longlong pasin, profet bilong Jehova i tokim em: “Yu bin mekim dispela kain pasin, olsem na Bikpela i belhat long yu.” Em i wanpela bikpela tok! Tasol Jehova i laik mekim sampela tok moa. Em i tok: “Tasol yu save mekim sampela gutpela pasin tu.” (2 Stori 19:1-3) Olsem na  maski Jehova i kros long pasin nogut bilong Jehosafat, Em i luksave tu long gutpela pasin bilong em. Yumi ol man bilong graun i no save mekim olsem! Taim yumi kros long narapela, ating yumi no save lukim gutpela pasin bilong em. Na taim yumi mekim sin, yumi bel hevi, sem, na bel i kotim yumi, na dispela inap mekim na yumi no luksave long ol gutpela pasin bilong yumi yet. Tasol tingim, sapos yumi hevi long ol sin yumi mekim na tanim bel na wok strong long yumi no ken mekim gen, Jehova bai lusim rong bilong yumi.

13 Taim Jehova i skelim bel bilong yu, i olsem em i rausim ol kain sin olsem, wankain olsem man i painim gol em i save rausim ol ston nating. Olsem wanem long ol gutpela pasin na wok bilong yu? Ol i olsem ol liklik hap “gol” em i save holim i stap! Olsem wanem? Yu bin lukim ol papamama i lukautim gut piksa pikinini i bin droim o wanpela samting pikinini i bin wokim long skul? Sampela taim papamama i holim dispela samting inap planti yia bihain long ol pikinini i lusim tingting pinis long en. Jehova em i wanpela Papa i save tingim tru ol pikinini bilong em. Sapos yumi stap gut long em, em bai no inap lusim tingting long ol gutpela wok na pasin bilong yumi. Sapos em i lusim tingting long ol dispela samting, long tingting bilong em i olsem em i mekim pasin i no stret, na i no gat wanpela taim em i mekim pasin i no stret.  (Hibru 6:10) Em i save skelim yumi long wanpela narapela rot tu.

14, 15. (a) Maski yumi gat ol pasin kranki, bilong wanem Jehova inap luksave yet long ol gutpela pasin bilong yumi? Stori long dispela. (b) Jehova bai mekim wanem long ol gutpela pasin em i lukim i stap long yumi? Em i ting olsem wanem long ol manmeri bilong em i stap gut long em?

14 Maski yumi gat ol pasin kranki, Jehova i save tingim tu ol samting yumi inap long mekim. Olsem: Ol man husat i save laikim ol piksa ol man i bin wokim, ol bai mekim bikpela wok bilong stretim bek ol piksa o ol narapela samting olsem i bin bagarap. Long wanpela haus (National Gallery) long London, Inglan, i gat ol naispela piksa, na wanpela man i sut long sotgan na bagarapim piksa em Leonardo da Vinci i bin wokim, pe bilong piksa em inap olsem 120 milion kina. I no gat wanpela man i tok long ol i mas tromoi dispela piksa, long wanem, em i bagarap nau. Nogat. Wantu tasol ol i kirap stretim dispela piksa i bin i stap inap 500 yia pinis. Bilong wanem ol i mekim olsem? Long wanem, em i gutpela samting tru long ai bilong ol man i save laikim tru ol piksa ol man i bin wokim. Yu ting yu gutpela samting tru, winim wanpela piksa man i bin wokim long pensil samting? God i ting olsem—maski sin i mekim na yu no gutpela olgeta. (Song 72:12-14) God Jehova, em Man Bilong Wokim ol man, em bai mekim ol samting em i mas mekim na bai ol man i pilim gutpela pasin sori bilong em ol inap kamap gutpela olgeta.Aposel 3:21; Rom 8:20-22.

15 Jehova i save lukim ol gutpela pasin bilong yumi em yumi yet i no luksave long en. Na taim yumi mekim wok bilong em, em bai mekim ol dispela gutpela pasin i kamap strong i go inap long yumi kamap gutpela olgeta. Maski ol man bilong graun bilong Satan i bin mekim wanem long yumi, Jehova i ting ol wokman i stap gut long em ol i gutpela samting tru.Hagai 2:7NW.

Jehova i Save Soim Pasin Laikim Bilong Em

16. Wanem nambawan samting i kamapim klia olsem Jehova i laikim tru yumi? Olsem wanem yumi ken save dispela presen em i samting bilong yumi yet?

16 Namba foa, Jehova i mekim planti samting bilong kamapim klia em i laikim tru yumi. Ofa bilong Krais bilong baim bek ol man i bekim tru tok giaman bilong Satan, olsem yumi samting  nating o ol narapela i no inap laikim yumi. Yumi no ken lusim tingting olsem bikpela pen Jisas i karim long diwai pos na bihain em i dai, na bikpela pen moa em Jehova i pilim taim em i lukim Pikinini em i laikim tumas i dai, dispela samting i kamapim klia pasin bilong tupela long laikim tru yumi. Sori tru, planti man i hatwok long bilip olsem dispela presen em i samting bilong ol yet i ken kisim. Ol i ting ol i no gutpela inap long ol i ken kisim dispela samting. Tasol tingim, aposel Pol i bin birua long ol disaipel bilong Krais. Na em i tok: “Pikinini Bilong God em i bin laikim mi tru na em i lusim laip bilong em yet bilong helpim mi.”Galesia 1:13; 2:20.

17. Long wanem ol rot Jehova i pulim yumi i go long em na long Pikinini bilong em?

17 Jehova i helpim yumi wan wan long kisim ol gutpela samting ofa bilong Krais i kamapim na long dispela rot em i soim olsem em i laikim tru yumi. Jisas i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Yes, Jehova yet i pulim yumi i go long Pikinini bilong em na long laip i stap gut oltaim. Olsem wanem em i mekim dispela? Long rot bilong wok autim tok—em ol i bin autim tok long yumi wan wan—na long rot bilong holi spirit, em Jehova i mekim wok long en bilong helpim yumi long save gut long tok i tru na bihainim, maski yumi gat sin na strong bilong yumi i gat mak bilong en. Olsem na Jehova inap tok long yumi olsem em i bin tok long lain Israel: “Oltaim mi save laikim yupela tumas na mi save mekim gutpela pasin long yupela, bilong mekim yupela i kam klostu long mi.”Jeremaia 31:3.

18, 19. (a) Long wanem rot yumi ken pilim moa yet olsem Jehova i save laikim tru yumi? Wanem samting i soim olsem dispela em i samting bilong em yet? (b) Olsem wanem Baibel i kamapim klia olsem Jehova i save pilim hevi bilong man i toktok long em?

18 Tasol ating long rot bilong beten yumi ken pilim moa yet olsem Jehova i save laikim tru yumi. Baibel i tokim yumi long “beten oltaim” long God. (1 Tesalonaika 5:17) Em i save putim yau. Em i Man bilong “harim beten”. (Song 65:2) Em i no givim namba bilong mekim dispela wok long wanpela narapela, na em i no givim long Pikinini bilong em tu. Tingim dispela: Man  Bilong Wokim heven na graun i tokim yumi long kam klostu long em long rot bilong beten, na kamapim bel bilong yumi. Na taim em i putim yau long beten bilong yumi, yu ting em i olsem man i no save tingim narapela o i no wari long em? Nogat tru.

19 Jehova i save pilim hevi bilong man. Dispela pasin bilong pilim hevi bilong narapela em i wanem kain pasin? Wanpela gutpela lapun Kristen i tok: “Em pasin bilong pilim pen bilong yu long bel bilong mi.” Yu ting Jehova i save pilim tru pen bilong yumi? Baibel i stori long ol hevi lain bilong em, lain Israel i bin karim: “Long taim ol i karim pen na hevi, Bikpela tu i bin karim pen na hevi wantaim ol.” (Aisaia 63:9) Jehova i luksave long ol hevi bilong ol, na tu, em i pilim hevi bilong ol. Tok Jehova yet i mekim long ol wokman bilong em i kamapim klia em i pilim tru hevi bilong ol, em i tok: “Man i holim yupela em i holim kiau bilong ai bilong mi.” * (Sekaraia 2:8, NW) Dispela bai givim bikpela pen tru! Em nau, Jehova i pilim hevi bilong yumi. Taim yumi pilim pen, em tu i pilim.

20. Yumi mas sakim wanem tingting i no stret sapos yumi laik bihainim tok i stap long Rom 12:3?

20 Kristen i gat gutpela tingting em i no inap ting pasin bilong God long laikim na tingim em tru i as na em i ken hambak o ting em i gutpela samting tru. Aposel Pol i tok: “Long marimari bilong en God i bin makim mi bilong mekim wok bilong en, olsem na mi laik givim dispela tok lukaut long yupela olgeta wan wan. Yupela i no ken ting save na pasin bilong yupela i winim ol arapela. Nogat. Yupela i mas skelim gut ol pasin bilong yupela yet na tingting stret, inap long mak bilong bilip God i givim yupela.” (Rom 12:3) Narapela Baibel i tanim dispela ves olsem: “Mi laik tokim yupela olgeta long yupela i no ken ting yupela i samting tru, yupela i mas skelim gut yupela yet na kisim stretpela tingting.” (A Translation in the Language of the People, em Charles B. Williams i wokim) Yumi amamas long Papa bilong  yumi long heven i save laikim tru yumi, tasol yumi mas bihainim stretpela tingting na tingim olsem pasin bilong yumi i no mekim na God i mas laikim tru yumi, nogat.Luk 17:10.

21. Oltaim yumi mas wok long sakim wanem ol tok giaman bilong Satan? Yumi mas wok long strongim bel bilong yumi long rot bilong wanem tok i tru bilong Baibel?

21 Gutpela sapos yumi olgeta i mekim olgeta samting yumi inap mekim bilong sakim olgeta tok giaman bilong Satan, olsem dispela tok yumi samting nating o ol narapela i no inap laikim yumi. Sapos ol samting long laip bilong yu i bin givim tingting long yu olsem yu nogut pinis na God i no inap tru long laikim yu, o ol gutpela wok yu mekim i samting nating na God i no lukim, maski em inap lukim olgeta samting, o ol sin bilong yu i bikpela tumas na i dai bilong gutpela Pikinini bilong em i no inap tekewe ol dispela sin, orait dispela tingting i giaman tru. Sakim tru ol dispela tok giaman! Yumi mas wok long strongim bel bilong yumi long rot bilong wanpela tok i tru em Pol i raitim: “Mi bilip tru olsem, i no gat wanpela samting inap pasim laik bilong God i kamap long yumi. Dai o laip, o ol ensel o ol strongpela spirit, o samting nau i stap o samting bai i kamap bihain, o kain kain samting i gat strong, o samting bilong antap o samting bilong daunbilo, o ol arapela samting i stap nabaut, dispela olgeta i no inap pasim laik bilong God, em dispela laik em i givim yumi long Krais Jisas, Bikpela bilong yumi.”Rom 8:38, 39.

^ par. 6 Planti taim Baibel i bungim tok bilong kirap bek wantaim pasin bilong Jehova long tingim ol samting. Bilipman Jop i tokim Jehova: “Yu ken makim wanpela taim bilong tingim mi gen.” (Jop 14:13) Jisas i tok long kirap bek bilong “olgeta manmeri i stap long matmat [“matmat bilong tingim,” NW].” Dispela i stret, long wanem, Jehova inap tingim olgeta samting bilong ol man i dai pinis em i laik kirapim bek.Jon 5:28, 29.

^ par. 19 Long dispela ves, sampela Baibel i tok man i holim lain bilong God em i holim ai bilong em yet o ai bilong lain Israel, na i no ai bilong God. Sampela man bilong raitim tok bilong Baibel i kamapim dispela popaia, ol i ting dispela ves i daunim God, olsem na ol i senisim. Tingting kranki bilong ol i haitim dispela pasin bilong Jehova long pilim hevi bilong man.