Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Go Klostu long Jehova

 SAPTA 27

“Gutpela Pasin Bilong Em i Nambawan Tru!”

“Gutpela Pasin Bilong Em i Nambawan Tru!”

1, 2. Gutpela pasin bilong God i save kamapim wanem ol samting? Baibel i tok wanem long dispela pasin?

SAN i go daun na kamapim gutpela kala long skai, sampela gutpela pren i stap ausait na i kaikai wantaim, ol i lap na toktok na amamas long lukim ol diwai na plaua samting. Long narapela ples i stap longwe, fama i lukluk long gaden bilong em na i smail, long wanem, ol blakpela klaut i bung na ren i kirap pundaun long gaden i drai. Long narapela hap, man na meri i amamas long lukim namba wan taim pikinini bilong ol i kirap long wokabaut.

2 Maski ol i save o nogat, wanpela samting i helpim olgeta dispela man—em gutpela pasin bilong God Jehova. Sampela bilong ol man i save tingim lotu, ol i save tok “God i gat gutpela pasin.” Baibel i kolim strong moa dispela tok. Em i tok: “Gutpela pasin bilong em i nambawan tru!” (Sekaraia 9:17, NW) Tasol i luk olsem wan wan man tasol i save gut long mining bilong dispela tok. Wanem samting i insait long gutpela pasin bilong God Jehova? Na dispela pasin bilong God i mekim wanem long yumi wan wan?

Bikpela Samting Bilong Pasin Laikim Bilong God

3, 4. Gutpela pasin i wanem samting? Bilong wanem yumi ken tok gutpela pasin bilong Jehova i kamapim pasin laikim bilong em?

3 Long planti tok ples bilong nau, dispela tok “gutpela pasin” i no kirapim tumas tingting bilong man. Tasol long Baibel dispela tok i gat strong. Gutpela pasin i olsem pasin i stret olgeta, o i nambawan tru. Olsem na yumi ken tok gutpela pasin i pulap long Jehova. Olgeta pasin bilong em—strong, savetingting, na stretpela pasin bilong em—i nambawan tru. Tasol yumi ken tok, gutpela pasin i kamapim pasin laikim bilong Jehova. Bilong wanem yumi tok olsem?

4 Man i kamapim gutpela pasin long rot bilong ol samting em  i mekim long narapela. Aposel Pol i soim olsem gutpela pasin bilong man i winim stretpela pasin bilong em. (Rom 5:7) Stretpela man bai bihainim gut ol tok bilong lo, tasol gutpela man bai mekim sampela samting moa. Em i go pas long painim rot bilong helpim ol narapela. Olsem yumi bai lukim, long dispela rot Jehova i gutpela tru. Tru tumas, bikpela pasin laikim bilong Jehova i as bilong dispela kain gutpela pasin.

5-7. Bilong wanem Jisas i no laik bai wanpela man i kolim em olsem “Gutpela Tisa”? Em i kamapim klia wanem bikpela tok i tru?

5 I no gat narapela man i gutpela olsem Jehova. Paslain liklik long taim Jisas i dai, wanpela man i kamapim wanpela askim long em, na i kolim em olsem “Gutpela Tisa.” Jisas i tokim em: “Bilong wanem yu kolim mi gutpela? God wanpela tasol em i gutpela.” (Mak 10:17, 18) Ating yu kirap nogut long dispela tok. Bilong wanem Jisas i stretim dispela man? Jisas i “Gutpela Tisa” o olsem wanem?

6 I luk olsem dispela man i yusim tok “Gutpela Tisa” olsem wanpela kain nem bilong litimapim Jisas. Long pasin daun Jisas i litimapim nem bilong Papa bilong em long heven, em gutpela pasin bilong em i nambawan tru. (Sindaun 11:2) Tasol Jisas i kamapim klia tu wanpela bikpela tok i tru. Jehova wanpela tasol inap makim wanem samting i gutpela. Em wanpela tasol i gat rait long tok wanem samting i gutpela na wanem samting i nogut. Adam tupela Iv i laik kisim namba long mekim dispela long taim ol i bikhet na kisim kaikai bilong diwai bilong save wanem samting i gutpela na wanem samting i nogut. Jisas i no bihainim pasin bilong tupela, em i gat pasin daun na em i larim Papa bilong em i makim ol samting i gutpela o nogut.

7 Na tu, Jisas i save olsem Jehova i as bilong olgeta samting i gutpela. Em i Man Bilong Givim ‘olgeta gutpela samting na olgeta presen i gutpela tru.’ (Jems 1:17) Orait nau yumi skelim olsem wanem gutpela pasin bilong Jehova i kamap klia long ol samting em i givim.

Ol Samting i Soim Gutpela Pasin Bilong Jehova

8. Olsem wanem Jehova i bin mekim gutpela pasin long olgeta man?

8 Gutpela pasin bilong Jehova i bin helpim olgeta man i bin  stap laip. Song 145:9 i tok: “Em i save mekim gutpela pasin long olgeta manmeri.” Wanem sampela samting i kamapim klia olsem em i mekim gutpela pasin long olgeta? Baibel i tok: “Em i no bin hait olgeta bai ol man i no ken save long em. Nogat. Oltaim em i save mekim gutpela pasin long yupela. Em i mekim ren i lusim skai na i kam daun long yupela, na em i mekim planti gutpela kaikai i kamap. Em i givim yupela planti kaikai na i mekim bel bilong yupela i amamas.” (Aposel 14:17) Olsem wanem? Sampela taim yu pilim bikpela amamas taim yu kisim kaikai i swit? Bai no gat kaikai sapos Jehova i no bin mekim gutpela pasin na wokim dispela graun we oltaim wara yet i wok long kamap klin gen na i givim wara long graun na mekim “planti gutpela kaikai i kamap.” Jehova i mekim dispela gutpela pasin long olgeta man, na em i no mekim tasol long ol man i laikim em. Jisas i tok: “Em i save mekim san bilong en i kamap antap long ol man nogut na long ol gutpela man wantaim. Na em i save mekim  ren i kam daun long ol stretpela man na long ol man bilong mekim pasin i no stret tu.”Matyu 5:45.

Jehova i “i mekim ren i lusim skai na i kam daun long yupela, na em i mekim planti gutpela kaikai i kamap”

9. Olsem wanem apol i kamapim gutpela pasin bilong Jehova?

9 Planti man i no tingim ol planti gutpela samting ol i wok long kisim long rot bilong san, ren, na kaikai i save kamap long olgeta taim. Olsem: Tingim apol. Em i wanpela prut i save kamap long planti hap i no hot tumas. Em i luk nais na i swit long maus, na i pulap long wara na ol gutpela samting bilong helpim skin. Yu bin save olsem long olgeta hap bilong graun i gat 7,500 narapela narapela kain apol? Kala bilong ol i ret, o gol, o yelo, o grin, na sais bilong ol i olsem liklik laulau i go inap long bikpela orens. Sapos yu holim liklik sid bilong apol long han bilong yu, em i olsem liklik samting nating. Tasol wanpela gutpela diwai tru bai kamap long  dispela sid. (Song Bilong Solomon 2:3) Long mun Me samting diwai apol i pulap long ol naispela plaua, na long Septemba samting em i karim kaikai. Long olgeta yia—inap 75 yia samting—diwai apol bai kamapim planti prut inap long em i ken pulimapim 20 bokis em hevi bilong wan wan em 19 kilo!

Dispela liklik sid bai kamapim wanpela diwai ol man bai kisim amamas na kaikai long en inap planti yia

10, 11. Olsem wanem ol samting bodi bilong yumi inap mekim i kamapim gutpela pasin bilong God?

10 Jehova i mekim gutpela pasin na i givim yumi bodi i “nambawan tru,” na i gat strong long helpim yumi long luksave na amamas long ol samting em i bin wokim. (Song 139:14) Tingim gen ol man yumi stori pinis long en long kirap bilong dispela sapta. Wanem ol samting ol man i lukim i givim amamas long kain taim olsem? Pes bilong pikinini i lait taim em i amamas. Ren i pundaun long gaden. Ol gutpela kala olsem ret, gol, na blu i kamap taim san i go daun. Ai bilong man inap luksave long winim 300,000 narapela narapela kala! Na yau bilong yumi inap harim narapela narapela krai bilong nek bilong man yumi laikim em tru, na krai bilong win namel long ol diwai, na lap bilong liklik pikinini. Bilong wanem yumi inap amamas long ol samting yumi inap lukim na harim? Baibel i tok: “Bikpela i bin givim ai long yumi bilong yumi ken lukluk, na yau bilong yumi ken harim ol toktok samting.” (Sindaun 20:12) Dispela em tupela samting tasol bilong ol samting bodi bilong yumi inap mekim.

11 Pasin bilong yumi long smelim ol samting em wanpela narapela samting i kamapim gutpela pasin bilong Jehova. Nus bilong man inap smelim 10,000 narapela narapela smel. Tingim sampela: smel bilong kaikai yu save laikim tru, ol plaua, ol lip i pundaun pinis, o smok i kamap long paia. Na skin bilong yu inap pilim win i holim isi pes bilong yu, na wanpela yu laikim em tru i holimpas yu, na naispela skin bilong prut long han bilong yu. Taim yu kaikai dispela prut, maus i pilim swit bilong en. Ol marasin samting insait long dispela prut i mekim na taim yu kaikai, bai yu pilim kain kain swit long maus bilong yu. Yes, i gat as tru na yumi ken tokaut long Jehova: “Yu save mekim gutpela wok tru bilong helpim ol man i stap aninit long yu.” (Song 31:19) Tasol Jehova i mekim wanem bilong helpim ol man i stap aninit long em?

 Gutpela Pasin Bilong Helpim Ol Man Inap Oltaim

12. Wanem ol gutpela samting Jehova i save givim i bikpela samting tru? Bilong wanem em i bikpela samting?

12 Jisas i tok: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’ ” (Matyu 4:4) Tru tumas, ol gutpela samting bilong spirit Jehova i save givim inap helpim yumi moa yet, winim ol samting bilong skin em i givim, long wanem, ol i bringim yumi long laip oltaim. Long Sapta 8 bilong dispela buk, yumi kisim save olsem nau long taim bilong las de, Jehova i bin yusim strong bilong em long stretim bek ol samting bilong kamapim paradais bilong spirit. Wanpela bikpela samting bilong dispela paradais em planti kaikai bilong spirit.

13, 14. (a) Profet Esekiel i lukim wanem samting long driman? Dispela i makim wanem samting long yumi long nau? (b) Jehova i givim wanem ol gutpela samting bilong spirit bilong givim laip long ol wokman bilong em?

13 Long wanpela tok profet bilong Baibel long ol samting bai kamap gutpela gen, profet Esekiel i lukim driman long ol i wokim gen tempel na givim biknem long en. Wanpela wara i kam long dispela tempel, na dispela wara i wok long go bikpela na daun tru i go inap long em i kamap bikpela wara tru. Dispela wara i kamapim ol blesing long olgeta hap em i ran i go long en. Long arere bilong wara i gat ol diwai i givim kaikai na i oraitim ol man. Na dispela wara i givim laip na ol pis samting long raunwara Detsi i no gat ol samting i gat laip long en! (Esekiel 47:1-12) Tasol wanem mining bilong ol dispela samting?

14 Dispela driman i makim olsem Jehova bai stretim bek ol samting bilong lotu i tru, olsem tempel Esekiel i lukim em i piksa long dispela samting. Olsem dispela wara, ol gutpela samting bilong i stap laip em God i givim long lain bilong em, ol bai kamap planti moa. Kirap long taim ol i stretim bek lotu i tru long 1919, Jehova i bin givim ol gutpela samting bilong givim laip long lain bilong em. Em i mekim olsem wanem? Ol Baibel, ol buk na nius bilong Baibel, ol miting, na ol kibung i bin helpim planti milion man long kisim save long ol bikpela tok i tru. Long ol dispela rot Jehova i bin skulim ol man long nambawan  bikpela samting bilong givim laip—em ofa bilong Krais bilong baim bek ol man, em dispela samting i opim rot na bai ol man i laikim tru God na pret long em, ol i ken stap klin long ai bilong Jehova na bilip na wet long kisim laip oltaim. * Olsem na long dispela taim bilong las de, taim ol manmeri bilong dispela graun i sot tru long kaikai bilong spirit, lain bilong Jehova i kisim planti kaikai bilong spirit.Aisaia 65:13.

15. Gutpela pasin bilong Jehova bai mekim wanem long ol man i stap gut long em long Taim Bilong Wan Tausen Yia Bilong Krais i Stap King?

15 Tasol dispela wara Esekiel i lukim bai no pinis taim pasin nogut bilong dispela graun i pinis. Nogat. Em bai kamap bikpela moa long Taim Bilong Wan Tausen Yia Bilong Krais i Stap King. Long rot bilong Kingdom long han bilong Krais, Jehova bai mekim bikpela wok moa long ofa bilong Jisas na isi isi olgeta manmeri long graun bai kamap gutpela olgeta. Long dispela taim bai yumi amamas tru long gutpela pasin bilong Jehova!

Sampela Narapela Samting Bilong Gutpela Pasin Bilong Jehova

16. Olsem wanem Baibel i soim olsem i gat ol narapela pasin i insait long gutpela pasin bilong Jehova? Wanem sampela bilong ol dispela pasin?

16 Gutpela pasin bilong Jehova i kirapim em long givim ol samting, tasol i no dispela samting tasol. God i tokim Moses: “Mi bai soim yu gutpela pasin bilong mi. Na bai mi autim nem bilong mi long yu olsem, Mi Bikpela.” Bihain Baibel i tok: “Jehova i wokabaut i go klostu long em na i tok: ‘Jehova, Jehova, em i God bilong marimari na tingim man, em i no save belhat kwik na gutpela pasin sori bilong em i bikpela tru na em i save tok tru oltaim.’ ” (Kisim Bek 33:19; 34:6, NW) Olsem na i gat ol narapela pasin i insait long gutpela pasin bilong Jehova. Nau yumi ken skelim tupela bilong ol.

17. Jehova i save mekim wanem kain pasin long ol man bilong graun? Wanem pasin i kirapim em long mekim olsem?

17 “Tingim man.” Dispela pasin i kamapim klia pasin Jehova i  save mekim long ol man em i bin wokim. Planti man husat i gat namba ol i save tok strong, mekim hatpela pasin, o i no tingim man, tasol Jehova i gat pasin isi na em i save mekim gut long man. Olsem: Jehova i mekim dispela tok long Abram: “Yu sanap hia [“plis,” NW] na yu lukluk i go long olgeta hap. Lukluk i go long hap sankamap na long hap san i go daun, na long hap not na long hap saut.” (Stat 13:14) Planti Baibel i no gat tok “plis” long dispela ves. Tasol ol saveman bilong Baibel i tok, long tok Hibru ol i bin raitim dispela ves pastaim long en i gat wanpela tok i mekim na i olsem Jehova i tok plis taim em i askim Abram long mekim sampela samting, em i no tokim em tasol long mekim. I gat sampela narapela ves i gat dispela wankain tok Hibru long en. (Stat 31:12; Esekiel 8:5) Tingim, King bilong heven na graun i tok “plis” na askim ol man long mekim sampela samting! Planti man bilong dispela graun i gat hatpela pasin, pasin bilong kros, na ol i mekim pasin na tok nogut, olsem na yumi kisim nupela strong taim yumi tingim gutpela pasin bilong God bilong yumi, Jehova.

18. Olsem wanem Jehova “i save tok tru oltaim”? Bilong wanem dispela tok i strongim yumi?

18 “Em i save tok tru oltaim.” Planti man long nau i save giaman. Tasol Baibel i tokim yumi: “God i no save giaman olsem yumi man.” (Namba 23:19) Long Taitus 1:2 Baibel New World Translation i tok, “God . . . i no inap giaman.” Gutpela pasin bilong Jehova i mekim na em i no inap tru long giaman. Olsem na yumi ken bilip tru long ol tok promis bilong Jehova; oltaim ol tok bilong em i kamap tru. Baibel i kolim Jehova olsem “God bilong mekim pasin tru tasol.” (Song 31:5) Em i no save tok giaman, nogat; na ol tok i tru em i autim i planti tru. Em i no save autim hap tok tasol o haitim sampela tok, nogat; em i gat bikpela savetingting tru na em i amamas long givim save o givim lait long ol wokman i stap gut long em. * Em i lainim ol tu long pasin bilong bihainim ol dispela tok i tru em i save givim na bai  ol i ken “wokabaut long pasin bilong tok tru.” (3 Jon 3) Gutpela pasin bilong Jehova i mas mekim wanem long yumi wan wan?

‘Amamas Tru Long Gutpela Pasin Bilong Jehova’

19, 20. (a) Olsem wanem Satan i kirapim Iv long kisim tupela tingting long gutpela pasin bilong Jehova? Wanem samting i kamap? (b) Gutpela pasin bilong Jehova i mas mekim wanem long yumi? Bilong wanem yu bekim olsem?

19 Taim Satan i traim Iv long gaden Iden, isi isi em i kirapim Iv long kisim tupela tingting long gutpela pasin bilong Jehova. Jehova i bin tokim Adam: “Yu ken kaikai pikinini bilong olgeta diwai bilong dispela gaden.” Long dispela gaden i gat planti tausen diwai, tasol Jehova i tambuim ol long kisim kaikai bilong wanpela tasol. Tasol tingim tok Satan i kamapim long namba wan askim em i mekim long Iv: “Ating God i tambuim yutupela long kaikai pikinini bilong olgeta diwai bilong gaden, a?” (Stat 2:9, 16; 3:1) Satan i paulim ol tok bilong Jehova bilong kirapim Iv long ting olsem Jehova i no laik givim sampela gutpela samting long ol. Sori tru, dispela trik i wok. Iv—olsem planti man na meri bihain long em—i kisim tupela tingting long gutpela pasin bilong God husat i bin givim olgeta samting long em.

20 Yumi save dispela pasin bilong kisim tupela tingting i bin kamapim bikpela pen na hevi. Olsem na yumi mas bihainim tru tok i stap long Jeremaia 31:12 (NW): ‘Ol bai amamas tru long gutpela pasin bilong Jehova.’ Em nau, gutpela pasin bilong Jehova i mas mekim na yumi amamas tru. I nogat as na yumi mas ting sampela tingting nogut i kirapim God long mekim ol samting, em gutpela pasin i pulap long em. Yumi ken bilip tru long em, long wanem, em i laik bai ol gutpela samting tasol i painim ol man i laikim em tru.

21, 22. (a) Wanem sampela samting yu laik mekim bilong kamapim amamas bilong yu long gutpela pasin bilong Jehova? (b) Long sapta i kamap bihain long dispela bai yumi stori long wanem pasin? Olsem wanem dispela i narapela kain liklik long gutpela pasin?

21 Na tu, taim yumi gat rot long tokim ol narapela long  gutpela pasin bilong God, yumi amamas long dispela. Song 145:7 i tok long lain bilong Jehova: “Ol bai i stori long ol gutpela pasin bilong yu na ol bai i singim song.” Long olgeta de yumi stap laip, gutpela pasin bilong Jehova i save helpim yumi. Gutpela sapos long olgeta de yumi tok tenkyu long Jehova long gutpela pasin bilong em, na kolim stret ol samting yumi amamas long en. Pasin bilong tingting long gutpela pasin bilong Jehova, na tok tenkyu long em long dispela samting long olgeta de, na tokim ol narapela long en, dispela bai helpim yumi long bihainim pasin bilong gutpela God bilong yumi. Na taim yumi painim rot bilong mekim gutpela pasin, olsem Jehova i save mekim, bai yumi go klostu moa long em. Lapun aposel Jon i tok: “Gutpela pren, yu no ken bihainim pasin nogut. Nogat. Yu mas bihainim gutpela pasin. Man i mekim gutpela pasin, em i man bilong God.”3 Jon 11.

22 Gutpela pasin bilong Jehova i poroman wantaim sampela narapela pasin tu. Olsem: ‘Gutpela pasin sori bilong God i bikpela tru.’ (Kisim Bek 34:6, NW) Dispela pasin i narapela kain liklik long gutpela pasin, long wanem, Jehova i save mekim dispela pasin moa yet long ol man i stap gut long em. Long sapta i kamap bihain long dispela, bai yumi kisim save long olsem wanem em i mekim olsem.

^ par. 14 I no gat narapela samting i soim gutpela pasin bilong Jehova olsem pe bilong baim bek man. I gat planti milion spirit i stap na Jehova i ken makim wanpela bilong ol long i dai bilong helpim yumi, tasol em i makim dispela wanpela Pikinini em i laikim tumas.

^ par. 18 I stret Baibel i tok lait i poroman wantaim tok i tru. Man bilong raitim song i tok: “Yu mas salim tok tru na lait bilong yu i kam.” (Song 43:3) Jehova i save givim bikpela lait bilong spirit long ol man i amamas long em i skulim ol.2 Korin 4:6; 1 Jon 1:5.