Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Go Klostu long Jehova

 SAPTA 31

‘Go Klostu Long God, na Em Bai i Kam Klostu Long Yu’

‘Go Klostu Long God, na Em Bai i Kam Klostu Long Yu’

1-3. (a) Yumi kisim wanem save long pasin bilong yumi ol man taim yumi skelim samting i kamap namel long papamama na bebi bilong ol? (b) Wanem samting i kamap taim wanpela i soim olsem em i laikim yumi tru? Yumi ken givim wanem bikpela askim long yumi yet?

PAPAMAMA i save amamas tru long lukim nupela bebi bilong ol i smail. Planti taim ol i putim pes bilong ol i go klostu long pes bilong bebi, na mekim switpela tok na smail long em. Ol i laik bai bebi i mekim sampela samting. Na i no longtaim na naispela smail i kamap long pes bilong bebi. I olsem dispela smail i kamapim bel bilong bebi, em i kirap laikim papamama bilong em taim ol i kamapim pasin laikim bilong ol.

2 Smail bilong bebi i kirapim yumi long tingim wanpela bikpela samting bilong yumi ol man. Taim wanpela i laikim yumi, yumi tu i kirap laikim em. God i wokim yumi olsem. (Song 22:9) Taim yumi wok long kamap bikpela, yumi inap kamapim gut moa pasin bilong laikim narapela. Ating yu inap tingim taim yu liklik yet na papamama, ol wanblut, o ol pren i soim olsem ol i laikim yu tru. Bel bilong yu i pilim gutpela, na dispela samting yu pilim long bel i wok long kamap strong na i kirapim yu long mekim sampela samting. Yu soim olsem yu tu i laikim ol tru. Olsem wanem? Wankain samting i wok long kamap long pasin bilong yu long pas gut wantaim God Jehova?

3 Baibel i tok: “Yumi save laikim ol arapela, long wanem, God i bin laikim yumi pastaim.” (1 Jon 4:19) Hap 1 i go Hap 3 bilong dispela buk i kirapim yu long tingim olsem God Jehova i yusim strong, savetingting, na stretpela pasin bilong em long gutpela pasin i helpim yu. Na long Hap 4, yu lukim em i bin kamapim pasin bilong em long laikim tru ol manmeri—na yu yet—long ol rot yumi kirap nogut long en. Nau wanpela askim i kamap. Em i nambawan bikpela askim yu inap givim long yu yet: ‘Pasin laikim bilong Jehova i kirapim mi yet long mekim wanem?’

 Pasin Bilong Laikim God

4. Olsem wanem planti man i no klia long pasin bilong laikim tru God em wanem samting?

4 Jehova, em As bilong pasin laikim, i save olsem pasin laikim i gat bikpela strong long kirapim ol narapela long kamapim ol gutpela pasin bilong ol. Olsem na maski bikpela lain manmeri i no stap gut long God na i bikhet planti taim, em i bilip olsem sampela manmeri bai pilim pasin laikim bilong em na kirap mekim sampela samting. Na tru tumas, planti milion i bin mekim olsem. Tasol sori tru, ol lotu bilong dispela graun nogut i mekim na ol man i no klia long pasin bilong laikim tru God i makim wanem samting. Planti man i tok ol i laikim tru God, tasol i luk olsem ol i ting dispela pasin em i samting man i kamapim long tok bilong em tasol. Ating pasin bilong laikim God inap kirap long dispela rot, olsem bebi i smail taim em i kirap soim olsem em i laikim papamama. Tasol ol man i bikpela pinis, pasin bilong ol long laikim narapela i kirapim ol long mekim sampela samting moa.

5. Baibel i tok pasin bilong laikim tru God i makim wanem samting? Bilong wanem yumi mas amamas long dispela tok?

5 Jehova i kamapim klia pasin laikim em i makim wanem samting. Baibel i tok: “Sapos yumi laikim tru God, orait yumi save bihainim ol lo bilong en.” Olsem na yumi mas mekim sampela samting bilong soim olsem yumi laikim God. Tru, planti man i no laik tingting olsem ol i mas bihainim tok. Tasol wankain ves i mekim dispela gutpela tok: “Ol lo bilong [God] i no givim hevi long yumi.” (1 Jon 5:3) Ol lo na stiatok bilong Jehova i bilong helpim yumi, ol i no bilong putim hevi long yumi. (Aisaia 48:17, 18) Baibel i pulap long ol stiatok i helpim yumi long i go klostu moa long Jehova. Olsem wanem ol inap mekim olsem? Nau yumi ken skelim tripela samting bilong pasin bilong yumi long pas gut wantaim God. Em pasin bilong toktok wantaim em, lotuim em, na bihainim pasin bilong em.

Toktok Wantaim Jehova

6-8. (a) Long wanem ol rot yumi ken putim yau long tok bilong Jehova? (b) Yumi ken mekim wanem na bai yumi pilim tru tok bilong Baibel taim yumi ritim?

6 Long kirap bilong Sapta 1 i gat dispela askim, “Long tingting  bilong yu, yu inap lukim olsem yu toktok wantaim God?” Yumi bin lukim olsem dispela i no wanpela tingting nating tasol. Moses i bin toktok wantaim God. Olsem wanem long yumi? Nau em i no taim bilong Jehova long salim ol ensel bilong em long toktok wantaim ol man. Tasol Jehova i gat ol gutpela rot bilong toktok wantaim yumi long nau. Olsem wanem yumi inap putim yau long tok bilong Jehova?

7 “Spirit bilong God yet i bin kamapim olgeta tok i stap long buk bilong God,” olsem na yumi putim yau long tok bilong Jehova long rot bilong ritim Tok bilong em, Baibel. (2 Timoti 3:16) Man bilong raitim song i tokim ol wokman bilong Jehova long mekim olsem “long san na long nait.” (Song 1:1, 2) Bilong mekim olsem yumi mas taitim bun tru. Tasol olgeta hatwok yumi mekim bilong ritim Baibel i no lus nating. Olsem yumi lukim long Sapta 18, Baibel i olsem gutpela pas i kam long Papa bilong yumi long heven. Olsem na pasin bilong ritim Baibel i no ken kamap olsem wanpela wok nating yumi save mekim oltaim. Taim yumi ritim Baibel, yumi mas pilim tru tok bilong en. Olsem wanem yumi ken mekim olsem?

8 Piksaim long tingting ol stori bilong Baibel long taim yu ritim. Tingim ol dispela man bilong Baibel i olsem ol manmeri tru tru. Traim long save gut long sindaun bilong ol, na samting i kirapim ol long mekim ol samting. Orait nau tingim tingim ol tok yu ritim, na askim yu yet olsem: ‘Dispela tok i skulim mi olsem wanem long Jehova? Dispela tok i kamapim klia wanem ol pasin bilong em? Jehova i laik bai mi lainim wanem stiatok, na olsem wanem mi inap bihainim dispela stiatok long wokabaut bilong mi?’ Ritim, skelim long bel, na bihainim—na taim yu mekim olsem, bai yu pilim tru Tok Bilong God.Song 77:12; Jems 1:23-25.

9. Husat em i “wokboi i gat gutpela tingting”? Bilong wanem em i bikpela samting long yumi putim gut yau long tok bilong dispela “wokboi”?

9 Na tu, Jehova i toktok long yumi long rot bilong “wokboi i gat gutpela tingting.” Olsem Jisas i tok profet long en, i gat wanpela lain Kristen God i bin makim, na ol i bilong givim kaikai bilong spirit “long taim bikman i makim” long dispela taim bilong las de i gat planti hevi long en. (Matyu 24:45-47) Taim  yumi ritim ol buk na nius i bilong helpim yumi long kisim stretpela save long Baibel na taim yumi go long ol miting Kristen na kibung, lain gutpela wokboi i givim kaikai bilong spirit long yumi. Em lain wokboi bilong Krais, olsem na i gutpela long yumi bihainim tok bilong Jisas: “Yupela i mas lukaut gut bai yupela i harim gut tok.” (Luk 8:18) Yumi putim gut yau, long wanem, yumi save lain gutpela wokboi em wanpela rot bilong Jehova long toktok wantaim yumi.

10-12. (a) Bilong wanem beten em i wanpela gutpela presen tru i kam long Jehova? (b) Olsem wanem yumi ken beten long pasin Jehova i laikim? Bilong wanem yumi ken bilip olsem em i amamas long ol beten bilong yumi?

10 Tasol olsem wanem long pasin bilong toktok wantaim God? Yumi inap toktok wantaim Jehova? Dispela i narakain samting tru. Sapos yu traim long go na toktok wantaim nambawan bikman bilong kantri bilong yu long sampela hevi bilong yu yet, yu ting yu inap go long em? Sampela taim bikpela hevi inap kamap sapos man i traim long go toktok wantaim bikman! Long taim bilong Esta na Mordekai, ol inap kilim i dai man sapos em i go long king bilong Persia na king i no bin singautim em. (Esta 4:10, 11) Nau tingting olsem yu go long Bikpela King bilong heven na graun, sapos yumi skelim em wantaim ol nambawan bikman bilong graun ol i “samting nating olsem ol grasopa.” (Aisaia 40:22) Yu ting yumi mas pret long go klostu long em? Nogat tru!

11 Jehova i bin opim rot long ol man i ken go klostu long em—beten. Liklik pikinini tu inap bilip na beten long Jehova long nem bilong Jisas. (Jon 14:6; Hibru 11:6) Long rot bilong beten yumi inap kamapim ol tingting bilong yumi i stap insait tru long bel—dispela i makim tu ol tingting i givim bel hevi long yumi na i hatwok long tokaut long en. (Rom 8:26) Sapos yumi kamapim ol naispela na gutpela tok long beten bilong yumi o mekim planti toktok, dispela i no mekim na Jehova bai pilim tru beten bilong yumi. (Matyu 6:7, 8) Na Jehova i no makim hamas minit samting yumi mas toktok wantaim em o hamas taim. Baibel i tokim yumi long “beten oltaim.”1 Tesalonaika 5:17.

12 Baibel i tok Jehova tasol em i Man bilong “harim beten,” na em i save pilim tru hevi bilong man na putim yau long em.  (Song 65:2) Yu ting em i larim ol wokman bilong em i beten long em, na em tasol? Nogat, em i save amamas long beten bilong ol. Baibel i tok ol kain beten olsem i olsem smok i gat gutpela smel i save go antap. (Song 141:2; KTH 5:8; 8:4) Em i mekim gut bel bilong yumi long save olsem ol beten bilong yumi i go antap na Bikpela King i amamas long ol. Olsem na sapos yu laik i go klostu long Jehova, long pasin daun yu mas beten long em planti taim, long olgeta de. Kamapim tru ol tingting i stap long bel bilong yu, no ken haitim wanpela samting. (Song 62:8) Kamapim ol samting yu tingting planti long en, ol samting yu amamas long en, tok tenkyu long en, na mekim tok bilong litimapim nem bilong Papa bilong heven. Taim yu mekim olsem bai yu pas strong moa wantaim em.

Lotuim Jehova

13, 14. Pasin bilong lotuim Jehova em wanem samting? Bilong wanem i stret yumi lotuim em?

13 Taim yumi toktok wantaim God Jehova, i no olsem yumi toktok i go i kam olsem yumi save mekim wantaim wanpela pren o wanblut. Yumi lotu long Jehova, yumi givim ona long em olsem i stret yumi mas mekim. Lotu i tru i bosim olgeta samting long laip bilong yumi. Long dispela rot yumi kamapim olsem yumi givim bel olgeta long Jehova, na lotu i tru i mekim na olgeta lain i stap gut long Jehova—long heven o long graun—ol i stap wanbel. Long driman aposel Jon i harim wanpela ensel i autim dispela tok: “Yupela i mas lotu long God, em i bin wokim heven na graun na solwara na olgeta hul wara.”KTH 14:7.

14 I gat wanem as na yumi mas lotuim Jehova? Tingim ol pasin yumi bin skelim long dispela buk, olsem pasin holi, strong, bosim gut bel, stretpela pasin, strongpela bel, marimari, savetingting, pasin daun, pasin laikim, pasin sori, pasin bilong stap gut long narapela, na gutpela pasin. Yumi bin lukim olsem Jehova i kamapim olgeta dispela gutpela pasin long nambawan gutpela rot. Taim yumi traim long save gut long ol pasin bilong em, yumi luksave olsem em i bikpela Man i winim olgeta narapela, na i no dispela samting tasol. Glori bilong em i bikpela tru na em i antap tru, winim tru yumi. (Aisaia 55:9) Olsem na i stret tru  Jehova em i King bilong yumi, na yumi mas lotuim em. Tasol yumi ken lotuim em olsem wanem?

15. Olsem wanem yumi lotuim Jehova long ‘spirit na pasin i tru’? Ol miting Kristen i opim rot long yumi ken mekim wanem?

15 Jisas i tok: “God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.” (Jon 4:24) Dispela tok i makim olsem pasin bilong bilip na pasin laikim i pulap long bel bilong yumi na yumi lotuim Jehova, na spirit bilong em i stiaim yumi. Dispela tok i makim tu olsem yumi mas lotuim em long pasin i stret wantaim tok i tru, em stretpela save i stap long Baibel. Yumi gat gutpela rot tru long lotuim Jehova long ‘spirit na pasin i tru’ taim yumi bung wantaim ol wanbilip. (Hibru 10:24, 25) Taim yumi singsing bilong litimapim nem bilong Jehova, beten wantaim, na putim yau na insait long ol toktok bilong skelim Baibel, orait yumi mekim lotu i tru na long dispela rot yumi kamapim olsem yumi laikim tru Jehova.

Yumi kisim amamas taim yumi lotuim Jehova long ol miting Kristen

16. Wanem samting i wanpela bikpela wok ol Kristen tru i mas mekim? Bilong wanem yumi gat laik long bihainim tok na mekim dispela wok?

 16 Yumi lotuim tu Jehova taim yumi autim tok bilong em long ol narapela, olsem litimapim nem bilong em. (Hibru 13:15) Tru tumas, wok bilong autim gutnius bilong Kingdom bilong Jehova em i wanpela bikpela wok ol Kristen tru i mas mekim. (Matyu 24:14) Yumi amamas long bihainim dispela tok, long wanem, yumi laikim tru Jehova. Taim yumi tingim pasin bilong “giaman god bilong dispela graun,” Satan, long “pasim tingting bilong ol dispela man i no bilip,” na i kamapim ol tok giaman long Jehova, orait yumi gat laik long stap olsem ol Witnes bilong God bilong yumi na stretim ol dispela tok giaman, a? (2 Korin 4:4; Aisaia 43:10-12) Na taim yumi tingting long ol gutpela pasin bilong Jehova, yumi gat bikpela laik tru long autim tok bilong em long ol narapela, a? I no gat narapela gutpela wok olsem wok bilong helpim ol narapela long kisim save long Papa bilong yumi long heven na laikim em tru olsem yumi save mekim.

17. Wanem ol samting i insait long pasin bilong lotuim Jehova? Bilong wanem yumi mas lotuim God na stap gut long em?

17 I gat ol narapela samting tu i insait long pasin bilong yumi long lotuim Jehova. Lotu bilong yumi i insait long olgeta samting yumi mekim. (Kolosi 3:23) Sapos yumi bilip tru olsem Jehova em i Bikpela King, bai yumi painim rot bilong mekim laik bilong em long olgeta wokabaut bilong yumi—insait long famili, ples wok, pasin yumi mekim long ol narapela, na long taim bilong malolo samting. Bai yumi “gat wanpela tingting tasol,” em long lotuim Jehova na stap gut long em. (1 Stori 28:9) Dispela kain pasin bilong lotu i mekim na yumi no givim hap bel tasol o giaman long bihainim stretpela pasin—olsem giaman long mekim wok bilong Jehova, na long pasin hait mekim ol bikpela rong. Pasin bilong stap gut long God i pasim yumi long mekim kain pasin giaman olsem; na pasin laikim i kirapim yumi long nolaik tru long en. Pasin bilong pret long God, em tu bai helpim yumi. Baibel i tok kain pasin olsem bilong rispek tru long Jehova i helpim yumi long pas gut yet wantaim em.Song 25:14.

 Bihainim Pasin Bilong Jehova

18, 19. Bilong wanem yumi ken ting ol man i gat sin ol inap bihainim pasin bilong God Jehova?

18 Long pinis bilong olgeta 4-pela hap bilong dispela buk i gat sapta i stori long olsem wanem yumi inap ‘bihainim ol pasin God yet i save mekim.’ (Efesus 5:1) Em i bikpela samting long tingim olsem, maski yumi gat sin, yumi inap tru long bihainim pasin bilong Jehova long yusim strong bilong em, mekim stretpela pasin, bihainim savetingting, na laikim tru ol narapela. Olsem wanem yumi ken save olsem tru tru yumi inap bihainim God i Gat Olgeta Strong? Tingim, mining bilong nem bilong Jehova i lainim yumi olsem em i kamap wanem wanem kain em i mas kamap bilong mekim ol samting em i tingting pinis long mekim. I stret yumi kirap nogut long dispela samting, tasol yu ting mak i antap tumas long yumi yet inap bihainim pasin bilong Jehova? Nogat, i no olsem.

19 God i wokim yumi i kamap olsem em yet. (Stat 1:26) Olsem na ol manmeri i narapela kain long olgeta narapela samting God i bin wokim. I no olsem ol lo i stap long skin bilong yumi, o ol jin, o sindaun bilong yumi tasol i kirapim yumi long mekim ol samting. Jehova i bin givim gutpela presen long yumi—yumi stap fri long makim ol samting yumi laik mekim. Maski yumi gat sin na yumi no inap mekim olgeta samting, yumi stap fri long makim yumi laik kamap wanem kain man. Olsem wanem? Yu laik kamap man i gat pasin laikim, savetingting, stretpela pasin, na i save mekim stretpela wok long strong bilong em? Long rot bilong spirit bilong Jehova, yu inap kamap kain man olsem! Tingim ol gutpela samting dispela bai kamapim.

20. Wanem gutpela samting i kamap taim yumi bihainim pasin bilong Jehova?

20 Bai yu mekim ol samting Papa bilong yu long heven i laikim, na mekim em i belgut tru. (Sindaun 27:11) Jehova inap amamas long yu, long wanem, em i save long mak bilong strong bilong yu. (Kolosi 1:9, 10) Na taim yu wok long kamap strong moa long bihainim ol gutpela pasin bilong Papa bilong yu long heven, bai yu kisim wanpela gutpela wok tru. Yu inap stap olsem lait namel long ol manmeri i stap long tudak na  longwe long God. (Matyu 5:1, 2, 14) Yu bai helpim wok bilong kamapim ol gutpela pasin bilong Jehova long olgeta hap bilong graun. Em i wanpela gutpela wok tru!

‘Go Klostu Long God, na Em Bai i Kam Klostu Long Yu’

Oltaim wok long i go klostu moa long Jehova

21, 22. Ol man i laikim tru Jehova ol inap wokabaut oltaim long wanem rot?

21 Jems 4:8 i no tokaut tasol long wanpela mak i gutpela long winim. Em i wanpela rot yumi wokabaut long en. Na sapos yumi stap gut long God, bai yumi inap wokabaut long dispela rot inap oltaim oltaim. Pasin bilong i go klostu moa long Jehova i no inap pinis. Oltaim yumi inap kisim sampela save moa long em. Yumi no ken ting dispela buk i bin lainim yumi long olgeta samting bilong Jehova em yumi inap kisim save long en. Tru tumas, yumi bin stori liklik tasol long ol tok Baibel i mekim long God bilong yumi! Na Baibel tu i no tokim yumi long olgeta samting bilong Jehova. Aposel Jon i tok sapos ol i bin raitim olgeta samting Jisas i bin mekim taim em i mekim wok bilong em long graun, “ating graun bilong yumi bai i no gat ples inap long yumi ken putim ol dispela buk.” (Jon 21:25) Sapos dispela tok i stret long Pikinini, em bai stret moa yet long Papa!

 22 Maski yumi stap inap oltaim oltaim, bai i no gat pinis bilong wok bilong kisim save long Jehova. (Saveman 3:11) Olsem na tingim ol samting inap kamap bihain. Taim yumi bin stap inap sampela handet, tausen, milion, o bilion yia pinis, bai yumi gat bikpela save moa long God Jehova, winim save yumi gat long nau. Tasol bai yumi pilim olsem i gat planti planti gutpela samting yumi mas kisim save yet long en. Bai yumi amamas long kisim sampela save moa, long wanem, i gat as na oltaim yumi ken pilim wankain olsem man bilong raitim song, em i tok: ‘Mi stap klostu long God na dispela i gutpela tru.’ (Song 73:28) Laip oltaim bai i gat as tru bilong en na yumi inap mekim kain kain samting—na wok bilong go klostu long Jehova bai stap olsem nambawan gutpela samting bilong laip oltaim.

23. Gutpela sapos yu mekim wanem?

23 Gutpela sapos pasin laikim bilong Jehova i kirapim yu long mekim ol samting long nau, olsem laikim em tru long bel, tingting, na strong olgeta bilong yu. (Mak 12:29, 30) Gutpela sapos pasin laikim bilong yu i stap strong na i no surik liklik. Olgeta samting yu makim bilong mekim long olgeta de, maski em i liklik samting o bikpela samting, yu laik bai wanpela stiatok i bosim yu—oltaim makim rot i helpim yu long pas gut moa wantaim Papa bilong yu long heven. Na bikpela samting moa, wok long i go klostu moa long Jehova, na em bai i kam klostu moa long yu—inap oltaim oltaim!