Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Famili Bilong Yu Inap i Stap Amamas

 HAP 5

Stap Bel Isi Wantaim Ol Wanblut

Stap Bel Isi Wantaim Ol Wanblut

“Yupela i mas kisim . . . pasin helpim, pasin daun, pasin isi, na pasin bilong i no les kwik.”—Kolosi 3:12

Taim man na meri i marit, ol i kamap nupela famili. Em tru olsem oltaim yu bai laikim na rispektim papamama bilong yu, tasol nau poroman marit bilong yu i mas stap olsem namba 1 man o meri long laip bilong yu. Ating sampela wanblut bai i no amamas long dispela pasin. Tasol ol stiatok bilong Baibel inap helpim yu long holim stretpela tingting, na yu inap stap bel isi wantaim ol wanblut na strongim nupela famili bilong yu long pas gut wantaim.

 1 HOLIM STRETPELA TINGTING LONG OL WANBLUT

BAIBEL I TOK: “Onarim papa bilong yu na mama bilong yu.” (Efesus 6:2) Maski yu gat bikpela krismas, oltaim yu mas onarim na rispektim papamama bilong yu. Yu mas tingim tu olsem poroman marit bilong yu i gat papamama bilong em, olsem na em i mas tingim ol. “Man i gat pasin laikim . . . em i no save jeles,” olsem na yu no ken kisim tingting kranki sapos poroman marit i pas gut wantaim papamama bilong em.—1 Korin 13:4; Galesia 5:26.

SAMTING YU KEN MEKIM:

  • No ken mekim kain tok olsem “Olgeta taim famili bilong yu i save daunim mi” o “Mama bilong yu i no save amamas long ol samting mi mekim”

  • Pilim tingting bilong poroman marit

 2 TOK STRET

BAIBEL I TOK: “Man i save lusim papamama na i pas wantaim meri bilong en, na tupela i kamap wanpela bodi tasol.” (Stat 2:24) Taim yu marit, ating papamama bilong yu bai pilim olsem ol i gat wok yet long lukautim yu, olsem na ol bai mekim sampela samting we i no stret long ol i mekim.

Yu na poroman marit i ken toktok wantaim na putim sampela lo long ol samting papamama i ken mekim. Taim yutupela i toksave long ol, yutupela i ken tok stret na soim pasin laikim taim yutupela i toktok, na no ken mekim hatpela pasin. (Sindaun 15:1) Taim yutupela i bihainim pasin daun, pasin isi, na yutupela i no les kwik, yutupela bai pas gut wantaim ol wanblut na wok yet long “karim hevi ol arapela i putim long yupela na mekim wantaim pasin laikim.”—Efesus 4:2.

SAMTING YU KEN MEKIM:

  • Sapos ol wanblut i insait tumas long laip bilong yutupela na yu no amamas long dispela, orait toktok wantaim poroman marit taim tingting na bel bilong em i stap isi

  • Yutupela wantaim i mas wanbel long ol samting yutupela bai mekim bilong stretim dispela hevi