Skip to content

Skip to table of contents

Ol Witnes Bilong Jehova

Makim tokples Tok Pisin

SAPTA 12

Wokabaut Long Pasin God i Laikim

Wokabaut Long Pasin God i Laikim

Olsem wanem yu inap kamap pren bilong God?

Olsem wanem yu insait long tok Satan i bin sutim?

Jehova i no laikim wanem ol pasin?

Olsem wanem yu inap wokabaut long pasin God i laikim?

YU LAIK bai wanem kain man i stap pren bilong yu? Ating yu laik poromanim man i gat wankain tingting na laik olsem yu, na i bihainim ol wankain stiatok. Na ating yu laikim man i gat ol gutpela pasin, olsem pasin bilong tok tru na mekim gut long narapela.

2 Kirap long bipo na i kam inap long nau, God i bin makim sampela man long stap pren bilong em. Olsem: Jehova i tok Abraham em i pren bilong em. (Aisaia 41:8; Jems 2:23) Devit em i dispela kain man Jehova i save laikim, olsem na God i tok “bel bilong mi i laikim” em. (Aposel 13:22) Na Jehova i laikim tumas profet Daniel.—Daniel 9:23.

3 Bilong wanem Jehova i tingim Abraham, Devit, na Daniel olsem gutpela pren bilong em? Em i tokim Abraham olsem: “Yu bin bihainim tok bilong mi.” (Stat 22:18) Olsem na Jehova i save go klostu long ol man husat i daunim ol yet na mekim ol samting em i tokim ol long mekim. Em i tokim lain Israel olsem: “Yupela i mas bihainim tok bilong mi, na bai mi stap God bilong yupela, na bai yupela i stap lain manmeri bilong mi.” (Jeremaia 7:23) Sapos yu bihainim tok bilong Jehova, yu tu inap kamap pren bilong em!

JEHOVA I SAVE STRONGIM OL PREN BILONG EM

4 Tingim ol gutpela samting pasin bilong pren wantaim God i save kamapim. Baibel i tok Jehova i save painim rot bilong ‘helpim na strongim ol manmeri i save aninit long em wanpela tasol.’ (2 Stori 16:9) Olsem wanem Jehova inap strongim yu? Song 32:8 i stori long wanpela rot, em i tok: “Mi laik skulim yu gut, na soim yu long rot yu mas wokabaut long en. Bai mi skulim yu na lainim yu.”

5 Em i wanpela gutpela tok i kamapim pasin bilong Jehova long tingim yu tru! Em bai stiaim yu na sambai long yu taim yu bihainim rot em i makim. God i laik helpim yu long winim ol traim na hevi i save painim yu. (Song 55:22) Olsem na sapos yu mekim wok bilong Jehova long bel olgeta, yu ken bilip long God bai helpim yu olsem man bilong raitim song i bilip, em i tok: “Oltaim mi save pilim Bikpela i stap klostu long mi. Em i stap klostu na i givim strong long mi, olsem na i no gat wanpela samting i ken mekim mi i pret na guria.” (Song 16:8; 63:8) Yes, Jehova inap helpim yu long wokabaut long pasin em i laikim. Tasol olsem yu save, i gat wanpela birua bilong God husat i laik pasim yu long mekim olsem.

TOK SATAN I SUTIM

6Sapta 11 bilong dispela buk i stori long olsem wanem Satan i bin sutim tok long wok king bilong God. Satan i tok God i giaman na i no mekim stretpela pasin taim em i no larim Adam tupela Iv yet i makim wanem samting i stret na wanem samting i no stret. Bihain long Adam na Iv i mekim sin na ol pikinini bilong ol i wok long kamap long graun, Satan i sutim tok long olgeta manmeri. Em i tok: “Pasin bilong laikim God i no as na ol man i mekim wok bilong em. Givim rot long mi, na mi bai pulim olgeta man long givim baksait long God.” Stori bilong Jop i soim olsem Satan i gat kain tingting olsem. Jop em i husat, na olsem wanem em i insait long tok Satan i bin sutim?

7 Jop i bin stap long graun inap 3,600 yia i go pinis. Em i wanpela gutpela man, olsem Jehova i tok: “Em i save lotu na aninit long mi, na i save bihainim olgeta tok bilong mi. Em i no save mekim wanpela pasin nogut. Long olgeta hap bilong graun i no gat wanpela man i olsem em.” (Jop 1:8) God i amamas long Jop.

8 Satan i sutim tok long as na Jop i mekim wok bilong God. Satan i tokim Jehova olsem: “Oltaim yu save lukaut gut long em na long famili bilong en na long olgeta samting bilong en. Oltaim yu save mekim gut long em, na yu bin givim em planti bulmakau moa inap long pulapim olgeta hap bilong kantri em i stap long en. Tasol sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.”—Jop 1:10, 11.

9 Satan i tok Jop i mekim wok bilong God, long wanem, em i kisim ol gutpela samting long dispela rot. Em i tok tu olsem sapos traim i painim Jop, em bai givim baksait long God. Jehova i mekim wanem taim Satan i sutim dispela kain tok? Satan i sutim tok long as na Jop i mekim wok bilong Jehova, olsem na Jehova i larim Satan i traim Jop. Long dispela rot pasin bilong Jop long laikim God—o i no laikim God—bai kamap long ples klia.

TRAIM I PAINIM JOP

10 I no longtaim na Satan i traim Jop long kain kain rot. Ol man i stilim sampela animal bilong Jop, na birua i painim ol arapela animal na ol i dai. Ol i kilim i dai klostu olgeta wokman bilong em. Dispela i givim bikpela hevi bilong mani long Jop. Narapela bikpela hevi i painim Jop taim tenpela pikinini bilong em i dai long bikpela win na ren. Tasol maski ol dispela samting nogut tru i painim em, Jop “i no mekim sin na em i no tok nogut long God.”—Jop 1:22.

Jop i stap gut long God na em i kisim gutpela pe tru

Jop i kisim gutpela pe tru long em i stap gut long God

11 Satan i no givap. Em i tingting olsem maski Jop inap karim hevi taim ol animal, ol wokman, na ol pikinini i dai, em bai givim baksait long God sapos em i kisim sik. Jehova i larim Satan i givim long Jop wanpela sik nogut i givim bikpela pen long man. Tasol dispela samting tu i no mekim na Jop i lusim bilip bilong em long God, nogat. Em i “no mekim wanpela tok nogut long God.”—Jop 2:10.

12 Jop i no save olsem Satan em i as bilong ol hevi bilong em. Em i no save long ol tok Satan i bin sutim long wok king bilong Jehova, olsem na Jop i ting God i as bilong ol dispela hevi. (Jop 6:4; 16:11-14) Tasol em i stap gut long Jehova. Na pasin bilong Jop long stap gut long God i soim olsem tok Satan i sutim olsem Jop i tingim em yet na i mekim wok bilong God, dispela tok em i giaman!

13 Pasin bilong Jop long stap gut long Jehova i givim rot long Jehova long bekim gut tok Satan i bin sutim. Jop em i pren tru bilong Jehova, na God i blesim pasin bilong em long stap gut long em.—Jop 42:12-17.

YU INSAIT LONG EN

14 Tok Satan i sutim, olsem ol man bai i no stap gut long God taim hevi i painim ol, dispela tok i no go long Jop tasol. Yu tu i insait long en. Sindaun 27:11 i kamapim klia dispela samting, Jehova i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Ol i raitim ol dispela tok planti handet yia bihain long Jop i dai, na dispela tok i soim klia olsem Satan i wok yet long tok bilas long God na sutim tok long ol wokman bilong Em. Taim yumi wokabaut long pasin Jehova i laikim, yumi helpim wok bilong bekim ol tok giaman Satan i bin sutim, na long dispela rot yumi amamasim God. Yu ting olsem wanem long dispela? Maski sapos yu mas mekim sampela senis long laip bilong yu, em bai gutpela samting tru long insait long wok bilong bekim ol tok giaman Satan i sutim, a?

15 Tingim tok Satan i mekim: “Sapos wanpela man i laik i stap gut, em inap givim olgeta samting bilong en bilong baim bek laip bilong en.” (Jop 2:4) Taim Satan i tok “wanpela man,” em i kamapim klia olsem em i no sutim tok long Jop tasol, em i sutim dispela tok long olgeta manmeri. Dispela em i bikpela samting. Satan i sutim tok olsem yu bai i no stap gut long God. Satan i laik bai yu sakim tok bilong God na lusim stretpela rot taim ol hevi i kamap. Olsem wanem Satan i traim long kamapim dispela samting?

16 Olsem yumi stori pinis long Sapta 10, Satan i save yusim kain kain rot bilong pulim ol man i go longwe long God. Em i “olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pita 5:8) Olsem na wok Satan i mekim inap stap ples klia taim ol pren, wanblut, o ol narapela i birua long yu, long wanem, yu stadi long Baibel na bihainim ol tok yu lainim.* (Jon 15:19, 20) Na tu, Satan “i save senisim pasin bilong en na kamap olsem ensel bilong lait.” (2 Korin 11:14) Satan inap yusim ol samting i no stap ples klia bilong giamanim yu na mekim yu i lusim rot God i makim. Na Satan i laik bai yu bel hevi na ting yu no gutpela man inap long God i ken amamas long yu. (Sindaun 24:10) Maski Satan i olsem “laion i singaut strong” o “ensel bilong lait,” em i sutim wankain tok: Em i tok taim hevi o traim i painim yu, yu bai lusim wok bilong God. Olsem wanem yu ken bekim tok em i sutim na stap gut long God, olsem Jop i bin mekim?

BIHAINIM OL LO BILONG JEHOVA

17 Yu inap bekim tok Satan i bin sutim long rot bilong wokabaut long pasin God i laikim. Wanem ol samting i insait long dispela? Baibel i tok: “Yupela i mas laikim tumas God, Bikpela bilong yumi. Yupela i mas laikim em tru long bel bilong yupela na long tingting bilong yupela na long strong bilong yupela.” (Lo 6:5) Taim pasin bilong yu long laikim tru God i go bikpela, yu bai kisim bikpela laik long mekim ol samting em i laik yu mas mekim. Aposel Jon i tok: “Sapos yumi laikim tru God, orait yumi save bihainim ol lo bilong en.” Sapos yu laikim Jehova long bel olgeta, bai yu lukim olsem “ol lo bilong en i no givim hevi long yumi.”—1 Jon 5:3.

18 Jehova i givim wanem ol lo? Sampela lo i tambuim yumi long mekim sampela pasin. Olsem: Lukim blok, het tok bilong en “Sakim Ol Pasin Jehova i Nolaik Tru Long En.” Dispela blok i gat lista bilong ol pasin Baibel i tambuim. Taim yu lukim dispela lista, ating pastaim yu inap ting sampela pasin i no nogut tumas. Tasol taim yu tingim tingim long bel tok bilong ol skripsa lista i kolim, bai yu luksave olsem em i savetingting long bihainim ol lo bilong Jehova. Taim yu wok long senisim sampela pasin bilong yu, ating dispela em i nambawan bikpela hatwok i bin painim yu. Tasol taim yu wokabaut long pasin God i laikim, bai yu belgut na amamas tru. (Aisaia 48:17, 18) Na em i samting yu inap mekim. Olsem wanem yumi ken save long dispela?

SAKIM OL PASIN JEHOVA I NOLAIK TRU LONG EN

Tupela raskol
Man na meri i dring na smok
Meri i stil
  • Kilim man i dai.—Kisim Bek 20:13; 21:22, 23.
  • Pasin pamuk.—Wok Pris 20:10, 13, 15, 16; Rom 1:24, 26, 27, 32; 1 Korin 6:9, 10.
  • Wok bilong ol spirit nogut.—Lo 18:9-13; 1 Korin 10:21, 22; Galesia 5:20, 21.
  • Lotuim god giaman.—1 Korin 10:14.
  • Dring spak.—1 Korin 5:11.
  • Stil.—Wok Pris 6:2, 4; Efesus 4:28.
  • Giaman.—Sindaun 6:16, 19; Kolosi 3:9; KTH 22:15.
  • Mangal.—1 Korin 5:11.
  • Pait na bagarapim man.—Sindaun 3:31; Sindaun 22:24, 25; Malakai 2:16; Galesia 5:20, 21.
  • Tok i no stret.—Wok Pris 19:16; Efesus 5:4; Kolosi 3:8.
  • Kisim blut.—Stat 9:4; Aposel 15:20, 28, 29.
  • I no lukautim famili.—1 Timoti 5:8.
  • Insait long ol pait o kros bilong wok politik bilong dispela graun.—Aisaia 2:4; Jon 6:15; 17:16.
  • Smok o kisim drak.—Mak 15:23; 2 Korin 7:1.

19 Jehova i no save tokim yumi long mekim samting yumi no inap mekim. (Lo 30:11-14) Em i save long ol samting yumi inap mekim na ol samting yumi no inap mekim, winim yumi yet. (Song 103:14) Na tu, Jehova inap givim strong long yumi na bai yumi inap bihainim ol tok bilong em. Aposel Pol i tok: “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” (1 Korin 10:13) Bilong helpim yu long winim ol hevi, Jehova inap givim yu “bikpela strong.” (2 Korin 4:7) Bihain long Pol i bin karim planti traim pinis, em inap tok: “Em i givim pawa long mi, na long dispela as mi gat strong long mekim olgeta samting.”—Filipai 4:13, NW.

KISIM OL PASIN GOD I LAIKIM

20 Tru, Jehova i amamas long yumi taim yumi sakim ol samting em i no laikim, tasol dispela tasol i no inap. Yu mas laikim ol samting em i save laikim. (Rom 12:9) Olsem wanem? Yu save laikim ol man i gat wankain tingting na laik olsem yu, na i bihainim ol wankain stiatok? Jehova tu i save laikim ol kain man olsem. Olsem na lain long laikim ol samting Jehova i laikim. Song 15:1-5 i stori long sampela samting olsem, na ol dispela ves i kolim wanem kain man God i tingim olsem em pren bilong em. Ol pren bilong Jehova i kamapim ol pasin em Baibel i kolim ‘ol pasin em holi spirit i save kirapim yumi long mekim.’ Ol dispela pasin em, ‘pasin bilong laikim tru ol arapela, amamas, stap bel isi, no ken belhat kwik, helpim ol man, mekim gutpela pasin long ol, wokabaut stret oltaim [“bilip,” NW ], stap isi, na daunim laik bilong olpela bel.’—Galesia 5:22, 23.

21 Pasin bilong ritim na stadi oltaim long Baibel bai helpim yu long kisim ol pasin God i laikim. Na taim yu kisim save long ol samting God i laik yu mas mekim, dispela bai helpim yu long stretim tingting bilong yu na bai em i stret wantaim tingting bilong God. (Aisaia 30:20, 21) Taim yu strongim pasin bilong yu long laikim Jehova, laik bilong yu long wokabaut long pasin God i laikim bai i go bikpela moa.

22 Yu mas taitim bun bilong wokabaut long pasin Jehova i laikim. Baibel i tok wok bilong senisim pasin bilong yu i olsem yu rausim pasin bilong olpela bel na kamap nupela man. (Kolosi 3:9, 10) Tasol man bilong raitim song i tok long ol lo bilong Jehova olsem: “Mi bihainim lo bilong yu, olsem na yu save mekim sindaun bilong mi i kamap gutpela tru.” (Song 19:11) Yu tu bai lukim olsem taim yu wokabaut long pasin God i laikim, sindaun bilong yu bai kamap gutpela tru. Taim yu mekim olsem, yu bekim tok Satan i bin sutim na mekim bel bilong Jehova i amamas!

OL TOK BAIBEL I LAINIM YUMI LONG EN

  • Yu inap kamap pren bilong God taim yu bihainim tok bilong em.—Jems 2:23.
  • Satan i tok olgeta man bai i no stap gut long God.—Jop 1:8, 10, 11; 2:4; Sindaun 27:11.
  • Yumi mas sakim ol pasin God i no laikim.—1 Korin 6:9, 10.
  • Yumi ken amamasim Jehova taim yumi nolaik tru long ol samting em i nolaik tru long en na laikim ol samting em i laikim.—Rom 12:9.

*  Dispela i no makim olsem Satan i bosim ol man i birua long yu. Tasol Satan em i god bilong dispela graun, na graun olgeta i stap aninit long strong bilong em. (2 Korin 4:4; 1 Jon 5:19) Olsem na yumi ken save rot God i makim em i rot planti man i no laikim, na sampela bai birua long yu.


Ol Askim Bilong Stadi

1, 2. Stori long sampela man em Jehova i tok ol i gutpela pren bilong em.

3. Bilong wanem Jehova i makim sampela man long kamap pren bilong em?

4, 5. Jehova i mekim wanem bilong strongim lain bilong em?

6. Satan i sutim wanem tok long ol man?

7, 8. (a) Wanem samting i mekim na Jop i narapela kain man long taim bilong em? (b) Olsem wanem Satan i sutim tok long Jop?

9. Jehova i mekim wanem taim Satan i sutim tok long Jop? Bilong wanem Jehova i mekim olsem?

10. Wanem ol traim i painim Jop? Em i mekim wanem?

11. (a) Wanem namba tu tok Satan i sutim long Jop? Jehova i mekim wanem? (b) Jop i mekim wanem taim em i kisim sik i givim bikpela pen long em?

12. Olsem wanem pasin Jop i bihainim i soim klia olsem Satan em i giaman?

13. Pasin bilong Jop long stap gut long God i kamapim wanem samting?

14, 15. Bilong wanem yumi ken tok dispela tok Satan i bin sutim long Jop i go long olgeta manmeri?

16. (a) Long wanem ol rot Satan i traim long pulim ol man i go longwe long God? (b) Olsem wanem Satan inap yusim ol dispela rot bilong pulim yu?

17. Wanem nambawan as bilong bihainim ol lo bilong Jehova?

18, 19. (a) Wanem sampela lo bilong Jehova? (Lukim blok.) (b) Olsem wanem yumi save God i no save tokim yumi long mekim samting yumi no inap mekim?

20. Yu mas kisim wanem ol pasin God i laikim? Bilong wanem dispela em i bikpela samting?

21. Wanem samting bai helpim yu long kisim ol pasin God i laikim?

22. Wanem samting bai kamap sapos yu wokabaut long pasin God i laikim?