Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

APENDIKS

Sheol na Hades Em Wanem Samting?

Sheol na Hades Em Wanem Samting?

LONG ol tok ples bilong bipo tru ol i bin raitim Baibel long en, Baibel i yusim tok Hibru she’ohl′ na tok Grik hai′des winim 70 taim. Tupela tok wantaim i makim samting bilong indai. Sampela Baibel i tanim dispela tupela tok olsem “matmat,” “hel,” o “hul.” Planti taim Buk Baibel i tanim dispela tupela tok olsem “ples bilong ol man i dai pinis,” na sampela taim olsem “dai” o “matmat.” Tasol long planti tok ples i no gat ol tok i kamapim mining stret bilong dispela tok Hibru na Grik. Olsem na Baibel New World Translation i yusim tok “Sheol” na “Hades.” Wanem mining tru bilong dispela tupela tok? Yumi ken skelim olsem wanem narapela narapela ves bilong Baibel i yusim dispela tupela tok.

Saveman 9:10 i tok: “Yu no inap mekim wok o tingting o kisim gutpela tingting na save long ples bilong ol man i dai pinis [she’ohl′], dispela ples bai yu go long en.” Olsem wanem? Tok she’ohl′ i makim wanpela matmat stret we yumi bin planim ol famili bilong yumi? Nogat. Taim Baibel i tok long ples stret bilong planim man, o matmat, em i yusim ol narapela tok Hibru na Grik, em i no yusim tok she’ohl′ na hai′des. (Stat 23:7-9; Matyu 28:1) Na tu, Baibel i no yusim tok she’ohl′ bilong makim wanpela matmat i gat sampela daiman long en, olsem matmat bilong wanpela famili o matmat ol i bin planim planti man tru long en.—Stat 49:30, 31.

Orait she’ohl′ i makim wanem kain ples? Baibel i tok she’ohl′ o hai′des i makim bikpela samting, winim matmat ol i bin planim planti man long en. Olsem: Aisaia 5:14 i tok, “matmat [she’ohl′] i opim maus bikpela tru.” Maski she’ohl′ i bin daunim planti manmeri tru, i luk olsem oltaim em i gat laik long daunim sampela manmeri moa. (Sindaun 30:15, 16) Long wanpela ples matmat tru ol inap planim ol daiman inap long skel bilong ples matmat, tasol “ol i no inap pulapim ples bilong ol man i dai pinis [she’ohl′].” (Sindaun 27:20) Dispela i makim olsem she’ohl′ i no inap pulap. I no gat mak bilong en. Olsem na she’ohl′ o hai′des i no wanpela ples tru. Nogat. Em piksa i makim matmat em klostu olgeta daiman i slip long en.

Tok bilong Baibel long kirap bek i helpim yumi long kliagut moa long mining bilong she’ohl′ na hai′des. Baibel i kamapim olsem ol daiman i stap long she’ohl′ na hai′des ol bai kirap bek.* (Jop 14:13; Aposel 2:31; KTH 20:13) Baibel i tok tu olsem ol daiman i stap long she’ohl′ o hai′des, em ol man i bin mekim wok bilong Jehova, na ol man i no bin mekim wok bilong em. (Stat 37:35; Song 55:15) Olsem na Baibel i tok “God bai i kirapim bek ol man i dai pinis, em ol stretpela man na ol man nogut wantaim.”—Aposel 24:15.


*  Tasol Baibel i tok ol man husat i no inap kirap bek ol i no stap long she’ohl′ o hai′des nogat, ol i stap long Ge·hen′na, (Buk Baibel i tanim dispela tok olsem “hel” long Matyu 5:30; 10:28; 23:33). Tasol olsem she’ohl′ na hai′des, Ge·hen′na i no wanpela ples tru tru.

← Go bek long sapta