Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

SAPTA 15

Pasin Bilong Lotu Em God i Orait Long En

Pasin Bilong Lotu Em God i Orait Long En

Yu ting God i laikim olgeta lotu?

Olsem wanem yumi inap luksave long lotu i tru?

Husat i lotu tru long God long nau?

GOD JEHOVA i tingim tru yumi na em i laik bai yumi kisim helpim long gutpela pasin bilong em long stiaim yumi. Sapos yumi lotuim em long pasin i stret, bai yumi stap amamas na abrusim planti hevi. Bai yumi kisim tu blesing na helpim bilong em. (Aisaia 48:17) Tasol i gat planti handet lotu em ol i tok ol i save helpim ol man long kisim stretpela save long God. Tasol ol i gat narapela narapela tingting long God em i husat na em i laik bai yumi mas mekim wanem.

2 Olsem wanem yu inap save long stretpela pasin bilong lotuim Jehova? Yu no gat wok long stadi long tok bilong olgeta lotu na skelim narapela wantaim narapela. Yu mas lainim tasol ol tok Baibel i mekim long trupela lotu. Olsem: Long planti kantri i gat hevi long ol man i yusim giaman mani. Sapos ol i givim wok long yu long makim stret wanem mani em i giaman mani, bai yu mekim olsem wanem? Yu ting yu bai traim long tingim olgeta mak bilong giaman mani? Nogat. Gutpela moa sapos yu skelim gut mani tru. Taim yu save pinis long mani tru i luk olsem wanem, yu inap luksave long giaman mani. Na olsem tasol, taim yumi lain long olsem wanem yumi inap luksave long lotu i tru, yumi inap luksave long ol lotu giaman.

3 Em i bikpela samting long yumi lotuim Jehova long pasin em i orait long en. Planti man i ting God i laikim olgeta lotu, tasol Baibel i no tok olsem. Sapos man i tok em i wanpela Kristen, dispela samting tasol i no inap. Jisas i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.” Olsem na bilong God i ken orait long yumi, yumi mas kisim save long ol samting God i tok yumi mas mekim na bihainim dispela tok. Jisas i kolim ol man husat i no mekim laik bilong God, olsem “ol man bilong mekim pasin nogut.” (Matyu 7:21-23) Olsem giaman mani, lotu giaman i no inap helpim man. Na kain lotu olsem inap nogutim man.

4 Jehova i opim rot long olgeta man i ken kisim laip oltaim. Tasol bilong kisim laip oltaim long Paradais, yumi mas lotuim God long pasin i stret na wokabaut long pasin em i orait long en. Sori tru, planti man i no laik mekim olsem. Olsem na Jisas i mekim dispela tok: “Yupela i mas i go insait long liklik dua. Dua i go long ples bilong lus, em i bikpela, na rot i go long dispela ples em i op tumas na em i isi long bihainim. Na planti manmeri i save bihainim dispela rot. Tasol dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.” (Matyu 7:13, 14) Lotu i tru i bringim ol man long laip oltaim. Lotu giaman i bringim ol man long ples bilong lus. Jehova i no laik bai wanpela man i kisim bagarap, olsem na em i givim rot long ol man long olgeta hap i ken kisim save long em. (2 Pita 3:9) Olsem na pasin bilong yumi long lotuim God inap mekim na yumi kisim laip o yumi dai.

ROT BILONG LUKSAVE LONG LOTU I TRU

5 Olsem wanem yumi inap painim ‘rot i go long laip’? Jisas i tok lotu i tru bai stap ples klia long wokabaut bilong ol man i bihainim dispela lotu. Em i tok: “Yupela lukim pasin bilong ol na bai yupela i save,…Olgeta gutpela diwai i save karim gutpela kaikai.” (Matyu 7:16, 17) Olsem na yumi inap luksave long ol man i bihainim lotu i tru long rot bilong ol bilip na pasin bilong ol. Ol i gat sin na ol i save popaia, tasol olsem wanpela lain, ol man i lotu tru long God ol i traim long mekim laik bilong God. Orait nau yumi ken skelim sikspela samting i olsem mak bilong ol man i bihainim lotu i tru.

OL MAN I LOTU LONG TRUPELA GOD

  • Baibel i as bilong ol tok ol i autim
  • ol i lotuim Jehova tasol na autim nem bilong em
  • narapela i laikim tru narapela
  • ol i bilip olsem Jisas em i rot bilong God long kisim bek ol man
  • ol i no bilong dispela graun
  • ol i autim tok olsem Kingdom Bilong God tasol inap pinisim ol hevi
Ol manmeri bilong kain kain skin nap les i lotu long God

6Baibel i as bilong ol tok ol wokman bilong God i autim. Baibel yet i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” (2 Timoti 3:16, 17) Aposel Pol i tokim ol wanlain Kristen: “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God.” (1 Tesalonaika 2:13) Olsem na tingting bilong ol man o pasin bilong ples i no as bilong ol bilip na pasin bilong lotu i tru. Tok Bilong God, Baibel, i as bilong en.

7 Ol tok Jisas Krais i lainim ol man long en i kam long Baibel, na em i stap gutpela piksa long dispela samting. Em i beten long Papa bilong em long heven na i tok: “Tok bilong yu i tru olgeta.” (Jon 17:17) Jisas i bilip long Baibel, na olgeta samting em i lainim ol man long en i stret wantaim tok bilong Baibel. Planti taim Jisas i tok: “Buk bilong God i gat tok olsem.” (Matyu 4:4, 7, 10) Na em i kolim tok bilong skripsa. Na olsem tasol, lain bilong God long nau i no skulim ol manmeri long sampela tingting bilong ol yet. Ol i bilip olsem Baibel em i Tok Bilong God, na tok bilong Baibel i as bilong ol tok ol i autim.

8Ol man i bihainim lotu i tru, ol i lotu long Jehova tasol na ol i kamapim nem bilong em. Jisas i tok: “Yu mas aninit long God [“Jehova,” NW ], Bikpela bilong yu. Na yu mas lotu long em wanpela tasol.” (Matyu 4:10) Olsem na ol wokman bilong God i lotuim Jehova tasol. Ol i helpim ol manmeri long save long nem bilong trupela God na ol pasin bilong em. Song 83:18 (NW ) i tok: “Yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” Jisas i stap gutpela piksa long pasin bilong helpim ol narapela long save long God, olsem em i tokaut long en long beten: “Mi autim pinis nem bilong yu long ol man yu bin givim mi long dispela graun.” (Jon 17:6) Na olsem tasol, ol man i lotu tru long God ol i lainim ol narapela man long nem bilong God, ol samting em bai mekim, na ol pasin bilong em.

9Insait long lain bilong God narapela i laikim tru narapela na i no tingim em yet tasol. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Ol Kristen bilong bipo i gat dispela kain pasin bilong laikim narapela narapela. Pasin laikim em God i tok yumi mas kamapim i no tingim skin, namba, kantri bilong man, na dispela pasin laikim i mekim ol man i pas gut tru wantaim olsem wanpela lain brata i no inap bruk bruk. (Kolosi 3:14) Ol lain bilong lotu giaman i no gat dispela kain gutpela lain brata. Olsem wanem yumi save long dispela? Pasin bilong birua long narapela kantri o skin i mekim na wanbilip i kilim i dai wanbilip. Ol Kristen tru i no save holim gan samting bilong kilim i dai brata Kristen bilong ol o ol narapela man. Baibel i tok: “Sapos yumi laik save husat em i pikinini bilong God, na husat em i pikinini bilong Satan, orait yumi ken save olsem, man i no mekim stretpela pasin, em i no bilong God. Na man i no save laikim tru ol arapela pikinini bilong God, em tu i no bilong God.…Yumi wan wan i mas laikim tru ol arapela. Yumi no ken i stap olsem Kein. Em i man bilong Satan, na em i kilim i dai brata bilong en.”—1 Jon 3:10-12; 4:20, 21.

10 Pasin laikim i as na narapela i no kilim i dai narapela, tasol dispela pasin i kirapim ol trupela Kristen long mekim ol arapela samting tu. Ol trupela Kristen i save givim taim, strong, na mani samting bilong ol bilong helpim na strongim bel bilong ol narapela. (Hibru 10:24, 25) Ol i save helpim ol wanbilip long taim bilong hevi, na ol i no save giamanim ol. Ol i bihainim ol dispela tok bilong Baibel, olsem “mekim gutpela pasin long ol arapela.”—Galesia 6:10.

11Ol Kristen tru i bilip olsem Jisas Krais em i rot bilong God long kisim bek ol man. Baibel i tok: “I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.” (Aposel 4:12) Olsem yumi lukim long Sapta 5, Jisas i givim laip bilong em olsem pe bilong baim bek ol man i harim tok. (Matyu 20:28) Na tu, God i bin makim Jisas long i stap King long Kingdom bilong heven, em dispela Kingdom bai bosim graun olgeta. Na bilong yumi ken kisim laip oltaim, God i laik bai yumi bihainim ol tok Jisas i lainim ol man long en. Olsem na Baibel i tok: “Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip.”—Jon 3:36.

12Ol man i lotu tru long God ol i no bilong dispela graun. Taim Jisas i sanap long kot long ai bilong Pailat, bikman bilong Rom, Jisas i tok: “Kingdom bilong mi em i no bilong dispela graun.” (Jon 18:36) Maski ol disaipel bilong Jisas i stap long wanem kantri, ol i stap aninit long Kingdom bilong em long heven, olsem na ol i no insait long ol wok politik bilong dispela graun. Ol i no insait long ol pait bilong dispela graun. Tasol ol man i lotuim Jehova ol i no pasim ol narapela long joinim wanpela politikol pati, o sanap long eleksen, o votim man. I tru ol man i lotu tru long God ol i no insait long wok politik, tasol ol i save bihainim ol lo bilong kantri. Bilong wanem? Long wanem, Baibel i tokim ol long “stap aninit long ol gavman.” (Rom 13:1) Taim lo bilong gavman i pait wantaim lo bilong God, ol man i lotu tru long God ol bai bihainim pasin bilong ol aposel em ol i bin mekim dispela tok: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:29; Mak 12:17.

13Ol disaipel tru bilong Jisas i autim tok olsem Kingdom Bilong God tasol inap pinisim ol hevi. Jisas i tok profet: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Ol i no kirapim ol man long bilip olsem ol bikman bilong graun inap pinisim ol hevi, nogat, ol disaipel tru bilong Jisas Krais i autim tok olsem Kingdom Bilong God long heven tasol inap mekim olsem. (Song 146:3) Jisas i lainim yumi long beten long nambawan gutpela gavman i mas i kam, taim em i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Baibel i tok profet olsem dispela Kingdom “bai i daunim ol na bagarapim ol arapela king [i stap nau] na kingdom bilong en bai i stap oltaim.”—Daniel 2:44.

14 Tingim ol dispela tok yumi skelim pinis na askim yu yet: ‘Wanem lotu i save kisim olgeta tok bilong en long Baibel na i autim nem bilong Jehova? Wanem lain i laikim ol narapela olsem God i tokim yumi long mekim, na i bilip long Jisas, na i no bilong dispela graun, na i autim tok olsem Kingdom Bilong God tasol inap pinisim ol hevi? Long olgeta lotu i stap long graun, wanem lotu em inapim ol dispela mak?’ Ol samting i kamapim klia olsem em ol Witnes Bilong Jehova.—Aisaia 43:10-12.

Taim yu mekim wok bilong Jehova wantaim lain bilong em, bai yu kisim planti samting, winim ol samting yu lusim

Ol manmeri bilong kain kain skin na ples i pren wantaim

YU BAI MEKIM WANEM?

15 Bilong mekim God i amamas, i no inap long yumi bilip tasol olsem em i stap. Baibel i tok ol spirit nogut tu i save bilip olsem God i stap. (Jems 2:19) Tasol ol i no save bihainim laik bilong God na God i no orait long ol. Bilong God i ken orait long yumi, yumi mas bilip olsem em i stap, na tu, yumi mas bihainim laik bilong em. Yumi mas lusim tu lotu giaman na kirap bihainim lotu i tru.

16 Aposel Pol i soim olsem yumi no ken insait long ol lotu giaman. Em i tok: “Bikpela i tok moa olsem, ‘Yupela i mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God. Na bai mi yet mi kisim yupela.’ ” (2 Korin 6:17; Aisaia 52:11) Olsem na ol Kristen tru i sakim olgeta samting i insait long lotu giaman.

17 Baibel i soim olsem olgeta kain lotu giaman i hap bilong ‘Bikpela Babilon.’* (KTH 17:5) Dispela nem i kirapim yumi long tingim taun Babilon bilong bipo, we lotu giaman i bin kirap long en bihain long Bikpela Tait long taim bilong Noa. Planti bilip na pasin bilong ol lotu giaman long nau i kirap long bipo yet long Babilon. Olsem: Ol Babilon i bin lotuim ol god triwan. Long nau wanpela bikpela bilip bilong planti lotu em God Triwan. Tasol Baibel i kamapim klia olsem i gat wanpela trupela God tasol, em Jehova, na Jisas Krais em i Pikinini bilong em. (Jon 17:3) Ol Babilon i bilip tu olsem taim man i dai, em i gat wanpela spirit i stap laip yet na spirit inap pilim bikpela pen long ples paia. Long nau, planti lotu i save lainim ol man long dispela kain tok.

18 Lotu bilong ol Babilon bilong bipo i bin go long olgeta hap, olsem na Bikpela Babilon long nau i makim olgeta lotu giaman long graun. Na God i bin tok profet olsem olgeta lotu giaman bai pinis wantu. (KTH 18:8) Olsem wanem? Yu inap luksave long as na em i bikpela samting long yu mas lusim olgeta samting bilong Bikpela Babilon? God Jehova i laik bai yu “lusim dispela ples” hariap, taim haptaim i stap yet bilong mekim olsem.—KTH 18:4.

19 Sapos yu lusim lotu giaman, ating sampela bai no laik poroman moa wantaim yu. Tasol taim yu mekim wok bilong Jehova wantaim lain bilong em, bai yu kisim planti samting, winim ol samting yu lusim. Olsem ol disaipel bilong Jisas long bipo em ol i bin lusim ol samting na bai ol i ken bihainim lek bilong Jisas, yu tu bai kisim planti brata na sista bilong spirit. Yu bai insait long wanpela bikpela famili bilong planti milion trupela Kristen em ol i stap long olgeta hap na ol i laikim yu tru. Na yu inap wet long kisim gutpela samting, em laip oltaim “long taim i laik kamap bihain.” (Mak 10:28-30) Ating bihain, ol man husat i no laikim ol bilip bilong yu na i lusim yu, ol bai skelim tok bilong Baibel na ol tu bai kirap lotuim Jehova.

20 Baibel i tok klostu nau God bai pinisim pasin nogut bilong nau na kamapim nupela taim i gat stretpela pasin long en aninit long Kingdom bilong em. (2 Pita 3:9, 13) Dispela nupela taim bai i gutpela tru! Na long dispela nupela taim bai i gat wanpela lotu tasol, wanpela trupela lotu. Em i savetingting long yu mekim ol samting long nau bambai yu ken bung wantaim ol lain i lotu tru long God.

OL TOK BAIBEL I LAINIM YUMI LONG EN

  • I gat wanpela trupela lotu tasol i stap.—Matyu 7:13, 14.
  • Tok lotu i lainim ol man long en na pasin lotu i kirapim ol man long bihainim i kamapim klia lotu i tru.—Matyu 7:16, 17.
  • Ol Witnes Bilong Jehova i lotuim God long rot em i orait long en.—Aisaia 43:10.

*  Bilong kisim sampela save moa long as na Bikpela Babilon i makim olgeta lotu giaman long graun, lukim Apendiks.


Ol Askim Bilong Stadi

1. Sapos yumi lotuim God long pasin i stret, dispela bai helpim yumi olsem wanem?

2. Olsem wanem yumi inap lain long stretpela pasin bilong lotuim Jehova? Wanem tok piksa i helpim yumi long kliagut long dispela?

3. Olsem Jisas i tok, yumi mas mekim wanem na bai God i ken orait long yumi?

4. Tok bilong Jisas long tupela rot i makim wanem samting? Wan wan rot i go we?

5. Olsem wanem yumi inap luksave long ol man i bihainim lotu i tru?

6, 7. Ol wokman bilong God i ting olsem wanem long Baibel? Olsem wanem Jisas i stap gutpela piksa long dispela samting?

8. Wanem ol samting i insait long pasin bilong lotuim Jehova?

9, 10. Long wanem ol rot ol Kristen tru i soim olsem narapela i laikim tru narapela?

11. Bilong wanem em i bikpela samting long bilip olsem Jisas Krais em i rot bilong God long kisim bek ol man?

12. Olsem wanem yumi no bilong dispela graun?

13. Ol disaipel tru bilong Jisas i ting olsem wanem long Kingdom Bilong God? Olsem na ol i save mekim wanem?

14. Yu ting wanem lotu em inapim ol mak bilong lotu i tru?

15. Yumi bilip olsem God i stap, tasol God i laik bai yumi mas mekim wanem samting moa?

16. Bilong wanem yumi no ken insait long ol samting bilong lotu giaman?

17, 18. ‘Bikpela Babilon’ em wanem samting? Bilong wanem em i bikpela samting long “lusim dispela ples” hariap?

19. Yu bai kisim wanem ol samting sapos yu mekim wok bilong Jehova?

20. Ol manmeri i bihainim lotu i tru, wanem samting bai painim ol long bihain?