Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

APENDIKS

Mama i Karim Jisas Long Disemba o Nogat?

Mama i Karim Jisas Long Disemba o Nogat?

BAIBEL i no tokim yumi long wanem taim mama i karim Jisas. Tasol em i kamapim ol tok i helpim yumi long save olsem mama i no bin karim em long Disemba.

Tingim dispela taim bilong yia long Betlehem, em ples mama i bin karim Jisas long en. Mun Kislev bilong ol Juda (Novemba/Disemba) em taim bilong kol na ren. Mun bihain long dispela em Tebet (Disemba/Janueri). Dispela mun em taim bilong kol, winim ol narapela mun bilong yia, na sampela taim ais i pundaun long ol maunten. Nau yumi ken lukim tok Baibel i mekim long dispela samting.

Esra i kamapim klia olsem Kislev em taim bilong kol na ren. Esra i stori long lain manmeri i bung long Jerusalem long “de namba 20 bilong namba 9 mun [Kislev],” na em i tok “bikpela ren i kam daun na i wok long wasim olgeta man na mekim ol i guria.” Ol manmeri i bung i stori long dispela taim bilong yia, olsem: “Bikpela ren i kam daun. Olsem na mipela i no inap sanap ausait.” (Esra 10:9, 13; Jeremaia 36:22) Ol wasman bilong sipsip i stap long dispela hap ol i no larim ol sipsip bilong ol i stap ausait long nait long Disemba!

Ol wasman wantaim ol sipsip bilong ol

Taim mama i karim Jisas, ol wasman na ol sipsip bilong ol i stap ausait long nait

Tasol Baibel i tok ol wasman bilong sipsip i stap ausait na lukautim ol sipsip bilong ol long dispela nait mama i karim Jisas. Luk i tok long dispela taim ol wasman bilong sipsip “i stap ausait long taun, na ol i was long ol sipsip bilong ol long nait” klostu long Betlehem. (Luk 2:8-12) Tingim, Baibel i tok ol wasman bilong sipsip i stap ausait, i no olsem ol i wokabaut tasol ausait long san. Ol sipsip bilong ol i stap ausait long nait. Yu ting dispela stori long ol i stap ausait inap kamap long taim bilong kol na ren long Betlehem long Disemba? Nogat, i no inap. Olsem na ol samting i kamap long taim mama i karim Jisas i soim olsem mama i no bin karim em long Disemba.*

Baibel i kolim taim stret Jisas i bin dai long en, tasol Baibel i no mekim planti stori i helpim yumi long save long taim stret mama i bin karim em. Dispela i kirapim yumi long tingim tok bilong King Solomon: “Sapos ol man i ting yu gutpela man, orait dispela i gutpela tru, na i winim sanda i gat bikpela pe bilong en. Na de yu dai i winim de mama i bin karim yu.” (Saveman 7:1) Olsem na yumi no kirap nogut long Baibel i stori gut long wok Jisas i bin mekim na long indai bilong em, tasol i no stori tumas long taim stret mama i bin karim em.


*  Bilong kisim sampela save moa long dispela, lukim buk Toktok Gut Wantaim Ol Man Long Baibel, pes 284-8, ol Witnes Bilong Jehova i wokim.

← Go bek long sapta