Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

SAPTA 3

I Gat Wanem As na God i Wokim Dispela Graun?

I Gat Wanem As na God i Wokim Dispela Graun?

I gat wanem as na God i wokim ol manmeri?

Ol i bin sutim wanem tok long God?

Bai yumi gat wanem kain sindaun long graun long bihain?

SAMTING God bai mekim long dispela graun i gutpela tru. Jehova i laik bai graun i pulap long ol manmeri i stap amamas, na ol i no gat sik. Baibel i tok, “Bikpela i wokim wanpela gaden i stap long Iden” na em i “mekim graun i kamapim ol kain kain diwai, pikinini bilong ol i gutpela long kaikai. Olgeta dispela diwai i naispela tru.” Bihain long God i bin wokim namba wan man na meri, Adam tupela Iv, Em i putim ol long dispela gutpela ples na tokim ol: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:28; 2:8, 9, 15) Olsem na God i laik bai ol manmeri i karim ol pikinini, skruim Paradais i go long olgeta hap bilong graun, na lukautim ol animal.

2 Yu ting laik bilong God Jehova olsem ol manmeri bai stap long wanpela paradais long graun bai kamap tru? God i tok: “Mi tok pinis long mekim dispela ol samting, na bai mi mekim ol i kamap olsem mi tok.” (Aisaia 46:9-11; 55:11) Yes, ol samting God i tingting pinis long mekim em bai mekim tru! Em i tok em i “no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) God i laik bai wanem kain ol man i stap long graun? Na em i laik bai ol i stap hamas yia long en? Baibel i tok: “Ol stretpela man bai i kisim graun God i givim ol, na bai ol i stap oltaim long en.”—Song 37:29; KTH 21:3, 4.

3 Tru, dispela samting i no bin kamap yet. Ol manmeri i save sik na dai; ol i save pait tu na narapela i save kilim i dai narapela. Hevi i bin kamap. Tasol yumi no ken ting God i laik bai graun i stap olsem yumi lukim long nau! Wanem samting i bin kamap? Bilong wanem samting God i tingting pinis long mekim i no bin kamap? Wanpela buk ol man tasol i bin kamapim i no inap tokim yumi long dispela, long wanem, dispela hevi i kirap long heven.

WANPELA BIRUA I KAMAP

4 Namba wan buk bilong Baibel i stori long wanpela birua bilong God i kamap long gaden Iden. Baibel i tok em i olsem “snek,” tasol em i no wanpela animal nating tasol. Laspela buk bilong Baibel i tok em i dispela man “ol i kolim em Satan na…em i man bilong giamanim olgeta manmeri bilong graun.” Baibel i kolim em tu olsem “dispela snek bilong bipo yet.” (Stat 3:1; KTH 12:9) Dispela strongpela ensel, o strongpela spirit yumi no inap lukim, em i toktok long Iv long rot bilong snek, wankain olsem man i tromoi nek bilong em long maus bilong doli na i olsem doli i toktok. Dispela spirit i bin stap taim God i wokim graun bilong ol manmeri i ken stap long en.—Jop 38:4, 7.

5 Tasol olgeta samting Jehova i bin wokim i gutpela olgeta, olsem na husat i wokim “Satan”? Yumi ken tok, wanpela strongpela pikinini spirit bilong God i mekim em yet i kamap Satan. Olsem wanem dispela inap kamap? Long nau tu, wanpela man em bipo em i gutpela man na i no save giaman, em inap kamap stilman. Olsem wanem dispela inap kamap? Ating dispela man i larim ol tingting i no stret i kamap long bel bilong em. Sapos em i wok long tingting long en, dispela laik nogut inap kamap strong tru. Na taim rot i op, ating bai em i mekim ol samting nogut em i bin tingting long en.—Jems 1:13-15.

6 Dispela samting i bin kamap long Satan. Em i harim God i tokim Adam tupela Iv long kamapim ol pikinini na go sindaun long olgeta hap bilong graun. (Stat 1:27, 28) Ating Satan i tingting, ‘Olgeta dispela manmeri inap lotu long mi na i no long God!’ Olsem na tingting kranki i kamap long bel bilong em. Bihain, em i trikim Iv long rot bilong sutim ol tok giaman long God. (Stat 3:1-5) Olsem na em i kamap “Devil,” mining bilong dispela tok em “Man bilong bagarapim gutnem bilong narapela.” Na tu, em i kamap “Satan,” mining bilong dispela tok em “Birua.”

7 Long rot bilong pasin giaman na pasin trik, Satan i kirapim Adam tupela Iv long sakim tok bilong God. (Stat 2:17; 3:6) Olsem na bihain ol i dai, olsem God i bin tok ol bai dai sapos ol i sakim tok bilong em. (Stat 3:17-19) Adam i kamap man i no gutpela olgeta taim em i mekim sin, olsem na olgeta pikinini bilong em i kisim sin long em. (Rom 5:12) Yumi ken tok piksa long dispela samting long tin bilong wokim bret long en. Sapos tin i gat krungut long en, wanem samting bai kamap long olgeta wan wan bret ol i wokim long dispela tin? Olgeta bret bai gat krungut long en, olsem ol i no gutpela olgeta. Na olsem tasol, olgeta man i bin kisim “krungut” olsem sin bilong Adam. Long dispela as olgeta man i save go lapun na i dai.—Rom 3:23.

8 Taim Satan i kirapim Adam tupela Iv long mekim rong long God, em i kamapim pasin bilong bikhet long God. Em i sutim tok long pasin bilong Jehova long mekim wok bos. I olsem Satan i tok: ‘God i bos nogut. Em i save giaman na i no save givim ol gutpela samting long ol man i stap aninit long em. I no gat wok long God i bosim ol manmeri. Ol yet i ken makim wanem samting i gutpela na wanem samting i nogut. Na sapos mi bosim ol, ol bai stap gutpela moa.’ God bai mekim wanem long kain tok nogut olsem? Sampela i ting i gutpela moa sapos God i bin kilim i dai ol dispela bikhetman. Tasol yu ting dispela bai bekim ol tok Satan i bin sutim? Dispela bai kamapim klia olsem pasin bilong God long bosim ol man i stret?

9 Stretpela pasin bilong Jehova i gutpela olgeta, olsem na em i no inap kilim i dai wantu ol dispela bikhetman. Bilong bekim gut tok Satan i bin sutim na long kamapim olsem Satan em i man bilong giaman, em i ting sampela haptaim i mas lus pastaim. Olsem na God i ting inap sampela haptaim em bai larim ol man i stap aninit long strong bilong Satan na bosim wokabaut bilong ol yet. Sapta 11 bilong dispela buk bai skelim i gat wanem as na Jehova i mekim olsem, na bilong wanem em i bin larim longpela haptaim i lus paslain long em i stretim ol dispela bikpela tok. Tasol nau i gutpela long tingting long ol dispela askim: I stret Adam tupela Iv i bilip long Satan husat i no bin mekim wanpela gutpela samting long ol? Jehova i bin givim ol olgeta samting, olsem na i stret ol i ting em i man nogut bilong giaman? Sapos yu bin stap long dispela taim, bai yu mekim wanem?

10 Em i gutpela long tingim ol dispela askim, long wanem, ol i stret long yumi olgeta long nau tu. Em nau, yu gat rot long sapotim sait bilong Jehova na bekim tok Satan i bin sutim long em. Yu inap daun long Jehova olsem King bilong yu na helpim wok bilong soim olsem Satan em i man bilong giaman. (Song 73:28; Sindaun 27:11) Sori tru, sampela manmeri tasol namel long planti bilion manmeri i gat laik long mekim olsem. Dispela i kamapim wanpela bikpela askim olsem: Tru tru Baibel i tok olsem Satan i bosim dispela graun?

HUSAT I BOSIM DISPELA GRAUN?

Satan inap givim ol strongpela kantri bilong graun long Jisas, long wanem, ol i bilong em

Jisas i sakim Satan taim Satan i grisim em long kamap bos bilong dispela graun

11 Jisas i kliagut olsem Satan em i hetman i save bosim dispela graun. Long rot bilong wanpela mirakel, Satan i soim long Jisas “olgeta strongpela kantri bilong dispela graun wantaim ol gutpela samting bilong ol.” Satan i tok promis long Jisas olsem: “Sapos yu brukim skru na lotu long mi, orait bai mi givim yu dispela olgeta samting.” (Matyu 4:8, 9; Luk 4:5, 6) Tingim dispela. Sapos ol dispela gavman i no bilong Satan, yu ting dispela tok bilong Satan inap pulim Jisas? Nogat tru! Jisas i save ol dispela gavman bilong graun i bilong Satan. Sapos ol i no bilong Satan, Jisas bai tokaut olsem.

12 Jehova em i God i Gat Olgeta Strong, na Man Bilong Wokim heven na graun. (KTH 4:11) Tasol i no gat wanpela hap long Baibel i tok olsem God Jehova o Jisas Krais i bosim dispela graun. Jisas i tokaut stret olsem Satan em i “hetman i save bosim dispela graun.” (Jon 12:31; 14:30; 16:11) Baibel i tok Satan em i “giaman god bilong dispela graun.” (2 Korin 4:3, 4) Kristen aposel Jon i toktok long dispela birua, Satan, olsem: “Dispela graun olgeta em i stap aninit long strong bilong Satan.”—1 Jon 5:19.

GRAUN BILONG SATAN BAI PINIS OLSEM WANEM?

13 Long olgeta yia, pasin bilong dispela graun i wok long i go nogut moa. Em i pulap long ol ami i pait wantaim, ol man politik i mekim pasin giaman, ol bikman bilong lotu i gat tupela maus, na ol raskol i no gat sori. I no gat rot bilong stretim pasin bilong olgeta man. Baibel i kamapim klia olsem klostu nau God bai pinisim ol man nogut long pait bilong em long Armagedon. Long dispela rot nupela taim i gat stretpela pasin long en bai kamap.—KTH 16:14-16.

14 God Jehova i makim Jisas Krais long kamap King long Kingdom o gavman bilong Em long heven. Long bipo yet Baibel i tok profet: “Wanpela pikinini man i kamap pinis long yumi, em wanpela pikinini God i givim long yumi. Em bai i stap king bilong yumi, na em bai i gat ol dispela nem,…‘King bilong kamapim gutpela sindaun na bel isi.’…Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.” (Aisaia 9:6, 7) Jisas i lainim ol disaipel bilong em long beten long dispela gavman: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Olsem yumi bai lukim long narapela hap bilong dispela buk, klostu nau Kingdom Bilong God bai rausim olgeta gavman bilong dispela graun, na em bai kisim ples bilong olgeta dispela gavman. (Daniel 2:44) Long dispela taim Kingdom Bilong God bai kamapim Paradais hia long graun.

NUPELA TAIM I KLOSTU PINIS!

15 Baibel i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13; Aisaia 65:17) Taim Baibel i tok long “graun,” sampela taim dispela i makim ol manmeri i stap long graun. (Song 97:1) Olsem na “nupela graun” i makim lain manmeri em God i orait long ol.

16 Jisas i tok promis olsem long nupela taim ol man God i orait long ol, ol bai kisim “laip i stap gut oltaim oltaim” olsem presen. (Mak 10:30) Plis opim Baibel bilong yu long Jon 3:16 na 17:3, na ritim tok Jisas i mekim long yumi mas mekim wanem bilong kisim laip oltaim. Nau skelim long Baibel ol blesing ol man bai kisim, em ol man husat i winim mak bilong kisim dispela gutpela presen long God long Paradais bai kamap long graun.

17Pasin nogut, woa, pasin raskol, na pasin bilong pait na bagarapim man bai pinis. “Ol man nogut i lus olgeta.…Tasol ol manmeri i daunim nem bilong ol yet, bai God i givim olgeta graun long ol.” (Song 37:10, 11) Gutaim bai kamap, long wanem, ‘God i save mekim i dai pait long olgeta hap graun.’ (Song 46:9; Aisaia 2:4) Long dispela taim “ol manmeri i ken bihainim stretpela pasin tasol. Taim mun i lait yet, planti gutpela samting i ken kamap”—na dispela samting bai stap inap oltaim oltaim!—Song 72:7.

18Ol lain i lotuim Jehova bai i no bungim birua. Taim lain Israel long bipo i bihainim tok bilong God, ol i stap gut. (Wok Pris 25:18, 19) Em bai gutpela samting tru long i stap gut olsem long Paradais!—Aisaia 32:18; Maika 4:4.

19Kaikai bai i no sot. Man bilong raitim song i tok: “Planti rais na wit samting i ken kamap long ol gaden bilong ol manmeri, inap olsem i save kamap long Lebanon.” (Song 72:16) God Jehova bai blesim ol stretpela man, na ‘planti gutpela kaikai bai kamap long graun.’—Song 67:6.

Ol manmeri bilong kain kain lain na skin i amamas wantaim long Paradais

20Graun olgeta bai kamap wanpela paradais. Ol naispela haus na gaden bai stap long dispela graun em bipo ol man i gat sin i bin bagarapim. (Aisaia 65:21-24; KTH 11:18) Ol hap bilong graun i kamap gutpela pinis bai go bikpela moa inap long graun olgeta i kamap naispela tru na i kamapim ol gutpela kaikai samting olsem gaden Iden. Na God bai ‘opim han bilong em na inapim laik bilong olgeta samting i gat laip.’—Song 145:16, NW.

21Ol man na animal bai i stap wanbel wantaim. Ol wel animal na ol animal em ol man i save lukautim ol bai kaikai wantaim. Ol liklik pikinini tu bai i no pret long ol animal em ol inap bagarapim ol man long nau.—Aisaia 11:6-9; 65:25.

22Ol sik bai pinis. Jisas em i King bilong Kingdom Bilong God long heven, na em bai mekim bikpela wok bilong oraitim ol manmeri, winim taim em i bin stap long graun. (Matyu 9:35; Mak 1:40-42; Jon 5:5-9) Long dispela taim “bai i no gat wanpela man i tok: ‘Mi gat sik.’ ”—Aisaia 33:24, NW; 35:5, 6.

23Ol man i dai pinis bai kisim laip gen na ol inap i stap oltaim. Olgeta man i dai pinis em God i tingim ol, ol bai kirap bek. “God bai i kirapim bek ol man i dai pinis, em ol stretpela man na ol man nogut wantaim.”—Aposel 24:15; Jon 5:28, 29.

24 Gutpela samting tru bai painim ol man husat i laik kisim save long Bikpela Man Bilong Wokim yumi, God Jehova, na i laik mekim wok bilong em! Jisas i toktok long Paradais bai kamap bihain long graun, taim em i tokim man nogut i dai klostu long em: “Mi tok tru long yu nau, bai yu stap wantaim mi long Paradais.” (Luk 23:43, NW ) Em i bikpela samting long yumi kisim sampela save moa long Jisas Krais, em long rot bilong em olgeta dispela blesing bai kamap.

OL TOK BAIBEL I LAINIM YUMI LONG EN

  • Graun bai kamap Paradais olsem God i tingting pinis long en.—Aisaia 45:18; 55:11.
  • Satan i bosim dispela graun long nau.—Jon 12:31; 1 Jon 5:19.
  • Long nupela taim, God bai givim planti blesing long ol manmeri.—Song 37:10, 11, 29.

Ol Askim Bilong Stadi

1. I gat wanem as na God i wokim dispela graun?

2. (a) Olsem wanem yumi save ol samting God i tingting pinis long mekim long graun em bai kamap tru? (b) Baibel i tok wanem long ol manmeri bai stap oltaim?

3. Wanem ol samting nogut i stap nau long graun? Dispela i kamapim wanem ol askim?

4, 5. (a) Husat i toktok long Iv long rot bilong snek? (b) Wanpela man em bipo em i gutpela man na i no save giaman, olsem wanem em inap kamap stilman?

6. Olsem wanem wanpela strongpela pikinini spirit bilong God i kamap Satan na Devil?

7. (a) Bilong wanem Adam tupela Iv i dai? (b) Bilong wanem olgeta pikinini bilong Adam i save go lapun na i dai?

8, 9. (a) Satan i bin sutim wanem tok long God? (b) Bilong wanem God i no kilim i dai wantu ol dispela bikhetman?

10. Yu ken mekim wanem bilong sapotim sait bilong Jehova na bekim tok Satan i bin sutim long em?

11, 12. (a) Taim Satan i traim Jisas, olsem wanem dispela i kamapim klia olsem Satan em i hetman i save bosim dispela graun? (b) Wanem narapela samting i kamapim klia olsem Satan i bosim dispela graun?

13. Bilong wanem nupela taim i mas kamap?

14. God i bin makim husat long kamap King long Kingdom bilong Em? Olsem wanem Baibel i bin tok profet long dispela?

15. “Nupela graun” em i wanem samting?

16. God bai givim wanem gutpela presen long ol man em i orait long ol? Yumi mas mekim wanem bilong kisim dispela presen?

17, 18. Olsem wanem yumi ken save olsem bel isi na gutaim bai stap long olgeta hap?

19. Olsem wanem yumi save bai i gat planti kaikai long nupela taim God bai kamapim?

20. Bilong wanem yumi ken bilip tru olsem graun olgeta bai kamap wanpela paradais?

21. Wanem samting i soim olsem pasin wanbel bai stap namel long ol man na animal?

22. Wanem samting bai kamap long ol sik?

23. Bilong wanem kirap bek bai givim bikpela amamas long yumi?

24. Yu pilim olsem wanem taim yu tingim laip long Paradais long graun?