Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

SAPTA 17

Go Klostu Long God Long Rot Bilong Beten

Go Klostu Long God Long Rot Bilong Beten

Bilong wanem yumi mas beten long God?

Yumi mas mekim wanem na God bai harim beten bilong yumi?

Olsem wanem God i save helpim yumi taim yumi beten long em?

TAIM yumi skelim traipela ples antap wantaim graun bilong yumi, graun em i liklik tru. Jehova “i bin mekim kamap heven na graun,” na long tingting bilong em ol lain manmeri i olsem liklik hap wara i pundaun. (Song 115:15; Aisaia 40:15) Tasol Baibel i tok: “Wanem ol manmeri i save bel tru na i singaut long em, em i save stap klostu long ol. Wanem ol manmeri i save pret long em, em i save givim ol samting long ol. Na em i save harim krai bilong ol.” (Song 145:18, 19) Tingim insait bilong dispela tok! Man Bilong Wokim olgeta samting i stap klostu long yumi na em i harim beten bilong yumi sapos yumi “bel tru na i singaut long em.” Yumi inap beten long God na dispela em i wanpela gutpela samting tru!

2 Tasol sapos yumi laik bai Jehova i harim beten bilong yumi, yumi mas beten long em long rot em i orait long en. Bilong mekim olsem, yumi mas kliagut long ol tok Baibel i mekim long beten. Em i bikpela samting long yumi mas save long Baibel i tok wanem long dispela samting, long wanem, beten i helpim yumi long i go klostu long Jehova.

BILONG WANEM YUMI BETEN LONG JEHOVA?

3 Wanpela bikpela as na yumi mas beten long Jehova em olsem: Em i singautim yumi long mekim olsem. Baibel i kirapim yumi olsem: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Yumi no laik sakim kain gutpela samting olsem em Nambawan King bilong heven na graun i laik givim long yumi!

Meri i beten

Man “i bin mekim kamap heven na graun,” em i amamas long harim beten bilong yumi

4 Narapela as na yumi laik beten em olsem: Pasin bilong beten oltaim long Jehova em i rot bilong helpim yumi long pas gut moa wantaim em. Ol pren tru i no save toktok tasol long taim ol i sot long samting. Nogat. Narapela i save tingim tru narapela, na pasin pren bilong ol i kamap strong moa taim ol i kamapim tingting na wari bilong ol, na ol samting i stap long bel bilong ol. Yumi ken tok, pasin bilong yumi long stap klostu long God Jehova i wankain. Long rot bilong dispela buk, yu bin kisim bikpela save long ol tok Baibel i mekim long Jehova, ol pasin bilong em, na ol samting em i tingting pinis long mekim. Yu bin kisim save long em olsem em i wanpela man tru. Beten i opim rot long yu ken tokim Papa bilong yu long heven long ol tingting i stap insait tru long bel bilong yu. Taim yu mekim olsem, yu go klostu moa long Jehova.—Jems 4:8.

YUMI MAS INAPIM WANEM OL MAK?

5 Yu ting Jehova i save harim olgeta beten? Tingim tok em i mekim long ol bikhet Israel long taim bilong profet Aisaia: “Maski yupela i prea planti taim, bai mi pasim yau bilong mi. Long wanem, blut bilong ol man yupela i bin kilim, em i pas yet long ol han bilong yupela.” (Aisaia 1:15) Em nau, sampela pasin inap mekim na God i no harim beten bilong yumi. Olsem na bilong God i ken harim beten bilong yumi, yumi mas inapim sampela mak.

6 Wanpela bikpela mak yumi mas inapim em yumi mas i gat bilip. (Mak 11:24) Aposel Pol i tok: “Man i no bilip long God, em i no inap bihainim laik bilong God. Long wanem, man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Yumi save olsem God i stap na em i save harim beten bilong yumi, tasol dispela samting tasol i no makim olsem yumi gat bilip tru. Pasin bilong yumi i kamapim klia yumi gat bilip tru o nogat. Wokabaut bilong yumi long olgeta de i mas kamapim klia olsem yumi gat bilip.—Jems 2:26.

7 Jehova i laik tu olsem ol man i beten long em ol i mas i gat pasin daun na gutpela bel. I gat as tru na yumi mas i gat pasin daun taim yumi toktok long Jehova. Taim rot i op long ol man i ken toktok wantaim king o presiden, ol i save toktok long pasin rispek, ol i tingim bikpela namba bilong dispela man. Olsem na yumi mas mekim moa yet pasin rispek taim yumi beten long Jehova! (Song 138:6) Em i “God I Gat Olgeta Strong.” (Stat 17:1) Taim yumi beten long God, pasin bilong yumi long beten i mas soim olsem yumi save i stret yumi daun tru long em. Kain pasin daun olsem bai kirapim yumi long mekim ol beten yumi pilim tru long bel, na yumi no kolim nating ol wankain tok tasol long beten bilong yumi.—Matyu 6:7, 8.

8 Narapela samting yumi mas mekim na bai God i ken harim beten bilong yumi, em yumi mas mekim ol samting i stret wantaim beten bilong yumi. Jehova i laik bai yumi wok strong long mekim ol samting i stret wantaim beten bilong yumi. Olsem: Sapos yumi beten olsem, “Givim mipela kaikai inap long dispela de,” yumi mas wok strong long mekim wanem wanem wok mani i stap em yumi inap long mekim. (Matyu 6:11; 2 Tesalonaika 3:10) Sapos yumi beten askim God long helpim yumi long lusim wanpela pasin kranki, orait yumi mas was gut na abrusim ol samting inap kirapim yumi long mekim dispela pasin nogut. (Kolosi 3:5) Yumi mas inapim ol dispela mak, na tu, i gat sampela askim long ol samting bilong beten em yumi mas save long bekim bilong ol.

BEKIM SAMPELA ASKIM BILONG BETEN

9Yumi mas beten long husat? Jisas i lainim ol disaipel long beten long “Papa bilong mipela, yu stap long heven.” (Matyu 6:9) Olsem na yumi mas beten long God Jehova tasol. Tasol Jehova i laik bai yumi mas save long namba bilong Pikinini bilong em, Jisas Krais. Olsem yumi lainim long Sapta 5, God i bin salim Jisas i kam daun long graun bilong givim pe bilong baim bek yumi long sin na dai. (Jon 3:16; Rom 5:12) God i bin makim Jisas long i stap Hetpris na Jas. (Jon 5:22; Hibru 6:20) Olsem na Baibel i tokim yumi long beten long rot bilong Jisas. Em yet i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot. Nogat. Long mi tasol.” (Jon 14:6) Bilong Jehova i ken harim beten bilong yumi, yumi mas beten long Jehova tasol long rot bilong Pikinini bilong em.

10Olsem wanem? Yumi mas mekim wanpela kain pasin, olsem sanap o lindaun, taim yumi beten? Nogat. Jehova i no tokim yumi long sanap o sindaun, o long mekim sampela samting long han bilong yumi. Baibel i tok i stret yumi ken sindaun, daunim het, brukim skru, o sanap taim yumi beten. (1 Stori 17:16; Nehemia 8:6; Daniel 6:10; Mak 11:25) Bikpela samting em bel bilong yumi i mas gutpela, pasin yumi mekim em ol narapela inap lukim, olsem sindaun o brukim skru samting, dispela i no bikpela samting. Taim yumi mekim ol samting bilong ol wan wan de o taim bikpela hevi i painim yumi, yumi ken beten long tingting maski yumi stap we we. Jehova inap harim ol kain beten olsem maski ol man i stap klostu long yumi ol i no luksave olsem yumi beten.—Nehemia 2:1-6.

11Yumi inap beten long wanem ol samting? Baibel i tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi.” (1 Jon 5:14) Olsem na yumi ken beten askim God long olgeta kain samting i stret wantaim laik bilong em. Yu ting em i laik bilong em long yumi beten long ol samting yumi save tingting planti long en? Yes, em i laik yumi mekim olsem! Pasin bilong beten long Jehova i wankain olsem yumi toktok long wanpela gutpela pren. Yumi inap autim tru ‘olgeta hevi na olgeta tingting bilong yumi’ long God. (Song 62:8) I stret yumi askim God long givim holi spirit long yumi, long wanem, holi spirit bai helpim yumi long mekim ol samting i stret. (Luk 11:13) Yumi ken askim God long stiaim yumi long mekim ol gutpela disisen na long strongim yumi long karim ol hevi. (Jems 1:5) Taim yumi mekim rong, yumi mas askim God long lusim rong bilong yumi long rot bilong ofa bilong Krais. (Efesus 1:3, 7) Tru, yumi no ken beten tasol long ol samting bilong yumi yet. Yumi mas tingim ol narapela man taim yumi beten—famili bilong yumi na ol wanbilip.—Aposel 12:5; Kolosi 4:12.

Ol manmeri i beten long kain kain taim

Jehova inap harim beten bilong yu, maski yu beten long wanem wanem taim

12 Ol samting bilong God Jehova i mas i stap nambawan bikpela samting long beten bilong yumi. I gat as tru na yumi mas litimapim nem bilong em na tok tenkyu long olgeta gutpela pasin bilong em. (1 Stori 29:10-13) Beten Jisas i lainim yumi long en, i stap long Matyu 6:9-13, em i lainim yumi long beten olsem nem bilong God i mas i stap holi. Bihain long dispela, em i tok Kingdom Bilong God i mas i kam na laik bilong God i mas kamap long graun olsem em i save kamap long heven. Bihain long Jisas i kolim ol dispela bikpela samting bilong Jehova, em i kolim ol samting bilong yumi ol man. Taim yumi putim ol samting bilong God i stap nambawan samting long beten bilong yumi, yumi soim olsem yumi no tingim tasol sindaun bilong yumi yet.

13Yumi mas beten inap hamas minit samting? Baibel i no tok ol beten bilong yumi yet o ol beten yumi mekim long ai bilong ol man i mas hamas minit. Ating yumi save mekim sotpela beten paslain long yumi kaikai, na taim yumi mekim beten bilong yumi yet ating yumi beten longpela taim na kamapim ol samting i stap long bel bilong yumi long Jehova. (1 Samuel 1:12, 15) Tasol Jisas i no orait long ol man i tingim ol yet i stretpela man na ol i mekim ol longpela beten bilong pulim ai bilong ol narapela. (Luk 20:46, 47) Jehova i no save laikim ol dispela kain beten. Bikpela samting em taim yumi beten yumi mas pilim tru long bel. Olsem na longpela bilong ol beten em God i save harim i narapela narapela, ol i stret wantaim sindaun bilong yumi na ol samting yumi mas kisim helpim long en.

14Yumi mas beten hamas taim? Baibel i tokim yumi long “prea i stap” na “beten long olgeta taim.” (Matyu 26:41; Rom 12:12; 1 Tesalonaika 5:17) Ol dispela skripsa i no makim olsem yumi mas beten long Jehova long olgeta minit samting bilong de. Nogat. Tasol Baibel i kirapim yumi long beten oltaim, tok tenkyu long Jehova long gutpela pasin em i mekim long yumi, na askim em long stiaim na strongim yumi, na mekim gut bel bilong yumi. Yumi amamas long Jehova i no makim hamas minit samting o hamas taim yumi ken toktok wantaim em long beten. Sapos yumi amamas tru long yumi ken beten long Jehova, bai yumi painim planti rot bilong beten long Papa bilong yumi long heven.

15Bilong wanem yumi mas tok “Amen” long pinis bilong beten? Dispela tok “amen” i makim “I tru,” o “mi wanbel long dispela tok.” Ol skripsa i kamapim klia olsem i stret yumi tok “Amen” olsem “I tru” long pinis bilong beten bilong yumi yet na beten narapela i mekim. (1 Stori 16:36; Song 41:13) Taim yumi tok “Amen” long pinis bilong beten bilong yumi yet, yumi kamapim klia olsem yumi pilim ol tok long bel bilong yumi. Taim yumi tok “Amen”—long bel o long maus—long pinis bilong beten narapela i mekim, yumi soim olsem yumi wanbel wantaim ol tok bilong dispela beten.—1 Korin 14:16.

TAIM GOD I HARIM BETEN

16 Olsem wanem? Tru tru Jehova i save harim ol beten? Yes, em i save harim! I gat as tru na yumi ken bilip olsem Jehova i save harim beten bilong planti milion manmeri husat i gat gutpela bel. (Song 65:2) Taim Jehova i harim beten bilong yumi, em i save helpim yumi long kain kain rot.

17 Jehova i save yusim ol ensel bilong em na ol wokman bilong em long graun bilong helpim ol man i beten long em. (Hibru 1:13, 14) I gat planti ekspiriens bilong ol man husat i bin beten askim God long helpim ol long kliagut long tok bilong Baibel, na bihain liklik wanpela wokman bilong Jehova i bin bungim dispela man. Ol kain ekspiriens olsem i kamapim klia olsem ol ensel i save stiaim wok bilong autim tok bilong Kingdom. (KTH 14:6) Taim yumi mas kisim helpim na yumi beten long Jehova, Jehova inap kirapim wanpela Kristen long kam helpim yumi.—Sindaun 12:25; Jems 2:16.

18 God Jehova i save yusim tu holi spirit na Baibel bilong helpim ol wokman bilong em i beten long em. Taim yumi beten askim em long helpim yumi long karim ol hevi, em inap stiaim na strongim yumi long rot bilong holi spirit bilong em. (2 Korin 4:7) Taim yumi askim God long stiaim yumi, planti taim em i mekim olsem long rot bilong Baibel, tok i stap long Baibel i helpim yumi long makim ol samting yumi laik mekim. Taim yumi stadi long Baibel na ritim ol buk na nius Kristen bilong yumi, olsem dispela buk, yumi inap painim ol skripsa i helpim yumi. Ol tok i save kamap long ol miting Kristen o tok wanpela elda long kongrigesen i mekim, inap kamapim sampela bikpela tok bilong Baibel yumi mas tingting long en.—Galesia 6:1.

Tupela marit i helpim wanpela lapun

Taim yumi beten askim Jehova long helpim yumi, em inap kirapim wanpela Kristen long helpim yumi

19 Sapos i luk olsem Jehova i no hariap long harim beten bilong yumi, dispela i no makim olsem em i no inap mekim ol samting bilong helpim yumi. Nogat. Yumi mas tingim dispela samting: Taim Jehova i mekim ol samting bilong helpim yumi em bai mekim long rot i stret wantaim laik bilong em na long taim em yet i makim. Em i save long ol samting yumi sot long en na long rot bilong lukautim yumi, winim yumi yet. Planti taim em i larim yumi long wok long ‘askim, na painim, na paitim dua.’ (Luk 11:5-10) Kain pasin olsem bilong i no les kwik i soim God olsem yumi tingting tru long dispela samting yumi beten long en na yumi bilip tru long em. Na tu, Jehova inap mekim ol samting bilong helpim yumi long rot yumi no luksave hariap long en. Olsem: Em i harim beten bilong yumi taim yumi askim em long helpim yumi long wanpela traim, tasol em i no rausim dispela hevi, nogat, em i strongim yumi long karim hevi.—Filipai 4:13.

20 Yumi mas tenkyu tru long Man Bilong Wokim heven na graun long em i stap klostu long ol man i singaut long em long rot bilong beten! (Song 145:18) Em i wanpela gutpela samting tru long yumi inap beten long Jehova, olsem na yumi mas mekim olsem long olgeta taim. Sapos yumi mekim olsem, bai yumi inap i go klostu moa long Jehova, em Man Bilong Harim beten.

OL TOK BAIBEL I LAINIM YUMI LONG EN

  • Pasin bilong beten oltaim long Jehova i helpim yumi long i go klostu long em.—Jems 4:8.
  • Bilong God i ken harim beten bilong yumi, yumi mas beten long pasin daun, bilip, na long gutpela bel.—Mak 11:24.
  • Yumi mas beten long Jehova tasol long rot bilong Pikinini bilong em.—Matyu 6:9; Jon 14:6.
  • Jehova em i Man Bilong Harim beten, na em i yusim ol ensel, ol wokman long graun, holi spirit, na Baibel bilong helpim ol man i beten long em.—Song 65:2.

Ol Askim Bilong Stadi

1, 2. Bilong wanem yumi mas ting beten em i wanpela gutpela samting tru yumi inap mekim? Bilong wanem yumi mas save long ol tok Baibel i mekim long beten?

3. Wanem wanpela bikpela as na yumi mas beten long Jehova?

4. Olsem wanem pasin bilong beten oltaim long Jehova i helpim yumi long pas gut moa wantaim em?

5. Wanem samting i soim olsem Jehova i no save harim olgeta beten?

6. Bilong God i ken harim beten bilong yumi, wanem wanpela bikpela mak yumi mas inapim? Olsem wanem yumi ken inapim dispela mak?

7. (a) Bilong wanem yumi mas toktok long pasin rispek taim yumi beten long Jehova? (b) Taim yumi beten long God, olsem wanem yumi ken soim olsem yumi gat pasin daun na gutpela bel?

8. Olsem wanem yumi ken mekim ol samting i stret wantaim beten bilong yumi?

9. Yumi mas beten long husat, na long rot bilong husat?

10. Bilong wanem yumi no ken ting yumi mas sindaun o brukim skru samting taim yumi beten?

11. Wanem sampela samting bilong yumi yet yumi ken kamapim long beten?

12. Olsem wanem yumi ken putim ol samting bilong Papa bilong yumi long heven i stap nambawan samting long beten bilong yumi?

13. Baibel i tok wanem long longpela bilong ol beten em God i save harim?

14. Wanem mining bilong dispela tok bilong Baibel olsem yumi mas “beten long olgeta taim,” na dispela i givim wanem amamas long yumi?

15. Bilong wanem yumi mas tok “Amen” long pinis bilong beten bilong yumi yet na beten narapela i mekim?

16. Yumi ken bilip tru long wanem samting?

17. Bilong wanem yumi ken tok Jehova i save yusim ol ensel na ol wokman bilong em long graun bilong helpim ol man i beten long em?

18. Olsem wanem Jehova i save yusim holi spirit na Baibel bilong helpim ol wokman bilong em i beten long em?

19. Yumi mas tingim wanem samting sapos i luk olsem Jehova i no hariap long harim beten bilong yumi?

20. Bilong wanem yumi mas beten oltaim long Jehova?