Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

APENDIKS

De Bilong Kot—Em Wanem Samting?

De Bilong Kot—Em Wanem Samting?

YU TING De Bilong Kot i wanem kain? Planti i ting ol bilion bilion manmeri bai kam na olgeta wan wan bai sanap long ai bilong sia king bilong God. Long dispela taim God bai skelim olgeta wan wan man. Sampela bai kisim gutpela pe bilong stap amamas long heven, na sampela bai go long ples bilong kisim bikpela pen inap oltaim oltaim. Tasol tok Baibel i mekim long De Bilong Kot i narapela kain. Baibel i no tok em i wanpela taim nogut, nogat, em i tok em i taim bilong stretim bek ol samting na wetim ol gutpela samting i kamap.

Long Kamapim Tok Hait 20:11, 12, aposel Jon i tok long De Bilong Kot olsem: “Orait mi lukim bikpela waitpela sia king i stap, na mi lukim dispela man i save sindaun long dispela sia. Na graun wantaim skai i ranawe long em, na ol i no i stap moa. Na mi lukim ol manmeri i dai pinis, em ol manmeri i gat nem na ol manmeri nating, ol i sanap i stap long pes bilong sia king. Na ol ensel i opim ol buk i gat tok long pasin ol dispela manmeri i bin mekim. Na ol i opim narapela buk tu, em buk bilong laip. Na man i sindaun long sia king i lukim tok i stap long ol dispela buk, na em i skelim pasin bilong ol manmeri i dai pinis.” Husat dispela Jas skripsa i tok long en?

God Jehova em i nambawan Jas bilong ol manmeri. Tasol em i givim dispela wok jas long narapela man. Long Aposel 17:31, aposel Pol i tok God “i makim pinis wanpela de bilong em bai i kotim ol manmeri. Na long stretpela pasin bilong en, em bai i skelim pasin bilong olgeta manmeri bilong graun. Na em i bin makim wanpela man bilong bosim dispela kot.” Dispela Jas em i Jisas Krais i kirap bek pinis. (Jon 5:22) Orait long wanem taim dispela De Bilong Kot i kirap? Em i longpela olsem wanem?

Buk Kamapim Tok Hait i soim olsem De Bilong Kot i kirap bihain long pait bilong Armagedon, taim pasin nogut bilong dispela graun Satan i bosim i pinis olgeta.* (KTH 16:14, 16; 19:19-20:3) Bihain long Armagedon, Satan na ol spirit nogut bilong em bai kalabus long hul i no gat as inap wan tausen yia. Insait long dispela haptaim, lain 144,000 bai mekim wok jas na wok “king wantaim Krais inap long 1,000 yia.” (KTH 14:1-3; 20:1-4; Rom 8:17) Olsem na De Bilong Kot i no wanpela de i gat 24 aua tasol long en. Nogat. Longpela bilong en em wan tausen yia.

Long taim bilong wan tausen yia, Jisas Krais bai “skelim pasin bilong olgeta manmeri i stap laip na ol manmeri i dai pinis tu.” (2 Timoti 4:1) Ol “manmeri i stap laip” em ol “planti manmeri tru” husat bai abrusim bagarap long Armagedon. (KTH 7:9-17) Aposel Jon i lukim tu “ol manmeri i dai pinis,…ol i sanap i stap long pes bilong sia king” bilong Jisas i ken skelim ol. Olsem Jisas i bin tok promis long en, “olgeta manmeri i stap long matmat ol bai i harim maus bilong [Krais], na ol bai i lusim matmat na i kam ausait,” long rot bilong kirap bek. (Jon 5:28, 29; Aposel 24:15) Tasol Krais bai kotim ol long wanem samting?

Long driman aposel Jon i lukim, ol i ‘opim ol buk na lukim tok i stap long ol dispela buk na skelim pasin bilong ol manmeri i dai pinis.’ Olsem wanem? Ol dispela buk i olsem ripot bilong ol samting ol manmeri i bin mekim long bipo? Nogat. Krais bai i no skelim pasin ol manmeri i bin mekim paslain long ol i bin dai. Olsem wanem yumi save long dispela? Baibel i tok: “Man i dai pinis, em i no pas moa long sin.” (Rom 6:7) Ol man i kirap bek pinis, ol sin ol i bin mekim long bipo i no pas moa long ol. Olsem na ol dispela buk i mas makim sampela samting moa God i tok ol man i mas mekim. Bilong kisim laip oltaim, ol manmeri i abrusim bagarap long Armagedon na ol man i kirap bek, ol i mas bihainim ol lo bilong God, ol i mas bihainim tu ol nupela lo Jehova inap kamapim long taim bilong wan tausen yia. Olsem na Krais bai skelim pasin ol manmeri i mekim long taim bilong De Bilong Kot.

Long planti bilion manmeri, dispela De Bilong Kot i namba wan taim ol i gat rot long kisim save long laik bilong God na bihainim. Olsem na bikpela wok bilong skulim ol manmeri bai kamap. Tru tumas, ‘ol manmeri bilong graun bai skul long stretpela pasin.’ (Aisaia 26:9) Tasol sampela man bai i no amamas long bihainim laik bilong God. Aisaia 26:10 i tok: “Sapos yu marimari long ol manmeri nogut, bai ol i no kisim save long ol stretpela pasin. Maski ol i stap long graun bilong ol stretpela manmeri, ol bai i go het long mekim ol pasin nogut na bai ol i no tingim biknem na strong bilong yu na bai ol i no aninit long yu.” Ol dispela man nogut bai pinis na pinis olgeta long taim bilong De Bilong Kot.—Aisaia 65:20.

Long pinis bilong De Bilong Kot, ol man i stap laip ol bai “kisim laip” na ol i no gat sin. (KTH 20:5) Olsem na long De Bilong Kot, ol manmeri bai kamap gutpela olgeta olsem namba wan man na meri long bipo tru. (1 Korin 15:24-28) Bihain long dispela laspela traim bai kamap. Satan bai lusim kalabus na em bai traim long giamanim ol manmeri inap wanpela taim moa. (KTH 20:3, 7-10) Ol man i sakim Satan, tok promis bilong Baibel bai kamap tru long ol: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Em nau, De Bilong Kot bai kamapim planti gutpela samting long ol man i stap gut long God!


*  Bilong kisim sampela save moa long Armagedon, plis lukim buk Insight on the Scriptures, Volium 1, pes 594-5, 1037-8, na buk Toktok Gut Wantaim Ol Man Long Baibel, pes 27-32, na buk Lotuim Dispela Wanpela God Tru, sapta 20, em ol buk ol Witnes Bilong Jehova i wokim.

← Go bek long sapta