Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

SAPTA 11

Bilong Wanem God i Larim Pen na Hevi i Stap?

Bilong Wanem God i Larim Pen na Hevi i Stap?

Yu ting God i as bilong ol pen na hevi?

Wanem bikpela tok i kamap long gaden Iden?

Olsem wanem God bai pinisim ol samting pen na hevi i save kamapim?

LONG wanpela kantri woa i kamap long en, planti tausen meri na pikinini i dai long wanpela pait nogut. Ol i planim ol long wanpela traipela hul na putim ol liklik kruse long arere bilong dispela hul. Olgeta wan wan kruse i gat dispela tok: “Bilong wanem?” Sampela taim ol man i mekim dispela askim taim bel bilong ol i bagarap olgeta. Ol manmeri i save mekim dispela askim taim woa, bikpela bagarap, sik, o pasin raskol i kilim i dai wanpela ol i laikim em tru, o i bagarapim haus bilong ol, o kamapim narapela bikpela pen na hevi long ol. Ol i laik save bilong wanem ol kain bikpela hevi olsem i painim ol.

2 Bilong wanem God i larim pen na hevi i stap? Sapos God Jehova i gat olgeta strong, pasin laikim, savetingting, na stretpela pasin, orait bilong wanem dispela graun i pulap long pasin birua na pasin i no stret? Sampela taim yu yet i bin tingting long ol dispela samting?

3 Yu ting i gat rong long mekim askim olsem, bilong wanem God i larim pen na hevi i stap? Sampela i ting nogut kain askim olsem i soim olsem bilip bilong ol i sot o ol i no daun long God. Tasol taim yu ritim Baibel, bai yu lukim olsem ol manmeri i daun na stap gut long God, ol i bin mekim ol wankain askim. Olsem: Profet Habakuk i bin askim Jehova: “Mi lukim planti hevi i kamap long ol manmeri. Bilong wanem yu larim ol dispela hevi i kamap? Olsem wanem na yu lukim ol dispela samting nogut i kamap long ol manmeri na yu no mekim wanpela samting? Long olgeta hap mi lukim ol i bagarapim ol manmeri na ol samting bilong ol. Na ol man i save kros na pait nabaut.”—Habakuk 1:3.

Jehova bai pinisim olgeta pen na hevi

Fiuneral

4 Olsem wanem? Jehova i kros long gutpela profet Habakuk long em i bin mekim ol dispela kain askim? Nogat. God i putim ol dispela tok bilong Habakuk long Baibel. Na God i helpim em long kliagut moa long ol samting na long mekim bilip bilong em i kamap strong moa. Jehova i laik mekim wankain long yu. Tingim, Baibel i tok “God i save wari long yupela.” (1 Pita 5:7) Ol man i nolaik tru long pasin nogut na pen na hevi dispela i save kamapim, tasol God i nolaik moa yet long ol dispela samting. (Aisaia 55:8, 9) Orait bilong wanem i gat planti pen na hevi long dispela graun?

BILONG WANEM I GAT PLANTI PEN NA HEVI?

5 Ol manmeri bilong kain kain lotu i bin go long ol bikman na tisa bilong lotu na askim ol bilong wanem i gat planti pen na hevi. Planti taim ol i bekim olsem em laik bilong God na pen na hevi i stap na long bipo yet God i bin makim pinis ol samting bai kamap, ol bikpela bagarap tu. Ol i tokim planti man olsem yumi no inap save long as na God i mekim ol samting o em i save kamapim dai long ol manmeri—ol pikinini tu—bambai ol i ken stap wantaim em long heven. Tasol olsem yu bin lainim pinis, God Jehova i no save kamapim wanpela samting nogut. Baibel i tok: “God I Gat Olgeta Strong i no inap mekim pasin nogut. Nogat tru.”—Jop 34:10.

6 Yu save bilong wanem ol manmeri i popaia na i tok olgeta pen na hevi bilong graun em asua bilong God? Planti taim ol i sutim tok long God i Gat Olgeta Strong, long wanem, ol i ting em i man i bosim dispela graun. Ol i no save long wanpela bikpela tok i tru em Baibel i lainim yumi long en. Yu bin lainim dispela tok i tru long Sapta 3 bilong dispela buk. Man i bosim dispela graun em Satan.

7 Baibel i kamapim klia: “Graun olgeta em i stap aninit long strong bilong Satan.” (1 Jon 5:19) Taim yu tingting long dispela, ating yu inap luksave olsem dispela tok i stret, a? Ol man bilong dispela graun i kamapim pasin bilong dispela spirit husat i “giamanim olgeta manmeri bilong graun.” (KTH 12:9) Satan i save birua, giamanim, na mekim nogut long narapela. Olsem na graun em i save bosim i pulap long pasin birua, pasin giaman, na pasin nogut. Dispela em i wanpela as na i gat planti pen na hevi.

8 Olsem Sapta 3 i kamapim, namba tu as na i gat planti pen na hevi em olsem: Kirap long taim pasin bikhet i kamap long gaden Iden, ol manmeri i gat sin na pasin kranki. Ol sinman i save pait bilong kisim namba long bosim ol narapela, na dispela i kamapim ol woa, pasin bilong daunim narapela, na pen na hevi. (Saveman 4:1; 8:9) Namba tri as na i gat pen na hevi, em “taim nogut i save painim yumi olgeta.” (Saveman 9:11) Graun i no stap aninit long lukaut bilong Jehova, olsem na ol man inap karim pen na hevi taim ol i stap long hap em bikpela bagarap i kamap long en.

9 Yumi save olsem God i no as bilong pen na hevi na dispela samting i mekim gut bel bilong yumi. God i no kamapim ol woa, pasin raskol, na pasin bilong daunim narapela, na ol bikpela win na ren samting i save givim bikpela pen na hevi long ol man. Tasol yumi mas save, Bilong wanem Jehova i larim olgeta dispela pen na hevi i stap? Sapos em i God i Gat Olgeta Strong, em i gat strong bilong pinisim ol dispela hevi. Tasol bilong wanem em i no mekim olsem? Olsem yumi lainim pinis, God i gat pasin laikim, olsem na i mas i gat gutpela as na em i no mekim olsem.—1 Jon 4:8.

BIKPELA TOK I KAMAP

10 Bilong kisim save long as na God i larim pen na hevi i stap, yumi mas tingting i go bek long taim pen na hevi i kirap. Taim Satan i kirapim Adam tupela Iv long sakim tok bilong Jehova, wanpela bikpela askim i kamap. Satan i no tok Jehova i no gat strong. Satan i save olsem Jehova i gat olgeta strong. Satan i sutim tok olsem Jehova i no gat rait long mekim wok bos. Satan i tok God i save giaman na i no larim ol man em i bosim long kisim ol samting bilong helpim ol, na long dispela rot Satan i tok Jehova em i bos nogut. (Stat 3:2-5) I olsem Satan i tok ol manmeri bai stap gutpela moa sapos God i no bosim ol. Em i sutim tok long wok king bilong Jehova, em i tok Jehova i no gat rait long mekim wok bos.

11 Adam tupela Iv i bikhet long Jehova. I olsem ol i tok: “Jehova i no gat wok long stap King bilong mipela. Mipela yet inap makim wanem samting i stret na wanem samting i no stret.” Olsem wanem Jehova inap stretim dispela bikpela tok i kamap? Olsem wanem em inap lainim olgeta lain olsem tok bilong ol dispela bikhetman i no stret na rot em i makim i nambawan gutpela rot? Sampela inap tok olsem gutpela sapos God i bin pinisim tasol ol dispela bikhetman na wokim nupela man na meri. Tasol Jehova i bin tokaut pinis olsem ol pikinini bilong Adam tupela Iv bai pulap long graun, na em i laik bai ol i stap long graun em i ples paradais. (Stat 1:28) Oltaim Jehova i save kamapim ol samting em i tingting pinis long mekim. (Aisaia 55:10, 11) Na tu, sapos God i bin pinisim ol bikhetman long Iden, dispela i no inap bekim bikpela tok i bin kamap long wok bos bilong Jehova.

Tisa na ol sumatin

Yu ting sumatin i winim tisa?

12 Nau yumi ken skelim wanpela tok piksa. Tingim olsem wanpela tisa i tokim ol sumatin long rot bilong painim bekim bilong wanpela hatpela askim bilong matematiks. Wanpela smatpela sumatin husat i gat pasin bikhet, em i tok rot tisa i makim bilong painim bekim i no stret. Bilong soim olsem tisa i no gat gutpela save, dispela sumatin i tok em i save long gutpela rot moa bilong painim bekim. Sampela sumatin i ting tok bilong em i stret, na ol tu i bikhet. Orait tisa i mas mekim wanem? Sapos em i rausim ol bikhet sumatin long klas, ol narapela sumatin bai ting wanem? Ating ol bai ting tok bilong dispela wanklas bilong ol na ol narapela sumatin i bihainim em i stret, a? Ating ol arapela sumatin long klas bai i no rispek moa long tisa, ol inap ting em i pret long ol narapela i kamapim long ples klia olsem tingting bilong em i no stret. Tasol olsem wanem sapos tisa i larim dispela bikhet sumatin long soim klas long olsem wanem em yet bai painim bekim.

13 Jehova i bin mekim wankain samting olsem dispela tisa i mekim. Tingim, i no ol bikhetman long Iden tasol i insait long dispela samting. Planti milion ensel i lukluk i stap. (Jop 38:7; Daniel 7:10) Ol samting Jehova i mekim bilong stretim dispela pasin bikhet bai mekim bikpela samting long ol dispela ensel na long olgeta man. Olsem na Jehova i bin mekim wanem? Em i larim Satan i soim olsem wanem em i bosim ol manmeri. Na tu, God i bin larim ol man i bosim ol yet aninit long wok bos bilong Satan.

14 Dispela tisa long tok piksa i save olsem tingting bilong bikhet sumatin na ol sumatin i bihainim em, i no stret. Tasol em i save tu olsem taim em i larim ol i soim olsem tok bilong ol i tru o nogat, dispela bai helpim klas olgeta. Taim ol dispela bikhetlain i lus, olgeta sumatin i gat gutpela bel ol inap luksave olsem tisa tasol i winim mak bilong bosim klas. Na sapos sampela i bikhet bihain long dispela, ol sumatin bai kliagut bilong wanem tisa i rausim ol long klas. Na olsem tasol, Jehova i save em i gutpela long ol man na ensel i gat gutpela bel i lukim olsem wok bilong Satan na ol bikhetlain bilong em i no gutpela na ol manmeri i no inap bosim ol yet. Olsem Jeremaia bilong bipo, ol bai lainim dispela bikpela tok i tru: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.”—Jeremaia 10:23.

LONGPELA TAIM—BILONG WANEM?

15 Tasol bilong wanem Jehova i bin larim pen na hevi i stap inap longpela taim tru? Na bilong wanem em i no pasim rot bilong ol samting nogut long kamap? Tingim tupela samting tisa long tok piksa bai i no mekim. Namba wan, em bai i no pasim bikhet sumatin long kamapim tingting bilong em. Namba tu, tisa bai i no helpim dispela bikhet sumatin long soim olsem tingting bilong em i stret. Tingim tupela samting Jehova i no bin mekim. Namba wan, em i no bin pasim Satan na ol lain i bihainim em long kamapim klia olsem tok bilong ol i stret o nogat. Bilong mekim olsem sampela haptaim i mas lus pastaim. Insait long planti tausen yia, ol man i bin traim kain kain rot bilong bosim ol yet, olsem kamapim kain kain gavman. Ol man i bin kisim bikpela save long saiens na ol narapela samting, tasol pasin i no stret, stap rabis, pasin raskol, na ol woa i go nogut moa. Nau yumi inap lukim olsem ol man i pundaun long wok bilong ol long bosim ol yet.

16 Namba tu, Jehova i no bin helpim Satan long bosim dispela graun. Sapos God i bin pasim ol pasin nogut tru na ol i no inap kamap, i olsem em i helpim tok bilong ol bikhetman. Dispela bai kirapim ol manmeri long ting ol man inap bosim ol yet na ol hevi i no kamap long dispela rot. Sapos Jehova i bin mekim olsem, em bai insait long wanpela tok giaman. Tasol “God i no inap tru long giaman.”—Hibru 6:18.

God bai helpim yu long karim pen na hevi

Tok Bilong God i mekim gut bel bilong meri

17 Tasol olsem wanem long ol hevi na bagarap samting i bin kamap insait long dispela haptaim ol man i bin bikhet long God? Yumi mas tingim olsem Jehova i gat olgeta strong. Olsem na em inap pinisim na em bai pinisim olgeta samting nogut em pen na hevi i mekim long ol man. Olsem yumi lainim pinis, maski ol man i bin bagarapim graun, graun bai kamap Paradais. Bilip long ofa bilong Jisas bilong baim bek ol man bai pinisim ol samting nogut sin i kamapim, na kirap bek bai pinisim ol samting nogut dai i save kamapim. Long dispela rot God i givim wok long Jisas long “bagarapim na rausim wok bilong Satan.” (1 Jon 3:8) Jehova bai kamapim olgeta dispela samting long taim stret. Yumi ken amamas long em i no bin mekim yet ol dispela samting, long wanem, pasin bilong em long isi na i no les kwik i bin opim rot long yumi ken lainim tok i tru na mekim wok bilong em. (2 Pita 3:9, 10) God i wok long painim ol man i gat gutpela bel na i laik lotuim em na em i helpim ol long sanap strong maski wanem kain pen na hevi i painim ol long dispela taim nogut.—Jon 4:23; 1 Korin 10:13.

18 Sampela inap ting, Sapos God i bin wokim Adam tupela Iv i kamap olsem man na meri i no inap bikhet, ating bai i no gat olgeta dispela pen na hevi i bin painim ol man, a? Bilong bekim dispela askim, yu mas tingim wanpela gutpela presen tru Jehova i bin givim long yu.

BAI YU MEKIM WANEM LONG PRESEN GOD I BIN GIVIM?

19 Olsem Sapta 5 i kamapim, God i wokim ol man long i stap fri long makim ol samting ol i laik mekim. Olsem wanem? Yu luksave olsem dispela em i wanpela gutpela presen tru? God i bin wokim planti planti animal, na ol lo i stap long skin bilong ol i kirapim ol long mekim ol samting. (Sindaun 30:24) Ol man i bin wokim sampela robot em ol inap mekim olgeta samting man i laik ol i mas mekim. Yu ting yumi amamas sapos God i bin wokim yumi olsem? Nogat. Yumi amamas long yumi stap fri long makim yumi laik kamap wanem kain man, bihainim wanem ol rot, poromanim husat ol man, na ol kain samting olsem. Yumi amamas tru long yumi stap fri olsem, na God i laik bai yumi stap olsem.

20 Jehova i no laik ol man i mekim wok bilong em long wanem narapela i subim ol long mekim. (2 Korin 9:7) Olsem: Yu ting papa o mama i amamas long pikinini i tok “mi laikim yu” long wanem narapela i tokim em long mekim dispela tok, o ol i amamas taim bel bilong pikinini yet i kirapim em long tok olsem? Olsem na yu mas tingting, Olsem wanem yu bai yusim dispela presen bilong i stap fri long makim ol samting, em Jehova i bin givim long yu? Satan, Adam, na Iv i mekim wok nogut long dispela presen. Ol i sakim God Jehova. Yu bai mekim wanem?

21 Yu gat rot long mekim nambawan gutpela wok long dispela presen bilong makim ol samting yu laik mekim. Yu ken joinim planti milion manmeri husat i stap long sait bilong Jehova. Ol i mekim bel bilong Jehova i amamas, long wanem, ol i wok long kamapim klia olsem Satan em i man bilong giaman na wok bos bilong em i nogut olgeta. (Sindaun 27:11) Yu tu inap mekim olsem taim yu makim stretpela rot long bihainim. Sapta i kamap bihain long dispela bai stori long dispela samting.

OL TOK BAIBEL I LAINIM YUMI LONG EN

  • God i no as bilong ol hevi bilong graun.—Jop 34:10.
  • Satan i tok God i save giaman na i no larim ol man em i bosim long kisim ol samting bilong helpim ol, na long dispela rot Satan i tok Jehova em i bos nogut.—Stat 3:2-5.
  • Jehova bai mekim wok long Pikinini bilong em, King bilong Kingdom, bilong pinisim pen na hevi na ol samting nogut dispela i bin mekim long ol man.—1 Jon 3:8.

Ol Askim Bilong Stadi

1, 2. Wanem kain pen na hevi i save painim ol man long nau? Dispela i kirapim planti man long mekim wanem ol askim?

3, 4. (a) Wanem samting i soim olsem i no gat rong long mekim askim olsem, bilong wanem God i larim pen na hevi i stap? (b) Jehova i ting olsem wanem long pasin nogut na pen na hevi?

5. Sampela bikman bilong lotu i save tok i gat wanem as na ol manmeri i karim pen na hevi? Tasol Baibel i tok wanem?

6. Bilong wanem planti manmeri i popaia na i tok olgeta pen na hevi bilong graun em asua bilong God?

7, 8. (a) Olsem wanem ol man bilong dispela graun i kamapim pasin bilong dispela man i bosim graun? (b) Olsem wanem pasin kranki bilong ol man na “taim nogut” i bin kamapim pen na hevi?

9. Bilong wanem yumi ken save olsem i gat gutpela as na Jehova i larim pen na hevi i stap?

10. Satan i sutim tok long wanem samting? Em i mekim dispela olsem wanem?

11. Bilong wanem Jehova i no pinisim tasol ol bikhetman long Iden?

12, 13. Kamapim tok piksa i soim bilong wanem Jehova i larim Satan i kamap bos bilong dispela graun, na bilong wanem Em i larim ol man i bosim ol yet.

14. Taim Jehova i larim ol man i bosim ol yet, dispela i kamapim wanem gutpela samting?

15, 16. (a) Bilong wanem Jehova i bin larim pen na hevi i stap longpela taim? (b) Bilong wanem Jehova i no bin pasim ol pasin nogut tru na ol i no inap kamap?

17, 18. Jehova bai mekim wanem long ol hevi na bagarap em wok bos bilong ol man na bilong Satan i bin kamapim?

19. Jehova i bin givim wanem gutpela presen long yumi? Bilong wanem yumi mas amamas long dispela samting?

20, 21. Yumi ken mekim wanem nambawan gutpela wok long dispela presen bilong i stap fri long makim ol samting? I gat wanem as na yumi laik mekim olsem?