Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

SAPTA 18

Baptais na Pas Gut Wantaim God

Baptais na Pas Gut Wantaim God

Olsem wanem man i kisim baptais bilong kamap Kristen?

Yu mas mekim wanem bilong winim mak bilong kisim baptais?

Olsem wanem man i dediket long God?

I gat wanem as na man i kisim baptais?

“LUKIM, wara i stap. Ating wanpela samting i pasim rot na mi no inap kisim baptais?” Wanpela bikman bilong Itiopia i mekim dispela askim long taim bilong ol aposel. Wanpela Kristen, nem bilong em Filip, i bin toktok wantaim em na kamapim klia olsem Jisas em i dispela Mesaia God i bin promis long salim i kam. Man Itiopia i pilim tru ol tok bilong Baibel em i bin kisim save long en, na em i mekim sampela samting. Em i tok olsem em i laik kisim baptais!—Aposel 8:26-36.

Bikman bilong Itiopia long taim bilong ol aposel

2 Sapos yu bin stadi gut long ol sapta i kamap paslain long dispela wantaim ol Witnes Bilong Jehova, ating yu redi long mekim dispela askim, ‘Wanem samting i pasim rot bilong mi long kisim baptais?’ Nau yu save pinis long tok promis bilong Baibel long ol man inap kisim laip oltaim long Paradais. (Luk 23:43, NW; KTH 21:3, 4) Yu bin kisim save tu long ol man i dai pinis i stap olsem wanem na long bilip bilong kirap bek. (Saveman 9:5; Jon 5:28, 29) Ating yu save bung wantaim ol Witnes Bilong Jehova long ol miting bilong kongrigesen bilong ol na yu yet i bin lukim pasin bilong ol long bihainim lotu i tru. (Jon 13:35) Na nambawan bikpela samting, ating yu kirap pinis long mekim ol samting bilong pas gut wantaim God Jehova.

3 Yu ken mekim wanem bilong soim olsem yu laik mekim wok bilong God? Jisas i tokim ol disaipel bilong em: “Go mekim olgeta lain manmeri i kamap disaipel bilong mi. Na yupela baptaisim ol.” (Matyu 28:19) Jisas yet i stap gutpela piksa na em i kisim baptais long wara. Ol i no tromoi liklik wara long em o kapsaitim sampela wara antap long het bilong em. (Matyu 3:16) Dispela tok “baptais” i kam long wanpela tok Grik i makim “putim i go insait.” Olsem na baptais bilong ol Kristen i makim olsem man i go insait olgeta long wara.

4 Olgeta man husat i laik pas gut wantaim God Jehova i mas kisim baptais long wara. Baptais i kamapim long ples klia olsem yu laik mekim wok bilong God. Em i soim olsem yu amamas long mekim laik bilong Jehova. (Song 40:7, 8) Tasol bilong winim mak bilong kisim baptais, i gat ol samting yu mas mekim.

MAS I GAT SAVE NA BILIP

5 Yu kirap pinis long mekim namba wan samting yu mas mekim. Em wanem samting? Yu kisim save long God Jehova na Jisas Krais, ating long rot bilong stadi long Baibel. (Jon 17:3) Tasol i gat planti samting moa long kisim save long en. Ol Kristen i laik “save gut tru long laik bilong [God].” (Kolosi 1:9) Pasin bilong go long ol miting bilong kongrigesen bilong ol Witnes Bilong Jehova bai helpim yu long mekim olsem. Em i bikpela samting long go long ol dispela miting. (Hibru 10:24, 25) Pasin bilong go oltaim long ol miting bai helpim yu long kisim bikpela save moa long God.

Pasin bilong kisim stretpela save long Baibel i bikpela samting bilong winim mak bilong kisim baptais

Baibel stadi

6 Tru, i no olsem yu mas save long olgeta samting i stap long Baibel bambai yu inap winim mak bilong kisim baptais. Bikman bilong Itiopia i bin i gat sampela save, tasol em i mas kisim helpim bilong kliagut long sampela tok bilong Baibel. (Aposel 8:30, 31) Na olsem tasol, i gat planti samting moa yu mas kisim save long en. Tru tumas, wok bilong kisim save long God i no gat pinis bilong en. (Saveman 3:11) Tasol paslain long yu kisim baptais, yu mas save long ol bikpela tok bilong Baibel na bilip long en. (Hibru 5:12) Sampela bikpela tok olsem, em stretpela save long ol man i dai pinis i stap olsem wanem na stretpela save long nem bilong God na Kingdom bilong em.

7 Save tasol i no inap, long wanem, “man i laik i go klostu long God, em i mas bilip olsem God i stap.” (Hibru 11:6) Baibel i tok taim sampela manmeri long taun Korin bilong bipo i harim tok ol Kristen i autim, ol i “bilip na kisim baptais.” (Aposel 18:8) Na olsem tasol, pasin bilong stadi long Baibel i mas kirapim yu long bilip olsem Baibel em i Tok Bilong God. Wok bilong stadi long Baibel bai helpim yu long bilip long ol tok promis bilong God na bilip long ofa bilong Jisas bai kisim bek yu.—Josua 23:14; Aposel 4:12; 2 Timoti 3:16, 17.

AUTIM TOK I TRU BILONG BAIBEL LONG OL NARAPELA

8 Taim bilip bilong yu i go bikpela, bai yu gat bikpela laik long tokim ol narapela long ol samting yu bin lainim. (Jeremaia 20:9) Bel bilong yu bai kirapim yu long tokim ol narapela man long God na ol samting em i tingting pinis long mekim.—2 Korin 4:13.

Bilip i mas kirapim yu long toktok wantaim ol narapela long ol samting yu bilip long en

Man i autim bilip bilong em

9 Ating long gutpela pasin yu inap kirap autim tok i tru bilong Baibel long ol wanblut, ol pren, ol neiba, na ol wanwok bilong yu. Bihain, bai yu gat laik long mekim wok autim tok wantaim ol Witnes Bilong Jehova. Taim yu laik mekim olsem, toktok long dispela samting wantaim Witnes i stadi long Baibel wantaim yu. Sapos i luk olsem yu winim mak bilong autim tok wantaim kongrigesen, yu na tisa bilong yu bai bung wantaim tupela elda bilong kongrigesen.

10 Dispela bai helpim yu long save gut moa long sampela elda Kristen em ol i save lukautim ol manmeri bilong God. (Aposel 20:28; 1 Pita 5:2, 3) Sapos ol elda i luksave olsem yu kliagut na bilip long ol bikpela tok bilong Baibel, na pasin bilong yu i stret wantaim ol stiatok bilong God, na yu gat laik tru long kamap wanpela Witnes Bilong Jehova, orait ol bai tokim yu olsem yu winim mak bilong autim gutnius olsem wanpela pablisa i no baptais.

11 Tasol ol elda inap luksave olsem yu mas mekim sampela senis long i stap na pasin bilong yu paslain long ol i tok yu winim mak bilong autim tok wantaim kongrigesen. Ating yu mas lusim sampela pasin yu bin haitim long ol narapela. Olsem na paslain long yu tok long yu laik kamap wanpela pablisa i no baptais, yu mas lusim ol bikpela rong, olsem pasin pamuk, dring spak, na pasin bilong kisim drak.—1 Korin 6:9, 10; Galesia 5:19-21.

TANIM BEL NA BAUT

12 Yu mas mekim sampela narapela samting tu paslain long yu winim mak bilong kisim baptais. Aposel Pita i tok: “Yupela i mas senisim tingting nogut bilong yupela, na tanim bel, na bai God i rausim ol sin bilong yupela.” (Aposel 3:19) Pasin bilong tanim bel i makim olsem man i bel hevi tru long samting em i bin mekim. I stret man i tanim bel sapos em i bin insait long pasin pamuk, tasol man i gat wok long tanim bel maski em i no bin insait long ol pasin nogut. Bilong wanem i olsem? Long wanem, olgeta manmeri i gat sin na God i mas lusim rong bilong ol. (Rom 3:23; 5:12) Taim yu no stadi yet long Baibel, yu no bin save long laik bilong God. Olsem na long dispela taim save bilong yu i sot, na yu no inap bihainim gut laik bilong em, a? Long dispela as, yu mas tanim bel.

13 Bihain long yu tanim bel yu mas baut. I stret yu bel hevi long ol rong yu bin mekim, tasol yu mas mekim sampela samting moa. Yu mas sakim ol pasin nogut yu bin insait long en na tingting strong olsem kirap long nau bai yu mekim ol samting i stret. Tanim bel na baut em ol samting yu mas mekim paslain long yu kisim baptais.

DEDIKET BILONG YU

14 I gat narapela bikpela samting yu mas mekim paslain long yu kisim baptais. Yu mas dediket long God Jehova.

15 Taim yu dediket long God Jehova long rot bilong beten, dispela i makim olsem yu tok promis long yu bai lotu long em wanpela tasol inap oltaim oltaim. (Lo 6:15) Tasol bilong wanem man i laik mekim olsem? Tingim olsem wanpela man i kirap prenim wanpela meri. Taim man i save gut moa long em na luksave long ol gutpela pasin bilong meri, em bai laikim em moa yet. Bihain, man i gat laik long askim meri long maritim em. Tru, taim em i marit, dispela i makim olsem man bai i gat sampela wok moa bilong mekim. Tasol pasin bilong laikim tru dispela meri bai kirapim em long mekim dispela bikpela samting.

16 Taim yu kisim save long Jehova na laikim em tru, bel bilong yu bai kirapim yu long givim bel olgeta long mekim wok bilong em. Olgeta man i laik bihainim Pikinini Bilong God, Jisas Krais, ol i mas ‘daunim laik bilong ol yet.’ (Mak 8:34) Yumi mekim olsem taim yumi no larim ol laik bilong yumi yet na ol mak yumi laik winim i pasim rot bilong yumi long bihainim tru tok bilong God. Olsem na paslain long yu inap kisim baptais, pasin bilong mekim laik bilong God Jehova i mas i stap nambawan bikpela samting long laip bilong yu.—1 Pita 4:2.

WINIM PASIN BILONG PRET OLSEM YU BAI PUNDAUN

17 Sampela i surik long dediket long Jehova, long wanem, ol i pret long mekim dispela bikpela samting. Ating ol i pret long God bai i skelim ol long samting ol i mekim taim ol i kamap Kristen i dediket long em. Ol i pret long ol bai no inap mekim gut ol samting na ol bai mekim Jehova i bel hevi, olsem na ol i ting i gutpela moa long ol i no ken dediket long em.

18 Taim yu lain long laikim tru Jehova, bel bilong yu bai kirapim yu long dediket long em na wok strong long truim dediket bilong yu. (Saveman 5:4) Taim yu dediket pinis, bai yu gat laik long ‘wokabaut long pasin bilong ol manmeri tru bilong Bikpela, na bai em i laikim olgeta pasin bilong yu.’ (Kolosi 1:10) Yu laikim tru God, olsem na bai yu no pilim olsem i hatwok tumas long mekim laik bilong em. Ating bai yu wanbel wantaim tok bilong aposel Jon, em i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.”—1 Jon 5:3.

19 I no olsem yu mas gutpela olgeta na bai yu ken dediket long God. Nogat. Jehova i save long mak bilong strong bilong yu na em bai no tokim yu long mekim samting yu no inap mekim. (Song 103:14) Em i laik bai ol samting yu mekim i kamap gutpela na em bai sapotim na helpim yu. (Aisaia 41:10) Yu ken save tru olsem sapos yu bilip long Jehova long bel olgeta, em bai “soim yu stretpela rot long bihainim.”—Sindaun 3:5, 6.

KISIM BAPTAIS BILONG MAKIM OLSEM YU DEDIKET PINIS

20 Taim yu skelim ol tok nau yumi bin stori long en, dispela inap helpim yu long dediket long Jehova long rot bilong beten. Olgeta man husat i laikim tru God ol i mas ‘autim bilip bilong ol na bai God i kisim bek ol.’ (Rom 10:10) Olsem wanem yu ken mekim dispela?

Yu dediket pinis long God long rot bilong beten?

Man i beten

21 Toksave long wasman siaman bilong kongrigesen bilong yu olsem yu laik kisim baptais. Em bai stretim rot long sampela elda bai skelim wantaim yu ol askim bilong ol bikpela tok bilong Baibel. Sapos ol dispela elda i ting yu winim mak, ol bai tokim yu long yu ken kisim baptais.* Long taim bilong kisim baptais wanpela brata i mekim tok i stori long mining bilong baptais. Brata bilong mekim tok i tokim ol man i laik kisim baptais long bekim tupela askim, na dispela em i wanpela rot long ol i ken “autim bilip” bilong ol.

22 Baptais yet i kamapim long ples klia olsem yu dediket pinis long God na nau yu wanpela Witnes Bilong Jehova. Ol man i kisim baptais ol i go insait olgeta long wara bilong soim long ol man olsem ol i dediket pinis long Jehova.

MINING BILONG BAPTAIS BILONG YU

23 Jisas i tok ol disaipel bilong em bai kisim baptais “long nem bilong Papa na bilong Pikinini na bilong Holi Spirit.” (Matyu 28:19) Dispela i makim olsem man i kisim baptais em i save long namba bilong God Jehova na bilong Jisas Krais. (Song 83:18; Matyu 28:18) Em i save tu long wok bilong holi spirit bilong God, em strong bilong em.—Galesia 5:22, 23; 2 Pita 1:21.

Baptais i makim olsem yumi dai pinis long olpela pasin bilong yumi na kisim laip bilong mekim laik bilong God

Man i kisim baptais

24 Tasol baptais i no olsem yu go insait long wara na em tasol. Nogat. Em i makim wanpela bikpela samting tru. Taim yu go insait long wara, dispela i makim olsem yu dai pinis long olpela pasin bilong yu. Taim yu kam antap long wara, dispela i makim olsem yu kisim laip bilong mekim laik bilong God. Tingim tu olsem yu dediket long God Jehova yet, yu no dediket long wanpela wok, long wanpela man, o long wanpela oganaisesen. Taim yu dediket na kisim baptais, dispela em i kirap bilong pasin bilong yu long kamap pren bilong God, olsem pas gut tru wantaim em.—Song 25:14.

25 Baptais yet i no mekim na God bai kisim bek yu. Aposel Pol i tok: “God i kisim bek yupela pinis, na nau yupela i mas pret na guria na wok strong long kisim tru dispela presen.” (Filipai 2:12) Baptais em i kirap tasol bilong ol samting yu mas mekim. Bikpela askim i olsem, Olsem wanem yu inap i stap insait long pasin laikim bilong God? Laspela sapta bai bekim dispela askim.

OL TOK BAIBEL I LAINIM YUMI LONG EN

  • Baptais Kristen i makim olsem man i go insait olgeta long wara, ol i no tromoi tasol liklik wara long em.—Matyu 3:16.
  • Paslain long man i kisim baptais, em i kisim save, kamapim bilip, tanim bel, baut, na dediket long God.—Jon 17:3; Aposel 3:19; 18:8.
  • Bilong dediket long Jehova, yu mas daunim laik bilong yu yet, olsem ol man i bin mekim bilong bihainim Jisas.—Mak 8:34.
  • Baptais i makim olsem man i dai pinis long olpela pasin bilong em na kisim laip bilong mekim laik bilong God.—1 Pita 4:2.

*  Ol man i save kisim baptais long ol kibung bilong ol Witnes Bilong Jehova i save kamap long olgeta yia.


Ol Askim Bilong Stadi

1. Bilong wanem wanpela bikman bilong Itiopia i laik kisim baptais?

2. Bilong wanem yu mas tingting long kisim baptais?

3. (a) Jisas i tokim ol disaipel long mekim wanem? (b) Olsem wanem man i kisim baptais long wara?

4. Baptais long wara i kamapim klia wanem samting?

5. (a) Wanem namba wan samting yu mas mekim bilong winim mak bilong kisim baptais? (b) Bilong wanem ol miting Kristen i bikpela samting?

6. Yu mas i gat bikpela save long Baibel bambai yu inap winim mak bilong kisim baptais?

7. Pasin bilong stadi long Baibel i mas mekim wanem long yu?

8. Wanem samting bai mekim na bel bilong yu i kirapim yu long tokim ol narapela man long ol samting yu bin lainim?

9, 10. (a) Ating pastaim yu inap autim tok i tru bilong Baibel long husat? (b) Yu mas mekim wanem sapos yu laik autim tok wantaim ol Witnes Bilong Jehova?

11. Sampela i mas mekim wanem ol senis paslain long ol i winim mak bilong autim tok wantaim kongrigesen?

12. Bilong wanem yu gat wok long tanim bel?

13. Baut i makim wanem samting?

14. Yu mas mekim wanem bikpela samting paslain long yu kisim baptais?

15, 16. Dediket long God i makim wanem samting? Wanem samting i kirapim man long mekim olsem?

17. Bilong wanem sampela i surik long dediket long God?

18. Wanem samting inap kirapim yu long dediket long Jehova?

19. Bilong wanem yu no ken pret long dediket long God?

20. Bilong wanem yu mas kamapim long ples klia yu dediket pinis long Jehova?

21, 22. Olsem wanem yu inap “autim bilip” bilong yu?

23. Wanem mining bilong dispela tok, kisim baptais “long nem bilong Papa na bilong Pikinini na bilong Holi Spirit”?

24, 25. (a) Baptais i makim wanem samting? (b) Yu mas kisim bekim bilong wanem askim?