Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

SAPTA 2

Baibel—Wanpela Buk i Kam Long God

Baibel—Wanpela Buk i Kam Long God

Olsem wanem Baibel i narapela kain long olgeta arapela buk?

Olsem wanem Baibel inap helpim yu long karim ol hevi bilong yu?

I gat wanem as na yu inap bilip long ol tok profet i stap long Baibel?

OLSEM WANEM? Yu inap tingim wanpela taim yu bin kisim naispela presen long wanpela gutpela pren? Ating dispela i kirapim tru tingting bilong yu na mekim bel bilong yu i amamas. Presen i kamapim klia wanpela samting—man i givim presen i amamas tru long yu stap pren bilong em. Na ating yu tenkyu tru long gutpela presen pren bilong yu i givim.

2 Baibel em i presen i kam long God, em wanpela presen yumi ken amamas tru long en. Dispela narakain buk i kamapim ol samting yumi no inap kisim save long en long narapela rot. Olsem: Baibel i tokim yumi long God i wokim skai na ol sta i stap long en, na graun, na namba wan man na meri. Baibel i gat ol gutpela stiatok i helpim yumi long karim ol hevi na wari i save painim yumi. Em i stori gut long God bai mekim wanem bilong kamapim gutpela sindaun hia long graun. Baibel i wanpela gutpela presen tru!

3 Baibel em i wanpela presen i mekim bel bilong yumi i amamas, long wanem, em i helpim yumi long save long Man Bilong Givim dispela presen, em God Jehova. Em i givim dispela buk long yumi, na dispela i soim olsem em i laik bai yumi save gut long em. Tru tumas, Baibel inap helpim yu long i go klostu long Jehova.

4 Planti man tru i gat Baibel bilong ol yet. Ol i bin wokim Baibel olgeta o ol hap bilong en long 2,300 samting tok ples, olsem na winim 90 pesen bilong ol manmeri bilong graun ol inap kisim Baibel. Long olgeta wik ol i save tilim inap wan milion Baibel! Ol i bin wokim planti bilion Baibel o sampela hap bilong en. Tru tumas, i no gat narapela buk i kain olsem Baibel.

Ol i wokim Baibel “New World Translation of the Holy Scriptures” long planti tok ples

Baibel New World Translation long planti tokples

5 Na tu, “God yet i bin kamapim” olgeta tok bilong Baibel. (2 Timoti 3:16) Long wanem rot? Baibel yet i bekim dispela askim olsem: “Holi Spirit yet i kirapim ol man na ol i autim tok God i givim long ol.” (2 Pita 1:21) Olsem: Ating wanpela bisnisman bai tokim kuskus bilong em long raitim pas. Long dispela pas i gat ol tingting na tok bilong bisnisman. Olsem na em i pas bilong em, na i no bilong kuskus. Na olsem tasol, Baibel i gat ol tok bilong God long en, na i no bilong ol man i bin raitim Baibel. Olsem na tru tru Baibel olgeta em i “tok bilong God.”—1 Tesalonaika 2:13.

STRET WANTAIM NA STRET OLGETA

6 Ol i raitim Baibel insait long 1,600 yia samting. Ol man i raitim Baibel ol i bin stap long narapela narapela taim na ol i bilong kain kain sindaun. I gat ol man bilong wok gaden, sampela i save kisim pis, na sampela i lukautim ol sipsip. Na i gat ol profet, jas, na sampela king. Luk i raitim Gutnius em i wanpela dokta. Maski ol man i raitim Baibel ol i bilong kain kain sindaun, olgeta tok bilong en i stret wantaim.*

7 Namba wan buk bilong Baibel i tokim yumi long olsem wanem ol hevi bilong ol manmeri i kirap. Laspela buk i soim olsem graun olgeta bai kamap wanpela paradais, o naispela gaden. Ol tok bilong Baibel i stori long ol samting i bin kamap insait long planti tausen yia na i helpim ol samting God i tingting pinis long mekim. Ol tok bilong Baibel i stret wantaim, tasol yumi no kirap nogut long dispela, long wanem, em i wanpela buk i kam long God.

8 Tok bilong Baibel i stret wantaim saiens. Em i tokaut long ol samting ol man i bin kisim save long en long bihain tru. Olsem: Buk Wok Pris i kamapim ol lo bilong lain Israel bilong bipo long pasin bilong stap klin long skin na taim ol i sik ol i mas stap wanpis. Ol lain i stap klostu long ol i no gat save long ol dispela samting. Long taim ol man i gat tingting kranki long graun i stap olsem wanem, Baibel i tok stret olsem graun i “hangamap nating.” (Jop 26:7) Tru, Baibel i no wanpela buk bilong saiens. Tasol taim em i kamapim sampela tok bilong saiens, dispela tok i stret. Yumi save ol tok bilong buk i kam long God i mas stret olsem, a?

9 Tok bilong Baibel i tru na i stret wantaim ol samting i bin kamap long bipo. Em i kolim stret ol samting i bin kamap. Baibel i kolim nem bilong ol man na lain tumbuna bilong ol.# Ol man bilong raitim stori bilong ol samting i bin kamap bipo, planti taim ol i no raitim stori bilong lain bilong ol yet i lus long pait. Tasol ol man i raitim Baibel ol i no giaman, ol i kamapim tu pasin kranki bilong ol yet na bilong lain bilong ol. Olsem: Long Buk Namba, man bilong raitim dispela buk, Moses, em i kamapim bikpela rong em yet i bin mekim na em i bin kisim strafe long en. (Namba 20:2-12) Kain pasin olsem bilong tokaut stret long ol samting i no stap tumas long ol buk i stori long taim bipo, tasol Baibel i kamapim ol dispela samting, long wanem, em buk i kam long God.

BUK I KAMAPIM SAVEPASIN

10 Spirit bilong God i bin kamapim ol tok bilong Baibel, olsem na em i “gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi.” (2 Timoti 3:16) Yes, Baibel inap helpim yumi. Em i kamapim ol tok i makim stret pasin bilong yumi ol man. Yumi no kirap nogut long dispela, long wanem, Man i kamapim ol tok bilong en, God Jehova, em i Man Bilong Wokim yumi! Em i save gut long tingting bilong yumi na ol samting yumi pilim long bel, winim yumi yet. Na tu, Jehova i save long ol samting yumi mas i gat na bai yumi ken i stap amamas. Em i save tu long ol rot yumi mas abrusim.

11 Tingim Bikpela Tok Long Maunten em Jisas i bin mekim, em i stap long Matyu sapta 5 i go long 7. Long dispela tok bilong skulim gut ol man, Jisas i toktok long kain kain samting, olsem rot bilong painim amamas tru, rot bilong stretim ol tok pait, rot bilong beten, na rot bilong kisim stretpela tingting long ol samting bilong skin. Dispela tok bilong Jisas i gat bikpela strong na i helpim yumi long nau tu, wankain olsem i bin helpim ol man long taim em i mekim dispela tok.

12 Sampela stiatok bilong Baibel i bilong helpim famili, pasin bilong mekim wok, na pasin bilong stap gut wantaim ol arapela. Ol stiatok bilong Baibel i stret long olgeta manmeri, na ol tok bilong en i helpim yumi long olgeta taim. Ol tok bilong God em profet Aisaia i raitim i soim olsem tok bilong Baibel i gat savetingting: “Mi God, Bikpela bilong yupela. Oltaim mi save skulim yupela.”—Aisaia 48:17.

BUK I KAMAPIM OL TOK PROFET

13 Baibel i kamapim planti tok profet, na truim bilong planti bilong ol i kamap pinis. Tingim wanpela. Long rot bilong profet Aisaia husat i bin stap 750 yia samting paslain long Krais, Jehova i tok profet olsem taun Babilon bai bagarap. (Aisaia 13:19; 14:22, 23) Baibel i kolim stret olsem wanem dispela samting bai kamap. Ol lain ami i kam pait ol bai mekim wara bilong Babilon i drai na ol bai i no gat wok long pait taim ol i mats i go insait long taun. Tasol i no dispela samting tasol. Tok profet bilong Aisaia i kolim tu nem bilong king husat bai daunim Babilon—em Sairus.—Aisaia 44:27-45:2.

Man bilong raitim Baibel, Aisaia, em i tok profet long Babilon bai bagarap

Man i stadi bilong kisim save long bagarap bilong Babilon

14 Inap 200 yia bihain—long nait bilong Oktoba 5/6, 539 B.C.E.—wanpela ami i wokim kem klostu long Babilon. Husat em i komanda bilong en? Em King Sairus bilong Persia. Rot i op long wanpela narakain tok profet i ken kamap tru. Tasol olsem wanem? Ami bilong Sairus bai daunim Babilon na ol i no pait, olsem tok profet i makim?

15 Ol Babilon i mekim bikpela pati long dispela nait na ol i ting strongpela banis bilong taun i mekim na hevi i no inap painim ol. Sairus i mekim na wara i save ron namel long taun i senis na ron i go long narapela hap. I no longtaim na wara i go daun na ol soldia inap brukim wara na kamap long banis bilong taun. Tasol olsem wanem ami bilong Sairus inap go insait long banis bilong Babilon? Wanpela samting i mekim na long dispela nait ol dua bilong banis i op i stap!

16 Baibel i tok profet long Babilon, olsem: “I no gat wanpela man bai i stap long dispela ples gen. Na tu, ol Arap bai i no inap i kam sanapim haus sel bilong ol long dispela hap. Na ol wasman bilong sipsip bai i no inap bringim ol sipsip bilong ol i kam kaikai gras long dispela hap.” (Aisaia 13:20) Dispela tok profet i tok olsem dispela taun bai bagarap. Na tu, em i soim olsem Babilon bai stap nating inap oltaim oltaim. Yu inap lukim ol samting i soim olsem dispela tok i kamap tru. Ples we taun Babilon i bin stap long en bipo em i longwe long Baghdad, Irak, inap 80 kilomita long hap saut, na i no gat wanpela man i stap long en. Dispela i truim tok Jehova i bin mekim long rot bilong Aisaia: “Bai mi brumim Babilon long brum bilong mi, em brum bilong bagarapim olgeta samting.”—Aisaia 14:22, 23.%

Ol pipia ston bilong Babilon

Ol pipia ston bilong Babilon

17 Taim yumi tingim olsem Baibel em i wanpela buk i tokaut stret long ol samting bai kamap bihain, dispela i strongim bilip bilong yumi, a? Sapos Jehova i bin truim ol tok promis bilong em long bipo, i gat as tru na yumi ken bilip olsem em bai truim tok promis bilong em long kamapim Paradais hia long graun. (Namba 23:19) Tru tumas, yumi “bilip strong na wetim God i givim laip bilong i stap oltaim long [yumi]…em i tok pinis long em bai i givim dispela laip long yumi. Na em i no save giaman.”—Taitus 1:2.^

“TOK BILONG GOD EM I GAT LAIP”

18 Ol tok yumi bin skelim long dispela sapta i kamapim klia olsem Baibel i wanpela buk i narakain tru. Olgeta tok bilong en i stret wantaim, i stret wantaim saiens na ol samting i bin kamap long bipo, i kamapim savepasin, na i tokaut stret long ol samting bai kamap bihain, tasol Baibel i gat planti gutpela samting moa long en. Kristen aposel Pol i tok: “Tok bilong God em i gat laip, na em i wok strong i stap. Em i sap moa, na i winim bainat i gat tupela sap. Dispela tok i save sutim man na i go insait tru. Em i go kamap stret long dispela hap tewel na spirit i bruk, na long ol dispela hap skru na kru bilong bun i pas wantaim. Olsem na em i save gut tru long olgeta tingting na laik bilong bel bilong yumi.”—Hibru 4:12.

19 Pasin bilong ritim “tok” bilong God long Baibel inap senisim laip bilong yumi. Em i ken helpim yumi long skelim gut yumi yet. Yumi inap tok olsem yumi laikim tru God, tasol ol samting yumi save mekim taim yumi kisim save long Tok bilong em long Baibel, dispela i kamapim klia tingting tru bilong yumi, ol tingting i stap long bel bilong yumi tu.

20 Tru tru Baibel em i buk i kam long God. Em i wanpela buk yumi mas ritim, stadi long en, na laikim tru. Wok yet long skelim ol tok bilong en, long dispela rot yu soim olsem yu amamas tru long dispela presen i kam long God. Taim yu mekim olsem, bai yu kliagut long ol samting God i tingting pinis long mekim bilong helpim ol manmeri. Sapta i kamap bihain long dispela bai skelim dispela samting na olsem wanem em bai kamap tru.

OL TOK BAIBEL I LAINIM YUMI LONG EN

  • Spirit bilong God i bin kamapim ol tok bilong Baibel, olsem na tok bilong en i stret na i tru.—2 Timoti 3:16.
  • Ol tok i stap long Baibel i helpim wokabaut bilong yumi long olgeta de.—Aisaia 48:17.
  • Ol tok promis bilong God long Baibel bai kamap tru.—Namba 23:19.

*  Maski sampela man i tok sampela ves bilong Baibel i pait wantaim, ol dispela tok i no gat as bilong en. Lukim sapta 7 bilong buk The Bible—God’s Word or Man’s? em ol Witnes Bilong Jehova i wokim, na Wastaua, Julai 15, 1992, pes 3-7.

#  Lukim lain tumbuna bilong Jisas em Luk 3:23-38 i kamapim.

%  Bilong kisim sampela save moa long ol tok profet bilong Baibel, lukim pes 27-9 long buklet A Book for All People, na Wastaua, Epril 1, 1998, pes 19-20, em ol Witnes Bilong Jehova i wokim.

^  Bagarap i painim Babilon em wanpela tasol bilong ol tok profet bilong Baibel i bin kamap tru. Sampela narapela tok profet olsem, em bagarap i painim Tair na Ninive. (Esekiel 26:1-5; Sefanaia 2:13-15) Na tu, tok profet bilong Daniel i tokaut long ol bikpela gavman bilong graun i kamap bihain long Babilon, olsem Midia na Persia na Grik. (Daniel 8:5-7, 20-22) Lukim Apendiks bilong skelim ol tok profet long Mesaia em Jisas Krais i bin truim.


Ol Askim Bilong Stadi

1, 2. Olsem wanem Baibel i wanpela gutpela presen i kam long God?

3. Jehova i givim Baibel long yumi na dispela i kamapim klia wanem samting bilong em? Bilong wanem dispela i mekim bel bilong yumi i amamas?

4. Yu kirap nogut long wanem samting bilong wok bilong tilim Baibel?

5. Long wanem rot “God yet i bin kamapim” ol tok bilong Baibel?

6, 7. Ol tok bilong Baibel i stret wantaim, bilong wanem dispela em i narakain samting tru?

8. Stori long ol samting i soim olsem Baibel i stret wantaim saiens.

9. (a) Long wanem rot Baibel yet i kamapim olsem tok bilong en i tru na i stret wantaim ol samting i bin kamap long bipo? (b) Ol man bilong raitim Baibel i no giaman na dispela i soim Baibel i wanem kain buk?

10. Bilong wanem yumi no kirap nogut long Baibel inap helpim yumi?

11, 12. (a) Jisas i toktok long wanem ol samting long Bikpela Tok Long Maunten? (b) Baibel i kamapim wanem ol narapela tok? Bilong wanem tok bilong en i wok gut long olgeta taim?

13. Spirit bilong Jehova i kirapim profet Aisaia long raitim wanem stori bilong Babilon?

14, 15. Olsem wanem tok profet bilong Aisaia long Babilon i kamap tru?

16. (a) Aisaia i tok profet long wanem samting bai painim Babilon? (b) Tok profet bilong Aisaia long ol samting bai painim Babilon i kamap tru olsem wanem?

17. Olsem wanem truim bilong ol tok profet bilong Baibel i strongim bilip bilong yumi?

18. Kristen aposel Pol i mekim wanem bikpela tok taim em i stori long “tok bilong God”?

19, 20. (a) Olsem wanem Baibel inap helpim yu long skelim yu yet? (b) Yu ken mekim wanem bilong soim olsem yu amamas tru long presen bilong God, em Baibel?