Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Tru Tru Baibel i Tok Wanem?

APENDIKS

1914—Bikpela Yia Baibel i Tok Profet Long En

1914—Bikpela Yia Baibel i Tok Profet Long En

PLANTI yia paslain long 1914, ol Sumatin Bilong Baibel i tokaut olsem ol bikpela samting bai kamap long dispela yia. Wanem ol bikpela samting i kamap, na wanem samting i kamapim klia olsem 1914 i wanpela bikpela yia?

Long Luk 21:24 Jisas i tok: “Lek bilong ol man bilong ol arapela lain bai i krungutim Jerusalem, inap long taim God i bin makim bilong ol arapela lain man i bosim Jerusalem, em i pinis.” Jerusalem i bin stap olsem biktaun bilong lain Juda—em ples ol king bilong lain bilong King Devit i mekim wok king bilong ol. (Song 48:1, 2) Tasol ol dispela king i narapela kain long ol lida bilong ol arapela lain. Ol i sindaun long sia king bilong Jehova, ol i olsem mausman bilong em. (1 Stori 29:23) Olsem na Jerusalem i makim wok king bilong Jehova.

Tasol olsem wanem na long wanem taim ‘ol arapela lain i kirap krungutim’ wok king bilong God? Dispela i kamap long 607 B.C.E., taim ol Babilon i daunim Jerusalem. I no gat moa man i sindaun long sia king bilong Jehova, na ol i katim wok king bilong lain king bilong Devit. (2 King 25:1-26) Olsem wanem? Dispela wok bilong “krungutim” wok king bilong Jehova bai stap inap oltaim oltaim? Nogat. Tok profet bilong Esekiel long laspela king bilong Jerusalem, Sedekaia, i tok: “Rausim laplap long het, na lusim hat bilong king.…No gat wanpela man i ken kisim dispela samting inap long taim dispela man husat i gat rait long kisim em i kam, na bai mi givim long em.” (Esekiel 21:26, 27, NW ) Dispela man “husat i gat rait long kisim” wok king bilong Devit, em Krais Jisas. (Luk 1:32, 33) Olsem na wok bilong “krungutim” wok king bilong Jehova bai pinis taim Jisas i kamap King.

Dispela bikpela samting bai kamap long wanem taim? Jisas i soim olsem i gat kirap na pinis bilong dispela haptaim ol arapela lain bai bosim ol samting. Stori i stap long Daniel sapta 4 i helpim yumi long save long longpela bilong dispela haptaim. Dispela sapta i stori long driman bilong King Nebukatnesar bilong Babilon. Em i lukim wanpela traipela diwai ol i bin katim na daunim. As bilong diwai i no inap kru, long wanem, ol i bin pasim ol bikpela ring ain na bras long en. Wanpela ensel i tokaut olsem em bai stap olsem “inap long 7-pela yia.”—Daniel 4:10-16.

Long Baibel, sampela taim ol diwai i makim wok king. (Esekiel 17:22-24; 31:2-5) Olsem na taim ol i katim na daunim dispela diwai long driman, dispela i makim olsem wok king bilong God—em ol king long Jerusalem i mekim—i pinis inap sampela haptaim. Driman i kamapim klia olsem wok bilong “krungutim” Jerusalem i bilong sampela haptaim tasol—inap “7-pela yia.” Tasol dispela i no makim ol yia tru tru, em wanpela tok profet. Orait ol dispela yia i longpela olsem wanem?

Kamapim Tok Hait 12:6, 14 i soim olsem 3 na hap yia i makim “1,260 de.” Olsem na “7-pela yia” i dabol long dispela, olsem 2,520 de. Tasol ol arapela lain i no pinis long “krungutim” wok king bilong God inap 2,520 de bihain long Jerusalem i bagarap. Olsem na dispela tok profet i makim longpela haptaim moa. Namba 14:34 na Esekiel 4:6 i tok long “wanpela wanpela yia bilong inapim olgeta wan wan de,” olsem na “7-pela yia” i makim 2,520 yia.

Dispela 2,520 yia i kirap long Oktoba 607 B.C.E., taim ol Babilon i daunim Jerusalem na ol i rausim king bilong lain bilong Devit long sia king bilong em. Dispela haptaim i pinis long Oktoba 1914. Long dispela yia, ‘taim bilong ol arapela lain’ i pinis, na King God i makim i kamap long heven, em Jisas Krais.*—Song 2:1-6; Daniel 7:13, 14.

Olsem Jisas i bin tok profet long en, taim em i kam i stap olsem King long heven, ol bikpela samting i bin kamap long graun—pait, bikpela hangre, graun i guria, ol bikpela sik. (Matyu 24:3-8; Luk 21:11) Ol dispela samting i kamapim klia tru olsem long 1914 Kingdom Bilong God long heven i kamap na “taim bilong las de” bilong pasin nogut bilong dispela graun i kirap.—2 Timoti 3:1-5.


*  Kirap long Oktoba 607 B.C.E. i go inap long Oktoba 1 B.C.E. em 606 yia. I no gat yia siro, olsem na kirap long Oktoba 1 B.C.E. i go inap long Oktoba 1914 C.E. em 1,914 yia. Taim yumi bungim 606 yia wantaim 1,914 yia, em 2,520 yia. Bilong kisim save long bagarap bilong Jerusalem long 607 B.C.E., lukim tok “Chronology” long buk Insight on the Scriptures, na bsi04 Stadi Namba 3, pes 3, em ol buk ol Witnes Bilong Jehova i wokim.

“7-PELA YIA”
2,520 yia
606 1/4 yia
Oktoba 607 B.C.E. i go inap
Disemba 31, 1 B.C.E.
1,913 3/4 yia
Janueri 1, 1 C.E. i go inap
Oktoba 1914
607

“Ol man bilong ol arapela lain bai i krungutim Jerusalem”

Jerusalem i bagarap
←B.C.E. C.E.→ 1914

“Dispela man husat i gat rait long kisim em i kam”

Jisas Krais i King

← Go bek long sapta