Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 113: Pol i Stap Long Rom

Stori 113: Pol i Stap Long Rom

LUKIM sen i pasim han bilong Pol, na lukim wanpela soldia bilong Rom i was long em. Pol i stap kalabus long Rom. Em i wetim kot bilong Sisar. Em i stap kalabus, tasol ol man inap i go lukim em.

Pol i go kamap long Rom na 3-pela de bihain em i singautim ol hetman bilong lain Juda i kam lukim em. Planti Juda long Rom ol i go lukim Pol. Pol i autim tok long Jisas na Kingdom Bilong God. Sampela i bilip na ol i kamap Kristen, tasol sampela i no bilip.

Pol i stap long kalabus

Na tu, Pol i autim tok long ol narapela narapela soldia i was long em. Inap 2-pela yia em i stap kalabus na em i wok strong long autim tok long olgeta man. Olsem na ol man i wok long haus bilong Sisar ol tu i harim gutnius bilong Kingdom, na sampela i kamap Kristen.

Tasol husat i dispela man i sindaun long tebol na raitim ol tok? Yu inap traim kolim nem bilong em? Yes, em Timoti. Timoti tu i bin stap kalabus, long wanem, em i autim tok bilong Kingdom, tasol nau em i lusim kalabus. Em i kam bilong helpim Pol. Yu save Timoti i raitim wanem ol tok? Orait nau yumi ken stori long dispela.

Yu tingim yet taun Filipai na Efesus, em Stori 110 i bin toktok long en? Pol i bin helpim ol Kristen long kirapim ol kongrigesen long dispela tupela taun. Nau Pol i stap long kalabus, na em i raitim ol pas i go long ol dispela Kristen. Ol dispela pas i stap long Baibel, nem bilong ol em Buk Efesus na Buk Filipai. Orait nau Pol i tokim Timoti long ol tok em i mas raitim long ol pren Kristen bilong ol long Filipai.

Ol Kristen long Filipai i bin mekim gut tru long Pol. Ol i salim wanpela presen long em long kalabus, olsem na Pol i laik tenkyu long ol. Epafroditus i bin kisim dispela presen i kam. Tasol em i bin sik nogut tru na klostu em i dai. Nau em i orait pinis na em i redi long i go bek long ples. Em bai kisim dispela pas bilong Pol na Timoti i go bek wantaim em long Filipai.

Taim Pol i stap long kalabus, em i raitim 2-pela pas moa i stap long Baibel. Wanpela em bilong ol Kristen long taun Kolosi. Yu save long nem bilong dispela pas? Em Buk Kolosi. Na narapela pas em bilong wanpela gutpela pren bilong Pol long Kolosi, em Filemon. Dispela pas i tokim Filemon long wokboi bilong em, Onesimus.

Onesimus i bin ranawe long Filemon na em i go long Rom. Em i harim olsem Pol i stap long kalabus. Onesimus i go lukim Pol, na Pol i autim tok long em. I no longtaim na Onesimus i kamap Kristen. Nau Onesimus i sori long em i bin ranawe. Olsem na yu save Pol i raitim wanem tok long pas bilong Filemon?

Pol i tokim Filemon long lusim rong bilong Onesimus. Em i tok: ‘Mi salim em i kam bek long yu. Tasol nau em i no olsem wokboi tasol bilong yu, nogat. Em i gutpela brata Kristen bilong yu.’ Taim Onesimus i go bek long Kolosi em i kisim dispela tupela pas i go wantaim em, wanpela pas bilong ol Kolosi na wanpela pas bilong Filemon. Yumi ken tingim bikpela amamas bilong Filemon taim em i save olsem wokboi bilong em i kamap Kristen.

Taim Pol i raitim pas i go long ol Filipai na long Filemon, em i tokim ol long sampela gutpela tok. Em i tokim ol Filipai: ‘Mi salim Timoti i kam long yupela. Tasol bihain liklik bai mi tu i kam lukim yupela.’ Na em i tokim Filemon: ‘Redim wanpela rum bilong mi.’

Taim Pol i lusim kalabus em i go lukim ol brata na sista Kristen bilong em long planti ples. Tasol bihain ol i kalabusim em gen long Rom. Nau em i save olsem ol bai kilim em i dai. Olsem na em i raitim pas long Timoti na tokim em long kam hariap. Pol i tok: ‘Mi bin i stap gut long God na em bai givim prais long mi.’ Ol i kilim i dai Pol na sampela yia bihain, ol Rom i bagarapim Jerusalem.

Tasol i gat sampela pas moa i stap long Baibel. God Jehova i kirapim aposel Jon long raitim ol laspela buk bilong Baibel, na em i raitim tu Buk Kamapim Tok Hait. Kamapim Tok Hait i stori long ol samting bai kamap bihain. Orait yumi ken stori nau long ol dispela samting.

Aposel 28:16-31; Filipai 1:13; 2:19-30; 4:18-23; Hibru 13:23; Filemon 1-25; Kolosi 4:7-9; 2 Timoti 4:7-9.



Ol askim

  • Pol i autim tok long husat taim em i stap kalabus long Rom?
  • Long piksa, dispela man i kam lukim Pol na i sindaun long tebol em i husat? Em i mekim wanem bilong helpim Pol?
  • Epafroditus em i husat? Em i kisim wanem samting i go wantaim em taim em i go bek long Filipai?
  • Bilong wanem Pol i raitim pas i go long gutpela pren bilong em, Filemon?
  • Pol i mekim wanem taim em i lusim kalabus? Bihain ol i mekim wanem long em?
  • Jehova i mekim wok long husat bilong raitim ol laspela buk bilong Baibel? Buk Kamapim Tok Hait i stori long wanem ol samting?

Sampela askim moa

  • Ritim Aposel 28:16-31 na Filipai 1:13.

    Pol i mekim wanem long dispela haptaim em i stap long kalabus long Rom? Strongpela bilip bilong em i mekim wanem long kongrigesen Kristen? (Ap. 28:23, 30; Fl. 1:14)

  • Ritim Filipai 2:19-30.

    Pol i mekim wanem ol tok bilong kamapim tenkyu bilong em long Timoti na Epafroditus? Olsem wanem yumi inap bihainim pasin bilong Pol long dispela samting? (Fl. 2:20, 22, 25, 29, 30; 1 Ko. 16:18; 1 Te. 5:12, 13)

  • Ritim Filemon 1-25.

    Pol i laik bai wanem samting i mas kirapim Filemon long mekim pasin i stret? Olsem wanem dispela inap stiaim ol elda long nau? (Fm. 9; 2 Ko. 8:8; Ga. 5:13)

    Olsem wanem tok bilong Pol long Filemon 13, 14 i soim olsem em i rispektim tingting bilong ol arapela insait long kongrigesen? (1 Ko. 8:7, 13; 10:31-33)

  • Ritim 2 Timoti 4:7-9.

    Olsem aposel Pol, olsem wanem yumi inap bilip tru olsem Jehova bai givim prais long yumi sapos yumi stap gut long em i go inap long pinis? (Mt. 24:13; Hi. 6:10)