Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 112: Sip i Bagarap Long Ailan

Stori 112: Sip i Bagarap Long Ailan

LUKIM! Sip i bagarap! Em i wok long bruk i go! Yu lukim ol man i lusim pinis sip na kalap i go daun long wara? Sampela ol i kamap pinis long nambis. Dispela man i kam antap long nambis em Pol, a? Orait yumi ken stori long ol samting i painim em.

Ol lain i abrusim bagarap

Tingim, inap tupela yia Pol i bin stap kalabus long Sisaria. Bihain ol i putim em long wanpela sip wantaim sampela kalabusman moa na salim ol i go long Rom. Taim ol i bihainim nambis bilong Krit i go, strongpela win i kirap. Win i strong tumas na ol boskru i no inap stiaim sip. Planti de ol i no lukim san o sta. Ol i kisim tingting olsem ol i no inap kamap gut long wanpela hap; ol i ting olgeta bai lus.

Orait nau Pol i sanap namel long ol na i tok: ‘I no gat wanpela bilong yupela bai i lus; sip tasol bai lus. Long nait wanpela ensel bilong God i kam na tokim mi olsem, “Pol, yu no ken pret! Yu mas i go sanap long pes bilong Sisar long Rom. Na God bai helpim olgeta man i stap wantaim yu.”’

Long namba 14 nait ol boskru i lukim olsem solwara i no daun tumas! Olsem na ol i tromoi anka, long wanem, ol i pret, nogut sip i pas long rip. Long moningtaim, ol i lukim wanpela pasis. Ol i laik stiaim sip i go long nambis.

Taim ol i wok long i go klostu long nambis, sip i go antap long wanpela rip na i pas long en. Nau si i wok long paitim sip na brukim. Kepten bilong ol soldia i tok: ‘Yupela olgeta husat i save long swim, yupela i ken kalap long solwara na swim i go long nambis. Na yupela ol arapela i mas holim ol hap bilong sip i bruk na trip i go long nambis.’ Ol i mekim olsem kepten i tok. Olsem na olgeta 276 man i stap long sip ol i kamap gut long nambis, olsem ensel i bin tok promis.

Dispela ailan ol i kamap long en, em Malta. Ol asples i mekim gutpela pasin tru, na ol i lukautim ol man i kam long bot. Bihain Pol i kalap long narapela sip na ol i kisim em i go long Rom.

Aposel 27:1-44; 28:1-14.



Ol askim

  • Taim dispela sip em Pol i stap long en i bihainim nambis bilong Krit i go, wanem samting i kamap long en?
  • Pol i tok wanem long ol man i stap long sip?
  • Olsem wanem sip i bruk?
  • Kepten bilong ol soldia i tokim ol man long mekim wanem? Hamas man i kamap gut long nambis?
  • Wanem nem bilong dispela ailan ol i kamap long en? Pol i mekim wanem taim strongpela win i pinis?

Sampela askim moa

  • Ritim Aposel 27:1-44.

    Taim yumi ritim stori bilong raun bilong Pol i go long Rom, olsem wanem dispela i strongim bilip bilong yumi olsem ol tok bilong Baibel i stret tru? (Ap. 27:16-19, 27-32; Lu. 1:3; 2 Ti. 3:16, 17)

  • Ritim Aposel 28:1-14.

    Ol manmeri bilong Malta em ol i haiden ol i bin mekim “gutpela pasin tru” long Pol na ol arapela i go wantaim em long sip, dispela i mas kirapim ol Kristen long mekim wanem kain pasin? Ol i ken mekim olsem long wanem rot? (Ap. 28:1, 2; Hi. 13:1, 2; 1 Pi. 4:9)