Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 106: Ol i Lusim Kalabus

Stori 106: Ol i Lusim Kalabus

LUKIM dispela ensel i opim dua bilong haus kalabus. Ol dispela man i lusim kalabus em ol aposel bilong Jisas. Orait, yumi ken stori long wanem samting i kamap na ol i stap long kalabus.

Ensel i helpim ol aposel long lusim kalabus

Ol i kisim pinis holi spirit na liklik taim bihain dispela samting i kamap. Wanpela taim long apinun Pita na Jon i go long haus lotu long Jerusalem. Wanpela man lek nogut i sindaun klostu long dua. Long olgeta de ol man i save bringim em i kam hia na bai em i singaut long mani long ol manmeri i go insait long haus lotu. Taim em i lukim Pita na Jon, em i tokim tupela long givim samting long em. Tupela bai mekim wanem?

Tupela i sanap na lukluk long em. Pita i tok: ‘Mi no gat mani, tasol samting mi gat em mi laik givim long yu. Long nem bilong Jisas, yu kirap na wokabaut!’ Pita i holim han sut bilong dispela man, na wantu em i kalap na kirap wokabaut. Taim ol manmeri i lukim dispela samting, ol i kirap nogut na amamas tru long dispela gutpela mirakel.

Pita i tok: ‘Mipela i mekim dispela mirakel long strong bilong God, em Man i bin kirapim bek Jisas.’ Pita na Jon i toktok i stap na sampela bikman bilong lotu ol i kam. Ol i kros, long wanem, Pita na Jon i tokim ol manmeri olsem Jisas i kirap bek. Olsem na ol i holim tupela na putim ol long kalabus.

Long de antap ol bikman bilong lotu ol i mekim wanpela bikpela bung. Ol i sanapim Pita na Jon na dispela man ol i bin oraitim. Ol bikman bilong lotu i tok: ‘Yupela i kisim wanem kain strong na yupela i mekim dispela mirakel?’

Pita i tokim ol olsem tupela i bin mekim dispela mirakel long strong bilong God, em Man i bin kirapim bek Jisas long indai. Ol pris i no save bai ol i mekim wanem, long wanem, olgeta man i save pinis long dispela mirakel na ol i no inap haitim. Olsem na ol i tok strong long ol aposel olsem ol i no ken autim tok moa long Jisas, na ol i larim ol i go.

Tasol ol aposel i wok strong long autim tok long Jisas na ol i oraitim ol sikman. Tok bilong ol dispela mirakel i go nabaut long planti hap. Olsem na ol manmeri i stap long ol ples klostu long Jerusalem, ol i bringim ol sikman i kam bilong ol aposel bai oraitim ol. Dispela i mekim na ol bikman bilong lotu ol i jeles, olsem na ol i holim ol aposel na putim ol long kalabus. Tasol ol aposel i no stap longpela taim long kalabus.

Long nait ensel bilong God i opim dua bilong haus kalabus, olsem yu lukim long piksa. Ensel i tok: ‘Yupela go sanap insait long haus lotu na autim tok long ol man.’ Long neks de long moningtaim, ol bikman bilong lotu i salim ol man i go bilong kisim ol aposel long haus kalabus, tasol ol i no i stap. Bihain ol i lukim ol aposel i skulim ol man long haus lotu, na ol i bringim ol i go long haus kaunsil.

Ol bikman bilong lotu i tok: ‘Mipela i bin tambuim yupela long autim tok long Jisas. Tasol ol manmeri long olgeta hap bilong Jerusalem i harim pinis tok bilong yupela.’ Ol aposel i tok: ‘Mipela i mas bihainim tok bilong God tasol, mipela i no ken bihainim tok bilong ol man.’ Olsem na ol i no lusim wok bilong skulim ol man long tok bilong “gutnius.” Em gutpela pasin yumi ken bihainim, a?

Aposel sapta 3 i go 5.



Ol askim

  • Wanpela taim long apinun Pita na Jon i go long haus lotu na wanem samting i kamap?
  • Pita i tok wanem long wanpela man lek nogut? Pita i givim wanem samting long dispela man, em samting i winim tru mani?
  • Bilong wanem ol bikman bilong lotu ol i kros? Ol i mekim wanem long Pita na Jon?
  • Pita i tok wanem long ol dispela bikman bilong lotu? Ol i tok strong long ol aposel i no ken mekim wanem?
  • Bilong wanem ol bikman bilong lotu ol i jeles? Wanem samting i kamap taim ol i putim ol aposel long kalabus long namba tu taim?
  • Ol aposel i tok wanem taim ol i bringim ol i go insait long haus kaunsil?

Sampela askim moa

  • Ritim Aposel 3:1-10.

    Yumi no gat strong bilong wokim ol mirakel long nau, tasol olsem wanem tok bilong Pita long Aposel 3:6 i helpim yumi long pilim tru olsem tok bilong Kingdom inap helpim ol man? (Jo. 17:3; 2 Ko. 5:18-20; Fl. 3:8)

  • Ritim Aposel 4:1-31.

    Taim ol man i birua long yumi long wok autim tok, olsem wanem yumi mas bihainim pasin bilong ol brata Kristen bilong yumi long taim bilong ol aposel? (Ap. 4:29, 31; Ef. 6:18-20; 1 Te. 2:2)

  • Ritim Aposel 5:17-42.

    Long bipo na long nau, olsem wanem sampela man i no Witnes ol i kamapim olsem ol i gat stretpela tingting long wok autim tok? (Ap. 5:34-39)