Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 103: Go Insait Long Rum i Lok Pinis

Stori 103: Go Insait Long Rum i Lok Pinis

TAIM Pita na Jon i lusim matmat na i go pinis, Maria wanpela i stap. Em i krai. Orait nau em i lukluk i go insait long matmat, olsem yumi lukim long piksa paslain long dispela. Em i lukim tupela ensel! Ol i tok: ‘Bilong wanem yu krai?’

Maria i tok: ‘Ol i rausim Bikpela bilong mi, na mi no save ol i putim em we.’ Em i tok olsem na i tanim na i lukim wanpela man. Dispela man i tok: ‘Yu painim husat?’

Maria i ting em i man bilong bosim gaden, na em i ting dispela man i bin kisim bodi bilong Jisas i go. Olsem na em i tok: ‘Sapos yu bin kisim em i go, yu mas tokim mi long ples yu putim em long en.’ Tasol dispela man em Jisas. Em i tanim i kamap narapela kain na Maria i no luksave long em. Tasol taim Jisas i kolim nem bilong Maria, nau Maria i save olsem dispela man em Jisas. Em i ran i go tokim ol disaipel: ‘Mi lukim pinis Bikpela!’

Bihain liklik, tupela disaipel i wokabaut i go long Emeus na wanpela man i wokabaut wantaim ol. Tupela i bel hevi tru, long wanem, ol i bin kilim i dai Jisas. Tasol taim ol i wokabaut i go, dispela man i stori gut long planti tok bilong Baibel na dispela i mekim gut bel bilong ol. Bihain, taim ol i laik kisim kaikai, nau tupela i luksave olsem dispela man em Jisas. Orait nau Jisas i lusim ol, na kwiktaim dispela tupela disaipel i go bek long Jerusalem bilong tokim ol aposel long ol samting i kamap.

Long dispela de yet, Pita tu i lukim Jisas. Ol arapela i amamas taim ol i harim tok long dispela samting. Orait nau dispela tupela disaipel i kamap long Jerusalem na ol i go painim ol aposel. Ol i stori long olsem wanem Jisas i bin kamap long ol long rot. Na taim ol i wok long toktok yet i stap, wanpela narapela kain gutpela samting i kamap. Yu save em wanem samting?

Lukim piksa hia. Jisas i kamap namel long ol disaipel, maski ol i bin lokim dua bilong dispela rum! Ol disaipel i amamas tru! Planti gutpela samting i bin kamap long dispela de, a? Yu inap kaunim hamas taim olgeta Jisas i bin kamap long ol disaipel bilong em? Em i bin kamap long ol inap 5-pela taim, a?

Jisas i kamap long ol disaipel bilong em

Aposel Tomas i no bin i stap taim Jisas i kamap long ol disaipel. Olsem na ol i tokim Tomas: ‘Mipela i lukim pinis Bikpela!’ Tasol Tomas i tok em yet i mas lukim Jisas na bai em i bilip. Orait, inap 8-pela de bihain ol disaipel i bung i stap long wanpela rum i lok pinis na Tomas tu i stap wantaim ol. Wantu Jisas i kamap namel long ol. Nau Tomas i bilip.

Jon 20:11-29; Luk 24:13-43.



Ol askim

  • Maria i tok wanem long wanpela man em i ting em i man bilong bosim gaden? Wanem samting i kamap na em i luksave olsem dispela man em Jisas?
  • Wanem samting i kamap long tupela disaipel em ol i wokabaut i go long Emeus?
  • Wanem narapela kain gutpela samting i kamap taim tupela disaipel i tokim ol aposel long ol i bin lukim Jisas?
  • Hamas taim Jisas i kamap long ol disaipel bilong em?
  • Tomas i tok wanem taim em i harim olsem ol disaipel i bin lukim Jisas? Tasol 8-pela de bihain wanem samting i kamap?

Sampela askim moa

  • Ritim Jon 20:11-29.

    Yu ting tok bilong Jisas long Jon 20:23 i makim olsem ol man i gat namba long lusim sin? Stori long dispela. (Sng. 49:2, 7; Ais. 55:7; 1 Ti. 2:5, 6; 1 Jo. 2:1, 2)

  • Ritim Luk 24:13-43.

    Olsem wanem yumi inap redim bel bilong yumi long kisim ol tok i tru bilong Baibel? (Lu. 24:32, 33; Esr. 7:10, NW; Mt. 5:3; Ap. 16:14; Hi. 5:11-14)